10.

Eb’ li molam re li Tijonelil re Aaron

10.1

K’a’ru rajb’al, ut chan ru naq k’uub’anb’il

10.1.1

K’a’ru rajb’al

Li rajb’al jun molam a’an xtenq’ankileb’ li xe’k’uluk re li tijonelil chi k’anjelak sa’ komonil re xb’aanunkil li k’anjel re li kolb’a-ib’ ut li taqenaqil loq’al.

10.1.2

Li ch’ol aatin choq’ reheb’ li molam re li Tijonelil re Aaron

“Laa’in jun ralal li Dios raab’ilin xb’aan, ut a’an wan xk’anjel choq’ we.

“Chi anchal inch’ool, inmetz’ew, ink’a’uxl, ut inkawilal tinra li Dios, tinpaab’eb’ lin sumwank, ut tinwoksi lix tijonelil a’an re k’anjelak chiru li was wiitz’in, xb’een wa sa’ li wochoch.

“Naq tinyal inq’e chi k’anjelak chiruheb’ jalan, chi paab’ank, chixjalb’al ink’a’uxl, ut chi chaab’ilo’k rajlal kutan, k’ulub’ejaqin chi osob’tesiik xb’aan li santil ochoch ut chixk’ulb’al li sahil ch’oolejil re li evangelio.

“Tinkawresi wib’ chi wank choq’ jun chaab’il misioneer, b’eelomej, ut yuwa’b’ej rik’in xb’eresinkil wib’ jo’ tz’aqal xtzolom li Jesukristo.

“Tintenq’anq sa’ xkawresinkil li ruchich’och’ choq’ re xkab’ xk’ulunik li Kolonel rik’in xb’oqb’al chixjunileb’ li was wiitz’in chi chalk rik’in li Kristo ut chi osob’tesiik xb’aan lix tojb’al rix li maak.”

10.1.3

Eb’ li molam

10.1.3.1

Lix molameb’ laj tenq’anel

Eb’ li saaj winq neke’ok sa’ lix molameb’ laj tenq’anel sa’ xtiklajik li enero re li chihab’ te’xket wi’ 12 chihab’. Sa’ li kutan a’an naru ajwi’ te’k’ojob’aaq jo’ aj tenq’anel wi kawresinb’ileb’ ut k’ulub’ejeb’.

Eb’ lix teneb’ankil laj tenq’anel wankeb’ chi ch’olob’anb’il sa’ Tzol’leb’ ut Sumwank 20:57–59; 84:111. Jalaneb’ chik lix teneb’ankileb’ a’an xnumsinkil li loq’laj wa’ak ut xtenq’ankil li obiispil sa’ “xk’anjelankil chixjunil li k’a’aq re ru re li yu’am a’in” (Tzol’leb’ ut Sumwank 107:68).

10.1.3.2

Lix molameb’ laj tzolonel

Eb’ li saaj winq neke’ok sa’ lix molameb’ laj tzolonel sa’ xtiklajik li enero re li chihab’ te’xket wi’ 14 chihab’. Sa’ li kutan a’an naru ajwi’ neke’k’ojob’aak jo’ aj tzolonel wi kawresinb’ileb’ ut k’ulub’ejeb’.

Eb’ laj tzolonel wan xteneb’ankileb’ jo’ chanru eb’ laj tenq’anel. Jo’kan ajwi’ neke’xkawresi li loq’laj wa’ak, ut neke’k’anjelak jo’ aj ilol komon. Xkomoneb’ chik lix teneb’ankileb’ wankeb’ chi ch’olob’anb’il sa’ Tzol’leb’ ut Sumwank 20:53–59; 84:111.

10.1.3.3

Lix molameb’ laj tij

Eb’ li saaj winq neke’ok sa’ lix molameb’ laj tij sa’ xtiklajik li enero re li chihab’ te’xket wi’ 16 chihab’. Sa’ li kutan a’an naru neke’k’ojob’aak jo’ aj tij wi kawresinb’ileb’ ut k’ulub’ejeb’.

