“19. Sere/iVakatagi,” iVoladusidusi Raraba: Veiqaravi e Na Lotu i Jisu Karisito ni Yalododonu Edaidai (2020).
“19. Sere/iVakatagi,” iVoladusidusi Raraba.
iVakatakilakila
erau taba piano tiko e dua na marama kei na gone
19.
Sere/iVakatagi
19.1
iNaki ni Sere/iVakatagi ena Lotu
Ena dua na ivakatakila a soli vua na Parofita o Josefa Simici, a kaya na Turaga, “Raica sa dau rekitaka na yaloqu na sere sa lagati ena yalodina; io, na nodra sere na yalododonu sa nodra masu vei au, ka na saumi vei ira ena veivakalougatataki ki uludra” (Vunau kei na Veiyalayalati 25:12). A kaya talega, “O ira na buladodonu … ka ra lako mai ki Saioni, ka lagata voli na sere ni reki tawavakaiyalayala” (Vunau kei na Veiyalayalati 45:71).
Na sereivakatagi tabu e vakalevutaka na vakabauti Jisu Karisito. Ena sureta na Yalo ka vakavulica na ivunau. E bulia talega na yalo ni vakarokoroko, vakaduavatataki ira na lewenilotu, ka vakarautaka e dua na sala ni sokalou ki vua na Tamada Vakalomalagi kei Jisu Karisito.
19.2
Sere/iVakatagi e Vale
Mai vei ira na Nona parofita, sa vakayaloqaqataki ira na tamata yadua kei na matavuvale na Turaga me ra vakayagataka na sereivakatagi veilaveti ena nodra bula e veisiga. Na lagasere kei na vakarorogo ki na sereivakatagi tabu e rawa ni sureta e dua na yalo totoka kei na vakacegu. E rawa talega ni vakalevutaka na veilomani kei na duavata ena kedra maliwa na lewe ni matavuvale. Na serenilotu e rawa ni vukea na tamata yadua me na rawata na yaloqaqa ka vorata na veitemaki.
Sa vakarautaki tu na katokatoni ni sereivakatagi ni Lotu mai na ivurevure eso oqo:
App ni Sereivakatagi Tabu se Sacred Music App
App ni Valenivola ni Kosipeli se Gospel Library App
E vakarautaka tu na Lotu na ivurevure me vukea na tamata yadua kei na matavuvale me vulica na kilai matau ni sereivakatagi. E rawa ni ra kunei ena music.ChurchofJesusChrist.org (raica talega na 19.6). Na vakatorocaketaki ni kila-ka ni sereivakatagi sa vakarabailevutaka na madigi vei ira na lewenilotu me ra veiqaravi e vale ka vakakina ena Lotu.
19.3
Sere/iVakatagi ena Soqoni ni Lotu
Na sereivakatagi tabu e tiki bibi ni soqoni ni sakaramede kei na veisoqoni tale eso ni Lotu. E tiko kina na kaukauwa me sureta na Yalo, ka kauti ira mai vakavoleka na tamata yadua ki vua na Kalou. “Eso na ivunau cecere era dau vunautaki ena kena lagati na serenilotu.” (Raica na Serenilotu, ix.)
19.3.1
Tuvanaki ni Sere/iVakatagi ni Soqoni ni Lotu
Era na cakacaka vata na kodineita ni sereivakatagi ena iteki kei na tabanalevu vata kei ira na iliuliu ni matabete me tuvanaki na sereivakatagi ni qaravi ni sokalou. Era na digitaka na sereivakatagi e dau laveta cake na yalo ni sokalou ena soqoni.
Ena dau lagati ga na serenilotu me baleta na lagasere ni ivavakoso kece ena qaravi ni sokalou. Sa rawa me vakayagataki na serenilotu se sereivakatagi tabu digitaki tale eso me sere ni curu ka sere ni suka, sere ni matasere, kei na domodua se matasere ni ilawalawa lalai. Na sereivakatagi taucoko ena soqoni ni Lotu e dodonu me lagati ena yalo ni sokalou vua na Tamada Vakalomalagi kei Jisu Karisito, ka sega ni itavi me vakaraitaki kina na taledi ni sereivakatagi.
