“20. Ngaahi ʻEkitivitií,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (2020).
“20. Ngaahi ʻEkitivitií,” Tohi Tuʻutuʻuni Fakakātoá.
20.
Ngaahi ʻEkitivitií
20.1
Ngaahi Taumuʻá
ʻOku fakatahatahaʻi ʻe he ngaahi ʻekitivitī ʻa e Siasí ʻa e kāingalotu ʻo e Siasí ko ha “kaungā kolo mo e kāinga māʻoniʻoni” (ʻEfesō 2:19). ʻE lava ke kau ʻeni ʻi he taumuʻa ʻo e ngaahi ʻekitivitií:
-
Langaki e tui kia Sīsū Kalaisí.
-
Maʻu ai e fiefiá mo ohi mai e uouangatahá.
-
ʻOange ha ngaahi faingamālie ke tupulaki fakataautaha.
-
Fakamālohia ʻa e fakafoʻituituí mo e ngaahi fāmilí
-
Tokoniʻi ʻa e kāingalotú ke nau kau ʻi he Ngāue ʻa e ʻOtuá ki he fakamoʻuí mo e hakeakiʻí (vakai, 1.2).
Ko ha ngaahi sīpinga ʻe niʻihi ʻo e ngaahi ʻekitivitī ʻa e Siasí ʻoku kau ai ʻa e:
-
Ngāue ʻokú ne tāpuakiʻi ha niʻihi kehe mo tanumaki e ngaahi vā fetuʻutaki he tukui koló.
-
Ngāue fakafaifekaú, ngāue fakatemipalé, mo e ngāue hisitōlia fakafāmilí.
-
Ngaahi faingamālie ke fakatupulaki e moʻui fakafalala pē kiate kitá mo e ngaahi taukei fakatakimuʻá.
-
Akó mo e ako ngāué.
-
Ngaahi ʻekitivitī ʻi tuʻá.
-
Ngaahi faingamālie ke fakatupulaki ha ngaahi talēniti mo fakahoungaʻi e ngaahi ʻaati fakafonuá.
-
Sipotí mo e moʻui leleí.
-
Fakafiefiaʻi ʻo ha ngaahi meʻa makehe ʻoku hoko, hangē ko e ngaahi ʻaho mālōloó pe ngaahi meʻa fakahisitōlia ʻi he Siasí pe fakalotofonua.
Ko hono fakaʻaongaʻi ʻi he tohi tuʻutuʻuni ko ʻení, ʻoku ʻuhinga ʻa e foʻi lea ʻekitivitī ʻa e Siasí ki ha ʻekitivitī ʻoku fakahoko ʻe ha ʻiuniti, kōlomu, pe houalotu ʻo e Siasí.
20.2
Ko Hono Palani ʻo e Ngaahi ʻEkitivitií
Kimuʻa pea palani ha ʻekitivitī, ʻe tomuʻa fakakaukauʻi ʻe he kau takí ʻa e ngaahi fiemaʻu fakalaumālie mo fakatuʻasino ʻa e kāingalotú. ʻE fekumi ʻa e kau takí ki he fakahinohino ʻa e Laumālié ʻi he taimi te nau fakakaukauʻi ai e faʻahinga ʻekitivitī ʻe tokoni ki hono feau ʻo e ngaahi fiemaʻu ko iá.
20.2.1
Fatongia ki Hono Palani ʻo e Ngaahi ʻEkitivitií
Ko e fakamatala ki hono palani ʻo e ngaahi ʻekitivitī fakasiteiki mo fakavahaʻasiteikí, vakai, 20.3.
ʻE lava ke palani ʻa e ngaahi ʻekitivitī fakauōtí ʻi ha taha ʻo e ngaahi founga ko ʻení, ʻo fakatatau mo e ngaahi fiemaʻu fakalotofonuá:
-
ʻE lava ke tokangaʻi ʻe he fakataha alēlea fakauōtí hono palaniʻí.
-
ʻE lava ke vahe ʻe he fakataha alēlea fakauōtí ha ngaahi houalotu pau ke tokoni ʻi hono palani ha ʻekitivitī ʻe taha pe lahi ange.
-
ʻO ka fie maʻu pea ʻi he feituʻu ʻoku tokolahi feʻunga ai ʻa e kāingalotú, ʻe lava ke fokotuʻu ʻe he kau pīsopelikí ha kōmiti ʻekitivitī fakauooti. ʻE lava ke uiuiʻi ʻa e toʻu tupú ko ha kau mēmipa ʻo e kōmití. ʻE ngāue ʻa e kōmití ni ʻo fakatatau mo e tuʻutuʻuni ʻa e fakataha alēlea fakauōtí. ʻE vahe ʻe he fakataha alēlea fakauōtí ki ha taha ʻo hono kau mēmipá ke fetuʻutaki maʻu pē mo e kōmiti ʻekitivitií.
Ko e fakamatala ki hono palani ʻo e ngaahi ʻekitivitī fakauooti ʻa e toʻu tupú, vakai, 10.2.1.3 mo e 11.2.1.3.
20.2.2
Ko Hono Fakaafeʻi ʻo e Taha Kotoa ke Kaú
ʻOku totonu ke tokoniʻi ʻe kinautolu ʻoku nau palani ʻa e ngaahi ʻekitivitií ʻa e taha kotoa, ʻo tautautefito ki he kau mēmipa foʻoú, kāingalotu māmālohí, toʻu tupú, taautaha lalahí, ko kinautolu ʻoku faingataʻaʻia fakatuʻasinó, mo e kakai ʻo e ngaahi tui fakalotu kehé. ʻOku totonu ke ongoʻingofua ʻe kinautolu ʻoku palaní ʻa e ngaahi fakangatangata fakatuʻasino ʻo kinautolu ʻoku kaú. ʻOku totonu foki ke nau toe ongoʻingofua mo e ngaahi faikehekehe fakafonuá mo e lea fakafonuá.
ʻE kumi ʻe kinautolu ʻoku nau palani e ngaahi ʻekitivitií ha ngaahi founga ke kau ai ʻa kinautolu ʻoku kaú. Hangē ko ʻení, te nau lava ʻo fakaafeʻi ʻa e kāingalotú mo ha niʻihi kehe ke nau fakaʻaongaʻi honau ngaahi potó mo e ngaahi talēnití ʻi he ʻekitivitií.
Neongo ʻe lava ke hoko e fakatahataha ʻi he ngaahi ʻekitivitií ko ha tāpuaki, ka ʻoku ʻikai totonu ke ʻai ke ongoʻi haʻisia ʻa e kāingalotú ke nau haʻu ki he ʻekitivitī kotoa pē. ʻOku ʻikai totonu ke fakakavengaʻi noaʻia ʻe he ngaahi ʻekitivitií e kau takí mo e kāingalotú.
20.2.3
Ngaahi Tuʻunga Moʻuí
Ko e ngaahi ʻekitivitī faka-Siasí ʻoku totonu ke langaki moʻui mo fakamamafaʻi ʻa e meʻa ʻoku “māʻoniʻoni, fakaʻofoʻofa, pe ongoongo lelei pe feʻunga mo hono vīkivikiʻí” (Ngaahi Tefito ʻo e Tuí 1:13). He ʻikai ke kau ʻi he ngaahi ʻekitivitií ha faʻahinga meʻa ʻoku fehangahangai mo e ngaahi akonaki ʻa e Siasí. He ʻikai ke kau ʻi he ngaahi ʻekitivitií ha mītia pe ngaahi fakafiefia kehe te ne ʻai ke hangē ʻoku tali ha faʻahinga meʻa ʻoku taʻefeʻunga.
ʻOku ʻikai ngofua ha ngaahi meʻa ʻoku fehangahangai mo e Lea ʻo e Potó ʻi he ngaahi ʻekitivitī ʻa e Siasí pe ʻi ha kelekele ʻo e Siasí. He ʻikai ke fakangofua e kakai ʻoku huʻakavaʻia pe fakaʻaongaʻi ha faʻahinga faitoʻo konatapu ke nau kau ʻi he ngaahi ʻekitivitī ʻa e Siasí. Kapau ʻoku hoko ha faʻahinga meʻa pehē, ʻe fakaleleiʻi ia ʻe he kau takí ʻi he loto-ʻofa.
20.2.4
Palanisi mo Kehekehe
ʻE palani ʻe he kau takí ha ha ngaahi ʻekitivitī ʻoku palanisi, kau ai e ngāue tokoní, ngaahi ʻaati fakafonua, mo ha ngaahi ʻekitivitī fakatuʻasino (vakai, 20.1). ʻOku totonu ke maʻu ʻe he kāingalotú ha ngaahi faingamālie ke kau ʻi he ngaahi ʻekitivitī ʻoku fakamānako kiate kinautolú. ʻOku totonu foki ke nau poupouʻi e niʻihi kehé ʻi he ngaahi meʻa ʻoku nau manako aí.
ʻOku ʻoatu ʻe he ngaahi kongá ni ha sīpinga ʻo e ngaahi ʻekitivitī ʻoku leleí.
20.2.4.1
Ngāue Tokoni
ʻOku ʻomi ʻe he ngaahi ʻekitivitī ngāue tokoní ha ngaahi faingamālie ke fakahaaʻi ha ʻofa ki he niʻihi kehé, ke ongoʻi e fiefia ʻo hono tokoniʻi kinautolú, pea mo fakaleleiʻi ʻa e tukui koló.
ʻE lava ke kau ʻi he ngaahi ʻekitivitī ko ʻení ha ʻaʻahi kiate kinautolu ʻoku puke pe taʻelatá, fakamatamataleleiʻi ʻa e ngaahi fale mo e kelekele ʻo e Siasí, mo kau ʻi he ngaahi ngāue fakakoló. ʻI he feituʻu ʻoku maʻu aí, ʻoku fokotuʻu atu ʻe he JustServe.org ha ngaahi faingamālie tokoni ʻi he tukui koló.
