23.

Te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai

23.0

’Ōmuara’a

Te anira’a i te mau ta’ata ato’a ’ia fāri’i i te ’evanelia, e tuha’a ïa nō te ’ohipa nō te fa’aorara’a ’e te fa’ateiteira’a (hi’o 1.2 i roto i teie buka arata’i ; Mataio 28:19–20). ’Oia ho’i :

• Te ’āmuira’a mai i roto i te ’ohipa misiōnare ’e te tāvinira’a ’ei misiōnare.

• Te tauturura’a i te mau melo ’āpī ’e te mau melo e ho’i mai nei i te ’Ēkālesia ’ia haere i mua i ni’a i te ’ē’a nō te fafaura’a.

23.1

Te fa’a’itera’a i te ’evanelia

23.1.1

Here

E mau tamari’i pā’āto’a tātou nā te hō’ē Metua i te ao ra tei here maita’i roa i tāna mau tamari’i. Tē pūpū nei ’oia i te mau ta’ata ato’a i te rāve’a ’ia ’ī rātou i tōna here nā roto ia Iesu Mesia ’e tāna ’evanelia (hi’o Ioane 3:16 ; 2 Nephi 26:24–28 ; Alama 26:37 ; Te mau Hīro’a Fa’aro’o 1:3).

Hō’ē rāve’a tā tātou e fa’a’ite i tō tātou here i te Atua, nā roto ïa i te herera’a ’e te tāvinira’a i tāna mau tamari’i (hi’o Mataio 22:36–39 ; 25:40). E tūtava tātou i te here ’e i te tāvini mai tā Iesu Mesia i rave. Nā teie here e fa’auru ia tātou ’ia toro i te rima i te mau ta’ata nō te mau fa’aro’o ato’a, te mau nūna’a ta’ata ’e te mau ta’ere (hi’o Te ’Ohipa 10:34 ; 2 Nephi 26:33).

23.1.2

Fa’a’ite

Nō tō tātou here i te Atua ’e i tāna mau tamari’i, e hina’aro iho ā tātou e fa’a’ite i te mau ha’amaita’ira’a tāna i hōro’a mai ia tātou (hi’o Ioane 13:34–35) ’e e tauturu i te ha’aputuputura’a ia ’Īserā’ela. Tē ’imi nei tātou i te tauturu i te ta’ata ’ia putapū i te ’oa’oa tā tātou e putapū nei (hi’o Alama 36:24). ’Ei pipi nā Iesu Mesia, e fa’ateitei tātou i tōna māramarama (hi’o 3 Nephi 18:24–25). Tē parau nei tātou i mua i te ta’ata nō ni’a i te Fa’aora ’e tōna mana i roto i tō tātou orara’a (hi’o Te Ha’api’ira’a Tumu ’e te mau Fafaura’a 60:2). Tē fa’a’ite nei tātou i te here, te taime, te mau ’itera’a, ’e te mau fa’anahora’a a te ’Ēkālesia nō te ha’amaita’i i te mau tamari’i a te Atua ’e nō te tauturu ia rātou ’ia ha’afātata atu ā i te Fa’aora. E fa’a’ite tātou i teie mau mea nā roto i te mau rāve’a tano noa ’e mai terā noa, i roto i tā tātou mau ’āpaura’a i te ta’ata, ’e nā ni’a i te natirara ’e nā roto i te tahi atu mau ’ohipa.

23.1.3

Tītau manihini

Tē tītau manihini nei te Fa’aora i te tā’āto’ara’a ’ia fāri’i i tāna ’evanelia ’e ’ia fa’aineine nō te ora mure ’ore (hi’o Alama 5:33–34). ’Ei pipi nāna, tē pe’e nei tātou i tōna hi’ora’a, ma te ani manihini i te tā’āto’ara’a ’ia « nā roto i tōna maita’i e riro ai ’outou ’ei mea maita’i roa i te Mesia ra » (Moroni 10:32).

