« 11. Feiā ’āpī tamāhine », Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei (2020).
« 11. Feiā ’āpī tamāhine », Buka arata’i rahi.
11.
Feiā ’Āpī Tamāhine
11.1
Te fā ’e te fa’anahonahora’a
E tauturu te fa’anahonahora’a a te Feiā ’Āpī Tamāhine i te mau tamari’i a te Atua ’ia fa’aineine nō te ho’i i mua i tōna ’aro. ’A rohi ai rātou nō te riro mai ’ei mau tamāhine nō te fafaura’a a te Atua, « o te parau-tia ’e te mana o te Atua i te hanahana rahi ra, ’o tā rātou ïa mauha’a » (1 Nephi 14:14).
11.1.1
Fā
E tauturu te fa’anahonahora’a a te Feiā ’Āpī Tamāhine i te feiā ’āpī tamāhine ’ia rave ’e ia ha’apa’o i te mau fafaura’a mo’a ’e ’ia fa’ahōhonu i tō rātou fa’afāriura’a ia Iesu Mesia ’e tāna ’evanelia.
Te fā a te hō’ē piha ha’api’ira’a nō te feiā ’āpī tamāhine o te tauturura’a ïa i te feiā ’āpī tamāhine ’ia ’ohipa ’āmui nō te rave-fa’aoti-ra’a i te ’ohipa nō te fa’aorara’a ’e te fa’ateiteira’a. I roto i tā rātou piha ha’api’ira’a, e tāvini te feiā ’āpī tamāhine ia vetahi ’ē, e rave fa’aoti i te mau hōpoi’a o te fafaura’a, e patu i te tāhō’ēra’a, ’e e ha’api’i mai ’e e ora i te ha’api’ira’a tumu.
11.1.2
Te parau tai’o a te Feiā ’Āpī Tamāhine
E nehenehe te parau tai’o a te feiā ’āpī tamāhine e tauturu i te feiā ’āpī tamāhine tāta’itahi ’ia hāro’aro’a i tōna ti’ara’a hanahana ’e ’ia fa’afāriuhia ’ia Iesu Mesia. E tai’o te feiā ’āpī tamāhine ’e tō rātou feiā fa’atere i te parau tai’o i te ’ōmuara’a o te mau purera’a i te sābati ’e i te tahi atu mau putuputura’a Feiā ’Āpī Tamāhine. Teie te parau tai’o :
« E tamāhine herehia vau e nā Metua i te ra’i ra, mā te nātura hanahana ’e te hope’a mure ’ore.
« ’Ei pipi nā Iesu Mesia, tē tūtava nei au ’ia riro mai iāna ra te huru. Tē ’imi nei au ’e tē rave nei au mai te au i te heheura’a e tae mai iā’u nei ’e tē aupuru nei au ia vetahi ’ē i tōna i’oa mo’a.
« E ti’a atu vau ’ei ’ite nō te Atua i te mau taime ato’a ’e i roto i te mau mea ato’a ’e i te mau vāhi ato’a.
« ’A tūtava ai au ’ia noa’a te fa’ateiteira’a, e poihere au i te hōro’a nō te tātarahapa, ’e e ’imi au i te ha’amaita’i iā’u i te mahana tāta’itahi. Ma te fa’aro’o, e ha’apūai au i tō’u ’utuāfare ’e i tō’u mau fēti’i, e rave au i te mau fafaura’a mo’a ’e e ha’apa’o vau i te reira, ’e e fāri’i au i te mau ’ōro’a ’e te mau ha’amaita’ira’a o te hiero mo’a ».
11.1.3
Hōho’a
ītona, te mau arata’ira’a nō te fa’atanora’a
Piha ha’api’ira’a
E riro te feiā ’āpī tamāhine ’ei melo nō te hō’ē piha ha’api’ira’a Feiā ’Āpī Tamāhine, ma te ha’amata i te ’āva’e Tēnuare o te matahiti e ti’ahia ai tō rātou matahiti i te 12.
E fa’anahohia te mau piha ha’api’ira’a Feiā ’Āpī Tamāhine ’ei mau pupu matahiti. Hō’ē pupu matahiti, ’o te feiā ’āpī tamāhine pā’āto’a ïa o te ti’ahia hō’ē ā matahiti i roto i te hō’ē matahiti tārena. E nehenehe e ’āmui i roto i te hō’ē piha ha’api’ira’a hau atu i te hō’ē pupu matahiti. E nu’u te feiā ’āpī tamāhine i roto i te hō’ē piha ’āpī i te ’āva’e Tēnuare o te matahiti e ti’ahia tō rātou matahiti i te fāito matahiti o taua piha ha’api’ira’a ra.
Nā roto i te pure, e fa’aoti te mau ’episekōpora’a ’e te feiā fa’atere ta’ata pa’ari o te feiā ’āpī tamāhine e nāhea ’ia fa’anahonaho i te piha ha’api’ira’a ’ia au i te fāito matahiti. E feruri rātou i te mau rāve’a fa’aterera’a nō te feiā ’āpī tamāhine. E mā’itihia hō’ē peresideni nō te piha tāta’itahi, ’e mai te mea e nehenehe, hō’ē ’aore rā, e piti tauturu ’e hō’ē pāpa’i parau. Mai te mea e nehenehe, e ti’a ’ia fa’anahohia te mau piha ha’api’ira’a ’ia nava’i te rarahi, ’ia ti’a i te mau peresidenira’a ’ia tāvini i te mau melo o te piha ha’api’ira’a.
E parauhia te mau piha i te hō’ē noa i’oa, ’oia ho’i « Te Feiā ’Āpī Tamāhine ». Mai te mea e hau i te hō’ē piha i roto i te hō’ē pāroita, e fa’a’ohipahia te pupu matahiti nō te fa’ata’a i te mau piha— ’ei hi’ora’a, « feiā ’āpī tamāhine 12–14 ».
11.2
Te ’āmuira’a i roto i te ’ohipa nō te fa’aorara’a ’e te fa’ateiteira’a
Tē ani nei te Atua i te mau ta’ata ato’a ’ia haere mai i te Mesia ’e ’ia tauturu i roto i tāna ’ohipa nā roto i :
Te orara’a i te ’evanelia a Iesu Mesia.
Te utuutura’a i te feiā nava’i ’ore.
Te anira’a i te mau ta’ata ato’a ’ia fāri’i i te ’evanelia.
Te tāhō’ēra’a i te mau ’utuāfare nō te tau a muri atu.