Na sereivakatagi digitaki eso e dodonu me salavata tikoga kei na yalo ni sokalou ni serenilotu. E dodonu me ra vakavulica na kosipeli ena kaukauwa kei na savasava.
Na sereivakatagi tabu e volai se lagati ena kena ivakarau vakavanua ni veimataqali sereivakatagi duidui eso e rawa ni vukea na vakaduavatataki ni ivavakoso. Sa rawa vei ira na kodineita kei na iliuliu ni matabete me ra okata kina e vica na iwalewale ni sere e veirauti ka na ganita na nodra bula ituvaki na lewenilotu.
19.3.2
Sere/iVakatagi ena Soqoni ni Sakaramede
Era soqoni vata mai na lewenilotu ena soqoni ni sakaramede me ra nanumi Jisu Karisito ena nodra vakaivotavota ena sakaramede. Era soqoni vata me ra tara cake na vakabauta kei na ivakadinadina ka sokalou vua na Tamada Vakalomalagi kei Jisu Karisito. Sa dodonu me digitaki na sereivakatagi me vukea na kena rawati na inaki oqo.
Na sereivakatagi ena soqoni ni sakaramede e oka kina na nodra lagasere ni lotu na ivavakoso me ra dolava ka sogota kina na soqoni ni bera ni qai qaravi na sakaramede. Na sere ni ivavakoso e vakarautaka e dua na madigi vei ira na lewenilotu me ra duavata ena nodra vakaitavi vakagumatua ena sokalou vata. Na serenilotu ni sakaramede e dodonu me baleta vakatabakidua tiko na sakaramede se na nona solibula na iVakabula. Me baleta na ikuri ni ivakamacala, raica na “Serenilotu ni iVakakoso,” Serenilotu, 380–81.
Na ivakatagi ni curu ena vakatagitaki ni ra soqoni vata mai na lewenilotu ni bera na soqoni. Na kena inaki oya me tauyavutaki e dua na yalo ni sokalou e sureta na Yalo. Ni oti na isogomasu, sa na vakatagitaki e dua na sere ni suka ni ra biubiu tiko na soqoni na lewenilotu. Sa rawa ni digitaki na serenilotu kei na sereivakatagi tabu tale eso me baleta na sere ni curu kei na sere ni suka.
E rawa talega ni oka ena soqoni ni sakaramede e dua tale na sere ni ivavakoso ka lagati ena lomaloma ni soqoni—me vakataka, ena maliwa ni vosa eso. Se e rawa ni oka kina e dua se sivia na sereivakatagi digitaki tale eso. Sa rawa me ra vakaitavi eke na matasere (raica na 19.3.7), lagati se ivakatagi walega, se ilawalawa lalai. E sega ni dodonu me soli na gauna ni soqoni ni sakaramede ki na dua na mataivakatagi se sere mai taudaku.
Na piano, oqani, se dua tale na ivakatagi vakadonui mai vei iratou na matabisopi e rawa ni vakayagataki me salavata kei na serenilotu ena soqoni ni sakaramede (raica na 19.3.6).
Era na saga na kodineita kei na matabisopi me ra raica me tudonu vakatautauvata na serenilotu e kilai levu kei na kena e sega soti ni kilai vakalevu. Na sere digitaki eso era lagata na matasere ni tabanalevu se so tale ena rawa ni vukei ira na lewenilotu me ra kila vakavinaka cake na serenilotu e sega soti ni kilai levu.
19.3.3
Sere/iVakatagi ena Kalasi kei na Soqoni Tale Eso ni Tabanalevu
Na laga serenilotu e rawa ni dua na sala mana ni kena vakatakilaitaki se vakaqaqacotaki na ivakavuvuli ni kosipeli. Me ra veivakayaloqaqataki na iliuliu vei ira na qasenivuli me ra vakayagataka na serenilotu kei na sereivakatagi tabu tale eso me vakabulabulataka na nodra veivakavulici.
Na soqoni ni kuoramu kei na kalasi ena Sigatabu e sega ni dau tekivutaki ena dua na sere me dolavi kina.