E pure tātou nō te fa’aurura’a ’e te arata’ira’a e nāhea i te ani manihini ia vetahi ’ē ’ia :

• Haere mai e hi’o i te mau ha’amaita’ira’a e roa’a nā roto ia Iesu Mesia, tāna ’evanelia, ’e tāna ’Ēkālesia (hi’o Ioane 1:37–39, 45–46).

• Haere mai e tauturu ’ia tāvini i te mau ta’ata tei hina’aro i te tauturu.

• Haere mai e ’ite i te tā’amura’a i te ’Ēkālesia a Iesu Mesia i fa’aho’i-fa’ahou-hia mai.

’Ia niu-ana’e-hia tā tātou mau tītaura’a manihini i ni’a i te mau hina’aro ’e te mau mea e ’ana’anataehia e te ta’ata, e riro ’oia i te fāri’i i taua mau tītaura’a manihini ra. Pinepine te tītaura’a manihini ’o tē ’āmui-noa-ra’a ïa i tō tātou ’utuāfare, tō tātou mau hoa ’e tō tātou ta’ata tupu i roto i te ’ohipa tā tātou e rave a’ena nei. ’Ei hi’ora’a, e nehenehe tātou e ani manihini ia rātou ’ia :

• ’Āmui mai ia tātou i te ’utuāfare nō te tahi ’ātivite.

• ’Āmui mai ia tātou nō te ha’amorira’a ’e nō te ha’api’ira’a i te ’evanelia.

• Haere i te tahi ’ohipa ta’a ’ē, mai te hō’ē ha’amaita’ira’a ’aiū ’aore rā te bāpetizora’a.

• ’Āmui mai i te mau ’ātivite ’aore rā i te mau ’ohipa tāvinira’a a te pāroita ’e a te ’oire, mai te mau ’ōpuara’a tei fa’anahohia nā roto i te JustServe.org (mai te mea tē vai ra).

• ’Āmui i roto i te mau fa’anahora’a e te mau ’ātivite a te ’Ēkālesia. I roto i te reira te mau ’ātivite a te Paraimere, te mau ’ātivite a te feiā ’āpī, te ’ā’amu ’utuāfare, te mau ha’api’ira’a nō te fa’arava’ira’a iāna iho, te BYU–Pathway Worldwide, ’e te ha’api’ira’a tai’o ’e te reo peretāne.

• Fārerei i te mau misiōnare rave tāmau ’e fa’aro’o i tā rātou poro’i.

Nō te tahi atu ā mau mana’o ’e mau mātēria, hi’o share.ChurchofJesusChrist.org ’e « Fa’a’itera’a i te ’Evanelia » i roto i te Vaira’a buka ’evanelia.

E tano ato’a te mau parau tumu nō te here, te fa’a’itera’a ’e te tītau-manihini-ra’a, nō te ha’apūai i te mau melo ’āpī ’e tei ho’i mai.

23.2

Ha’apūai i te mau melo ’āpī

’Ua riro te tomora’a i roto i te ’Ēkālesia ’ei ’ohipa fa’ahiahia ’e te fifi ato’a nō te mau ta’ata e rave rahi. E hōpoi mai te reira i te mau ha’amaita’ira’a rahi, e tītau ato’a rā te reira i te fa’atanora’a i te mau ti’aturira’a ’āpī, te mau peu ’āpī ’e te mau tā’amura’a ’āpī (hi’o 1 Tesalonia 1:6).

Tītauhia nō te melo ’āpī tāta’itahi te auhoara’a, te mau rāve’a tāvinira’a, ’e te mā’a pae vārua. ’Ei melo nō te ’Ēkālesia, e hōro’a tātou i te mau melo ’āpī i tō tātou here ’e tā tātou pāturura’a (hi’o Mosia 18:8–10). E tauturu tātou ia rātou ’ia putapū i te mana’o tā’amura’a i te ’Ēkālesia. E tauturu tātou ia rātou ’ia haere i mua i ni’a i te ’ē’a nō te fafaura’a ’e ’ia « fa’afāriu[-hōhonu-]hia i te Fatu ra » (Alama 23:6). E tauturu tātou ia rātou ’ia « fa’a’amuhia rātou i te parau maita’i a te Atua, nō te tāpe’a ia rātou i ni’a i te ’ē’a ti’a […] ma te ti’aturi noa i te mau maita’i rahi o te Mesia, » (Moroni 6:4).

