Ol Hanbuk mo Ol Koling
0. Fas Bigfala Lukluk


“0. Fas Bigfala Lukluk,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).

“0. Fas Bigfala Lukluk,” Jeneral Hanbuk.

0.

Fas Bigfala Lukluk

0.0

Fas Toktok

Lod i bin tijim: “Naoia, evri man i mas lanem diuti blong hem, mo i mas lanem blong wok strong wetem strong tingting long ofis we oli bin putum hem long hem” (Doktrin mo Ol Kavenan 107:99). Olsem wan lida insaed long Jos Ia blong Jisas Kraes blong Ol Lata-dei Sent, yu mas lukaotem blong kasem revelesen blong yuwan blong helpem yu blong lanem mo mekem ol diuti we oli go wetem koling blong olgeta.

Fasin blong stap stadi long ol skripja mo ol tijing blong ol profet blong Lata-dei, bae i helpem yu blong andastanem diuti blong yu, mo blong mekem olgeta diuti ia. Taem yu stap stadi long ol toktok blong God, bambae yu save kasem moa paoa blong Spirit (luk long Doktrin mo Ol Kavenan 84:85).

Mo tu, yu save lanem diuti blong yu taem yu stap stadi long ol instraksen insaed long hanbuk ia blong Jos. Olgeta instraksen ia, oli save invaetem revelesen blong kam sapos oli yusum blong mekem wan i andastanem ol prinsipol, ol polisi, mo ol fasin blong wok blong praktisim, mo semtaem, stap lukaotem Spirit blong i lidim yu.

0.1

Hanbuk Ia

Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent i soem rod long ol jeneral mo ol lokol lida blong Jos. Oli serem long ol seksen:

  • Fandesen we I Stanap long Doktrin: Japta ia i givim infomesen abaot fasin blong singaotem mo rilisim ol memba blong givim seves insaed long Jos. Ol japta ia oli eksplenem:

    • Plan blong God blong stap hapi, wok blong Hem blong fasin blong sevem man, mo fasin blong kam olsem wan god, mo stamba tingting blong Jos.

    • Rol blong famli insaed long plan blong God, wok blong Hem blong fasin blong sevem man, mo fasin blong kam olsem wan god, mo rilesensip bitwin hom mo Jos.

    • Ol prinsipol blong prishud.

    • Ol prinsipol blong stap lid insaed long Jos Ia blong Sevya.

  • Oganaesesen blong Jos: Ol japta ia oli givim instraksen blong ol stek presidensi mo ol bisoprik, ol lida blong kworom blong prishud, ol lida blong ol oganaesesen blong stek mo wod, mo ol narawan we oli stap givim seves insaed long Jos.

  • Wok blong God blong Fasin blong Sevem Man mo Fasin blong Kam Olsem Wan God: Ol japta ia oli givim instraksen long saed blong stamba wok blong Jos.

    • Stap laef folem gospel blong Jisas Kraes

    • Stap kea long olgeta we oli stap long nid

    • Stap invaetem evriwan blong akseptem gospel

    • Joenem ol famli blong taem we i no save finis

  • Administresen blong Jos: Japta ia i givim sam moa gaedlaen long saed blong fasin blong lidim Jos. Ol topik insaed ia, i gat ol miting, ol koling, ol rekod, ol faenens, mo ol polisi.

Ol heding mo ol smol heding insaed long hanbuk ia, oli gat ol namba; hemia i blong mekem se i isi blong faenem o blong givim refrens blong ol topik. Eksampol: ol instraksen abaot hu nao i save sil insaed long wan tempol, oli stap long 27.3.1. Namba 27 i namba blong japta; namba 3 i namba blong seksen insaed long japta ia, mo namba 1 i namba blong smol seksen insaed long seksen ia.

0.2

Ol Risos we Yu Save Stretem Folem Situesen mo Sam we Yu Save Yusum

Ol Stek mo ol wod, oli no gat ol semfala nid. Insaed long hanbuk ia, i gat ol gaedlaen blong stretem ol samting i folem situesen blong stek o wod, mo tu, sam nara risos we yufala i save yusum.

  • Ol Gaedlaen blong Stretem Samting Folem Situesen ( ) oli givim daereksen long wei blong stretem ol oganaesesen mo ol program blong Jos insaed long ol yunit we oli gat ol defren nid mo risos.

  • Sam risos we yu save yusum, ( ) insaed long olgeta i gat sam moa infomesen mo daereksen we oli save helpem ol lida blong stek mo wod.

Ol lida oli lukaotem insperesen abaot wijwan gaedlaen mo wijwan moa risos nao yu save yusum blong lukluk long ol nid blong ol memba.

0.3

Ol Apdeit

Hanbuk ia, bambae oli stap apdeitem oltaem. Wan lis blong ol las jenis oli stap insaed long “Wan Sot Lis blong Ol Las Apdeit.”

0.4

Ol Kwestin abaot Ol Instraksen

Taem we i gat ol kwestin we oli kam antap we i no gat ansa insaed long ol skripja, ol toktok blong ol profet we oli stap laef, o insaed long hanbuk ia, ol memba blong Jos oli mas dipen long ol kavenan we oli bin mekem wetem God, kaonsel blong ol lokol lida blong olgeta, mo insperesen blong Spirit blong i soem rod long olgeta.

Sapos ol lida we oli gat kwestin abaot infomesen we i stap long hanbuk ia, o abaot sam samting we oli no tokbaot insaed long hanbuk ia, oli mas askem ol kwestin blong olgeta i go long prisaeding atoriti we oli wok stret anda long olgeta.

0.5

Ol Toktok

Sapos oli no talem se i defren, nao:

  • Ol toktok ia, bisop, mo, bisoprik, insaed long hanbuk ia, oli save yusum tu long ol branj presiden mo ol branj presidensi. Ol toktok ia, stek presiden, mo stek presidensi, i go tu long ol distrik presiden mo ol distrik presidensi. Blong luk wan sot lis blong wei we atoriti blong ol distrik presiden i defren long hemia blong ol stek presiden, luk long 6.3.

  • Taem oli tokbaot ol wod mo ol stek, plante taem oli save yusum tu long ol branj, ol distrik mo ol misin.

  • Taem oli tokbaot Sandei, hem i tokbaot eni dei we oli tekem se hem i Sabat dei, long wanwan lokol ples.

  • Toktok ia, yunit, i tokbaot ol wod mo ol branj.

  • Taem oli tokbaot papa mo mama, plante taem, oli yusum hemia tu long olgeta we oli gat raet folem loa blong lukaot long wan.

Ol koling blong bisop mo branj presiden, oli no gat semfala atoriti mo responsabiliti, mo i semmak tu wetem ol koling blong stek presiden mo distrik presiden. Bisop, hem i wan ofis insaed long prishud; hem i wan odinesen we Fas Presidensi nomo i givim raet from. Ol stek presiden, Ol Jeneral Atoriti mo Ol Eria Seventi nao oli singaotem olgeta.

0.6

Stap Kontaktem Ol Hedkwota blong Jos, o Eria Ofis

Insaed long sam japta insaed long hanbuk ia, i gat ol instraksen blong wei blong kontaktem ol hedkwota blong Jos, o eria ofis. Instraksen blong kontaktem ol hedkwota blong Jos, hem i blong olgeta long Yunaeted Stet mo Kanada. Instraksen blong kontaktem eria ofis, hem i blong olgeta we oli stap aotsaed long Yunaeted Stet mo Kanada.