19.3.4
Sere/iVakatagi ena Koniferedi ni iTeki
Na sereivakatagi ni koniferedi ni iteki e dodonu me tuvalaki me vakaqaqacotaki kina na vakabauta kei na ivakadinadina. E dodonu me vakamuria na ivakavuvuli ena 19.3.1. Ena raica raraba na iliuliu vakatulewa na sereivakatagi kece sa vakaturi mai ena itekivu ni ituvatuva.
Na sereivakatagi ni koniferedi ni iteki e dau okati kina na lagasere ni ivavakoso kei na sereivakatagi digitaki tale eso mai na dua na matasere, domodua, se ilawalawa lalai. Era na dau lagata na ivavakoso e dua na serenilotu ena lomaloma ni soqoni. Sa rawa vei iratou na mataveiliutaki ni iteki me ratou vakadonuya na domodua kei na iyaya ni ivakatagi tale eso ka sega ni piano se oqani (raica na 19.3.6).
19.3.5
Sere/iVakatagi Tale Eso ena Valenilotu
E rawa ni dau vakayagataki ena veigauna tale eso na valenilotu me baleta na soqo ni cakacaka ni ivakaraitaki vakavanua ka oka kina na sere kei na ivakatagi vaka vuravura, me vaka na vakatasuasua, meke, kei na so tale na ivakaraitaki. Me vaka ni sega ni dau vakadonui na vakasausau ena gauna ni qaravi ni sokalou, ena rairai veiganiti kei na veisoqo sa tukuni oti toka oqo.
Era na sauma na veiliutaki ni matabete e veivanua na taro me baleta na itaviqaravi vakavanua e vakayacori e valenilotu. Raica na 35.5 me baleta na itukutuku ni kena vakayagataki vakadodonu na veivalenisoqoni.
19.3.6
iYaya ni iVakatagi
Na iyaya ni vakatagi bula e dau vakayataki ena sere ni curu kei na sere ni suka ka vakakina na kena vakayagataki me salavata kei na sere ni lotu ena veisoqoni ni Lotu. Ena vanua era tu kina kei na vanua e rawa ni ra vakatagitaka kina na lewenilotu, na oqani kei na piano era sa iyaya tudei ni ivakatagi. Sa rawa me ratou vakadonuya na matabisopi na vakayagataki ni iyaya ni ivakatagi tale eso me salavata kei na lagasere vakaivavakoso, ena sereivakatagi ni curu kei na suka, kei na sereivakatagi digitaki tale eso.
Na iyaya ni vakatagi me vakaraitaka na yalo ni sokalou ka me vakatagitaki me sala vata kei na maroroi ni yalo ni soqoni.
Ke sega ni tiko na piano, oqani, se iyaya me veitokoni, sa rawa me vakayagataki na kena sa katoni rawa tu (raica na 19.2).
19.3.6.1
Kau Mai ni iYaya ni iVakatagi
Ena dau soli mai ki na vale ni Lotu na kena oqani, piano, se kibod livaliva. E rawa ni ra veitaratara na iliuliu ki vua na manidia ni iyauqaqa me baleta na itukutuku ni kena vakarautaki na iyaya vou se kena isosomi.
19.3.6.2
Maroroi Vinaka ni iYaya ni iVakatagi
Sa dau ki-taki donu ka maroroi vinaka na piano kei na oqani ena veigauna. Na bisopi se na mata ni vale ni iteki e rawa ni veitaratara kei na manidia ni iyauqaqa ena vuku ni vakatataro eso. Ni sa gadrevi, sa rawa talega vua me vakauta e dua na kerekere ena Facility Issue Reporting (FIR) me maroroi ka vakavinakataki kina na piano kei na oqani (raica na 35.4.2).
19.3.7
Matasere
Me vakatekivu mai na gauna ni Veiyalayalati Makawa, era sa dau lagasere na luve ni Kalou ena matasere me ra vakacaucautaki Koya kina. Na matasere ni Lotu e kauta mai na lagilagi ki vua na Kalou, me vakaduavatataki ka vakaqaqacotaki ira na lewe ni Lotu, ka kauta mai na reki vei ira era vakaitavi kei na ivavakoso.