E paraparau ’āmui te mau peresidenira’a piha, pāturuhia e te feiā fa’atere ta’ata pa’ari, nō ni’a i te huru nō te rave-fa’aoti-ra’a i teie ’ohipa. Nō te ha’amāramaramara’a hau, nō ni’a i te ’ohipa nō te fa’aorara’a ’e te fa’ateiteira’a, ’a tuatāpapa i te pene 1.
11,2.1
Te orara’a i te ’evanelia a Iesu Mesia
11.2.1.1
Te mau ’ohipa a te mau metua ’e te feiā fa’atere
E hōpoi’a nā te mau metua ’ia ha’api’i i tā rātou mau tamari’i i te ’evanelia ’e ’ia tauturu ia rātou ’ia ora i te reira (hi’o Te Ha’api’ira’a Tumu ’e te mau Fafaura’a 68:25–28). E pāturu te ’episekōpora’a, te feiā fa’atere nō te feiā ’āpī tamāhine, ’e te mau peresidenira’a piha ha’api’ira’a, i te mau metua i roto i teie hōpoi’a mai teie i muri nei :
E fa’aitoito i te ’āparaura’a i rotopū i te feiā ’āpī tamāhine ’e tō rātou ’utuāfare.
E ha’apāpū ē, tē pāturu nei ’e tē ha’amaita’i nei te mau ’ohipa ri’i a te feiā ’āpī i te mau ’utuāfare.
E tauturu i te mau metua ’ia fa’aineine i tā rātou mau tamāhine nō te ’ōro’a hiero, nō te tāvinira’a misiōnare rave tāmau (mai te mea e hina’aro te feiā ’āpī tamāhine), te fa’aipoipora’a hiero, ’e te ti’ara’a metua vahine.
E ara ato’a te feiā fa’atere i ni’a i te feiā ’āpī ’aita te ’utuāfare e pāturu ia rātou nō te ora i te ’evanelia.
E tūtava te mau metua ’e te feiā fa’atere ’ia riro rātou ’ei mau hi’ora’a maita’i nō te feiā ’āpī. E arata’i rātou i te mau tamari’i i roto i tā rātou mau tauto’ora’a ’ia riro hau atu mai ia Iesu Mesia. E nehenehe te fa’anahora’a a te mau tamari’i ’e a te feiā ’āpī e tauturu i roto i teie mau tauto’ora’a (hi’o ChildrenandYouth.ChurchofJesusChrist.org).
11.2.1.2
Te ha’api’ira’a mai i te ’evanelia
E fa’aitoito te feiā fa’atere ’e te mau peresidenira’a o te Feiā ’Āpī Tamāhine i te feiā ’āpī tamāhine ’e tō rātou mau ’utuāfare ’ia ha’api’i mai i te ’evanelia i te fare. E tuatāpapa te feiā fa’atere i te ’evanelia ’e e fa’a’ite atu i te feiā ’āpī tamāhine i te mau mea tā rātou i ha’api’i mai. E ani rātou i te mau melo o te piha ha’api’ira’a ’ia fa’a’ite mai i te ’ekālesia i te mau mea tā rātou i ha’api’i mai i te fare.
E putuputu te mau piha feiā ’āpī tamāhine i te sābati nō te ha’apūai i te fa’aro’o, nō te patu i te hō’ēra’a, nō te ha’apūai i te mau ’utuāfare ’e i te mau fare, ’e nō te rave i te mau fa’anahora’a nō te rave fa’aoti i te ’ohipa o te fa’aorara’a ’e te fa’ateiteira’a. Nā te mau peresidenira’a piha ha’api’ira’a, pāturuhia e te feiā fa’atere ta’ata pa’ari, e fa’anaho i te mau putuputura’a o te sābati.
E fa’atupuhia te mau putuputura’a a te piha ha’api’ira’a i te piti ’e te maha o te sābati o te ’āva’e tāta’itahi. E 50 minuti te maoro. Nā te hō’ē melo nō te peresidenira’a o te piha e arata’i. E arata’i ’oia i te piha ha’api’ira’a ma te tai’ora’a i te parau tai’o ’e ’ia ’āparau ’āmui nō ni’a i te mau fa’auera’a ’ohipa ’e te tahi atu mau mea.
I muri iho, nā te hō’ē melo o te piha ’aore rā, te hō’ē fa’atere ta’ata pa’ari e arata’i i te ha’api’ira’a ’evanelia. E paraparau te mau peresidenira’a piha ha’api’ira’a ’e te feiā fa’atere ta’ata pa’ari nō te fa’aoti e nā vai e ha’api’i. E ’itehia te mau arata’ira’a o te putuputura’a i roto i te Mai, pe’e mai—nō te mau pupu Autahu’ara’a a Aarona ’e te mau piha ha’api’ira’a a te Feiā ’Āpī Tamāhine (hi’o ComeFollowMe.ChurchofJesusChrist.org).
Mai te mea i roto i te hō’ē pāroita, ’ua hau atu i te hō’ē piha ha’api’ira’a feiā ’āpī tamāhine, e fa’ata’a ’ē rātou i te putuputura’a. Terā rā, e nehenehe rātou e putuputu ’āmui, mai te mea tē vai ra te hō’ē hina’aro ta’a ’ē. E nehenehe te feiā ’āpī tamāhine ’e te feiā ’āpī tamāroa e putuputu ’āmui i te tahi taime nō te hō’ē ha’api’ira’a i te sābati, mai te au i te arata’ira’a a te ’episekōpora’a.
E fa’aitoitohia te feiā ’āpī tamāhine ’ia haere i te ha’api’ira’a séminaire (hi’o 15.1).
11.2.1.3
Te tāvinira’a ’e te mau ’ohipa ri’i
Nā te mau peresidenira’a piha ha’api’ira’a, ma te pāturuhia e te feiā fa’atere ta’ata pa’ari, e fa’anaho i te ’ohipa tāvinira’a ’e te mau ’ohipa ri’i. E ti’a i te reira ’ia tauturu i te rave-fa’aoti-ra’a i te ’ohipa o te fa’aorara’a ’e te fa’ateiteira’a. E ti’a i te tāvinira’a ’e te mau ’ohipa ri’i ’ia patu i te mau ’itera’a pāpū, ’ia ha’apūai i te mau ’utuāfare, ’ia fa’atupu i te hō’ēra’a o te piha ha’api’ira’a, ’e ’ia hōro’a i te mau rāve’a nō te ha’amaita’i ia vetahi ’ē. ’Ia ravehia te reira i roto e maha tuha’a o te tupura’a o te ta’ata iho : te pae vārua, te pae tōtiare, e pae tino, ’e te pae o te ferurira’a.