E nehenehe ato’a tātou e tauturu i te mau melo ’āpī ’ia :

• Ha’api’i ’e ’ia ’ite i te ’oa’oa nō te vaira’a e pipi nā Iesu Mesia.

• Ha’api’i nāhea i te ’ite ē e muhumuhu nō ’ō mai i te Vārua ra.

• Fa’ahotu i te peu nō te pure ta’ata hō’ē ’e nō te pure ’utuāfare, nā reira ato’a nō te tuatāpapara’a pāpa’ira’a mo’a.

• Fa’a’ite i te ’evanelia i tō rātou ’utuāfare ’e i tō rātou mau hoa.

• ’Imi i te mau i’oa o te mau tupuna ’e fa’aineine nō te fāri’i i te mau ’ōro’a o te hiero nō rātou.

• Tupu i te rahi nā roto i te rave-fa’aoti-ra’a i te mau fa’auera’a ’ohipa a te ’Ēkālesia ’e te ’āmuira’a i roto i te tahi atu mau rāve’a e rave rahi tā te ’Ēkālesia e hōro’a nei.

23.3

Ha’apūai i te mau melo tei ho’i mai

E mā’iti te tahi mau melo e fa’aea i te ’āmui i roto i te ’Ēkālesia. I parau te Fa’aora ē : « E tāmau ā ho’i ’outou i te poihere i taua huru ta’ata ra ; ’aita ho’i ’outou i ’ite ’o te ho’i mai rātou ’e ’o te tātarahapa, ’e ’o te haere mai iā’u ma te ’ā’au hina’aro mau, ’e nā’u e fa’aora ia rātou, ’e ’ua riro ’outou ’ei rāve’a nō te hōpoi atu i te fa’aorara’a ia rātou » (3 Nephi 18:32). E tano teie mau parau nō te tā’āto’ara’a tei hina’aro i te aupurura’a tāmau, noa atu ā te tumu.

Te mau melo ’aita e ’āmui hope nei, e mea pāpū a’e rātou ’ia ho’i mai mai te mea e tā’amura’a pūai tō rātou ’e te mau melo o te ’Ēkālesia. E nehenehe tō tātou here ’e tō tātou pāturura’a e tauturu ia rātou ’ia upo’oti’a i ni’a i te mau fifi. Mai te mau melo ’āpī, tītauhia nō rātou te auhoara’a, te mau rāve’a tāvinira’a, ’e te mā’a pae vārua. E nehenehe te hāro’aro’ara’a i tō rātou vaira’a ’e tō rātou mau fifi e tauturu ia tātou ’ia aupuru ia rātou ma te vai ara ’e te here.

23.4

Te feiā fa’atere nō te titi

23.4.1

Peresidenira’a titi

Tei te peresideni titi te mau tāviri o te titi nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E hōro’a ’oia ’e tōna nā tauturu i te ’avei’a nō teie mau tauto’ora’a. E ha’apāpū ’oia ē, e paraparau-pinepine-hia teie ’ohipa i roto i te mau rurura’a titi.

Hō’ē taime i roto i te ’āva’e, i te rahira’a taime, e fārerei te peresideni titi i te peresideni misiōni nō te fa’aau i te mau tauto’ora’a i rotopū i te feiā fa’atere o te titi ’e te pāroita ’e te mau misiōnare rave tāmau. Teie te tahi atu mau ta’ata e nehenehe e haere mai :

• Nā tauturu i roto i nā peresidenira’a titi ’e misiōni.