Ena vanua e veirauti kina na iwiliwili ni lewenilotu, e rawa ni ra tauyavutaka na tabanalevu na matasere me lagasere ena soqoni ni sakaramede e veigauna. Me ratou kaciva na matabisopi e dua na dairekita ni matasere kei na dua na kenadau ni taba oqani kei na piano ni matasere (raica na 19.4.3.3.3).
Sa rawa vei ira na lewe ni tabanalevu me ra solia wale na nodra gauna me ra lagasere ena matasere. E rawa talega ni ra sureti na lewenilotu kei ira tale eso me ra vakaitavi. E sega ni dau vakayacori na vakatovotovotaki ni domo.
Era sa vakayaloqaqataki na matasere me ra vakayagataka na sere ni Lotu. Na lagati ni serenilotu ena sureta na Yalo ka vukei ira na vakaitavi ena matasere kei na ivavakoso me ra vulica na kosipeli (raica na Serenilotu, 381–83). Kevaka era vakayagataki eso tale na sereivakatagi tabu, me vakamuri na idusidusi ena 19.3.1 .
Na vakatovotovo ni matasere e sega ni dau sivita e dua na auwa.
Kevaka e gadreva na matasere ni tabanalevu na pepa ni sereivakatagi, ena rawa ni voli ena ilavovakarau ni tabanalevu (raica na 19.7.1). Era sa vakayaloqaqataki na matasere ni tabanalevu me ra wasea na sereivakatagi voli vei ira na matasere tale eso ena iteki. Na lavetaki ni ikabakaba ni sereivakatagi ka sega ni vakadonuya na kena itaukei e veisaqasaqa kei na lawatu ni Lotu (raica na 38.8.11).
Me ikuri ni matasere ni tabanalevu, sa rawa me ra sureti na matavuvale kei na ilawalawa ni marama, tagane, itabagone, se gonelalai me ra lagasere ena soqoni ni Lotu.
Ena nodra veivakadonui na iliuliu ni iteki se iwasewase, sa rawa me tauyavutaki na matasere ni iteki kei na veimata iteki me baleta na koniferedi ni iteki kei na soqo tale eso, me vaka na soqoni vakaitikotiko raraba. Ni oti na soqoni se soqo, ena tu vakawawa na matasere me yacova ni vakayacori e so tale na soqo.
19.4
Veiliutaki ni Sere/iVakatagi ena Tabanalevu
19.4.1
Matabisopi
Sa nona itavi na bisopi na sereivakatagi ena tabanalevu. E rawa ni lesia na itavi oqori ki na dua vei rau na nona daunivakasala. Sa ikoya oqo na nodra itavi na matabisopi:
Kaciva ka tabaki ira na lewenilotu me ra veiqaravi ena veikacivi ni sereivakatagi e vakamacalataki tiko ena 19.4.2 kei na 19.4.3 ni sa gadrevi.
Cakacaka vata kei na kodineita ni sereivakatagi ena tabanalevu me tuvanaki na sereivakatagi ena soqoni ni sakaramede (raica na 19.3.1).
Vakavulica na bibi ni sokalou ena sereivakatagi ena soqoni. Vakayaloqaqataki ira na lewenilotu me ra vakaitavi ena lagasere vakaivavakoso. Vakayaloqaqataki ira na lewenilotu, vakauasivi vei ira na itabagone, me ra vakayagataka e veisiga na sereivakatagi veilaveti ena nodra dui bula (raica na 19.2).
Vakatulewataka ni sa rawa me vakayagataki na iyaya ni vakatagi tale eso ka sega ni piano se oqani walega ena veisoqoni ni Lotu (raica na 19.3.6).
Tokona na matasere ni tabanalevu ena nona vakayaloqaqataki ira na lewenilotu me ra vakaitavi.
19.4.2
Kodineita ni Sere/iVakatagi ena Tabanalevu
Na kodineita ni sereivakatagi ena tabanalevu e veiqaravi ena nodratou veidusimaki na matabisopi. Sa ikoya oqo na nona ilesilesi:
Me ivurevure vei iratou na matabisopi kei ira na iliuliu tale eso ni tabanalevu ena veika ni sereivakatagi. Me tiko ena bose ni matabose ni tabanalevu ni sureti mai vei bisopi me vukea na kena vakacokotaki na sere ena tabanalevu.