ʻOku totonu ke muimui ʻa e ngaahi ʻekitivitī ngāue tokoní ʻi he ngaahi fakahinohino ki he tuʻunga malú (vakai, 20.7.6.1
20.2.4.2
Ngaahi ʻAati Fakafonuá
ʻOku ʻomi ʻe he ngaahi ʻekitivitī ʻaati fakafonuá ha ngaahi faingamālie ki he kāingalotú ke nau fakatupulaki mo vahevahe ai honau talēnití. ʻOku toe tanumaki foki ʻe he ngaahi ʻekitivitī ko ʻení ʻa e mohu foungá, loto-toʻá, mo e ngāue fakatahá. ʻE lava ke kau ai ha ngaahi ʻaati mo ha ngaahi ngāue fakameaʻa, ngaahi fakaʻaliʻali, fakaʻaliʻali talēniti, pe hulohula, hiva, mo e tulama. ʻE lava foki ke kau ai hano kātoangaʻi ʻo e anga fakafonuá, ngaahi ʻaho mālōloó, pe hisitōlia fakalotofonua pe fakalūkufua ʻo e Siasí.
20.2.4.3
Fakatupulakí, Moʻui Leleí, Longomoʻuí, mo e Sipotí
ʻOku poupouʻi ʻa e kāingalotú ke nau kau ʻi he ngaahi ʻekitivitī ʻoku tokoni ki heʻenau moʻui leleí mo e longomoʻuí, ʻi honau tuʻunga fakafoʻituituí, fakafāmilí, mo e kulupu ʻo e Siasí. ʻE lava ke palani ha ngaahi ʻekitivitī fakatupulaki ʻe niʻihi ʻa e Siasí ke lava ʻa e kau mēmipa ʻo e fāmilí ʻo kau fakataha.
Ko e fakamatala ki he ngaahi ʻekitivitī sipoti ʻa e Siasí, vakai, 20.5.9.
20.2.5
Ko Hono Fakataimi-tēpileʻi ʻo e Ngaahi ʻEkitivitií
ʻOku totonu ke palani kei mamaʻo ʻaupito e ngaahi ʻekitivitī ʻa e Siasí ʻi he tuʻunga ʻe lavá. ʻE fakahā maʻu pē ʻe he kau takí ki he mātuʻá ʻa e ngaahi ʻekitivitī ʻa e fānaú mo e toʻu tupú.
ʻOku totonu ke fakahoko ʻa e ngaahi ʻekitivitií ʻi ha taimi fakapotopoto. ʻOku totonu ke ʻosi vave pē ʻenau ʻekitivitií kae lava ʻo foki lelei e niʻihi ʻoku kau aí ki honau ʻapí.
Kapau ʻe fakahoko ha ʻekitivitī ʻi ha ʻapisiasi pe ʻi ha fale kehe ʻo e Siasí, ʻoku totonu ke taʻofi kimuʻa ʻa e falé ke ʻoua naʻa hoko ha fepakipaki ʻi hono fakataimi-tēpileʻí.
ʻOku tukutaha e ngaahi pō Mōnité ki he ngaahi ʻekivitivī fakafāmilí (vakai, 20.5.3).
20.2.6
Fakapaʻanga ʻo e Ngaahi ʻEkitivitií
Ko e lahi taha ʻo e ngaahi ʻekitivitií ʻoku totonu ke maʻamaʻa mo siʻisiʻi hono fakamolé pe ʻikai ha fakamole ki ai. Kuo pau ke tomuʻa fakangofua ʻe he kau pīsopelikí pe kau palesitenisī fakasiteikí ha faʻahinga fakamole.
ʻOku ʻikai totonu ke faʻa totongi ʻe he kāingalotú e ngaahi ʻekitivitií ka nau toki kau ai. Ko e ngaahi tuʻutuʻuni mo e ngaahi fakahinohino ki hono fakapaʻanga ʻo e ngaahi ʻekitivitií, vakai, 20.6.
20.3
Ngaahi ʻEkitivitī Fakasiteiki, Fakavahaʻasiteiki, mo Fakaʻēlia
20.3.1
Ngaahi Fakahinohino Fakalūkufuá
Ko e lahi taha ʻo e ngaahi ʻekitivitī ʻa e Siasí ʻoku fakahoko ia ʻi he uōtí. ʻOku toe poupouʻi foki ʻa e kau takí ke nau fakahoko ha ngaahi ʻekitivitī fakasiteiki mo fakavahaʻasiteiki ʻi he taimi ʻe tokoni ai ʻa e ngaahi ʻekitivitī peheé ki hono fakahoko ʻo e ngaahi taumuʻa ʻi he 20.1.
ʻOku fakatautautefito e ʻaonga ʻa e ngaahi ʻekitivitī fakasiteiki mo fakavahaʻasiteikí ki he toʻu tupú, kāingalotu tāutahá, mo e houʻeiki fafiné, ʻo tautautefito ʻi he ngaahi feituʻu ʻoku tokosiʻi ai ʻa e kāingalotú. ʻE lava ʻe he ngaahi ʻekitivitī fakasiteiki mo fakavahaʻasiteiki naʻe palani leleí ʻo ʻoange ki he kāingalotú ha feohiʻanga fakakaungāmeʻa lahi ange. ʻE ʻiloʻi ʻe he kau taki ko ʻení e ngaahi fiemaʻu ʻa kinautolu ʻoku nau ngāue ki aí mo fakakaukauʻi pe ʻe feau ʻe he ngaahi ʻekitivitī fakasiteiki pe fakavahaʻasiteikí ʻa e ngaahi fiemaʻu ko iá. ʻE fokotuʻu atu leva ʻe he kau taki ko ʻení ʻa e ngaahi ʻekitivitií ki he kau palesitenisī fakasiteikí.
20.3.2
Ngaahi ʻEkitivitī Fakasiteikí
ʻE kamata ngāue ʻa e kau palesitenisī ʻo e Kau Talavoú, Kau Finemuí, Fineʻofá, mo e Palaimelí ki hono palani ʻo e ngaahi ʻekitivitī fakasiteikí maʻa ʻenau ngaahi houalotú.
ʻE kamata palani leva ʻe he kōmiti fakasiteiki ʻo e kau taautaha kei talavoú ʻa e ngaahi ʻekitivitī fakasiteiki maʻá e kau taautaha kei talavoú.
Kapau kuo fokotuʻu ha kōmiti fakasiteiki ʻo e kau taautaha lalahí, ʻe kamata leva ʻe he kau mēmipa ʻo e kōmití ʻa e ngāue ki hono palani ʻo e ngaahi ʻekitivitií maʻá e kau taautaha lalahí.
Kapau kuo fokotuʻu ha kōmiti ʻekitivitī fakasiteiki, te nau lava ʻo palani e ngaahi ʻekitivitī fakasiteikí mo hoko ko ha maʻuʻanga tokoni ki he ngaahi houalotu ʻo e siteikí ʻi hono palani ʻenau ngaahi ʻekitivitií ʻo hangē ko hono fakamatalaʻi ʻi he 20.3.2.1.
ʻE fie maʻu ke fakangofua e ngaahi ʻekitivitī fakasiteiki kotoa pē mei he kau palesitenisī fakasiteikí. ʻOku fakafekauʻaki kinautolu ʻi he ngaahi fakataha alēlea fakasiteikí.
ʻE fakahoko kei taimi ʻe he kau taki fakasiteikí ki he kau taki fakauōtí ʻa e ngaahi ʻekitivitií. Te nau toe fakapapauʻi foki ʻoku tokoniʻi ʻe he ngaahi ʻekitivitī fakasiteikí ʻa e ngaahi ʻekitivitī fakauōtí kae ʻikai ke na feʻauʻauhi.
20.3.2.1
Kōmiti ʻEkitivitī ʻa e Siteikí
ʻE lava ke fokotuʻu ʻe he kau palesitenisī fakasiteikí ha kōmiti ʻekitivitī ʻa e siteikí ke tokoni ki he fakataha alēlea fakasiteikí ʻi hono palani ʻo e ngaahi ʻekitivitī fakasiteikí. ʻOku kau ʻi he kōmiti ʻekitivitī ʻa e siteikí ha sea (ko ha aleaʻanga māʻolunga) mo ha kau mēmipa ʻo e kōmití (vakai, 20.3.2.2 mo e 20.3.2.3). ʻE toe lava foki ke fakaafeʻi ʻe he kau palesitenisī fakasiteikí ha kāingalotu kehe ke nau tokoni ʻi hono palani ha ʻekitivitī ʻe taha pe toe lahi ange.
20.3.2.2
Sea ʻo e Kōmiti ʻEkitivitī ʻa e Siteikí
Kapau ʻoku fokotuʻu ʻe he kau palesitenisī fakasiteikí ha kōmiti ʻekitivitī fakasiteiki, te nau vahe ha aleaʻanga māʻolunga ke hoko ko e sea ʻo e kōmití. ʻE lava ke kau ʻi hono ngaahi fatongiá ʻa e:
-
Faʻu ha tohi māhina ʻo e ngaahi ʻekitivitī fakasiteikí.
-
Tokangaʻi e kau mēmipa ʻo e kōmití ʻi hono palani ʻo e ngaahi ʻekitivitī fakasiteikí.
-
Fokotuʻu atu ki he kau palesitenisī fakasiteikí ha patiseti ʻoku fakaʻāuliliki ai e ngaahi ʻekitivitī fakasiteikí kimuʻa ʻi he kamataʻanga ʻo e taʻu kotoa pē. ʻOku ʻikai ke kau ʻi he patiseti ko ʻení ʻa e ngaahi ʻekitivitī ʻoku fakataumuʻa ki he ngaahi houalotu fakataautaha ʻo e siteikí.
-
Hoko ko ha maʻuʻanga tokoni ki he kau taki ʻo e ngaahi houalotu ʻo e siteikí ʻi he taimi ʻoku nau palani ai ʻa e ngaahi ʻekitivitií.
20.3.2.3
Kau Mēmipa ʻo e Kōmiti ʻEkitivitī ʻa e Siteikí
ʻE lava ke uiuiʻi ha kau mēmipa ke nau ngāue ʻi he kōmiti ʻekitivitī fakasiteikí ʻe ha mēmipa ʻo e kau palesitenisī fakasiteikí pe ʻe ha aleaʻanga māʻolunga ne vahe ki ai. Te nau ngāue ʻo fakatatau mo e fakahinohino ʻa e sea ʻo e kōmití. ʻE tokoni ʻa e kau mēmipa ʻo e kōmití ʻi hono palani mo fokotuʻutuʻu ʻo e ngaahi ʻekitivitī ʻi he siteikí.