• Te mau melo ’āpo’ora’a teitei tei fa’auehia.

• Te peresideni Sōtaiete Tauturu o te titi.

• Te mau misiōnare tei fa’auehia e te peresideni misiōni.

23.4.2

Te tōmite fa’atere nō te feiā pa’ari o te titi

Teie te mau ta’ata i roto i te tōmite fa’atere nō te feiā pa’ari o te titi :

• Te peresidenira’a titi.

• Te peresidenira’a Sōtaiete Tauturu o te titi.

• Te mau melo ’āpo’ora’a teitei tei fa’auehia e ’ohipa i pīha’i iho i te mau pupu peresibutero.

E ha’api’i ’e e pāturu teie feiā fa’atere i te mau peresidenira’a pupu peresibutero ’e Sōtaiete Tauturu o te pāroita i roto i te ’ohipa nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai (hi’o 23.5.2). E nehenehe e fa’atupu i te ha’api’ira’a nō te hō’ē pupu ’e ’aore rā nō te ta’ata hō’ē. E nehenehe te mau fa’atere misiōni pāroita e anihia ’ia fāri’i i teie ha’api’ira’a.

Nō te tahi atu ā ha’amāramaramara’a nō ni’a i te mau rurura’a a teie tōmite, hi’o 29.3.9.

23.4.3

Te mau melo ’āpo’ora’a teitei

E nehenehe te peresidenira’a titi e fa’aue i te mau melo ’āpo’ora’a teitei ’ia ha’api’i e ’ia pāturu i te mau peresidenira’a pupu peresibutero ’e te mau fa’atere misiōni pāroita. E fa’auehia te hō’ē melo ’āpo’ora’a teitei ’aore rā hau atu, ’ia arata’i i teie mau tauto’ora’a. Terā rā, tei te mau melo ’āpo’ora’a teitei ato’a teie mau hōpoi’a nō te mau pāroita ’e te mau pupu autahu’ara’a tei fa’ata’ahia nā rātou.

23.4.4

Te peresidenira’a Sōtaiete Tauturu o te titi

I raro a’e i te arata’ira’a a te peresideni titi, e ha’api’i ’e e pāturu te peresidenira’a Sōtaiete Tauturu titi i te mau peresidenira’a Sōtaiete Tauturu o te pāroita i roto i tā rātou mau hōpoi’a nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai.

23.5

Te feiā fa’atere nō te pāroita

23.5.1

Te ’episekōpora’a

Nā te ’episekōpora’a e fa’aau i te mau peresidenira’a pupu peresibutero ’e Sōtaiete Tauturu i te arata’ira’a i te mau tauto’ora’a a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E ’āpo’o tāmau teie feiā fa’atere.

E ha’apāpū te ’episekōpora’a ē, e tāu’aparauhia ’e e fa’aauhia teie mau tauto’ora’a i roto i te ’āpo’ora’a pāroita ’e te mau rurura’a ’āpo’ora’a feiā ’āpī pāroita. E hi’o ’e e fa’ati’a ato’a te ’episekōpora’a i te fa’anahora’a pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai (hi’o 23.5.6).

E paraparau te ’episekōpora’a i te peresideni titi nō te fa’aoti ē, e pi’i ānei i te hō’ē fa’atere misiōni pāroita (hi’o 23.5.3 nō te tahi atu ā ha’amāramaramara’a).

E uiui te ’episekōpo i te mau melo ’āpī ’ua ti’a tō rātou matahiti nō te hō’ē parau fa’ati’a nō te hiero, nō te rave i te mau bāpetizora’a ’e te mau ha’amaura’a ta’ata mono (hi’o 26.4.2). E uiui ato’a ’oia i te mau taea’e ’ua ti’a tō rātou matahiti nō te fāri’i i te Autahu’ara’a a Aarona (hi’o 38.2.9.1). Tōna tanora’a, e fa’atere ’oia i teie mau uiuira’a i roto i te hepetoma i muri mai i te ha’amaura’a o te melo.