Cakacaka vata kei iratou na matabisopi me tuvanaki na sereivakatagi ena soqoni ni sakaramede (raica na 19.3.1 kei na 19.3.2).
Vakatututaka ka liutaka na parokaramu ni vulici ni sere ena tabanalevu, ke gadrevi vakakina (raica na 19.6). Vukei ira na lewenilotu me ra kunea na madigi me ra taracake ka vakayagataka na nodra taledi ni sereivakatagi ena tabanalevu.
Ena nodratou kerekere na matabisopi, vakaturi ira na lewenilotu me ra veiqaravi ena veikacivi ni sereivakatagi ena tabanalevu. Tuberi ira era veiqaravi ena veikacivi oqo, veitokoni, veidusimaki, kei na veituberi ni sa gadrevi.
Veiqaravi ena veikacivi tale eso ni sereivakatagi ena tabanalevu kevaka era sa bera ni kacivi eso tale.
Veitalanoa kei na kodineita ni sereivakatagi ena iteki me baleta na vuli kei na veitokoni ni sa gadrevi.
Ena veitabanalevu e levu toka na kena iwilwili, sa rawa vei iratou na matabisopi me ratou kacivi ira na lewenilotu me ra veiqaravi ena veikacivi eso oqo. E rawa ni ra kacivi na itabagone kei ira na matalotu tale eso me ra veiqaravi. Sa rawa me ratou taurivaka na matabisopi na veikacivi oqo ni sa ganita me sotava na gagadre ni nodratou tabanalevu.
19.4.3.1
iLiuliu ni Sere/iVakatagi ena Tabanalevu
Ena liutaka o iliuliu ni sereivakatagi na serenilotu ni ivavakoso ena soqoni ni sakaramede kei na soqoni tale eso ni tabanalevu ni sa kerei vakakina.
19.4.3.2
Kenadau ni Piano ke na Oqani ni Sere/iVakatagi ni Tabanalevu
Ena vakarautaka o dau ni piano kei na oqani na sere ni curu kei na sere ni suka ka vakakina na serenilotu ena soqoni ni sakaramede kei na soqoni ni tabanalevu tale eso ni sa kerei vakakina. Ni sa gadrevi, sa rawa talega vei dau ni piano kei na oqani me salavata kei na matasere se me veiqaravi vakadautabapiano ena Lalai.
Ni sega ni dua ena tabanalevu e rawa ni vakatagitaka na piano se oqani, oqo na veika e rawa ni vakayacori:
E rawa ni vakatagitaka e dua na lewenilotu e dua tale na iyaya ni ivakatagi sa vakadonuya o bisopi (raica na 19.3.6).
Sa vakarautaki tu na piano kei na oqani vakalivaliva sa parokaramutaki tu kina na ivakatagi veitokoni ni serenilotu ena so na valenilotu (raica na 19.3.6.1).
Sa rawa vei ira na lewenilotu me ra vakayagataka na katokatoni mai na ivurevure eso oqo:
App ni Sereivakatagi Tabu se Sacred Music App
App ni Valenivola ni Kosipeli se Gospel Library App
Dairekita ni Matasere kei na Daunitaba Piani kei na Oqani ni Matasere
Ena vakatura o dairekita ni matasere ni tabanalevu na sereivakatagi me ra lagata na matasere, liutaka na vakatovotovo ni matasere, ka liutaka na matasere ena soqoni ni sakaramede (raica na 19.3.7).
Na daunitaba piano kei na oqani ni matasere ni tabanalevu ena vakatagi ena vakatovotovo ni matasere kei na gauna e lagasere kina na matasere ena soqoni ni sakaramede.
Me baleta na ikuri ni ivakamacala ni kena liutaki na matasere, raica na ivolavakarau Vuli Veiliutaki ena Sere tabana e 73–83.
19.4.3.4
iLiuliu ni Sereivakatagi ni Lalai kei na Dautabapiano ni Lalai
Sa rawa vei iratou na matabisopi me ratou kaciva eso na kenadau me ra veivuke ena vakavulici ni sere ena tabanalevu (raica na 19.6).