20.3.3
Ngaahi ʻEkitivitī Fakavahaʻasiteikí mo Fakaʻēliá
ʻI he ngaahi feituʻu ʻoku tokosiʻi ai ʻa e toʻu tupú, ʻoku totonu ke fakahoko maʻu pē ʻe he kau takí ha ngaahi ʻekitivitī fakavahaʻasiteiki ʻa e toʻu tupú koeʻuhí ke ʻaonga ki he toʻu tupú ʻa e feohi fakatokolahí. ʻE lava foki ke fakahoko ha ngaahi ʻekitivitī fakaʻēlia maʻá e toʻu tupú, ʻi ha taimi ʻe niʻihi.
ʻOku totonu ke faʻa fakahoko ha ngaahi ʻekitivitī fakavahaʻasiteiki maʻá e kau taautaha kei talavoú ʻi he ngaahi feituʻu he ʻikai fie maʻu ai ha taimi lahi pe fakamole lahi ki he fakatahá. ʻE lava foki ke faʻa fakahoko ha ngaahi ʻekitivitī fakaʻēlia maʻá e kau taautaha kei talavoú.
Ke maʻu ha fakamatala fekauʻaki mo e ngaahi ʻekitivitī fakavahaʻasiteiki ʻa e kāingalotu tāutahá, vakai, 14.2.1.3.
Ko e ngaahi ʻekitivitī fakavahaʻasiteikí ʻoku totonu ke faingofua mo kehekehe.
Kapau ʻe ongoʻi ʻe he kau palesiteni fakasiteikí ʻe ʻaonga ha ʻekitivitī fakavahaʻasiteiki ki he kāingalotu ʻo honau ngaahi siteikí, te nau lava ʻo kole ha ngofua mei he Kau Palesitenisī Fakaʻēliá. Kimuʻa pea fokotuʻu ha ʻekitivitī fakavahaʻasiteikí, ʻe fakafuofuaʻi ʻe he kau palesiteni fakasiteikí pe ko e founga lelei taha ia ke feau ai ʻa e ngaahi fiemaʻu kuo nau ʻiló. ʻE fakakaukauʻi ʻe he kau palesiteni fakasiteikí ʻa e fakamolé, taimí, mo e fefonongaʻaki ʻe fie maʻú. Te nau toe fakakaukauʻi foki ʻa e tuʻunga malú (vakai, 20.7.6).
ʻE lava ke fakahoko ʻa e ngaahi fakataha ke fakafekauʻaki hono palani ʻo e ngaahi ʻekitivitī fakavahaʻasiteikí kimuʻa pe ʻi he hili ʻa e fakataha alēlea fakaʻēliá mo e ngaahi fakataha alēlea fakafekauʻakí (vakai, 5.2.3 mo e 5.2.4). Ka fie maʻu, pea ʻe lava ke fakaafeʻi ha kau taki kehe—kau ai e palesiteni ʻo e Fineʻofá, Kau Talavoú, mo e Kau Finemui fakasiteikí—ke nau kau ai.
ʻE lava ke vahe ʻe he Kau Palesitenisī Fakaʻēliá ha kau palesiteni fakasiteiki pe kau Fitungofulu Fakaʻēlia ke nau taki ʻi he ngaahi kōmiti ʻoku nau palani mo fakahoko e ngaahi ʻekitivitī fakavahaʻasiteikí pe fakaʻēliá. ʻE lava ke uiuiʻi ʻe he kau palesitenisī fakasiteikí ha kāingalotu ʻo honau ngaahi siteikí ke nau kau ʻi he ngaahi kōmití.
Ko e fakapaʻanga ʻo e lahi taha ʻo e ngaahi ʻekitivitī fakavahaʻasiteikí ʻoku haʻu ia mei he paʻanga patiseti ʻa e ngaahi siteiki ʻoku kaú. ʻE lava ke fakapaʻanga e ngaahi ʻekitivitī fakaʻēliá mei he patiseti ʻa e ʻēliá pe hetikuota ʻo e Siasí ʻi hano fakangofua.
20.3.4
Ko e talangofua ki he Ngaahi Tuʻutuʻuni ʻa e Siasí ki he Fefonongaʻakí
ʻOku totonu ke fai pau e ngaahi ʻekitivitī fakasiteikí, fakavahaʻasiteikí, mo fakaʻēliá ki he ngaahi tuʻutuʻuni ʻa e Siasí ki he fefonongaʻakí (vakai, 20.7.7). ʻOku totonu ke fai pau e fefonongaʻaki ki he ngaahi konifelenisi KFT ki he ngaahi tuʻutuʻuni ʻa e Siasí ki he fefonongaʻakí, tuku kehe kapau ʻoku ʻoange ʻe ha pule ʻo e KFT ha ngaahi fakahinohino kehe ki he kau taki fakalotofonuá.
20.4
Konifelenisi ʻa e Toʻu Tupú
ʻE kamata ʻi he Sānuali ʻo e taʻu ʻe hoko ai honau taʻu 14, ʻa hono fakaafeʻi e kau talavoú mo e kau finemuí ke nau kau fakataha ʻi ha konifelenisi ʻa e toʻu tupú. ʻOku meimei ke fakahoko tuʻo taha he taʻu ʻa e konifelenisi fakauooti pe fakasiteiki ʻa e toʻu tupú. ʻE toe lava pē foki ke fakahoko fakavahaʻasiteiki pe fakaʻēlia ia. Ko e taʻu ʻoku vahe ai e toʻu tupú ke kau ʻi he konifelenisi KFT, ʻoku ʻikai totonu ke fakahoko ʻe he ngaahi siteikí mo e ngaahi uōtí ha ngaahi konifelenisi ʻa e toʻu tupú.
Ko e taumuʻa ʻo e ngaahi konifelenisi ʻa e toʻu tupú ke tokoniʻi ʻa e toʻu tupú ke:
-
Langaki e tui kia Sīsū Kalaisí.
-
Fakamālohia e ngaahi fakamoʻoní.
-
Fakatupulaki e ngaahi talēnití.
-
Maʻu ha ngaahi kaungāmeʻa foʻou.
-
Fiefia fakataha mo e toʻu tupu ʻoku nau maʻu e tui mo e ngaahi tuʻunga moʻui tataú.
ʻE lava foki ke ako ʻe he toʻu tupú ha ngaahi taukei fakatakimuʻa ʻi heʻenau tokoni ki hono palani ʻo e ngaahi konifelenisi ʻo e toʻu tupú.
ʻOku palani mo fakahoko ʻa e ngaahi konifelenisi fakauooti ʻa e toʻu tupú ʻe he fakataha alēlea fakauooti ʻa e toʻu tupú, ʻi he malumalu ʻo e fakahinohino ʻa e kau pīsopelikí (vakai, 29.2.6). ʻE maʻu ʻe he kau pīsopelikí ha fakangofua mei he kau palesitenisī fakasiteikí ʻi ha ngaahi palani ki ha konifelenisi fakauooti ʻa e toʻu tupú.
ʻOku palani mo fakahoko ʻa e ngaahi konifelenisi fakasiteiki ʻa e toʻu tupú ʻe he kōmiti fakatakimuʻa ʻa e toʻu tupú ʻi he siteikí (vakai, 29.3.10). ʻOku totonu ke fakaafeʻi ʻa e toʻu tupú ke nau tokoni ki he kōmití, ʻi he lahi taha ʻe lavá.
ʻOku fakapaʻanga e ngaahi konifelenisi ʻa e toʻu tupú mei he patiseti ʻa e siteikí pe uōtí. ʻOku ʻikai totonu ke kole ki he kāingalotú ke nau totongi e ngaahi konifelenisi ʻa e toʻu tupú (vakai, 20.6).
ʻI hono palani ʻe he kau takí mo e toʻu tupú ʻa e konifelenisi ʻa e toʻu tupú, ʻoku totonu ke nau tauhi ʻa e ngaahi tuʻutuʻuni ʻi he vahe ko ʻení pea mo e ngaahi fakahinohino ko ʻení:
-
Fili ha kaveinga ʻo e ongoongoleleí, hangē ko ha potufolofola, ʻa ē te ne ueʻi fakalaumālie ʻa e toʻu tupú mo tokoni ke mahino kiate kinautolu ʻa e ngaahi fiemaʻu ʻo e konifelenisí. ʻE lava ke fakaʻaongaʻi ʻa e kaveinga fakataʻu ʻa e Siasí maʻá e toʻu tupú ke hoko ko e kaveinga ʻo e konifelenisí. ʻOku totonu ke fakangofua ʻa e kaveingá mei he kau pīsopelikí pe mei he kau palesitenisī fakasiteikí.
-
Palani ha ngaahi ʻekitivitī ʻoku fenāpasi mo e kaveingá.
-
Maʻu ha fakangofua mei he kau pīsopelikí pe kau palesitenisī fakasiteikí ki he kau leá mo e ngaahi ʻekitivitií kotoa. Ko e kau leá ʻoku totonu ko ha kau mēmipa ʻo e Siasí pea ʻoku nau faiako ʻaki ʻa e Laumālié. Vakai ki he 38.8.18 ki ha ngaahi fakahinohino kehe fekauʻaki mo e kau leá.
-
Kapau ʻoku palani ke fai ha polokalama ʻi he Sāpaté, ʻoku totonu ke taau ia mo e ʻaho Sāpaté. ʻOku ngofua ke fai ha ngaahi houa fakamoʻoni, fealēleaʻaki mo e kau pīsopelikí, pe ngaahi fakataha pehē. Neongo ia, ka he ʻikai fai ha houalotu sākalamēniti—pea ʻe ʻikai fakahoko ha sākalamēniti—mavahe mei he ngaahi falelotu ʻo e uōtí pe siteikí. Ko ha fakaʻatā makehé kuo pau pē maʻa ha ʻekitivitī ʻoku fakalele ʻe he Siasí, pea kuo pau ke fakangofua ia ʻe he Kau Palesitenisī Fakaʻēliá. ʻOku ʻikai totonu ke fefonongaʻaki ha ngaahi kulupu ki ha konifelenisi ʻa e toʻu tupú ʻi he Sāpaté.
-
Fakapapauʻi ʻoku tokolahi feʻunga maʻu pē ʻa e kakai lalahi ʻoku nau tokangaʻí, ʻi he taimi kotoa (vakai, 20.7.1).