Eb’ laj tij wankeb’ ajwi’ xteneb’ankileb’ jo’eb’ aj tenq’anel ut aj tzolonel. Xkomon chik lix teneb’ankileb’ wankeb’ chi ch’olob’anb’il sa’ Tzol’leb’ ut Sumwank 20:46–52, 73–79.

10.1.4

Eb’ lix laawil li tijonelil

Re xtawb’al xkomon chik li na’leb’ chirixeb’ li laaw a’in, chi’ilmanq 3.4.1.

10.1.5

Xjalb’aleb’ li molam a’ yaal jo’ li na’ajman ru sa’ li junjunq chi na’ajej

Sa’ jun teep malaj uq’ej b’ar moko k’iheb’ ta li saaj winq, eb’ li molam re li Tijonelil re Aaron naru nekech’utla sa’ komonil re tzole’k ut choq’ reheb’ li kok’ k’anjel.

10.2

Li tz’aqonk sa’ li k’anjel re li kolb’a-ib’ ut li taqenaqil loq’al

10.2.1

Xyu’aminkil lix evangelio li Jesukristo

10.2.1.2

Xtzolb’al li evangelio

Neke’b’aanuman lix ch’utameb’ li molam sa’ li xkab’ ut xkaa domingo re li po. Neke’wan chiru 50 k’asal. Jun komon sa’ li awa’b’ejil re li molam (malaj jun reheb’ laj tenq’ re li obiisp sa’ lix molameb’ laj tij) nab’eresink. A’an naxk’ameb’ xb’e li molam sa’ xyaab’asinkil li ch’ol aatin ut sa’ xk’uub’ankil li na’leb’ sa’ komonil chirix li k’eeb’ileb’ wi’ xtaqlankileb’, chirix lix teneb’ankileb’, ut chirix xkomoneb’ chik li na’leb’.

Jun komon sa’ li molam malaj jun aj k’amol b’e naxb’eresi li tzolok.

10.2.1.3

Li k’anjelak chiru as iitz’inb’ej ut li kok’ k’anjel

Li k’anjelak chiru as iitz’inb’ej ut li kok’ k’anjel tento naq te’xwaklesi li xnawom ch’oolej, te’xk’e xkawilaleb’ li junkab’al, te’xwaklesi li junajil sa’ li molam, ut te’xkanab’eb’ li komon chirosob’tesinkil li ras riitz’ineb’.

Sa’ junjunqeb’ li kok’ k’anjel ut li k’anjelak chiru as iitz’inb’ej, tento te’tz’aqonq li saaj winq jo’ ajwi’ li saaj ixq, ut mas wi’chik rik’ineb’ li saaj li xe’ninqan xchihab’.

Eb’ li k’anjel re rajlal chihab’. Rochb’een li kok’ k’anjel reheb’ li saaj li neke’b’aanuman chi kok’ aj xsa’, eb’ li saaj winq naru ajwi’ neke’tz’aqon sa’eb’ li k’anjel a’in rajlal chihab’:

• Jun campamento re lix molameb’ li Tijonelil re Aaron (chi’ilmanq Guía de campamento de los cuórums del Sacerdocio Aarónico).

• Jun ch’utub’aj-ib’ reheb’ li saaj sa’ li teep malaj li oqech, malaj jun conferencia Para la Fortaleza de laj Juventud (PFJ).

10.2.1.4

Xchaab’ilob’resinkil rib’ li junjunq

Rik’in naq yookeb’ chixyalb’al xq’e chi wank jo’ chanru li Kolonel, napatz’man reheb’ li saaj naq te’xk’e xmeta re nimank sa’ musiq’ej, sa’ komonil, sa’ tz’ejwalej, ut sa’ k’a’uxlej (chi’ilmanq Lukas 2:52).

Re xtawb’al xkomon chik li na’leb’, chi’ilmanq ChildrenandYouth.ChurchofJesusChrist.org.

10.2.2

Xtenq’ankileb’ li wankeb’ rajom ru

Eb’ li neke’k’amok re li Tijonelil re Aaron neke’xtenq’a li obiisp sa’ “xk’anjelankil chixjunil li k’a’aq re ru re li yu’am a’in” (Tzol’leb’ ut Sumwank 107:68). Tento naq te’k’eemanq xhoonal chi k’anjelak chiruheb’ li ras riitz’in chi kok’ aj xsa’, sa’ ut rochb’een lix junkab’aleb’, sa’eb’ li k’anjel reheb’ li saaj, ut xjuneseb’ rib’.

