“Hilwayon kamo sang kamatuoran,” Para sa Kusog sang mga Lamharon: Giya sa Paghimo sang mga Pagpili (2022)
“Hilwayon kamo sang kamatuoran,” Para sa Kusog sang mga Lamharon
Hilwayon kamo sang kamatuoran
Juan 8:32
Ang Amay nga Langitnon Dios sang kamatuoran. Nahibal-an Niya ang tanan. Ang tanan nga kamatuoran nagahalin sa Iya kag nagatudlo pakadto sa Iya. Ginapakita mo nga ginahatagan mo sang balor ang kamatuoran kon nagatinguha ka nga magtuon, nagapangabuhi nga may integridad, kag maisog nga ginatindugan ang nahibal-an mo nga matuod—bisan pa nga magatindog ka nga isahanon.
Wala katapusan nga mga kamatuoran
Gusto sang Amay nga Langitnon nga ang Iya mga anak nga babayi kag lalaki pirme nagatuon. May pareho temporal kag espiritwal ka nga mga rason para magpangita kag palanggaon ang pagtuon. Ang edukasyon indi lamang para magganar sang kuwarta. Bahin ini sang imo wala katapusan nga lalab-uton nga mangin mas pareho sa Amay nga Langitnon.
Ang pagpangabuhi nga may integridad nagakahulugan nga ginapalangga mo ang kamatuoran sa bilog mo nga tagipusuon—nga mas masobra pa sa imo pagpalangga sa personal nga kasulhayan, popularidad, ukon kahapos. Nagakahulugan ini sang paghimo sang husto tungod kay husto ini.
May butang ka nga malahalon nga ipaambit. Ang ebanghelyo ni Jesucristo may mga sabat sa mga pamangkot sang kabuhi. Amo ini ang alagyan pakadto sa kalinong kag kalipayan. Mahimo nga wala mo nahibal-an ang tanan, pero hustuhan na ang imo nahibal-an para buligan ang iban nga maintiendihan kag hatagan sang bili ang matuod, wala katapusan nga mga prinsipyo.
Mga Imbitasyon
Pirme gid magtuon. Magpangita sang mga oportunidad nga pasangkaron ang imo kaisipan kag ang imo mga ikasarang. Ini nga mga oportunidad pwede nga sa pormal nga edukasyon sa eskwelahan ukon paghanas sang bokasyon lakip na ang indi pormal nga pagtuon nga makuha sa mga ginasaligan mo nga mga ginhalinan. Upda ang Ginuo sa imo mga pagpaninguha, kag Iya ka giyahan. Samtang nagatuon ka parte sa kalibutan sa imo palibot, tun-i man ang parte sa Manluluwas, nga nagtuga sang kalibutan. Tun-i ang Iya kabuhi kag mga pinanudlo. Himoa ang seminary, institute, kag personal nga pagtuon sang ebanghelyo nga parte sang imo bilog-kabuhi nga pagtuon.
Palanggaa ang kamatuoran sing tuman sa punto nga indi mo gid gusto nga magpangawat, magbinutig, mangdaya, ukon manginto sa bisan ano nga paagi—sa eskwelahan, sa trabaho, online, bisan diin. Mangin amo gihapon katampad nga sumulunod ni Jesucristo sa publiko kag sa pribado.
Mangin kasanag para sa iban. Tugoti ang imo mga tinaga kag imo mga aksyon nga magsalamin sang imo pagtuo kay Jesucristo. Maghanda karon para sa mga oportunidad sa palaabuton para ipaambit ang Iya mahimayaon nga ebanghelyo, bilang misyonero kag sa bug-os mo nga kabuhi. Kag mangin handa sa paghambal sa bisan sin-o nga nagapamangkot sa imo parte sa paglaum kag kalipay nga imo nabatyagan.
Ginpromisa nga mga bugay
Ang edukasyon nagapadugang sang imo ikasarang sa pagserbisyo sa Ginuo. Ginahatagan ka sini sang gahum nga bugayan ang iban, ilabi na gid ang imo pamilya. Kon mas damo ang imo natun-an, mas makabulig ka sa pagpasad sang ginharian sang Dios kag makaimpluwensya sa kalibutan para sa kaayuhan.
Ang katampad nagadala sang kalinong kag respeto sa kaugalingon. Kon ang imo mga tinaga kag mga aksyon nagakumporme sa kamatuoran, ginapakita mo nga masaligan ka—sang iban nga tawo kag sang Ginuo.
Kon ginatindugan mo ang mga pinanudlo ni Jesucristo, tindugan ka man Niya. Mahimo nga ang iban indi magkumporme sa imo, pero ang imo kaisog kag sinseridad matalupangdan. Bisan sundon sang iban ukon indi ang imo ehemplo, ang imo testimonya, kompiyansa, kag pagtuo kay Cristo magatubo.
Mga pamangkot kag mga sabat
Sala bala kon may mga pamangkot ka parte sa Simbahan? Paano ko pangitaon ang mga sabat? Ang mga pamangkot indi tanda sang kahuyang ukon kakulang sang pagtuo. Ang matuod, ang pag-angkon sang mga pamangkot nagabulig sa pagpatubo sang pagtuo. Ang Pagpanumbalik sang ebanghelyo nagsugod sang ang 14-anyos nga si Joseph Smith nagpamangkot nga may pagtuo. Pangitaa ang mga sabat sa balaan nga mga kasulatan, sa mga pulong sang propeta sang Dios, sa imo mga lider kag matinuohon nga ginikanan, kag sa Dios Mismo. Kon ang mga sabat wala dayon nagaabot, magsalig nga magatuon ka sing amat-amat. Padayon nga ipangabuhi ang imo na nga nahibal-an, kag padayon nga magpangita sang kamatuoran.
Paano ko ipakigbato ang kamatuoran nga indi makasaklaw sa may mga lain nga ginapatihan? Sugdi sa pagsiguro nga ang imo mga tinaga kag mga aksyon inspirado sang pagpalangga sa Dios kag sa Iya mga anak. Ang pagpaambit sang ebanghelyo indi dapat himuon nga may espiritu sang kasingki kundi sang kaathag, pagkamapainubuson, kag kaayo. Pwede ka nga mangin mapinalanggaon sa iban bisan pa nga wala ka nagakumporme sa ila mga panan-aw.
Tan-awa sa Mateo 5:14–16 (tugti ang imo kasanag nga mag-iwag); Juan 14:6 (si Jesus ang kamatuoran); 1 Pedro 3:15 (mangin handa pirme sa pagpaambit sang imo paglaum kay Cristo); Doktrina kag mga Kasugtanan 88:77–80 (mga butang nga gusto sang Ginuo nga aton matun-an); 93:36 (ang himaya sang Dios amo ang kaalam); 124:15 (ang integridad amo ang pagpalangga sang kon ano ang husto); 130:18 (ang aton kaalam magabangon upod sa aton pagkabanhaw).
Pamangkot para sa temple recommend
Ginatinguhaan mo bala nga mangin tampad sa tanan mo nga ginahimo?