19.5
Veiliutaki ni Sere/iVakatagi ena iTeki
19.5.1
Mataveiliutaki ena iTeki
O peresitedi ni iteki ena raica raraba na sereivakatagi ena iteki. Sa rawa vua me lesia na itavi oqo ki vua e dua na nona daunivakasala se dua na lewe ni matabose e cake:
Kaciva ka tabaki ira na lewenilotu me ra veiqaravi ena veikacivi ni sereivakatagi e vakamacalataki tiko ena 19.5.2 kei na 19.5.3 ni sa gadrevi vakakina.
Veitalanoa kei kodineita ni sereivakatagi ena iteki me tuvanaki na sere ena koniferedi ni iteki kei na soqo tale eso ni iteki (raica na 19.3.1, 19.3.4, kei na 19.3.7.2).
Vakavulica na bibi ni sokalou ena sereivakatagi ena soqoni. Vakayaloqaqataki ira na lewenilotu me ra vakaitavi ena lagasere vakaivavakoso. Vakayaloqaqataki ira na lewenilotu me ra vakayagataka e veisiga na sereivakatagi veilaveti ena nodra dui bula (raica na 19.2).
Vakatulewa ena kena vakayagataki na iyaya ni vakatagi tale eso ka sega walega ni piano se oqani ena veisoqoni ni iteki (raica na 19.3.6).
19.5.2
Kodineita ni Sere/iVakakatagi ena iTeki
Ena nodratou veidusimaki na mataveiliutaki ni iteki, oqo na ilesilesi nei kodineita ni sereivakatagi ni iteki:
Me ivurevure vei iratou na mataveiliutaki ni iteki kei ira na iliuliu tale eso ni iteki ena veika ni sereivakatagi.
Veitalanoa kei iratou na mataveiliutaki ni iteki me tuvanaki na sereivakatagi ena soqoni ni koniferedi ni iteki kei na soqo tale eso ni iteki (raica na 19.3.1, 19.3.4, kei na 19.3.7.2).
Vakatura ka liutaka na parokaramu ni vakavulici ni sere ena iteki (raica na 19.6).
Ena nodratou kerekere na mataveiliutaki ni iteki, ena vakaturi ira na lewenilotu me ra vakatawana na veikacivi ni sereivakatagi ena iteki. Veituberi vei ira era veiqaravi ena veikacivi oqo. Solia na veitokoni, veidusimaki, kei na veituberi ni sa gadrevi vakakina.
Vakarautaka na vuli kei na veitokoni vei ira na kodineita ni sereivakatagi ena tabanalevu ni sa gadrevi vakakina.
Veiqaravi vaka iliuliu ni sereivakatagi ka dairekita ni matasere ena soqoni ni iteki kevaka era sa bera ni kacivi eso.
E rawa ni ra kacivi na daunisereivakatagi eso ni iteki ni sa gadrevi vakakina. E rawa ni ratou oka kina e dua na dairekita ni matasere ena iteki, iliuliu ni sereivakatagi ena iteki, kei na daunitaba ivakatagi ni iteki. Sa rawa talega ni ra lesi na kenadau ni sereivakatagi ena iteki me ra vakarautaka na vuli sere (raica na 19.6).
19.6
Vuli Sereivakatagi kei na iVurevure
Na kena vulici ka kilai vinaka na sereivakatagi ena vakarautaki ira na lewenilotu me ra vakayagataka na nodra taledi me ra veiqaravi kina ena Lotu. Na ivurevure eso oqo e rawa ni vukei ira e tiko na nodra veikacivi ni sereivakatagi. E rawa talega ni vukei ira kece na lewenilotu era taleitaka na kena vakatoroicaketaki na rawaka ni sereivakatagi.
E dua na valenivola ni pepa ni sereivakatagi kei na katokatoni ni sereivakatagi me vakayagataki e vale kei na lotu sa vakarautaki tu ena app ni Sereivakatagi Tabu se na Sacred Music app ka vakakina ena initaneti ena music.ChurchofJesusChrist.org. Na vakarorogo ki na katokatoni e rawa ni vukei ira na lewenilotu me ra kila vakavinaka cake na serenilotu.