-
Muimui ki he ngaahi fakahinohino kotoa ki he tuʻunga malú ʻi he 20.7.6.
ʻOku fakaafeʻi ʻa e kau taki kakai lalahí ke nau kau ki he konifelenisí ʻi he lahi taha te nau lavá. ʻOku kau heni ʻa e kau mēmipa ʻo e kau pīsopelikí pe kau palesitenisī fakasiteikí, kau palesitenisī ʻo e Kau Finemuí he uōtí pe siteikí, mo e kau palesitenisī ʻo e Kau Talavou e siteikí. ʻE lava foki ke fakaafeʻi mo e kau ʻetivaisa fakauooti ʻo e Kau Finemuí mo e Kau Talavoú ke nau haʻu ki ai.
20.5
Ngaahi Tuʻutuʻuni mo e Fakahinohino ki Hono Fili mo Palani ʻo e Ngaahi ʻEkitivitií
ʻE fakapapauʻi ʻe he kau takí ʻoku tauhi ʻa e ngaahi tuʻutuʻuni mo e ngaahi fakahinohino ko ʻení ʻi hono fili mo hono palaniʻi e ngaahi ʻekitivitī faka-Siasí.
20.5.1
Ngaahi ʻEkitivitī Fakakomēsiale pe Fakapolitikalé
ʻOku ʻikai ngofua ha ngaahi ʻekitivitī ʻoku fakahoko ʻi ha faʻahinga taumuʻa fakakomēsiale pe fakapolitikale (vakai, 35.5.6.1 mo e 35.5.6.3).
20.5.2
Ngaahi Hulohulá mo e Fasí
ʻI he ngaahi hulohula kotoa pē, ʻoku totonu ke tokoniʻi ʻe he teungá, teuteú, māmá, tōʻonga hulohulá, ngaahi fakalea ʻo e hivá mo e fasí ha ʻātakai ʻe lava ke nofoʻia ʻe he Laumālie ʻo e ʻEikí (vakai, tohi tufa, Ki Hono Fakamālohia ʻo e Toʻu Tupú).
ʻE fakaʻaongaʻi ʻe he kau takí ʻa e foomu Aleapau Ngāué ʻi he taimi ʻoku totongi ai ha tā-meʻalea, ʻōkesitulā, pe tokotaha tā fasi (DJ). ʻE tokoni ʻa e aleapau ko ʻení ke fakapapauʻi ʻoku taau ʻa e ʻulungāngá mo e ngaahi fasí mo e ngaahi hulohula ʻa e Siasí. ʻE fai ʻe he kau takí ha ngaahi aleapau mahino ʻoku ʻosi tohiʻi ai ʻo fakamahino kiate kinautolu ʻoku tā e ngaahi fasí ke nau muimui ki he ngaahi tuʻunga moʻui taau ʻa e Siasí ʻi he ngaahi ʻekitivitī faka-Siasí.
20.5.3
Ngaahi Pō Mōnité
ʻOku poupouʻi ʻa e kāingalotú ke nau fakahoko ʻa e ngaahi ʻekitivitī fakafāmilí ʻi he Mōnité pe ʻi ha ngaahi toe taimi kehe. ʻOku ʻikai totonu ke fai ha ʻekitivitī faka-Siasi, fakataha, pe ouau papitaiso ʻi he hili ʻa e taimi 6:00 efiafi he ʻaho Mōnité.
ʻE fakapapauʻi ʻe he kau takí ʻoku tāpuni ʻi he pō Mōnité ʻa e ngaahi ʻapisiasí mo e ngaahi fale kehe ʻo e Siasí. He ʻikai ke fakahoko ha ngaahi kātoanga fakafiefia pe ha faʻahinga ʻekitivitī pehē ʻi he ngaahi fale ʻo e Siasí ʻi he pō Mōnité.
Ko e fakaʻatā makehé pē, ʻe lava ke fakahoko ʻe he ngaahi uooti taautaha kei talavoú mo e ngaahi uooti taautaha lalahí ha ngaahi ʻekitivitī ʻi he pō Mōnité, pea ʻi he ngaahi fale ʻo e Siasí. ʻE lava ke fai ha fakaʻatā makehe ʻi he taimi ʻoku hoko ai e Pō Fakaʻosi Taʻú ʻi ha ʻaho Mōnite (vakai, 20.5.4).
20.5.4
Ngaahi ʻEkitivitī ʻo e Pō Fakaʻosi Taʻú
Kapau ʻoku palani ʻe ha uooti pe siteiki ha ʻekitivitī ʻi he Pō Fakaʻosi Taʻú, pea kapau ʻoku hoko ʻa e Fakaʻosi Taʻú ʻi ha Tokonaki, Sāpate, pe Mōnite, ʻoku totonu ke fai pau e kau takí ki he ngaahi fakahinohino ko ʻení.
Tokonakí. ʻE lava ke fakataimi-tēpileʻi ʻe he palesiteni fakasiteikí ha Sāpate kehe ke fai ai e ʻaukaí. ʻE lava ke fakalaka atu ʻa e ʻekitivitií ʻi he tuʻapoó. Neongo ia, ka ʻoku totonu ke ʻosi vave pē koeʻuhí ke lava ʻa kinautolu ʻoku kau maí ki he ngaahi fakatahaʻanga ʻo e Sāpaté.
Sāpaté. ʻE lava ke palani ʻa e ngaahi ʻekitivitī faka-Siasí ki he Tokonaki, ʻaho 30 ʻo Tīsemá. ʻE fakaʻaongaʻi ki ai e ngaahi fakahinohino ʻi he palakalafi kimuʻá. ʻE lava ke poupouʻi e ngaahi fāmilí ke nau fakamanatua ʻa e Fakaʻosi Taʻú ʻi honau ngaahi ʻapí. Ko e ngaahi ʻekitivitií ʻoku totonu ke taau mo e ʻaho Sāpaté.
Mōnité. ʻE lava ʻe he palesiteni fakasiteikí pe pīsopé ʻo fakamafaiʻi hano fakaʻaongaʻi ʻo e ngaahi fale ʻa e Siasí ʻi he efiafi Mōnité.
20.5.5
Ngaahi ʻEkitivitī Pō Kakató
ʻOku fie maʻu ha ngofua mei he mātuʻá pe tauhí ki he ngaahi ʻekitivitī pō kakato kotoa pē ʻa e Siasí ʻoku kau ai ʻa e toʻu tupú (vakai, 20.7.4).
Ko e ngaahi ʻekitivitī pō kakato ʻoku fakatahaʻi ai ʻa e ngaahi kulupu kau talavou mo e kau finemuí kuo pau ke fakangofua ia ʻe he pīsopé mo e palesiteni fakasiteikí. Ko e meʻa tatau pē ki he ngaahi ʻekitivitī ʻa e houʻeiki tangata mo fafine taautaha ʻoku teʻeki malí. ʻOku totonu ke tātaaitaha pē ʻa e faʻahinga ʻekitivitī peheé. ʻOku kau ʻi he ngaahi sīpingá ʻa e ngaahi konifelenisi ʻa e toʻu tupú, ngaahi konifelenisi KFT, pe ngaahi ʻaʻahi ki he temipalé ʻoku fakahoko ai ha fononga mamaʻó.
ʻOku totonu ke mavahevahe pē e nofoʻanga ʻo e kakai tangata mo fafine mo e kau taki ʻoku kau aí. Neongo ia, ka ʻe lava pē ke nofo fakataha pē ha ongomātuʻa ʻi he loki pe tēniti tatau. ʻOku totonu ke ʻi ai ha mohenga pe tangai moheʻanga (sleeping bag) mavahe ʻo e toʻu tupu takitaha.
ʻI he ngaahi meʻa lahi, he ʻikai lava ke nofo ha toʻu tupu ʻi he tēniti pe loki tatau mo ha taha lahi tukukehe kapau ko ʻene mātuʻa pe tauhi ʻa e tokotaha lahí. ʻE lava ke fai ha fakaʻatā makehe kapau ʻoku ʻi ai ha kakai lalahi ʻe toko ua ʻi he tēnití pe lokí, pea ʻokú na tuʻunga tangata pe fefine tatau mo e toʻu tupú.
Kapau ʻoku nofo fakataha ʻa e kau taki lalahí mo e toʻu tupú ʻi ha ngaahi feituʻu ʻi he poó kakato, hangē ko ha kiʻi fale, kuo pau ke ʻoua naʻa toe siʻi hifo ʻi ha kakai lalahi ʻe toko uá ʻi he falé, pea kuo pau ke na tuʻunga tangata pe fefine tatau mo e toʻu tupú.
Kuo pau ke ʻoua naʻa toe tokosiʻi ange ʻi he kakai lalahi ʻe toko uá ʻi he ngaahi ʻekitivitī pō kakato kotoa pē ʻa e Siasí.
Kuo pau ke ʻi ai ha kakai lalahi maʻu lakanga fakataulaʻeiki tokolahi feʻunga ʻi he taimi kotoa pē, ʻi he lolotonga ʻo e ngaahi ʻekitivitī pō kakató ke fai ha poupou mo ha maluʻi. ʻI he ngaahi ʻekitivitī ʻa e Kau Finemuí, kuo pau ke nofo ʻa e kau maʻu lakanga fakataulaʻeikí ʻi ha fale mavahe mei he kau finemuí.
ʻE fakafonu ʻe he kau takí ha foomu Palani ʻo e ʻEkitivitií mo e Meʻa ʻe Fakahokó ki he ngaahi ʻekitivitī pō kakato kotoa pē.
ʻOku ʻikai fakangofua ha ngaahi ʻekitiviti pō kakato ke fai ʻi he ngaahi ʻapisiasí pe kelekele ʻoku tuʻu ai e ʻapisiasi ʻo e Siasí.
Ki ha fakamatala lahi ange, vakai, “FAQs—What Should I Do?” ʻi he ChurchofJesusChrist.org.
20.5.6
Fakatātaaʻi ʻo e ʻOtuá
Kuo pau ke ʻoua naʻa fakatātaaʻi ʻa e ʻOtua ko e Tamaí mo e Laumālie Māʻoniʻoní ʻi ha faʻahinga fakataha, tulama pe polokalama hiva.