10.2.2.1

Li ilok komon

Eb’ li xe’k’uluk re li Tijonelil re Aaron naru neke’k’ehe’ xtaqlankileb’ jo’ aj ilol komon sa’ xtiklajik li enero re li chihab’ te’xket wi’ 14 chihab’. Re xtawb’al xkomon chik li na’leb’, chi’ilmanq ch’ol 21.

10.2.3

Xb’oqb’aleb’ chixjunil chixk’ulb’al li evangelio

Eb’ li xe’k’uluk re li Tijonelil re Aaron tento sa’ xb’eeneb’ “xb’oqb’al chixjunil chi chalk rik’in li Kristo” (Tzol’leb’ ut Sumwank 20:59).

Eb’ li na’b’ej yuwa’b’ej ut eb’ laj jolominel neke’xwaklesi xch’ooleb’ li saaj winq chixkawresinkil rib’ re te’k’anjelaq jo’ misioneer ut re te’xwotz li evangelio chiru chixjunil lix yu’ameb’.

10.2.4

Xk’amb’aleb’ li junkab’al sa’ junajil sa’ li junelik q’e kutan

Eb’ li xe’k’uluk re li Tijonelil re Aaron naab’al paay ru chan ru neke’ru chi tenq’ank sa’ xk’amb’aleb’ li junkab’al sa’ junajil sa’ li junelik q’e kutan.

• Naru te’roxloq’i lix na’ xyuwa’ ut te’xk’ut rik’in xb’aanuhom li wank jo’ chanru li Kristo sa’ li rochocheb’.

• Naru te’xkawresi rib’ chixk’ulb’aleb’ li k’ojob’anb’il k’anjel sa’ li santil ochoch, jo’ li junelikil sumlaak.

• Naru te’xtaw xk’ab’a’eb’ lix xe’ xtooneb’ li neke’raj ru li k’ojob’anb’il k’anjel re li santil ochoch (chi’ilmanq FamilySearch.org).

• Naru te’tz’aqonq sa’ li kub’iha’ ut li k’ojob’aak sa’ li Iglees choq’ reheb’ li kamenaq, a’ yaal jo’ naru chiruheb’.

10.3

Li obiispil

Li xb’een xteneb’ankil li obiisp a’an rilb’aleb’ li saaj winq ut li saaj ixq sa’ lix teep. A’an naxtzol lix k’ab’a’eb’ ut naxnaw chan ru naq wankeb’ sa’ li rochocheb’. Nawulak sa’ lix kok’ k’anjeleb’ ut sa’eb’ lix ch’utam re domingo chi kok’ aj xsa’.

Li obiisp a’an li awa’b’ej sa’ xb’een lix molameb’ laj tij.

Li xb’een aj tenq’ aj k’ehol na’leb’ sa’ li obiispil wan xteneb’ankil rik’in lix molameb’ laj tzolonel. Li xkab’ aj tenq’ aj k’ehol na’leb’ wan xteneb’ankil rik’in lix molameb’ laj tenq’anel.

A’aneb’ a’in xkomoneb’ chik lix teneb’ankileb’ li obiispil chirixeb’ li molam re li Tijonelil re Aaron:

• Xb’aanunkil li tz’ilok-ix rik’in li junjunq chi saaj winq wiib’ sut chiru li jun chihab’ (chi’ilmanq 31.3.1).

• Xtenq’ankileb’ li saaj winq chixkawresinkil rib’ re xk’ulb’al li Tijonelil re Melkisedek.

• Xb’eresinkil li tz’iib’ank hu, li taqlanb’il esil, ut li tumin reheb’ li molam re li Tijonelil re Aaron.

Eb’ laj k’amol b’e ut eb’ laj k’anjenel neke’tenq’an rik’ineb’ li k’anjel a’in naq tz’aamanb’il chiruheb’.