Nā te ’episekōpora’a e fa’aau i te tahi atu feiā fa’atere nō te hi’o ē, e mau rāve’a tō te mau melo ’āpī ’e ’o tei ho’i mai, nō te tāvini. E nehenehe te reira mau rāve’a e tauturu i teie mau melo ’ia tupu i te rahi i te pae vārua ’e ’ia ’ite i te mana o te Fatu i roto i tō rātou orara’a. E nehenehe ato’a te tāvinira’a e tauturu i te mau melo ’ia ’ite i te ’oa’oa ’e ’ia patu i te mau tā’amura’a fātata ’e vetahi ’ē i roto i te pāroita. ’Ia fa’atumuhia te reira i ni’a i te mau hina’aro ’e te ’aravihi o te melo. I te tahi taime, e mea tano te pi’ira’a. I te tahi atu taime, e mea maita’i a’e te hō’ē fa’auera’a ’ohipa pāpū.

23.5.2

Te mau peresidenira’a pupu peresibutero ’e Sōtaiete Tauturu

E arata’i te mau peresidenira’a pupu peresibutero ’e Sōtaiete Tauturu i te mau tauto’ora’a tāmau a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai (hi’o 8.2.3 ’e 9.2.3). E fa’atere te peresidenira’a pupu peresibutero i teie mau tauto’ora’a nō te mau melo o te pupu peresibutero. E fa’atere te peresidenira’a Sōtaiete Tauturu i te mau tauto’ora’a nō te mau melo o te Sōtaiete Tauturu. E ’ohipa āmui rātou nō te fa’atere i teie mau tauto’ora’a ’e te ’āpo’ora’a pāroita, i raro a’e i te fa’aaura’a a te ’episekōpo.

Teie te mau hōpoi’a a teie mau ti’a fa’atere :

• Tauturu i te mau melo ’ia here i te mau tamari’i a te Atua, ’ia fa’a’ite i te ’evanelia, ’e ’ia tītau manihini ia vetahi ’ē ’ia fāri’i i te mau ha’amaita’ira’a a te Fa’aora (hi’o 23.1).

• ’Āpo’o ’e te mau melo o te pupu autahu’ara’a ’aore rā o te Sōtaiete Tauturu e nāhea i te fa’a’ite i te ’evanelia. ’Āparau nāhea i te ’imi i te mau ta’ata nā te mau misiōnare e ha’api’i ’e nāhea i te pāturu i te mau ta’ata e ha’api’ihia ra. ’Āpo’o ’āmui nō ni’a i te mau hina’aro o te mau melo ’āpī ’e ’o tei ho’i mai, ’e nāhea i te tauturu atu.

• Fa’ata’a i te mau taea’e ’e te mau tuahine aupuru nō te mau melo ’āpī ’e ’o tei ho’i mai (hi’o 21.2.1). E nehenehe ato’a te mau taea’e ’e te mau tuahine aupuru e fa’ata’ahia nō te mau ta’ata tā te mau misiōnare e ha’api’i ra (e ravehia te reira nā roto i te fa’aaura’a i te mau misiōnare). Mai te mea e nehenehe, e fa’ata’a te feiā fa’atere i te mau melo e tā’amura’a ’aore rā ’o tē nehenehe e fa’atupu i te tā’amura’a fātata i teie mau ta’ata. E fa’aitoito te feiā fa’atere i te mau taea’e ’e te mau tuahine aupuru ’ia hōro’a i te here mai tō te Mesia te huru ’e te pāturura’a.

• Hōro’a i te mau melo ’āpī ’e ’o tei ho’i mai i te mau rāve’a nō te tāvini ’ei tuahine aupuru ’aore rā, ’ei taea’e aupuru. Nō te tahi atu mau ha’amāramaramara’a, ’a hi’o pene 21.

• Tauturu i te ’āpo’ora’a pāroita ’ia ha’amau i te hō’ē fa’anahora’a nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai (hi’o 23.5.6).