Kapau ʻoku fakatātaaʻi e Fakamoʻuí, kuo pau ke fai ia ʻi ha founga molumalu mo fakaʻeiʻeiki. Ko e houʻeiki tangata pē ʻoku ʻulungaanga leleí ʻoku totonu ke fakakaukauʻi ki he konga ko iá. Ko e tokotaha te ne fakatātaaʻi ʻa e Fakamoʻuí ʻoku ʻikai totonu ke hiva pe tauʻolunga. ʻI he taimi ʻe lea aí, ʻoku totonu ke ne fakaʻaongaʻi pē ʻa e ngaahi kupuʻi lea tonu ne folofola ʻaki ʻe he Fakamoʻuí. ʻI he ʻosi ʻa e fakaʻaliʻalí, ʻoku totonu ke ne fetongi leva he vave tahá ki hono vala angamahení.
ʻOku ʻikai totonu ke fakatātaaʻi ʻe he fānaú e Fakamoʻuí tuku kehe pē ʻi hono fakatātaaʻi ʻo e ʻAloʻí.
20.5.7
Lotu mo e Fakataha Lotu ʻi he Ngaahi ʻEkitivitií
Ko e ngaahi ʻekitivitī kotoa pē ʻoku totonu ke kamata ʻaki ha lotu, pea kapau ʻe taau, pea fakaʻosi ʻaki ha lotu. ʻE lava ke fakakau atu ha himi, poupou fakalaumālie, pe lea ʻa ha taki pe tokotaha ʻoku kau ai.
20.5.8
Tauhi ʻo e ʻAho Sāpaté
Kuo pau ke ʻoua naʻa fakataimi-tēpileʻi ha nofo kemi, sipoti, pe ngaahi polokalama fakatupulaki ʻa e Siasí ki he Sāpaté. Pea ʻoku ʻikai totonu ke fefonongaʻaki ha ngaahi kulupu toʻu tupu pe kulupu kehe mei ha nofo kemi pe konifelenisi ʻi he Sāpaté.
Makehe mei aí, ko e taimi ʻoku hoko ai ko ha palopalema lahi e tuʻunga malú mo e fakamole ki he fefonongaʻakí, ʻe lava ke fakataimi-tēpileʻi ha ngaahi ʻekitivitī ʻe niʻihi ʻa e toʻu tupú ke fai ʻi he ʻosi pē ʻa e lotú he Sāpaté. ʻOku tonu ke kehe ʻa e ngaahi ʻekitivitī ko ʻení mei he taimi-tēpile ʻo e houalotu he Sāpaté. ʻOku totonu ke fenāpasi mo hono tauhi ʻa e laumālie ʻo e Sāpaté. ʻE fie maʻu ha fakangofua mei he pīsopé mo e palesiteni fakasiteikí.
20.5.9
Sipotí
ʻOku ʻomi ʻe he ngaahi ʻekitivitī sipoti ʻa e Siasí ha ngaahi faingamālie ki ha ʻekitivitī fakatuʻasino mo ha feohi. ʻOku nau fakamamafaʻi hono fakatupulaki ʻo e kau ki aí, anga fakasipotí, mo e taukeí. Ko e taimi ʻoku kau ai ha feʻauhi ʻi he ʻekitivitií, ʻoku totonu ke fakahoko e meʻa kotoa ʻe lavá ke ʻoua naʻa hoko ha kē. ʻOku totonu ke maʻu ʻe he kau mēmipa ʻo e ngaahi timí kotoa ha faingamālie ke vaʻinga, ʻo tatau ai pē pe ko e hā e tuʻunga ʻenau taukeí.
ʻE tokangaʻi ʻe he kau palesitenisī fakasiteikí ʻa e ngaahi ʻekitivitī sipoti ʻoku fakalele ʻi honau siteikí. Te nau toe fokotuʻu foki ha ngaahi fakahinohino ʻe (1) fakamahinoʻi ai ʻa e taʻu motuʻa ʻe lava ke kau ai ʻa e kau vaʻingá ʻi he ngaahi sipoti ʻa e Siasí mo (2) fakapapauʻi e tuʻunga ʻe lava ai ke vaʻingá. ʻOku totonu ke fai e faʻahinga tuʻutuʻuni peheé kimuʻa pea toki kamata ʻa e faʻahitaʻu vaʻingá.
Kapau ʻoku fakahoko ha ngaahi ʻekitivitī fakavahaʻasiteiki, ʻe lava ke vahe ʻe he Kau Palesitenisī Fakaʻēliá ha kau Fitungofulu Fakaʻēlia ke nau tokangaʻi ia. Ko e ngaahi ʻekitivitī ko ʻení ʻe fakalele ia ʻe he kau mataotao sipoti ne ui ʻe he kau palesiteni siteiki fakafofonga naʻe vahe ki ai ʻe he Kau Palesitenisī Fakaʻēliá. ʻOku ʻikai fakangofua ha feʻauhi sipoti fakaʻēlia.
ʻE lava ke kau ha kakai ʻoku ʻikai mēmipa ʻi he Siasi ki he ngaahi ʻekitivitī sipoti ʻa e Siasí. Neongo ia, ka ʻoku totonu ke nau nofo ʻi loto he ngaahi ngataʻanga ʻo e siteikí mo loto ke muimui ki he ngaahi tuʻunga moʻui taau mo e ngaahi tuʻutuʻuni ʻo e Siasí he lolotonga ʻo e ngaahi ʻekitivitií.
Kapau ʻoku fakaʻaongaʻi ha ngaahi teunga ki he timí, ʻoku totonu ke faingofua, ʻikai fuʻu fakamole, pea feʻunga mo e ʻekitivitií. ʻOku faʻa feʻunga pē ʻa e ngaahi falani lanu kehekehé pe sote ʻoku lava ʻo fefulihiʻaki. Ko e teungá ʻoku totonu ke totongi ia ʻaki ʻa e patiseti ʻa e siteikí pe uōtí.
ʻOku ʻikai poupouʻi hano fakafeʻiloaki ʻo e ngaahi timí pe foaki ha ngaahi pale fakafoʻituitui pe ngaahi sila.
20.5.10
ʻAlu ki he Temipalé
ʻOku fokotuʻutuʻu fakauooti pe fakasiteiki ʻa e ō ki he temipalé ʻi he lotoʻi vāhenga fakatemipalé.
ʻOku ʻikai poupouʻi ke fokotuʻutuʻu ke ʻaʻahi ha uooti pe siteiki ki ha ngaahi temipale mavahe mei he vāhenga fakatemipale kuo vahe kinautolu ki aí. ʻE fie maʻu ke fakangofua e faʻahinga ʻaʻahi peheé mei he kau palesitenisī fakasiteikí. Ko e ngaahi fononga pō kakato ki he temipalé ʻe fie maʻu foki ke fakangofua ia ʻe he kau palesitenisī fakasiteikí.
Kuo pau ke fenāpasi e ngaahi ō ki he temipalé mo e ngaahi tuʻutuʻuni ki he fefonongaʻakí ʻi he 20.7.7. Kuo pau foki ke fenāpasi e ngaahi ō pō kakato ki he temipalé, mo e ngaahi tuʻutuʻuni ʻi he 20.5.5.
20.5.11
Ngaahi ʻEkitivitī ʻOku ʻIkai Fakangofuá
He ʻikai ke fakahoko ʻe he ngaahi ʻiuniti ʻo e Siasí ha ngaahi ʻekitivitī ʻoku ʻikai hoa mo e ngaahi fakahinohino ʻi he vahe ko ʻení. ʻOku kau heni ʻa e:
-
Ngaahi ʻekitivitī ʻoku tuʻu fakatuʻutāmaki lahi ke hoko ai ha lavea pe puke (vakai, 20.7.6).
-
Ngaahi ʻekitivitī ʻoku fie maʻu ki ai ha fuʻu fakamole pe fefonongaʻaki ʻoku ngali kehe (vakai, 20.7.7).
-
Ngaahi polokalama fakamālohisino ʻoku kau ai ha fasi, fakalea, teunga, pe ngaahi ʻelemēniti kehe ʻoku ʻikai fenāpasi mo e ngaahi tuʻunga moʻui taau ʻo e Siasí.
Ka ʻi ai ha pīsope ʻoku ʻi ai haʻane fehuʻi fekauʻaki mo e tuʻunga taau ʻo ha ʻekitivitī, te ne ʻeke ia ki he palesiteni fakasiteikí. ʻE lava ke fakahoko ʻe he kau palesiteni fakasiteikí ʻa e ngaahi fehuʻí ki he Kau Palesitenisī Fakaʻēliá.
20.6
Ngaahi Tuʻutuʻuni mo e Fakahinohino ki Hono Fakapaʻanga ʻo e Ngaahi ʻEkitivitií
ʻE fakapapauʻi ʻe he kau takí ʻoku tauhi ʻa e ngaahi tuʻutuʻuni mo e ngaahi fakahinohino ko ʻení ʻi hono fakapaʻanga ʻo e ngaahi ʻekitivitī faka-Siasi kotoa pē.
20.6.1
Ngaahi ʻEkitivitī ʻOku Totongi ʻAki e Paʻanga Patiseti ʻa e Uōtí pe Siteikí
ʻOku totonu ke fakaʻaongaʻi ʻa e paʻanga patiseti ʻo e uōtí pe siteikí ki hono totongi ʻo e ngaahi ʻekitivitī kotoa pē—tuku kehe ʻa e ngaahi fakaʻatā makehe ʻoku hā ʻi he 20.6.2.
ʻOku ʻikai totonu ke tānaki ʻe he kāingalotú ha koloa, naunau, totongi ha fale pe totongi hū ki ha polokalama, pe ha fakamole ʻiate kinautolu pē ki ha fononga mamaʻo. ʻE lava ke foaki ʻe he kāingalotú ha meʻakai kapau he ʻikai hoko ko ha fakakavenga.