E fa’atupuhia te rahira’a o te mau ’ohipa ri’i a te feiā ’āpī i te mau taime ta’a ’ē atu i te sābati ’aore rā, i te pō monirē. E ravehia te reira hō’ē taime i te hepetoma. I roto i te tahi mau fenua, nō te ātea, nō te pārurura’a, ’aore rā, nō te tahi atu mau tumu, ’aita e nehenehe e fa’atupu i te mau ohipa ri’i. I roto i te reira mau fenua, e nehenehe e fa’aiti ri’i mai te fa’atupura’a i te reira mau ’ohipa ri’i, e ti’a rā ’ia fa’atupu i te reira hō’ē a’e taime i te ’āva’e.. Enehenehe e fa’anaho i te mau ’ohipa ri’i i ni’a i te Sample Service and Activity Planne (Hi’ora’a nō te fa’anahora’a i te tāvinira’a ’e te ’ohipa ri’i), e vai ra i ni’a i te ChurchofJesusChrist.org.
Tē vai ra te tahi tāvinira’a ’e te tahi mau ’ohipa ri’i e ’āmui i te feiā ’āpī tamāroa ’e te feiā ’āpī tamāhine, nō te feiā ’āpī pa’ari a’e iho ā rā.
E nehenehe te feiā ’āpī e fāna’o i te autahira’a i roto i te mau pupu rarahi a’e. E nehenehe te feiā ’āpī i roto e piti pāroita ’aore rā, hau atu e putuputu ’āmui i te tahi taime nō te tāvinira’a ’e te mau ’ohipa ri’i. E nehenehe te mau titi ’aore rā, te mau mata’eina’a e fa’anaho i te tahi taime i te tāvinira’a ’e te mau ’ohipa ri’ nā te feiā ’āpī.
E tauturu te feiā fa’atere pa’ari ’ia ha’apāpū ē, e mea pāruruhia te mau ’ohipa ri’i (hi’o safety.ChurchofJesusChrist.org ; hi’o ato’a 20.6.20). E tītauhia ’ia tae mai e piti a’e ti’a fa’atere ta’ata pa’ari i roto i te mau ’ohipa ri’i ato’a (hi’o 11.6.1).
Nō te mau ha’amāramaramara’a hau atu, hi’o YoungWomen.ChurchofJesusChrist.org. Hi’o ato’a JustServe.org i te vāhi e roa’a. E hōro’a mai teie mau rāve’a tauturu i te mau mana’o nō te tāvinira’a ’e te ’ohipa ri’i.
Te mau ’ohipa ri’i tāmatahiti Ta’a ’ē atu te mau ’ohipa ri’i tāmau a te feiā ’āpī, e nehenehe ato’a te feiā ’āpī tamāhine e ’āmui atu i roto i teie i muri nei, i te matahiti tāta’itahi :
Hō’ē putuputura’a piri atu i te ’ōmuara’a o te matahiti, nā te feiā ’āpī ’e tō rātou mau metua. E nehenehe te reira e fa’atupu fa’ata’a-’ē-hia nā te feiā ’āpī tamāroa ’e te feiā ’āpī tamāhine, ’aore rā, e fa’atupu ’āmui. E nehenehe ato’a e fa’atupu i te reira nā te pāroita ’aore rā, nā te titi. E arata’ihia ’e e fa’anahohia te reira e nā te mau tauturu o te ’episekōpo i roto i te pupu o te mau tahu’a ’e te peresidenira’a o te piha feiā ’āpī tamāhine pa’ari a’e. E nehenehe te feiā ’āpī tamāhine e ti’ahia te matahiti i te 12 i roto i terā iho matahiti, e fāri’i i tā rātou mau tāpa’o nō te rirora’a ’ei melo, i roto i teie putuputura’a (hi’o 11.6.3). Nō te tahi atu mau ha’amāramaramara’a, hi’o ChildrenandYouth.ChurchofJesusChrist.org.
Hō’ē pūhapara’a nā te feiā ’āpī tamāhine (hi’o Young Women Camp Guide (Te arata’i pūhapara’a nā te feiā ’āpī tamahine)). E nehenehe te feiā ’āpī tamāhine e ’āmui atu i roto i te tahi atu mau pūhapara’a, te mau tupura’a ’ohipa, ’e te mau ’ohipa ri’i i te roara’a o te matahiti, mai te mea tē vai ra.
Hō’ē ’āmuira’a feiā ’āpī nā te pāroita ’aore rā, nā te titi ’aore rā, hō’ē ’āmuira’a Nō te Pūai o te Feiā ’Āpī (JSF) (hi’o FSY.ChurchofJesusChrist.org).
Hō’ē a’e ’ohipa ri’i nō te ha’apāpū i te mau ture i roto i te Nō te Pūai o te Feiā ’Āpī. E nehenehe te feiā ’āpī tamāroa ’e te feiā ’āpī tamāhine e ’āmui i roto i teie tupura’a ’ohipa. E nehenehe ato’a e ani i te mau metua.
Te mau tītaura’a o te matahiti. Ma te parau fa’ati’a a tō rātou mau metua, e nehenehe te feiā ’āpī tamāhine e haere i te pūhapara’a pō a te feiā ’āpī tamāhine e ha’amata i te ’āva’e Tēnuare o te matahiti e ti’ahia ai tō rātou matahiti i te 12. E nehenehe rātou e haere i te mau orira’a, te mau ’āmuira’a feiā ’āpī, ’e te mau ’āmuira’a JSF e ha’amata i te ’āva’e Tēnuare o te matahiti e ti’ahia ai tō rātou matahiti i te 14. Terā rā, ’ia 16 a’e matahiti tō rātou hou ’a arapae ai (hi’o Nō te Pūai o te Feiā ’Āpī [2011], 4).
Aufaura’a i te mau ’ohipa ri’i Nā te faufa’a moni pāroita e ’aufau i te mau ’ohipa ri’i, tae noa atu i te mau tauiha’a. ’Eiaha ’ia rahi roa te mau ha’amāu’ara’a ’e te mau rāterera’a.
Hō’ē ta’a-’ē-ra’a, mai te mea ’aita e rava’i te faufa’a moni a te pāroita nō te ’aufau i te mau ’ohipa ri’i e rave rahi mahana, mai te mau pūhapara’a, e nehenehe te feiā fa’atere e ani i te feiā e haere i te reira ’ohipa ri’i e tauturu i te ’aufau i tā rātou tuha’a. Terā rā, ’eiaha te hō’ē tamāhine ’ia ’ōpanihia ’ia haere mai te mea ’aita tāna e nehenehe e ’aufau. Mai te mea e hina’aro-noa-hia ā te tahi atu moni, e nehenehe te ’episekōpo e fa’ati’a ’ia ravehia te ’imi’imira’a moni i te matahiti tāta’itahi (hi’o 20.2.8).