• Arata’i i te ’ohipa a te fa’atere misiōni pāroita. Mai te mea ’aita teie ti’a fa’atere i pi’ihia, e rave ïa te hō’ē melo nō te peresidenira’a pupu peresibutero i teie hōpoi’a (hi’o 23.5.3).

E fa’aue tāta’itahi te peresideni pupu peresibutero ’e te peresideni Sōtaiete Tauturu i te hō’ē melo nō te peresidenira’a ’ia tauturu i te arata’ira’a i teie mau tauto’ora’a. E rave ’āmui teie nā melo o nā peresidenira’a. E haere rāua i te mau rurura’a fa’aaura’a hepetoma (hi’o 23.5.7).

23.5.3

Te fa’atere misiōni pāroita

E paraparau te ’episekōpora’a i te peresideni titi nō te fa’aoti ē, e pi’i ānei i te hō’ē fa’atere misiōni pāroita. Mai te mea e fa’aoti rātou e hōro’a i teie pi’ira’a, e paraparau te ’episekōpora’a i te mau peresideni pupu peresibutero ’e Sōtaiete Tauturu nō te fa’aoti ’o vai tē pi’i atu. ’Ei taea’e tei mau i te Autahu’araa a Melehizedeka. Mai te mea ’aita teie ti’a fa’atere i pi’ihia, e rave ïa te hō’ē melo nō te peresidenira’a pupu peresibutero i teie hōpoi’a.

E turu te fa’atere misiōni pāroita i te peresidenira’a pupu peresibutero ’e te peresidenira’a Sōtaiete Tauturu i roto i tā rātou mau hōpoi’a misiōnare. Teie ato’a tāna mau hōpoi’a i muri nei :

• Fa’aau i te ’ohipa a te mau melo ’e te feiā fa’atere o te pāroita, te mau misiōnare pāroita ’e te mau misiōnare rave tāmau. E nehenehe ïa e fa’aau i te mau tauto’ora’a ha’api’ira’a, te mau purera’a bāpetizora’a, ’e te mau tauto’ora’a nō te ha’apūai i te mau melo ’āpī. E nehenehe ato’a e fa’anaho i te mau rāve’a nō te tauturu i te mau melo o te pāroita ’ia fa’a’ite i te ’evanelia.

• Fa’atere i te mau rurura’a fa’aaura’a tāhepetoma (hi’o 23.5.7).

• Haere i te mau rurura’a ’āpo’ora’a pāroita mai te mea ē, e anihia mai.

• Tauturu i te ’āpo’ora’a pāroita ’ia ha’amau ’e ’ia fa’a’ohipa i te fa’anahora’a pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai (hi’o 23.5.6).

• Mai te mea ’ua fa’ati’ahia, ’a fa’anaho i te tāmā’ara’a nā te mau misiōnare rave tāmau i’ō i te mau melo. ’Imi i te mau rāve’a nō te mau misiōnare ’ia tāmā’a ’e te mau ’utuāfare ’āfa melo ’e te mau ’utuāfare paruparu, mai te mea e nehenehe. Fa’aitoito ia rātou ’ia fa’a’ite i te hō’ē poro’i nō te ’evanelia i teie mau ’utuāfare.

• ’Ohipa e te ti’a fa’atere ’ohipa hiero ’e ’ā’amu ’utuāfare o te pāroita, ’e te mau tauturu ’ohipa hiero ’e ’ā’amu ’utuāfare, nō te tauturu i te feiā e ha’api’i ra i te ’evanelia, te mau melo ’āpī, ’e te mau melo ’o tei ho’i mai, ’ia fa’aō ia rātou i roto i te ’ohipa hiero ’e te ’ā’amu ’utuāfare.