20.6.2
Fakapaʻanga ʻo e Nofo Kemi ʻa e Toʻu Tupú
Kapau ʻoku ʻikai ke ʻi ai ha paʻanga feʻunga ʻi he patiseti ʻa e uōtí pe siteikí ke fakapaʻanga ʻa e ngaahi ʻekitivitī ʻoku hā atu ʻi laló, ʻe lava ke kole ʻe he kau takí kiate kinautolu ʻoku kaú ke nau totongi ha konga pe kotoa ʻo e ʻekitivitií:
-
Ko ha kemi fakataʻu ʻe taha ʻa e Lakanga Taulaʻeiki Faka-ʻĒloné naʻe toloi pe ʻekitivitī tatau mo ia
-
Ko ha kemi fakataʻu ʻe taha ʻa e Kau Finemuí naʻe toloi pe ʻekitivitī tatau mo ia
ʻOku ʻikai totonu ke fuʻu lahi ʻa e fakamole pe fononga ki ha kemi fakataʻu. ʻOku ʻikai totonu ke taʻofi ha mēmipa mei haʻane kau mai koeʻuhí ko haʻane nounou fakapaʻanga fakafoʻituitui.
Kapau ko e paʻanga mei he patiseti ʻa e uōtí mo e siteikí pea mo e paʻanga meiate kinautolu ʻoku kau he kemí, ʻoku ʻikai feʻunga ia, ʻe lava ke fakamafaiʻi ʻe he pīsopé ha feinga paʻanga ʻe taha ʻa e uōtí ʻi he taʻu. Kuo pau ke fenāpasi ʻa e polokalama ko ʻení mo e ngaahi fakahinohino ʻi he 20.6.5.
Ki ha fakamatala kau ki hono fakapaʻanga ʻo e ngaahi meʻa fakavahaʻasiteiki lalahí pe ngaahi meʻa fakaʻēlia maʻá e kau taautaha kei talavoú, vakai, 14.2.1.3.
20.6.3
Fakapaʻanga ʻo e Ngaahi Konifelenisi KFT
ʻE lava ke kole ki he toʻu tupú ke nau totongi ha paʻanga ke kau ʻi he ngaahi konifelenisi Ki Hono Fakamālohia ʻo e Toʻu Tupú (KFT). Kapau ʻe taʻofi ʻe he fakamolé ha toʻu tupu mei haʻane kau, ʻe lava ke fakaʻaongaʻi ʻe he pīsopé ʻa e paʻanga patiseti ʻa e uōtí ke totongi kotoa pe ko ha konga ʻo e totongi ko ʻení. Vakai, FSY.ChurchofJesusChrist.org.
20.6.4
Fakapaʻanga ʻo e ʻŪ Meʻangāué mo e Naunaú
Kapau ʻe lava, pea fakatau e meʻangāue mo e naunau ʻe fie maʻu ʻe he uōtí ki he nofo kemi fakataʻu ʻa e toʻu tupú ʻaki e paʻanga patiseti ʻa e uōtí. Kapau ʻoku ʻikai feʻunga ʻa e paʻanga ko ʻení, ʻe lava ke fakamafaiʻi ʻe he pīsopé ha polokalama feinga paʻanga tuʻo taha ʻi he taʻu ʻa e uōtí. Kuo pau ke fai pau e ʻekitivitī ko ʻení ki he ngaahi fakahinohino ʻi he 20.6.5.
Ko e ngaahi ʻū meʻangāue mo e naunau ʻoku fakatau ʻaki ʻa e paʻanga patiseti ʻa e uōtí pe paʻanga ʻoku tānaki ʻo fakafou ʻi ha polokalama feinga paʻangá, ʻe fakaʻaongaʻi ʻataʻatā pē ia ki he meʻa ʻa e Siasí. He ʻikai fakaʻaongaʻi ia ki ha meʻa fakataautaha.
20.6.5
Ngaahi Polokalama Feinga Paʻangá
Ko e ngaahi fakamole ki he ngaahi ʻekitivitī fakasiteikí mo fakauōtí ʻoku meimei ke faʻa totongi ʻaki pē ʻa e paʻanga patisetí. Neongo ia, ka ʻe lava ʻe ha palesiteni fakasiteiki pe pīsope ʻo fakamafaiʻi ha polokalama feinga paʻanga ʻe taha ʻi he taʻu ki he ngaahi taumuʻa pē ko ʻení:
-
Ke tokoni ʻi hono totongi ʻo e ngaahi ʻekitivitī ʻoku hiki atu ʻi he 20.6.2 mo e 20.6.3.
-
Ke tokoni ʻi hono fakatau mai ha meʻangāue ʻe fie maʻu ʻe he ʻiunití ki he ngaahi nofo kemi fakataʻú ʻo hangē ko ʻene hā ʻi he 20.6.4.
Kapau ʻoku fai ha feinga paʻanga, ʻoku totonu ke ne fakahoko ha meʻa pe tokoni mahuʻinga.
ʻE fakapapauʻi ʻe he kau takí ʻoku tufaki tatau e paʻanga mei he feinga paʻangá. ʻOku makatuʻunga e lahi ʻo e patiseti ʻa e ngaahi kōlomu ʻo e Lakanga Taulaʻeiki Faka-ʻĒloné ʻi he tokolahi ʻo e kau talavou ʻi he uōtí. ʻOku makatuʻunga e lahi ʻo e patiseti ʻa e kau finemuí ʻi he tokolahi ʻo e kau finemui ʻi he uōtí.
Ko e ngaahi foaki ki he feinga paʻangá ʻoku fakahoko tauʻatāina. ʻE fakapapauʻi ʻe he kau takí ʻoku ʻikai ongoʻi haʻisia ʻa e kāingalotú ke nau foaki.
ʻOku ʻikai totonu ke tuʻuaki pe kole ʻa e ngaahi ʻiuniti ʻoku nau fakahoko ʻa e kumi paʻangá ʻo fakalaka atu ʻi honau ngaahi ngataʻangá. Pe te nau fakatau atu ha koloa pe ngāue totongi mei he ʻapi ki he ʻapi.
Ko e sīpinga ʻo e ngaahi ʻekitivitī feinga paʻanga ʻoku ʻikai fakangofuá ʻoku kau ai ʻeni:
-
Ha ngaahi ʻekitivitī ʻe ala tukuhauʻi.
-
Ngaahi ʻekitivitī ʻoku fakahoko ʻaki ha ngāue totongi, tatau ai pē pe ko hano fakahoko ʻe ha kau ngāue pe ko ha aleapau.
-
Ko ha fakafiefia ʻoku totongi ai ʻe he siteikí pe uōtí ha kau faiva ke nau faiva.
-
Ko hano fakatau atu ha ʻū koloa pe ngaahi ngāue mei ha pisinisi fakakomēsiale.
-
Ngaahi vaʻinga kumi monūʻia, hangē ko e toho monūʻiá, lulú, mo e pingikoú.
-
Ngaahi ʻekitivitī ʻoku ʻikai malu.
Ka ʻi ai ha ngaahi fakaʻatā makehe mei he ngaahi fakahinohino ko ʻení, kuo pau ke toki fakangofua pē ʻe he Kau Palesitenisī Fakaʻēliá.
20.7
Ngaahi Tuʻutuʻuni mo e Fakahinohino ki he Malu ʻi he Ngaahi ʻEkitivitií
ʻE fakapapauʻi ʻe he kau takí ʻoku tauhi ʻa e ngaahi tuʻutuʻuni mo e fakahinohino ko ʻeni ki he malú ʻi he ngaahi ʻekitivitī kotoa ʻa e Siasí.
20.7.1
Tokangaʻi ʻe ha Kakai Lalahí
Kuo pau ke ʻi ai ha kakai lalahi ʻe toko ua pe lahi ange ʻi he ngaahi ʻekitivitī kotoa ʻa e Siasí ʻoku kau ai e toʻu tupú mo e fānaú. ʻE lava ke fie maʻu ha kakai lalahi kehe ʻo fakatatau mo e tokolahi ʻo e kulupú, ngaahi pōtoʻi ngāue ʻoku fie maʻu ki he ʻekitivitií, pe ko ha toe ngaahi meʻa kehe. ʻOku poupouʻi ʻa e ngaahi mātuʻá ke nau tokoni.
Ko kinautolu kotoa ʻoku ngāue mo e fānaú pea mo e toʻu tupú kuo pau ke nau fakakakato ʻa e ako ki he maluʻi ʻo e fānaú mo e toʻu tupú. Vakai, ProtectingChildren.ChurchofJesusChrist.org.
20.7.2
Ngaahi Fiemaʻu ʻi he Taʻu Motuʻá kae Kau ʻi he Ngaahi ʻEkitivitī ʻa e Toʻu Tupú
ʻE lava ke kau ʻa e toʻu tupú ki ha kemi pō kakato ʻo kamata ʻi he Sānuali ʻo e taʻu ʻoku hoko ai honau taʻu 12, ʻo ka fakangofua ʻe heʻenau mātuʻá. ʻE lava ke nau kau ʻi ha ngaahi hulohula, konifelenisi ʻa e toʻu tupú, mo ha ngaahi konifelenisi KFT ʻo kamata ʻi he Sānuali ʻo e taʻu ʻoku hoko ai honau taʻu 14.
20.7.3
Maluʻí
20.7.3.1
Maluʻi Meʻalele Fakatāutahá
Vakai, 20.7.7.
20.7.3.2
Moʻui Lelei Fakatāutahá mo e Maluʻi Fakatuʻutāmakí
ʻI ha ngaahi feituʻu lahi ʻo māmani, ʻoku maʻu ha maluʻi moʻui mo ha maluʻi fakatuʻutāmaki ʻo fou ʻi he ngaahi kautaha ngāué pe ngaahi polokalama ʻa e puleʻangá. ʻOku totonu ke maʻu ʻe he kāingalotu ʻoku nau maʻu e faʻahinga maluʻi ko ʻení ʻa e ngaahi monūʻia kotoa pē kapau ʻe hoko ha lavea lolotonga ha ʻekitivitī ʻa e Siasí kimuʻa pea nau toki kumi tokoni mei he maluʻi ʻekitivitī ʻa e Siasí (vakai, 20.7.3.4).
20.7.3.3
Maluʻi Moʻui Fakatāutahá
ʻOku faleʻi ʻe he Siasí ʻa e kāingalotu mo e kau taki ʻoku nau tokangaʻi ʻa e ngaahi ʻekitivitī ʻa e Siasí ke maluʻi kinautolu ʻi he ngaahi feituʻu ʻe lava aí, ʻaki haʻanau totongi ha maluʻi moʻui ʻoku lahi feʻungá. ʻE lava ke maʻu ʻa e faʻahinga maluʻi peheé ʻi he maluʻi ʻa e kau maʻu-ʻapí pe ʻi ha toe ngaahi maluʻi kehe. Ki ha fakamatala lahi ange, vakai, “FAQs—What Should I Do?” ʻi he ChurchofJesusChrist.org.