’Ia ha’apāpū te ’episekōpora’a ē, e rava’i ’e e mea ’aifāito te faufa’a moni ’e te mau ’ohipa ri’i nā te feiā ’āpī tamāroa ’e nā te feiā ’āpī tamāhine. ’Ua fa’ata’ahia te faufa’a moni nō te feiā ’āpī tamāhine mai te au i te rahira’a o te feiā ’āpī tamāhine i roto i te pāroita. ’Ua fa’ata’ahia te faufa’a moni nō te mau pupu Autahu’ara’a a Aarona mai te au i te rahira’a o te feiā ’āpī tamāroa i roto i te pāroita.
Hi’o FSY.ChurchofJesusChrist.org nō te mau ha’amāramaramara’a nō ni’a i te ’aufaura’a i te mau ’āmuira’a JSF.
11.2.1.4
Te fa’ahotura’a iāna iho
I roto i tā rātou mau tauto’ora’a nō te riro hau atu mai te Fa’aora te huru, e anihia i te feiā ’āpī ’ia ha’amau i te mau ’ōpuara’a nō te tupu i te rahi i te pae vārua, te pae tōtiare, i te pae tino ’e i te pae o te ferurira’a (hi’o Luka 2:52). E ’imi te feiā ’āpī i te fa’aurura’a nō te ’ite mai, e aha te ti’a ia rātou ’ia ha’amaita’i. Nā roto i te tauturu a te mau metua, e rave rātou i te mau fa’anahora’a, e ha’a i ni’a i tā rātou mau fa’anahora’a, ’e e feruri i ni’a i te mau mea tā rātou i ha’api’i mai. E hōro’a ato’a te feiā fa’atere i te pāturura’a e hina’arohia. Terā rā, ’eiaha rātou e tāpa’o i te mau ’ōpuara’a a te feiā ’āpī tamāhine ’aore rā, i tō rātou haerera’a i mua. E nehenehe te mau metua ’e te feiā fa’atere e hōro’a i te mana’o nō ni’a i te mau ’ōpuara’a, e vaiiho rā rātou i te feiā ’āpī ’ia ’imi i tā rātou iho fa’aurura’a nō ni’a i te mau ’ōpuara’a e rave.
E fa’aitoitohia te feiā ’āpī ’ia fa’aoti e piti a’e ’ōpuara’a i roto i nā tuha’a tāta’itahi e maha i te matahiti tāta’itahi. E nehenehe rātou e fa’a’ohipa i te Tupura’a o te ta’ata iho : Buka tauturu nō te feiā ’āpī ’aore rā, te fa’anahora’a Te ’Orara’a i te ’Evanelia nō te fa’ata’a ’e nō te tāpa’o i te mau ’ōpuara’a.
E ti’a i te feiā ’āpī tamāhine ’ia fāri’i tāmau i te mau rāve’a nō te tāvini ia vetahi ’ē i roto ’e i pīha’i iho i tō rātou ’utuāfare, i roto i te mau ’ohipa ri’i a te feiā ’āpī, ’e nā roto ia rātou iho. Tē vai ra te mau mana’o nō te tāvinira’a i ni’a ChildrenandYouth.ChurchofJesusChrist.org. I te vāhi tē vai ra, tē hōro’a mai nei te JustServe.org i te mau rāve’a nō te tāvini i roto i te ’oire.
11.2.2.1
Aupururaʼa
Te aupurura’a ’o te ha’apa’ora’a ïa ia vetahi ’ē mai tā te Fa’aora e nā reira. E nehenehe te feiā ’āpī tamāhine e fāri’i i te fa’auera’a nō te aupuru ma te ha’amata i te ’āva’e Tēnuare o te matahiti e ti’ahia ai tō rātou matahiti i te 14. Nō te tahi atu mau ha’amāramaramara’a, hi’o pene 21.
11.2.3
Te anira’a i te mau ta’ata ato’a ’ia fāri’i i te ’evanelia
E ani te feiā ’āpī tamāhine i te mau ta’ata ato’a ’ia fāri’i i te ’evanelia ’a ti’a ai rātou « ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a » (Mosia 18:9). ’Ua tāpurahia i raro nei te tahi mau rāve’a nō te rave i te reira :
Fa’a’ite i te hō’ē hi’ora’a maita’i ’ei mau pipi nā Iesu Mesia.
Fa’a’ite i tō rātou ’itera’a pāpū i te mau hoa ’e i te mau melo o te ’utuāfare.
E aupuru i te mau melo paruparu o tā rātou piha ha’api’ira’a.
E ani i te mau hoa ’ia haere mai i te purera’a ’aore rā, i te mau ’ohipa ri’i a te feiā ’āpī.
Ani i te mau hoa ’ia ’āmui mai i roto i te fa’anahora’a a te mau tamari’i ’e a te feiā ’āpī. E ha’a fātata te feiā fa’atere i pīha’i iho i te mau metua o teie feiā ’āpī nō te tauturu ia rātou ’ia hāro’aro’a i te fa’anahora’a ’e ’ia fa’ata’a nāhea rātou ’e tā rātou mau tamari’i ’ia fa’aō mai i roto.
Ani i te mau hoa ’ia ha’api’ihia e te mau misiōnare.
E nehenehe te mau metua ’e te feiā fa’atere e tauturu i te feiā ’āpī tamāhine ’ia fa’aineine ia rātou nō te fa’a’ite i te ’evanelia i te roara’a o tō rātou orara’a. ’Ua tāpurahia i raro nei te tahi mau rāve’a nō te rave i te reira :
E fa’aitoito i te feiā ’āpī tamāhine ’ia noa’a tō rātou iho ’itera’a pāpū nō ni’a i te fa’anahora’a nō te ’oa’oa a te Metua i te ao ra, te tāra’ehara o Iesu Mesia, ’e te fa’aho’i-fa’ahou-ra’a-hia mai tāna ’evanelia.
E hōro’a i te mau rāve’a nō te tāvini i roto i te ’Ēkālesia.
E hōro’a i te mau rāve’a nō te ha’api’i i te ’evanelia i roto i te mau putuputura’a a te piha ’e i roto i te tahi mau fa’anahora’a.