23.5.4

Te mau misiōnare pāroita

E tauturu te mau misiōnare pāroita i te mau melo o te pāroita ’ia ’ite i te ’oa’oa nō te fa’a’itera’a i te ’evanelia, mai tei fa’a’itehia i roto i te 23.1. E tāvini rātou i raro a’e i te fa’aterera’a a te fa’atere mīsioni pāroita, ’aore rā te melo o te peresidenira’a pupu peresibutero e amo i te reira hōpoi’a. E nehenehe te mau peresideni pupu peresibutero ’e Sōtaiete Tauturu e tu’u i te i’oa o te mau melo e nehenehe e tāvini.

E ha’api’i te mau misiōnare pāroita i te ta’ata nā roto i te parau ’e te hi’ora’a maita’i, e nāhea i te here ia vetahi ’ē, i te fa’a’ite i tō rātou fa’aro’o, ’e i te tītau manihini ia vetahi ’ē ’ia fāri’i i te mau ha’amaita’ira’a o te ’evanelia. E tauturu ato’a rātou i te mau melo o te pāroita ’ia aupuru i te mau melo ’āpī ’e ’o tei ho’i mai.

E ’āmui te mau misiōnare pāroita i te mau rurura’a fa’aaura’a tāhepetoma (hi’o 23.5.7).

23.5.5

Te ’āpo’ora’a pāroita ’e te ’āpo’ora’a feiā ’āpī pāroita

’Ia paraparau-pinepine-hia te parau nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai, i roto i te mau rurura’a ’āpo’ora’a pāroita. E nehenehe te ’episekōpo e ani i te peresideni pupu peresibutero ’aore rā te peresideni Sōtaiete Tauturu ’ia arata’i i teie mau ’āparaura’a, ’o tē tūtonu i ni’a i te mau ta’ata. E nehenehe te ’episekōpo e ani i te fa’atere misiōni pāroita ’ia haere mai i te mau rurura’a ’āpo’ora’a pāroita.

E nehenehe te ’āpo’ora’a e paraparau nō ni’a i te fa’anahora’a a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E ’āparau ato’a rātou i te mau fa’auera’a ’ohipa e tītauhia ’ia fa’aauhia i roto i te mau ’āvirira’a. E nehenehe te mau ’api parau i muri nei e tauturu i teie mau ’āparaura’a :

• Parau nu’ura’a misiōnare. E fa’a’ohipa te mau misiōnare rave tāmau i teie parau nō te fa’a’ite i te nu’ura’a i mua o te mau ta’ata tā rātou e ha’api’i ra. E tauturu teie parau i te mau misiōnare ’e te mau melo ’ia fa’aau i tā rātou ’ohipa. I te mau vāhi e fa’a’ohipa te mau misiōnare i te fa’aaura’a rorouira ra Buka tāpa’o tāmahana nō te vāhi [Area Book Planner], e roa’a mai teie parau i te feiā fa’atere nō te pāroita i roto i te fa’anahora’a nō te mau ti’a fa’atere ’e te mau pāpa’i parau (DDG) ’e te fa’aaura’a rorouira Outils [Mauha’a]. I te tahi atu mau vāhi, e fa’a’ohipa te mau misiōnare rave tāmau i te parau pāpie.

• Te haerera’a i mua o te melo ’āpī ’e tei ho’i mai. E fa’a’ohipa te feiā fa’atere o te pāroita i teie ’api parau nō te fa’anaho i te rāve’a nō te tauturu i te mau melo ’ia haere i mua i te pae vārua. E roa’a te reira i ni’a i te DDG.

Nō te tahi atu ā parau nō ni’a i te ’āpo’ora’a pāroita, hi’o 29.2.5.

Nō te ’āparaura’a i te mau hina’aro o te feiā ’āpī i roto i te pāroita, e ha’apa’o ta’a ’ē te ’āpo’ora’a feiā ’āpī pāroita i te mau melo ’āpī ’e ’o tei ho’i mai, ’e i te feiā ’āpī e ha’api’ihia ra e te mau misiōnare. E ’āparau ato’a te ’āpo’ora’a i te mau rāve’a e nehenehe ai i te feiā ’āpī ’ia ’āmui mai i roto i te fa’anahora’a a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. Nō te tahi atu ā parau nō ni’a i te ’āpo’ora’a feiā ’āpī pāroita, hi’o 29.2.6.