20.7.3.4
Polokalama Tokoni Fakafaitoʻo ki he ʻEkitivitī Faka-Siasí
ʻI he ʻIunaiteti Siteití mo Kānata, ʻoku ʻomi ʻe he polokalama Tokoni Fakafaitoʻo ki he ʻEkitivitī ʻa e Siasí (CAMA) ha toe tokoni fakafaitoʻo mo fakaenifo ki ha ngaahi lavea naʻe hoko he lolotonga ha kau ʻi ha ʻekitivitī ʻa e Siasí. ʻOku toe tokoni foki ki he meʻafakaʻeikí, ʻo ka fie maʻu. ʻOku fakataumuʻa e polokalama ko ʻení ke tokoni, kae ʻikai fetongi, ha maluʻi moʻui mo ha maluʻi fakatuʻutāmaki. Ki ha fakamatala lahi ange, vakai, “FAQs—What Should I Do?” ʻi he ChurchofJesusChrist.org.
Kapau ʻoku hoko ha meʻa lolotonga ha polokalama ʻoku fakalele ʻe he Siasí, ʻe sio e kau takí pe ʻe fie maʻu e CAMA. ʻE lava ke lipooti ʻe ha faʻahinga taki pē ha meʻa naʻe hoko ʻi he polokalama Lipooti ʻo e Meʻa Fakaemāmani Lahí ʻi incidents.ChurchofJesusChrist.org. Kapau ʻe pehē ʻe he takí ʻe fie maʻu ha faitoʻo ʻo laka ange ʻi he ʻuluaki tokoní (first aid), ʻe fakahā ki he pīsopé pea ʻe maʻu ai e fakamatala ki hono fakakau atú. ʻE fakakaukauʻi ʻe he pīsopé ʻa e tuʻunga malava ʻe he fāmili ʻo e tokotahá ʻo totongi ʻa e ngaahi fakamole fakafaitoʻó ʻi ha toe ngaahi founga kehe, hangē ko ha maluʻi fakataautaha pe ko ha ngaahi maʻuʻanga tokoni kehe. Te ne ala fakamafaiʻi hano fakaʻaongaʻi ʻo e paʻanga mei he CAMA kapau te ne ongoʻi ʻoku totonu.
Ke maʻu ha fakamatala lahi ange, vakai, Church Activity Medical Assistance Handbook. Ke maʻu e tohi tuʻutuʻuni ko ʻení, fetuʻutaki ki he:
Deseret Mutual Benefit Administrators
P.O. Box 45530
Salt Lake City, UT 84145-0530
Telefoni: 1-801-578-5650 pe 1-800-777-1647
ʻĪmeili: churchactivity@dmba.com
Uepisaiti: dmba.com/churchactivity
20.7.3.5
Tohi Fakamoʻoni ʻo e Totongi Maluʻí
ʻOku faʻa kole ki he Siasí ke ne ʻomi ha fakamoʻoni maluʻi ki he ngaahi ʻekitivitií. ʻOku maʻu ʻa e ngaahi kole ko ʻení koeʻuhí ko ha ngaahi felotoi ki ha totongi, aleapau, pe fakangofua ʻoku fekauʻaki mo e ngaahi ʻekitivitií.
ʻI he ʻIunaiteti Siteití mo Kānata, ʻe lava ke maʻu ʻe he kau takí ha tohi fakamoʻoni ʻoku hā ai ʻa e maluʻí ʻi he InsuranceCertificates.ChurchofJesusChrist.org. Mavahe mei he ʻIunaiteti Siteití mo Kānatá, ʻoku totonu ke fetuʻutaki e kau takí ki he ʻōfisi fakaʻēliá. ʻOku totonu ke kau ʻi he ngaahi kolé:
-
ʻA e hingoa mo e tuʻasila ʻo e kautaha ʻoku nau fie maʻu ʻa e fakamoʻoni ʻo e maluʻí.
-
Ko ha fakamatala mo e feituʻu ʻoku tuʻu ai e falé, kapau naʻe nō totongi ha fale.
-
ʻE fie maʻu ʻa e fakangatangata ki he maluʻí.
-
Fakamatala mahuʻinga kehe fekauʻaki mo e ʻekitivitií.
ʻOku totonu ke palani kei mamaʻo ʻe he kau takí kae lava ke maʻu ha taimi ke teuteu ai ʻa e ʻū tohi fakamoʻoní.
20.7.4
Fakangofua mei he Mātuʻá
He ʻikai ke lava ʻo kau e fānaú mo e toʻu tupú ʻi ha ʻekitivitī ʻa e Siasí taʻe-maʻu ha ngofua mei heʻenau mātuʻá pe tauhí. ʻOku fie maʻu ha tohi fakangofua ki he ngaahi ʻekitivitī faka-Siasi ʻoku kau ai ha nofo pō kakato, fefonongaʻaki lōloa, pe ko ha ngaahi meʻa ʻe ngali fuʻu fakatuʻutāmaki ange ʻi he angamahení. ʻE ʻi ai ha ngaahi ʻekitivitī ʻe niʻihi ʻe fie maʻu ki ai ha palani makehe ke ne holoki e tuʻunga fakatuʻutāmakí. ʻOku totonu ke mahuʻinga maʻu pē hono fakakaukauʻi ʻo e malú. Vakai, 20.7.6.1.
ʻE fakahā ʻe he mātuʻá mo e kau tauhí ʻenau loto-fiemālié ʻaki haʻanau fakamoʻoni ʻi he foomu Fakangofua mo e Fakaʻatā Fakaitoʻó. ʻOku totonu ke maʻu ʻe he tokotaha ʻokú ne tataki ʻa e ʻekitivitií ha foomu kuo ʻosi fakamoʻoni hingoa ai maʻá e tokotaha takitaha ʻoku kaú.
20.7.5
Lipooti ʻo e Ngaohikoviá
ʻOku totonu ke lipooti ki he kau maʻu mafai fakapuleʻangá, ha faʻahinga ngaohikovia pē ʻoku hoko ʻi ha ʻekitivitī ʻa e Siasí. ʻOku totonu ke fakahoko leva ia ki he pīsopé. Ko e ngaahi fakahinohino ki he kāingalotú ʻoku ʻi he 38.6.2.7. Ko e ngaahi fakahinohino ki he kau pīsopé ʻoku ʻi he 38.6.2.1.
Ko e ngaahi fakaʻuhinga ʻo e ngaohikoviá, vakai, 38.6.2.3 mo e 38.6.2.4.
20.7.6
Ngaahi Fakatokanga ki he Malú, Tokoni ʻi ha Fakatuʻutāmaki, mo hono Lipooti ʻo ha Fakatuʻutāmakí
20.7.6.1
Ngaahi Fakatokanga ki he Malú
ʻE tokangaʻi fakalelei ʻe he kau takí mo kinautolu ʻoku kaú ʻa e ngaahi ʻekitivitií, ke fakapapauʻi ʻoku siʻi ʻaupito ha tuʻunga fakatuʻutāmaki ke lavea pe hoko ai ha puke. ʻOku totonu foki ko e ngaahi ʻekitivitií ʻe siʻisiʻi ʻaupito ai e ngaahi maumau ki he feituʻu ko iá. ʻI he lolotonga ʻo e ngaahi ʻekitivitií, ʻe fai ʻe he kau takí ʻa e meʻa kotoa pē ke fakapapauʻi ʻoku malu e tafaʻaki kotoa. Ka palani fakalelei mo muimui ki he ngaahi fakatokanga fekauʻaki mo e tuʻunga malú, ʻe lava leva ʻe he kau takí ʻo fakasiʻisiʻi ha hoko ha ngaahi fakatuʻutāmaki.
ʻOku totonu ke kau ʻi he ngaahi ʻekitivitií hano akoʻi mo tokangaʻi lelei. ʻOku totonu foki ke feʻunga mo e taʻu motuʻa ʻo kinautolu ʻe kaú, meʻa te nau malavá, mo ʻenau tuʻunga fakapotopotó.
ʻE fakahinohinoʻi ʻe he kau takí ʻa kinautolu kotoa ʻe kaú, ʻi he ngaahi founga malu ki he ʻekitivitií. Ko e taimi ʻe fie maʻu ai ʻi he ngaahi ʻekitivitií ha ngaahi poto fakatuʻasino mo taukei paú, mahalo naʻa fie maʻu ke fakahoko ha ako fakapatonu pe fakaʻaongaʻi ha ngaahi fakahinohino fakapalōfesinale.
ʻOku totonu ke mateuteu ʻa e kau takí ki ha ngaahi meʻa fakatuʻupakē. ʻOku totonu foki ke nau tomuʻa ʻilo kei taimi e founga ke fetuʻutaki ai mo e kau polisi fakalotofonuá mo e ngaahi potungāue ki he meʻa fakatuʻupakeé. Ki ha fakamatala lahi ange, vakai, “FAQs—What Should I Do?” ʻi he ChurchofJesusChrist.org.
20.7.6.2
Tokoni ʻi ha Fakatuʻutāmakí
Kapau ʻe hoko ha fakatuʻutāmaki pe lavea ʻi ha kelekele ʻo e Siasí pe lolotonga ha ʻekitivitī ʻa e Siasí, ʻe muimui e kau takí ki he ngaahi fakahinohino ko ʻení, ʻo fakatatau mo ʻene malavá:
-
Fai ʻa e ʻuluaki tokoní. Kapau ʻoku fie maʻu ʻe ha taha ha tokoni fakafaitoʻo lahi ange, fetuʻutaki ki he tafaʻaki fakafaitoʻo ki he meʻa fakatuʻupakeé. Fetuʻutaki foki ki he mātuʻá, tauhí, pe ko ha kāinga ofi kehe mo e pīsopé pe palesiteni fakasiteikí.
-
Kapau ʻoku pulia pe mate ha taha, fetuʻutaki he vave tahá ki he kau polisi fakalotofonuá. Fengāueʻaki kakato mo kinautolu.
-
Fai ha tokoni fakaeloto.
-
ʻOua naʻá ke poupouʻi pe taʻofi ha ngāue fakalao. ʻOua naʻá ke fai ha tukupā ʻo fakafofongaʻi ʻa e Siasí.