Mai te mea e hina’aro te feiā ’āpī tamāhine e tāvini i te hō’ē misiōni rave tāmau, e tauturu te mau metua ’e te feiā fa’atere ia rātou ’ia fa’aineine. ’Oia ato’a, e ha’api’i ia rātou nō ni’a i te mau ha’amaita’ira’a ’e te mau tītaura’a o te ’ohipa misiōnare rave tāmau.
E hōro’a te Missionary.ChurchofJesusChrist.org i te tahi atu mau rāve’a ’o tē nehenehe e tauturu i te feiā ’āpī tamāhine e hina’aro e fa’aineine nō te tāvini i te hō’ē misiōni. Hi’o te mau pene 23 ’e te 24 nō te mau ha’amāramaramara’a hau atu.
11.2.4
Te hō’ēra’a te mau ’utuāfare nō te tau a muri atu
E nehenehe te feiā ’āpī tamāhine e tauturu ’ia hō’ē te mau ’utuāfare nō te tau a muri atu nā roto i te mau rāve’a e rave rahi. ’Ua tāpurahia i raro nei te tahi o te reira mau rāve’a :
E fa’atura i tō rātou mau metua ’e e fa’a’ite i te hō’ē hi’ora’a nō te hō’ē orara’a mai tō te Mesia te huru i roto i tō rātou fare.
E fa’aineine ’ia fāri’i i tō rātou iho ’utuāfare mure ’ore.
’Ia vai ti’amā nō te hō’ē parau fa’ati’a tā’ōti’ahia nō te hiero.
E fa’aineine nō te fāri’i i te mau ’ōro’a nō te hiero, e tae noa atu i te fa’aipoipora’a mure ’ore.
E ha’api’i mai nō ni’a i tō rātou mau ’utuāfare fēti’i ’e te mau tupuna (hi’o My Family: Stories That Bring Us Together (Tō’u ’utuāfare : Te mau ’ā’amu e tāhō’ē ia mātou).
E ’imi i te mau tupuna e hina’aro i te mau ’ōro’a hiero (hi’o FamilySearch.org).
E ’āmui pinepine atu i roto i te mau bāpetizora’a ’e te mau ha’amaura’a nō te feiā pohe, mai te mea e nehenehe.
E tāvini ’ei mau tauturu nō te hiero ’e nō te ’ā’amu ’utuāfare ’ia pi’ihia e te ’episekōpora’a (hi’o 25.4.4).
11.3
Te fa’aterera’a i te Feiā ’Āpī Tamāhine o te pāroita
11,3.1
’Ēpisekōpora’a
Te hōpoi’a mātāmua roa a te ’episekōpo o te ha’apa’ora’a ïa i te feiā ’āpī ’āpī tamāhine ’e te feiā ’āpī tamāroa i roto i tāna pāroita. E tāmau mai ’oia ’e tōna nā tauturu i tō rātou i’oa ’e e hāro’aro’a i tō rātou huru orara’a ’utuāfare. E uiui rātou i te feiā ’āpī tamāhine tāta’itahi e piti a’e taime i te matahiti (hi’o 31.1.7).
Tei te ’episekōpo te hōpoi’a nō te fa’anahora’a o te feiā ’āpī tamāhine o te pāroita. E putuputu tāmau ’oia ’e te peresideni feiā ’āpī tamāhine. E fa’a’ite atu ’oia i te mau ’ohipa nō ni’a i te Feiā ’Āpī Tamāhine i roto i te ’āpo’ora’a a te ’episekōpora’a.
E ’āmui tāmau atu te ’episekōpo ’e tōna nā tauturu i roto i te mau putuputura’a a te Feiā ’Āpī Tamāhine, te tāvinira’a ’e te mau ’ohipa ri’i. Mai te mea e rave rahi piha Feiā ’Āpī Tamāhine, e nehenehe te ’episekōpo e fa’ata’a iāna iho ’e tōna nā tauturu nō te ’ohipa i pīha’i iho i te mau piha ta’a ’ē maita’i.
11.3.2
Te peresidenira’a ta’ata pa’ari o te Feiā ’Āpī Tamāhine
E pi’i ’e e fa’ata’a te ’episekōpo i te hō’ē vahine ta’ata pa’ari nō te tāvini ’ei peresideni nō te Feiā ’Āpī Tamāhine. Mai te mea ’ua nava’i te rahi o te ’āmuira’a, e ani ’oia ’ia pi’ihia hō’ē ’aore rā, e piti vahine ta’ata pa’ari ’ei nā tauturu nōna (hi’o pene 30). E feruri te ’episekōpora’a i tāna anira’a ’e e fa’ahaere i te mau pi’ira’a.
I roto i te hō’ē ’āmuira’a na’ina’i, e nehenehe te peresideni Feiā ’Āpī Tamāhine ’o ’oia ana’e te pi’ihia ’ei ti’a fa’atere ta’ata pa’ari i roto i te fa’anahora’a a te Feiā ’Āpī Tamāhine. I te reira taime, e ’ohipa ’oia ’e te mau metua nō te fa’anaho i te ha’api’ira’a ’e i te mau ’ohipa ri’i nō te Feiā ’Āpī Tamāhine. E ara ato’a ’oia ē, e tae mai e piti a’e ta’ata pa’ari ha’apa’o i roto i te mau putuputura’a ’e te mau ’ohipa ri’i ato’a. Mai te mea e nehenehe, e ti’a ’ia pi’ihia te mau tauturu ’e i te hō’ē pāpa’i parau.
I roto i te hō’ē ’āma’a na’ina’i roa e ’aita e peresideni nō te Feiā ’Āpī Tamāhine, e nehenehe te peresideni o te Sōtaiete Tauturu e fa’anaho i te ha’api’ira’a nō te feiā ’āpī tamāhine e tae atu i te taime e pi’ihia ai te hō’ē peresideni Feiā ’Āpī Tamāhine.
Teie te mau hōpoi’a a te peresideni o te Feiā ’Āpī Tamāhine : E tauturu tōna nā tauturu iāna.
E tāvini ’ei melo nō te ’āpo’ora’a pāroita (hi’o 7.4) ’e nō te ’āpo’ora’a feiā ’āpī o te pāroita (hi’o 29.2.9).
E aupuru i te feiā ’āpī tamāhine tāta’itahi.
E hōro’a i te mau anira’a i te ’episekōpora’a nō te mau tuahine e tāvini i roto i te Feiā ’Āpī Tamāhine.
E ha’api’i i te tahi atu feiā fa’atere Feiā ’Āpī Tamāhine ’e te mau peresidenira’a i tā rātou mau hōpoi’a.
E paraparau ’e te feiā ’āpī tamāhine nō ni’a i te mau tītaura’a ’aita e tītauhia te ’episekōpo ’aore rā, nō ni’a i te hāmani-’ino-ra’a (hi’o 32.3 ; 32.6.1.1).