Na misini ni sere veimaliwai ena ChurchofJesusChrist.org e rawa ni vukei ira era vakasaqara tiko me ra vulica na sereivakatagi vou se vakatorocaketaka na nodra kila-ka ni sereivakatagi.
Na Vuli Sereivakatagi Taumada ena rawa ni vukei ira na lewenilotu me ra vulica na ivakarau ni kena wiliki kei na vakatagitaki ni sereivakatagi. E oka kina na Kato ni Vuli kei na Kato ni Vuli Kibod livaliva. Na ivurevure eso oqo e rawa ni voli ena store.ChurchofJesusChrist.org.
Sa tauyavutaka na itikotiko liu ni Lotu e dua na iLavo ni Vuli Sereivakatagi me vakarautaki kina na kibod, iyaya vakaivola ni vuli, kei na idusidusi vei ira na lewenilotu me ra vakatoroicaketaka kina na nodra kila maqosa na sereivakatagi. Me baleta na ivakamacala ni ilavo oqo, raica na musicfund.ChurchofJesusChrist.org.
Sa rawa vei iratou na kodineita ni sereivakatagi ena iteki kei na tabanalevu me ratou tuvanaka na vuli sere taumada baleti ira na iliuliu ni sereivakatagi, dairekita ni matasere, se dautaba piano kei na oqani. O ira me ra okati kina e rawa ni wili kina o ira era veiqaravi tiko ena gauna oqo ena veikacivi ni sereivakatagi ka vakakina e so tale na qase, itabagone, kei ira na gonelalai era na via vakataivi kina. Sa rawa vei ira na kodineita ni sereivakatagi se o ira na kenadau me ra veituberi ena vuli. Sa rawa talega vei ira na kodineita ni sereivakatagi me ra vakatura eso na qasenivuli vakaivola me ra veivakavulici.
Ena veivanua e veirauti kina na iwiliwili ni lewenilotu, sa rawa vei ira na kodineita ni sereivakatagi me ra veitalanoa kei ira na iliuliu ni matabete ka vakatututaka na kena tauyavutaki na vuli ni iteki se veimataiteki. E sega ni saumi na vuli e dau vakarautaka na Lotu.
19.7
iKuri ni Lawatu kei na iDusidusi
19.7.1
Rawati kei na Vakayagataki ni Sere/iVakatagi
Ena dau soli ki na veivalenilotu vou na nodra serenilotu. Na ikuri ni serenilotu, sere ni matasere, kei na sereivakatagi tale eso me qai voli ga mai ena ilavo vakarautaki ni iteki se tabanalevu.
19.7.2
Vakayagataki ni iYaya ni iVakatagi ni Valenilotu me Baleta na Vakatovotovo, Tuberi ni Tamata Yadua, kei na Meke Vakalotu
Kevaka e sega ni tiko e dua na kena isosomi e veiganiti, e rawa ni ratou solia na iliuliu ni matabete na veivakadonui me vakayagataki na piano kei na oqani ni valenilotu ena vuli, saumi ni dauveivakatavulici mai tautuba, kei na lagasere ka ra vakaitavi kina o ira na lewenilotu ni tabanilotu era vakayagataka tiko na valenilotu o ya. Na veivakadonui oqo e vakabau ga me vaka e vakamacalataki tiko ena 35.5.6.1. E na sega ni lavaki e dua na icurucuru ki na rogo sere oqo.
19.7.3
Matasere ni iTikotiko Raraba
Na matasere ni itikotiko raraba lesi vakabalavu era veiliutaki ka ra lewena vakalewelevu na lewe ni Lotu e sega ni veiqaravi kina na Lotu. Na veimatasere oqo me ra kakua ni biuta na itukutuku ni Lotu ena yacadra.
Kevaka e ratou vakadonuya na mataveiliutaki ni iteki, e rawa ni ra vakayagataka na matasere ni itikotiko raraba na veivale ni Lotu me baleta na nodra vakatovotovo kei na vakatasuasua. E dodonu me ra muria na ivakatagedegede kei na lawatu ni Lotu me baleta na valenilotu (raica na 35.5).