10.4

Eb’ li saaj aj jolominel sa’eb’ li molam

10.4.1

Xb’oqb’aleb’, xk’utb’al xk’ab’a’eb’, ut xxaqab’ankileb’

Li obiisp naxb’oq jun malaj wiib’ aj tij re te’wanq choq’ aj tenq’ chiru sa’ xb’eresinkil lix molameb’ laj tij.

Jun komon sa’ li obiispil naxb’oq li awa’b’ej re lix molameb’ laj tenq’anel ut lix molameb’ laj tzolonel. Naq tz’aqal rajlankileb’ li xe’k’uluk re li Tijonelil re Aaron, eb’ li saaj winq a’in neke’xk’oxla rik’in tijok aniheb’ li komon sa’ lix molameb’ li te’xk’e xk’ab’a’ chi k’anjelak jo’ aj tenq’ aj k’ehol na’leb’ ut jo’ aj tz’iib’anel.

Chirix xk’eeb’al li b’oqok a’in, jun komon sa’ li obiispil naxk’ut xk’ab’a’eb’ li saaj aj jolominel reheb’ li molam re te’xaqab’aaq xwankil sa’ jun ch’utam re li molam. Li obiisp naxxaqab’eb’ laj tenq’, ut jo’kan ajwi’ li awa’b’ej re lix molameb’ laj tenq’anel ut laj tzolonel. Naxk’e xlaawil li tijonilel reheb’ li awa’b’ej re molam. Naru naxk’e xtaqlankileb’ laj tenq’ aj k’ehol na’leb’ re te’xxaqab’eb’ xkomoneb’ chik li komon sa’eb’ li awa’b’ejil, ut eb’ laj tz’iib’anel.

10.4.2

Eb’ li teneb’ank

• Neke’xb’eresi lix k’anjeleb’ li molam re te’tz’aqonq sa’ li k’anjel re li kolb’a-ib’ ut li taqenaqil loq’al (chi’ilmanq ch’ol 1).

• Neke’xnaweb’ ru ut neke’k’anjelak chiru li junjunq chi komon sa’ li molam, jo’ ajwi’ eb’ li ink’a’ neke’wulak sa’eb’ li ch’utam re li molam.

• Neke’k’anjelak sa’ li ch’uut reheb’ li saaj re li teep (chi’ilmanq 10.4.4).

• Neke’xtzoleb’ li komon sa’ li molam chirix lix teneb’ankileb’ sa’ li tijonelil (chi’ilmanq Tzol’leb’ ut Sumwank 107:85–88).

• Neke’xk’uub’eb’ ut neke’xb’eresiheb’ li ch’utam re li molam (chi’ilmanq 10.2.1.2).

• Neke’xk’uub’ ut neke’xb’eresi li k’anjelak chiru as iitz’inb’ej sa’ li molam, ut eb’ li kok’ k’anjel (chi’imanq 10.2.1.3).

10.4.3

Li ch’utam re lix awa’b’ejil li molam

Eb’ li awa’b’ejil sa’eb’ li molam re li Tijonelil re Aaron neke’ch’utla chi kok’ aj xsa’. Li awa’b’ej re li molam naxb’eresiheb’ li ch’utam a’in. Tento te’wanq wiib’ li winq ak ninq—li ani wan sa’ li obiispil, jun aj k’amol b’e, malaj jun aj k’anjenel.

10.4.4

Li ch’uut reheb’ li saaj re teep

Chi’ilmanq 29.2.6 re xtawb’al xkomon chik li na’leb’ chirix li ch’uut reheb’ li saaj re li teep.

10.8

Xkomon chik li b’eresink ut li chaq’rab’ink

10.8.1

Xkolb’aleb’ rix li saaj

Naq eb’ li ninqi komon wankeb’ rik’ineb’ li saaj sa’ li Iglees, aajel ru naq junelik te’wanq wiib’ li komon ninq li chaab’ileb’ xch’ool.

Chixjunileb’ li komon ninqeb’ li neke’k’anjelak rik’ineb’ li saaj tento te’xb’aanu li tzolok chirix xkolb’aleb’ rix li kok’al ut li saaj naq maji’ nanume’ jun po chirix naq xaqab’anb’ileb’ sa’ xk’anjel (ProtectingChildren.ChurchofJesusChrist.org).