E arata’i i te mau peresidenira’a o te piha i roto i tā rātou mau hōpoi’a nō te fa’aterera’a. Nā te hō’ē melo ta’a ’ē nō te peresidenira’a Feiā ’Āpī Tamāhine e tauturu ’e e hi’opo’a i te piha tāta’itahi.
E pāturu i te feiā ’āpī tamāhine ’o tē tāvini ’ei mau hoa nō te mau tuahine ta’ata pa’ari i roto i te aupurura’a (hi’o 21.3).
E fa’atupu tāmau i te mau putuputura’a a te peresidenira’a Feiā ’āpī Tamāhine ’e e fārerei i te ’episekōpo.
E hi’opo’a i te mau parau, te mau parau fa’a’ite, te faufa’a moni ’e te moni nō te fa’anahora’a Feiā ’Āpī Tamāhine.
11.3.3
Hōho’a
ītona, te mau arata’ira’a nō te fa’atanora’a
Pāpa’i parau
Mai te mea e ’āmuira’a rahi, e hōro’a te peresideni Feiā ’Āpī Tamāhine i te ’episekōpo ra i te i’oa o te hō’ē tuahine ta’ata pa’ari nō te tāvini ’ei pāpa’i parau nō te feiā ’āpī tamāhine. Teie te mau hōpoi’a a te pāpa’i parau :
E tauturu i te peresidenira’a feiā ’āpī tamāhine ’ia fa’aineine i te tāpura ’ohipa nō te mau putuputura’a a te peresidenira’a. E ’āmui atu ’oia i roto i teie mau putuputura’a, e pāpa’i i te mau nota, ’e e hi’opo’a i te mau fa’auera’a ’ohipa.
E ha’api’i i te mau pāpa’i parau nō te piha ’e e tauturu ia rātou ’ia tāpa’o i te rahira’a ta’ata e tae mai.
E tauturu i te peresidenira’a Feiā ’Āpī Tamāhine (1) ’ia fa’aineine i te hō’ē tāpura ha’amau’ara’a ’e (2) e mātutu i te mau ha’amāu’ara’a.
11.3.4
Peresidenira’a nō te piha ’e te pāpa’i parau
11.3.4.1
Te pi’ira’a, te pāturura’a, ’e te fa’ata’ara’a
’Ei peresidenira’a tō te piha tāta’itahi o te Feiā ’Āpī Tamāhine. E nehenehe te peresidenira’a o te Feiā ’Āpī Tamāhine e hōro’a i te i’oa o te feiā ’āpī tamāhine ’ia tāvini ’ei mau peresideni nō te piha ha’api’ira’a. Nā roto i te pure e paraparau te mau melo o te ’episekōpora’a nō te fa’aoti ’o vai te pi’i.
E pi’i te hō’ē melo o te ’episekōpora’a i te hō’ē feiā ’āpī tamāhine nō te tāvini ’ei peresideni piha ha’api’ira’a. Mai te mea e nava’i te feiā ’āpī tamāhine nō te tāvini, e feruri ’oia nā roto i te pure i te mau melo o te piha ha’api’ira’a nō te hōro’a i te i’oa ’ei nā tauturu ’e ’ei pāpa’i parau. E feruri te ’episekōpora’a i tāna anira’a ’e e fa’ahaere i te mau pi’ira’a.
Hou ’a ani ai i te hō’ē feiā ’āpī tamāhine ’ia tāvini i roto i te hō’ē o teie mau pi’ira’a, e ani te melo o te ’episekōpora’a i te parau fa’ati’a i te mau metua o te feiā ’āpī tamāhine.
I muri a’e i te hōro’ara’a i te reira mau pi’ira’a, e fa’a’ite atu te hō’ē melo o te ’episekōpora’a i te mau tamāhine ’āpī i mua i tā rātou piha nō te hō’ē mā’itira’a nō te pāturura’a. I muri iho, e fa’ata’a te ’episekōpo ’aore rā, te tauturu i fa’auehia, i te feiā ’āpī tamāhine.
E fa’a’ara te hō’ē melo o te ’episekōpora’a i teie mau pi’ira’a i roto i te purera’a ’ōro’a. ’Aita ’oia e ani i te pāturura’a.
E tāvini te mau peresideni piha ha’api’ira’a i roto i te ’āpo’ora’a feiā ’āpī o te pāroita (hi’o 11.3.4.4). Teie ato’a te mau hōpoi’a a te mau peresidenira’a piha ha’api’ira’a :
Arata’i i te mau tauto’ora’a a te piha ha’api’ira’a nō te ’āmui atu i roto i te ’ohipa o te fa’aorara’a ’e te fa’ateiteira’a (hi’o pene 1).
Tītau ’ia ’ite ’e e tāvini i te feiā ’āpī tamāhine tāta’itahi, tae noa atu ia rātou ’o tē ’ore e tae mai nei i te mau putuputura’a a te piha ha’api’ira’a. ’Ia ’ite i tō rātou mau hina’aro ’e tō rātou huru orara’a.
E fa’anaho ’e e arata’i i te mau putuputura’a a te piha ha’api’ira’a (hi’o 11.2.1.2).
E fa’anaho ’e e rave i te tāvinira’a ’e te mau ’ohipa ri’i a te piha ha’api’ira’a (hi’o 11.2.1.3).
Mai te mea ’ua pi’ihia te mau pāpa’i parau nō te piha ha’api’ira’a, nā rātou e fa’aineine i te mau tāpura ’ohipa nō te mau putuputura’a, e tāpa’o i te mau nota, ’e e tāpa’o i te rahira’a ta’ata e tae mai.
E ha’api’i te mau melo o te peresidenira’a Feiā ’Āpī Tamāhine i te mau peresidenira’a piha ha’api’ira’a nō ni’a i tā rātou mau hōpoi’a (hi’o 11.3.2). E tauturu itoito te mau tauturu ha’amāramarama ’e te mau tahu’a ’ohipa (hi’o 11.3.5 ; 11.3.6).