-
Tānaki mo tauhi e ngaahi hingoa ʻo e kau fakamoʻoní, fakamatala ke fetuʻutaki ai mo kinautolú, mo ha ʻū laʻitā.
-
Lipooti ʻa e fakatuʻutāmakí (vakai, 20.7.6.3).
20.7.6.3
Ko e Lipooti ʻo e Fakatuʻutāmakí
ʻOku totonu ke lipooti ʻa e ngaahi tūkunga ko ʻení ʻi he ʻinitanetí ʻi he incidents.ChurchofJesusChrist.org. ‘E lipooti taimi totonu ʻe he pīsopé, palesiteni fakasiteikí, pe ko ha mēmipa naʻe vahe ki ai pea ʻokú ne ʻilo ʻa e meʻa naʻe hokó.
-
Ko ha fakatuʻutāmaki pe lavea naʻe hoko ʻi ha kelekele ʻo e Siasí pe lolotonga ha ʻekitivitī ʻa e Siasí.
-
Ko ha taha naʻe kau ʻi ha ʻekitivitī ʻa e Siasí, ʻoku pulia.
-
ʻOku maumauʻi ha koloa fakataautaha, fakapuleʻanga, pe koloa ʻa e Siasí ʻi he lolotonga ha ʻekitivitī faka-Siasi.
-
ʻOku tuʻu ke fakahoko pe ʻamanaki ʻe fai ha fakaʻilo.
Kapau ʻe hoko ha lavea lahi, fakatuʻutāmaki, pe pulia ha taha, ʻe fakahoko leva ʻe he palesiteni fakasiteikí, pīsopé, pe ʻe ha mēmipa naʻe vahe ki ai ha taha ʻo e ngaahi meʻa ko ʻení:
-
ʻI he ʻIunaiteti Siteití pe Kānata, tomuʻa telefoni ki he Risk Management Division ʻi he hetikuota ʻo e Siasí (1-801-240-4049 pe 1-800-453-3860, laine 2-4049; ʻi he ʻosi ʻo e taimi ngāué pe fakaʻosinga ʻo e uiké, telefoni ki he 1-801-240-1000 pe 1-800-453-3860, pea ʻe fetuʻutaki leva ʻa e tali telefoní ki ha taha ʻi he taimi pē ko iá). Hili iá pea fetuʻutaki leva ki he Kau Palesitenisī Fakaʻēliá.
-
Mavahe mei ʻIunaiteti Siteití mo Kānatá, fetuʻutaki ki he ʻōfisi fakaʻēliá.
ʻE toe lipooti foki ʻe he palesiteni fakasiteikí pe pīsopé ʻa e ngaahi lavea mo e maumau ʻoku hoko ki he ʻū fale pe kelekele ʻo e Siasí ki he pule ki he ngaahi naunau fakatuʻasino ʻa e Siasí.
Ki ha fakamatala lahi ange, vakai, “FAQs—What Should I Do?” ʻi he ChurchofJesusChrist.org.
20.7.6.4
Maluʻí mo e Ngaahi Fehuʻí
Kapau ʻoku hoko ha lavea lolotonga ha polokalama faka-Siasi, ʻe fakafuofuaʻi ʻe he kau takí pe ʻe fakaʻaongaʻi ʻa e polokalama Tokoni Fakafaitoʻo ki he ʻEkitivitī ʻa e Siasí (vakai, 20.7.3.4).
ʻI ha ngaahi meʻa ʻe niʻihi, ʻe ala ʻi ai ha ngaahi fehuʻi ʻa e palesiteni fakasiteikí pe pīsopé fekauʻaki mo ha ngaahi palopalema fakaemaluʻi pe ʻeke ki he Siasí. ʻE ʻave ʻe he palesiteni fakasiteikí (pe pīsopé ʻi haʻane fakahinohino ki ai) ʻa e ngaahi fehuʻi ko iá ki he Risk Management Division pe ʻōfisi fakaʻēliá.
20.7.7
Fefonongaʻakí
Ko e fefonongaʻaki ki he ngaahi ʻekitivitī ʻa e Siasí ʻoku totonu ke fakangofua mei he pīsopé pe palesiteni fakasiteikí. ʻOku ʻikai totonu ke hoko e fefonongaʻakí ko ha kavenga mafasia ki he kāingalotú. ʻOku ʻikai poupouʻi ha fononga mamaʻo ki ha ngaahi ʻekitivitī.
ʻI ha ngaahi tūkunga makehe ʻe niʻihi, ʻe ongoʻi ai ʻe ha palesiteni fakasiteiki pe pīsope ʻe ʻuhinga lelei ke fai ha fononga mamaʻo ki ha ʻekitivitī. Te ne fakakaukauʻi ʻi he faʻa lotu ʻa e ngaahi lelei fakalaumālie ʻe ala maʻu ʻi he ʻekitivitií, fakamolé, mo ʻene ʻaonga ki he ngaahi fāmilí. Kapau te ne fakangofua ha fefonongaʻaki pehē, ʻoku ʻikai totonu ke totongi ʻe he kāingalotú e fakamolé.
ʻOku totonu ke tatau pē hono fakahoko ʻa e ngaahi founga fefonongaʻakí mo e muimui ki he ngaahi fakahinohino ʻi he konga ko ʻení ʻi he ngaahi ʻiuniti ʻo e ʻēlia pe fakataha alēlea fakafekauʻaki tatau. ʻE lava ke aleaʻi ʻe he kau palesiteni fakasiteikí pea mo nau felotoi ki ha ngaahi founga fefonongaʻaki, ʻi he lolotonga ʻo e ngaahi fakataha alēlea fakafekauʻakí.
ʻE fakafonu ʻe he kau takí ha foomu Palani ʻo e Meʻa ʻe Hokó mo e ʻEkitivitií ki he ngaahi ʻekitivitī ʻe kau ai ha fefonongaʻaki mamaʻó.
Ko e taimi ʻe kau ai ha fefonongaʻaki mamaʻo ʻi ha ʻekitivitī ʻa e Siasí maʻá e toʻu tupú pe nofo pō kakató, kuo pau ke maʻu mei he ngaahi mātuʻá ha tohi fakangofua ke kau mai ʻenau fānaú (vakai, 20.7.4). Kuo pau ke ʻi ai ha kakai lalahi fakapotopoto ke nau tokangaʻi (vakai, 20.7.1).
Ka faingamālie, ʻoku totonu ke fakaʻaongaʻi ʻe he ngaahi kulupu ʻo e Siasí ha meʻalele fakakomēsiale ki he fononga mamaʻó. ʻOku totonu ke ʻosi laiseni mo maluʻi e meʻalelé ʻe ha kautaha maluʻi.
Ko e taimi ʻe fononga ai e ngaahi kulupu Siasí ʻi ha ngaahi meʻalele pāsesé, ko e meʻalele kotoa pē kuo pau ke ʻi ha tuʻunga ngāue lelei ʻoku malu. ʻOku totonu ke fakaʻaongaʻi ʻe he tokotaha kotoa pē ha leta maluʻi. ʻOku totonu ke ʻosi laiseni ʻa e fakaʻuli kotoa pē pea fakapotopoto. Ko e ʻū meʻalele mo e kau fakaʻuli kotoa pē ʻoku totonu ke maluʻi ʻaki ha paʻanga maluʻi meʻalele ʻoku feʻungá. ʻOku totonu ke faʻu ha palani ke fakapapauʻi ʻoku tokanga mo ʻāʻā e kau fakaʻulí. Kapau ʻe lava, ʻoku ʻikai totonu ke nofo toko taha ha taha lahi mo ha toʻu tupu ʻi ha meʻalele tukukehe kapau ko e toʻu tupú ko ʻene fānau tonu.
ʻOku ʻikai totonu ke maʻu pe feinga e ngaahi houalotu ʻa e Siasí ke maʻu mai ha ʻū meʻalele pe pasi ki he ngaahi fononga fakakulupú.
ʻOku ʻikai totonu ke fononga toko ua pē ha tangata mo ha fefine ki ha ngaahi ʻekitivitī, ngaahi fakataha, pe ngaahi ngāue ʻa e Siasí tuku kehe kapau ʻokú na mali pe ʻokú na fakatou taautaha.
Ki ha fakamatala lahi ange, vakai, “FAQs—What Should I Do?” ʻi he ChurchofJesusChrist.org.
20.8
Ngaahi Tuʻutuʻuni Fakapule ki he ʻEkitivitií
ʻE fakapapauʻi ʻe he kau takí ʻoku tauhi ʻa e ngaahi tuʻutuʻuni mo e ngaahi fakahinohino ko ʻení ʻi hono fakahoko e ngaahi ʻekitivitī kotoa pē ʻa e Siasí.
20.8.1
Naunau ʻOku Puleʻi ʻe he Maʻu Mafai Pulusí
Vakai, 38.8.11
20.8.2
Nō Totongi ʻo ha Ngaahi Fale ʻOku ʻikai ʻo e Siasí ki ha Ngaahi ʻEkitivitī
Ko e taimi ʻoku ʻikai lahi feʻunga ai ʻa e ngaahi fale ʻo e Siasí ki ha ʻekitivitī fakasiteiki pe fakavahaʻasiteiki, ʻe lava ke nō totongi ha ngaahi fale ʻi hano fakangofua ʻe he palesiteni fakasiteikí. Ko e faʻahinga kole peheé ʻoku ngāue ki ai ʻa e pule ki he naunau fakatuʻasino ʻa e Siasí.
ʻE ala fie maʻu ʻa e ngaahi ʻiuniti fakalotofonuá ke nau fakahā ha tohi fakamoʻoni maluʻi ki ha fakamole ʻi he taimi te nau nō ai pe fakaʻaongaʻi ha ngaahi fale ʻoku ʻikai ʻo e Siasí. Ki ha fakamatala fekauʻaki mo e founga ke maʻu ai ha tohi fakamoʻoni maluʻí, vakai, 20.7.3.5.
20.8.3
Ngaahi ʻEkitivitī ʻOku Ala Tukuhauʻí
ʻE fakapapauʻi ʻe he kau takí he ʻikai uesia ʻe he ngaahi ʻekitivitií ʻa e tuʻunga fakaʻatā ʻo e Siasí mei he tukuhaú. Ke maʻu ha ngaahi fakahinohino, vakai, 34.8.1.