23.5.6

Te fa’anahora’a pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai

’Ia vai te hō’ē fa’anahora’a ’ōhie nā te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E nehenehe te reira e tauturu i te arata’i i te mau rurura’a, te tāvinira’a ’e te mau ’ātivite. E nehenehe e hōro’a i te mau fa’anahora’a ’e te mau mana’o nō te :

• Tauturu i te mau ta’ata ato’a ’ia ’ite ē, ’ua fāri’i-maita’i-hia rātou i roto i te mau rurura’a ’e te mau ’ātivite.

• Tauturu i te mau melo ’ia ’ite i te ’oa’oa nō te fa’a’itera’a i te ’evanelia.

• Pāturu i te ta’ata e ha’api’ihia ra e te mau misiōnare.

• Tauturu i te mau melo ’āpī ’e ’o tei ho’i mai, ’ia haere i mua i te pae vārua.

E tauturu te mau peresideni pupu peresibutero ’e Sōtaiete Tauturu i te ’āpo’ora’a pāroita ’ia ha’amau i terā fa’anahora’a. E tauturu ato’a te fa’atere misiōni pāroita. E hi’opo’a ’e e fa’ati’a te ’episekōpo i te reira.

Nā te mau melo o te ’āpo’ora’a pāroita feruri mai e nāhea i te fa’atupu i terā fa’anahora’a. E fa’a’ite rātou i te nu’ura’a i mua i roto i te mau ’āpo’ora’a pāroisa. E fa’atano ato’a rātou i te fa’anahora’a mai te mea e tītauhia.

23.5.7

Te mau rurura’a fa’aaura’a

I te mau hepetoma ato’a, e fa’atupuhia te mau rurura’a poto ’e te ’ōhie noa, nō te fa’aau i te mau tauto’ora’a nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. Mai te mea e pi’ihia te hō’ē fa’atere misiōni pāroita, nāna e fa’atere i teie mau rurura’a. ’Aita ana’e, nā te melo o te peresidenira’a pupu peresibutero e amo i teie hōpoi’a.

Teie te tahi atu mau ta’ata tei anihia ’ia haere mai :

• Te mau melo o te peresidenira’a Sōtaiete Tauturu ’e pupu peresibutero i fa’auehia.

• Te mau misiōnare pāroita.

• Te hō’ē rima tauturu nō te pupu tahu’a (’e ’aore rā, te peresideni o te pupu ha’api’i ’e ’aore rā diakono, mai te mea ’aita e tahu’a i roto i te pāroita).

• Te hō’ē melo nō te peresidenira’a o te piha feiā ’āpī tamāhine pa’ari a’e.

• Te mau misiōnare rave tāmau.

E nehenehe tā rātou e tāu’aparau i :

• Te fa’atupura’a i te fa’anahora’a a te pāroita nō te fa’a’itera’a i te ’evanelia ’e te ha’apūaira’a i te mau melo ’āpī ’e ’o tei ho’i mai. E fa’aau rātou i teie fa’anahora’a i te mau ’ōpuara’a ’e te mau fā a te mau misiōnare rave tāmau.

• Te mau fa’auera’a ’ohipa i hōro’ahia i roto i te mau rurura’a nā mua atu.

• Te turura’a i te feiā e ha’api’ihia ra e te mau misiōnare.

• Te fa’anahora’a i te mau purera’a bāpetizora’a e haere mai nei, ’e te anira’a i te mau melo ’ia haere mai.

E nehenehe teie mau rurura’a e fa’atupuhia ma te tae tino roa mai, ’aore rā nā te ātea noa. E nehenehe ato’a te fa’aaura’a e tupu nā roto i te tahi atu mau rāve’a, mai te niuniu, te mau SMS ’e te mau rata uira.