11.3.4.3
Putuputura’a a te peresidenira’a o te piha
E putuputu tāmau te mau peresidenira’a piha ha’api’ira’a a te Feiā ’Āpī Tamāhine. Nā te peresideni o te piha e arata’i i teie mau putuputura’a. E ’āmui ato’a mai te feiā fa’atere ta’ata pa’ari nō te Feiā ’Āpī Tamāhine tei fa’ata’ahia nō te pāturu i te peresidenira’a o te piha. I roto i teie mau rurura’a, e paraparau ’āmui te feiā fa’atere ’e e ’imi ho’i i te fa’aurura’a nō ni’a i te hina’aro o te Fatu nō tā rātou piha. I roto i te tāpura ’ohipa, e nehenehe e ’āparau i te mau tumu parau i muri nei :
Rave-fa’aoti-ra’a i te ’ohipa o te fa’aorara’a ’e te fa’ateiteira’a
Te tāvinira’a i te mau melo o te piha ha’api’ira’a, ma te ha’apa’o ta’a ’ē i te pāturura’a i te mau melo ’āpī ’e te fa’aorara’a i te mau melo paruparu
Te torora’a i te rima i te feiā nō te tahi atu mau ha’apa’ora’a fa’aro’o ’e mau ti’aturira’a.
Te fa’anahora’a i te mau putuputura’a a te piha ha’api’ira’a, te tāvinira’a, ’e te mau ’ohipa ri’i
Te ha’api’ira’a i te fa’aterera’a mai roto mai i te feiā fa’atere ta’ata pa’ari nō te Feiā ’Āpī Tamāhine ’aore rā, hō’ē melo nō te peresidenira’a o te piha ha’api’ira’a
Te fā o te ’āpo’ora’a pāroita a te feiā ’āpī, nō te tauturu ïa i te feiā ’āpī ’ia arata’i mai i te tahi atu mau ta’ata ia Iesu Mesia ra ’e ’ia rave i te ’ohipa o te fa’aorara’a ’e te fa’ateiteira’a.
Nā te ’episekōpo e peresideni i te ’āpo’ora’a pāroita a te feiā ’āpī. Teie te mau melo o teie ’āpo’ora’a :
Te ’episekōpora’a.
Hō’ē o nā tauturu o te ’episekōpo i roto i te pupu tahu’a ’e te peresideni o te pupu ha’api’i ’e te pupu diakono.
Te mau peresideni piha ha’api’ira’a a te feiā ’āpī tamāhine (’aore rā, te peresidenira’a tā’āto’a o te piha ha’api’ira’a mai te mea hō’ē ana’e piha ha’api’ira’a Feiā ’Āpī Tamāhine i roto i te pāroita).
Te peresideni nō te Feiā ’Āpī Tamāhine
E ’āparau te ’āpo’ora’a feiā ’āpī pāroita i te mau rāve’a nō te tauturu i te tahi atu mau ta’ata ’ia ha’apūai i te mau ’itera’a pāpū, ’ia fāri’i i te mau ’ōro’a fa’aorara’a, ’ia ha’apa’o i te mau fafaura’a, ’e ’ia riro ’ei mau pipi ha’apa’o nā Iesu Mesia (hi’o Moroni 6:4–5). E ’āparau ’āmui rātou nō ni’a i te mau hina’aro o te feiā ’āpī tamāhine ’e te feiā ’āpī tamāroa o te pāroita. E nehenehe rātou e paraparau i te mau ’ohipa ri’i nō te pāhono i teie mau hina’aro. Teie rā, e fa’anaho-hu’ahu’a-hia te mau ’ohipa ri’i i roto i te mau putuputura’a a te pupu ’aore rā, a te piha.
Hi’o 29.2.9 nō te tahi atu mau ha’amāramaramara’a nō ni’a i te ’āpo’ora’a a te feiā ’āpī pāroita.
11.3.5
Hōho’a
ītona, te mau arata’ira’a nō te fa’atanora’a
Te mau tauturu ha’amāramarama
E nehenehe te Peresidenira’a o te Feiā ’Āpī Tamāhine e ani i te ’episekōpora’a ’ia pi’ihia te mau tauturu ha’amāramarama nō te Feiā ’Āpī Tamāhine. E ’ohipa te tauturu ha’amāramarama tāta’itahi i pīha’i iho i te hō’ē pupu matahiti ta’a maita’i o te feiā ’āpī tamāhine. Hō’ē ana’e tauturu ha’amāramarama nō te piha tāta’itahi.
Teie te mau hōpoi’a a te mau tauturu ha’amāramarama :
E tauturu i te peresidenira’a Feiā ’Āpī Tamāhine i roto i rātou mau hōpoi’a.
E pāturu ’e e arata’i i te mau peresidenira’a piha ha’api’ira’a ’ia ha’api’i mai ’e ’ia rave i tā rātou mau hōpoi’a.
E ha’api’i i te mau ha’api’ira’a nō te sābati mai te mea e hina’arohia. E tauturu i te feiā ’āpī tamāhine tei anihia ’ia ha’api’i i te hō’ē ha’api’ira’a, ’ia fa’aineine maita’i ’e ’ia ha’api’i.
E haere i roto i te mau ’ohipa ri’i a te piha ha’api’ira’a.
E haere i roto i te mau putuputura’a a te peresidenira’a Feiā ’Āpī Tamāhine ’ia anihia mai.
’Ia tae mai e piti a’e vahine ta’ata pa’ari ha’apa’o i roto i te putuputura’a ’e te ’ohipa ri’i a te piha ha’api’ira’a. Tītauhia i te mau tauturu ha’amāramarama ’ia rave i te ha’api’ipi’ira’a i ni’a ProtectingChildren.ChurchofJesusChrist.org (hi’o 11.6.2).
11.3.6
Hōho’a
ītona, te mau rāve’a tauturu fa’ahepo-’ore-hia
Te tahu’a ’ohipa
Mai te mea e hina’arohia, e nehenehe te peresideni Feiā ’Āpī Tamāhine e ani i te ’episekōpora’a ’ia pi’i i te mau tahu’a ’ohipa nō te tauturu i te mau melo o te peresidenira’a ’e i te mau tauturu ha’amāramarama. I te tahi taime, e rave-noa-hia teie mau pi’ira’a nō te hō’ē tupura’a ’ohipa ta’a ’ē, mai te hō’ē pūhapara’a, hō’ē ’āmuira’a feiā ’āpī, ’aore rā, nō te ’ohipa tū’aro.
E tāvini te mau tahu’a ’ohipa ato’a i raro a’e i te fa’aterera’a a te peresidenira’a o te Feiā ’Āpī Tamāhine pāroita.
Tītauhia i te mau tahu’a ’ohipa ’ia rave i te ha’api’ipi’ira’a i ni’a ProtectingChildren.ChurchofJesusChrist.org (hi’o 11.6.2).
11.4
Tauturura’a i te feiā ’āpī tamāhine ’ia fa’aineine nō te haere atu i roto i te Sōtaiete Tauturu
E nehenehe te hō’ē feiā ’āpī tamāhine e haere atu i roto i te Sōtaiete Tauturu i te 18ra’a o tōna matahiti. I te 19ra’a o te matahiti, e ’āmui hope roa atu te tamāhine ’āpī tāta’itahi i roto i te Sōtaiete Tauturu. I roto i te tahi mau huru, e nehenehe te hō’ē feiā ’āpī tamāhine e haere i roto i te Sōtaiete Tauturu hou te 18ra’a o tōna matahiti. E paraparau te tamāhine ’āpī tāta’itahi i tōna nā metua ’e i te ’episekōpo nō te fa’aoti e aha te mea e tauturu maita’i a’e iāna ’ia ha’apūai noa i tōna fa’aro’o ia Iesu Mesia.
E ’ohipa ’āmui te mau metua ’e te feiā fa’atere o te feiā ’āpī tamāhine ’e te Sōtaiete Tauturu nō te tauturu i te feiā ’āpī tamāhine tāta’itahi ’ia manuia i te haerera’a i mua i roto i te Sōtaiete Tauturu. E hōro’a teie feiā fa’atere i te mau rāve’a tāmau nō te feiā ’āpī tamāhine ’e te mau tuahine nō te Sōtaiete Tauturu ’ia rave i te mau tū’atira’a ’e ’ia fa’ahotu i te mau auta’atira’a.
11.5
Hōho’a
ītona, te mau arata’ira’a nō te fa’atanora’a
Te feiā fa’atere nō te Feiā ’Āpī Tamāhine o te titi
E pi’i te hō’ē melo o te peresidenira’a titi i te hō’ē vāhine ta’ata pa’ari nō te tāvini ’ei peresideni nō te Feiā ’Āpī Tamāhine o te titi. Mai te mea e titi rahi, e ani ’oia hō’ē ’aore rā, e piti vahine ta’ata pa’ari nō te tāvini ’ei tauturu, ’e hō’ē atu nō te tāvini ’ei pāpa’i parau. Nā te hō’ē melo o te peresidenira’a titi ’aore rā, hō’ē melo nō te ’āpo’ora’a teitei e pi’i ’e e fa’ata’a i teie mau vahine. Nō te mau ha’amāramaramara’a nō ni’a i te mau hōpoi’a a te peresidenira’a Feiā ’Āpī Tamāhine ’e te pāpa’i parau, hi’o 5.4.1 ’e te 5.4.4.
’O te hō’ē tauturu i roto i te peresidenira’a titi te ha’apa’o i te fa’anahora’a o te Feiā ’Āpī Tamāhine i roto i te titi. Tei iāna ato’a te hōpoi’a nō te ’ohipa a te peresidenira’a Feiā ’Āpī Tamāhine o te titi. E ha’api’i ato’a ’oia i te mau ’episekōpo i tā rātou hōpoi’a nō te feiā ’āpī tamāhine.
E fa’ata’a te peresidenira’a titi i te hō’ē melo o te ’āpo’ora’a teitei ’ia ’ohipa i pīha’i iho i te peresidenira’a o te Feiā ’Āpī Tamāhine nō te titi. E tāvini teie melo ’āpo’ora’a teitei ’e te peresidenira’a Feiā ’Āpī Tamāhine ’e te pāpa’i parau i roto i te tōmite o te Autahu’ara’a a Aarona–Feiā ’Āpī Tamahine (hi’o 29.3.9).
11.6
Te mau arata’ira’a ’e te mau fa’aturera’a hau atu
11.6.1
Pārurura’a i te feiā ’āpī
’Ia ’ohipa ana’e te mau ta’ata pa’ari ’e te feiā ’āpī i roto i te mau fa’anahora’a a te ’Ēkālesia, e tītauhia e piti a’e ta’ata pa’ari ha’apa’o i reira. E tītauhia paha ’ia ’āmui te mau piha ha’api’ira’a nō te fa’atupu i te reira.
Tītauhia i te mau ta’ata pa’ari ato’a e ha’a ’e te feiā ’āpī, ’ia fāri’i hope roa i te ha’api’ipi’ira’a nō ni’a i te pārurura’a i te mau tamari’i ’e i te feiā ’āpī, i roto i te hō’ē ’āva’e o tō rātou pāturura’ahia (ProtectingChildren.ChurchofJesusChrist.org). E rave fa’ahou rātou i te reira ha’api’ipi’ira’a i te mau toru matahiti ato’a.
Nō te mau ha’amāramaramara’a nō ni’a i te huru nō te fa’a’ohipara’a i teie mau arata’ira’a i ni’a i te mau hoa aupuru, hi’o 21.3.
11.6.2
Feiā ’āpī tamāhine huma
E ha’apa’o ta’a ’ē te mau peresidenira’a piha ha’api’ira’a i te feiā ’āpī tamāhine huma. Nō te mau ha’amāramaramara’a nō ni’a i te tauturura’a i teie feiā ’āpī tamāhine, hi’o disability.ChurchofJesusChrist.org.
11.6.3
Te mau tāpa’o a te mau tamari’i ’e te feiā ’āpī
E fāri’i te feiā ’āpī tamāhine i te mau tāpa’o ’ei tuha’a nō te fa’anahora’a a te mau tamari’i ’e te feiā ’āpī. E ti’a i te feiā ’āpī tamāhine tāta’itahi ’ia fāri’i i te hō’ē tāpa’o nō te rirora’a ’ei melo, mai roto mai i tōna peresidenira’a o te piha ha’api’ira’a, i te taime e riro ai ’oia ’ei melo nō te Feiā ’Āpī Tamāhine. E fāri’i ato’a ’oia i te Tupura’a o te ta’ata iho : Buka arata’i nō te feiā ’āpī. E nehenehe e rave i te reira i te taime e fārerei ai te peresidenira’a piha ha’api’ira’a ’e te feiā fa’atere ta’ata pa’ari nō te feiā ’āpī tamāhine iāna nō te fāri’i iāna i roto i te Feiā ’Āpī Tamāhine. E nehenehe ato’a e rave i te reira i roto i te hō’ē putuputura’a matahiti nō te feiā ’āpī ’e tō rātou mau metua (hi’o 11.2.1.3).
I te ’āva’e Tēnuare nō te matahiti e ti’ahia ai te matahiti o te hō’ē tamāhine i te 18, e fāri’i ’oia i te tahi atu tāpa’o nō te rirora’a ’ei melo.
E roa’a i te feiā ’āpī tamāhine te hō’ē tāpa’o nō te manuiara’a nā roto i te tūtavara’a ’ia riro hau atu mai te Fa’aora te huru.