« Haere nā roto i te māramarama o te Atua », Nō te pūai o te feiā ’āpī : E arata’i nō te rave i te mau mā’itira’a (2022)
« Haere nā roto i te māramarama o te Atua », Nō te pūai o te feiā ’āpī
Haere nā roto i te māramarama o te Atua
Galatia 5:25
E maita’i a’e te mau mā’itira’a tā ’oe e rave ’ia ’ite maita’i ’oe i te mau mea. Terā te tumu e mea faufa’a rahi te māramarama : e fa’a’ōhie te māramarama ’ia ’ite i te ’ē’a ti’a. ’Ua fa’aineine te Metua i te ao ra i te māramarama o te ra’i nō ’oe—te hōro’a nō te Vārua Maita’i—nō te tauturu ia ’oe ’ia ’ite pāpū e aha te maita’i ’e te ’ino, e aha te ti’a ’e te hape.
Te mau parau mau mure ’ore
I tō ’oe bāpetizora’a ’ua tomo ’oe i roto i te hō’ē fafaura’a ’oa’oa ’e te Metua i te ao ra ’e Iesu Mesia. I roto i te hiero, e rave ’oe i te tahi atu ā fafaura’a ’o tē nehenehe e ha’apūai i taua tā’amura’a ra. I te mau hepetoma ato’a i roto i te ’ōro’a mo’a, e fa’a’āpī ’oe i tā ’oe mau fafaura’a. E fa’a’ite ’oe i tō ’oe ineine ’ia ha’apa’o i te mau fa’auera’a, ’e e ha’amaita’i te Fatu ia ’oe i te fāna’ora’a i te Vārua Maita’i ’ei hoa tāmau nō ’oe. ’O te hō’ē o tāna mau hōro’a rahi roa a’e ia ’oe.
Nā te ravera’a i te mau mā’itira’a maita’i e ha’amaita’i i tō ’oe ’aravihi ’ia putapū i te Vārua. E rave rahi ’ohipa maita’i ’e te au i roto i te ao nei. Mai te ’ohipa a te mā’a ’e te inu i ni’a i tō ’oe tino, e ’ohipa hōhonu ato’a tā te mea e tai’o ’oe ’e e māta’ita’i atu atu ’e e fa’aro’o atu, i ni’a i tō ’oe ferurira’a ’e tō ’oe vārua.
Te mau tītaura’a manihini
’A fa’ata’a i te taime nō te Fatu i te mau mahana ato’a. E ha’api’i nō ni’a iāna. Ha’amana’o ā iāna ē a muri noa atu. ’A pure i tō ’oe Metua i te ao ra. ’A tuatāpapa i te mau pāpa’ira’a mo’a ’e te mau parau a te mau peropheta ora. I muri iho, ’a tūtava i te ora ’ia au i te ha’api’ira’a tā ’oe i ’apo mai.
’A imi i te mea e fa’aitoito ’e e fa’auru ’e e tītau manihini i te Vārua. ’Ia rave ’oe i te mau mā’itira’a nō ni’a i te mea e māta’ita’i, te mea e tai’o, te mea e fa’aro’o ’e te mea e haere atu, ’a feruri i te mana’o e tupu i roto ia ’oe. Tē fa’atupu ra ānei te reira i te mau mana’o maita’i ? ’A fa’aātea ’ē atu i te mau mea ato’a ’o tē fa’a’o’ō’o i te mau mea mo’a ’e te mau mea vi’ivi’i. ’Eiaha e ’āmui atu i te mau mea e ha’aparuparu i tō ’oe mana’o fa’aoti ’e tō ’oe mana’o ara i te Vārua, mai te hitahita, te ’ava ’e te rā’au ta’ero ’ino. ’Ei taure’are’a itoito ’oe nō te tūpohe i te hōho’a ’aore rā te ha’uti, nō te haere i rāpae i te teata ’aore rā te ’orira’a, nō taui i te pehe, ’aore rā nō te fāriu ’ē i te hō’ē noa atu mea ’aita e tū’ati i te Vārua.
’A fa’a’ohipa i te rāve’a tūreiara’a sōtiare nō te fa’aitoito. E nehenehe te rāve’a tūreiara’a sōtiare e riro ’ei mauha’a tūreiara’a pūai rahi. Mai te mea e fa’a’ohipa ’oe i te reira, ’a fa’atumu i ni’a i te māramarama, te fa’aro’o ’e te parau mau. ’Eiaha e fa’ariro i te ’ohipa tei hi’ohia ra ē, tē tupu ra nō te tahi atu ta’ata, ’ei fa’aau nō tō ’oe orara’a. ’A ha’amana’o ē, tō ’oe faufa’a, ’oia ho’i e tamari’i ’oe a nā metua i te ra’i, e ’ere nō roto mai i te rāve’a tūreiara’a sōtiare.
’A tītau i te mau ’ohipa au, nā reira ato’a te mau tā’amura’a mau ’e te vai maoro. E hi’o maita’i ē, e’ita tā ’oe fa’a’ohipara’a i te rāve’a ’āpī ’e te ha’apararera’a e mono i te taime e ’āmui tino atu ’oe i tō ’oe ’utuāfare ’e tō ’oe mau hoa. E nehenehe te mau rāve’a tūreiara’a sōtiare ’e te tahi atu mau rāve’a ’āpī e ha’apau rahi i tō ’oe taime, ’aita rā e ’āpī rahi e noa’a mai. ’A ha’apae ri’i i terā ao tu’urēni, ’e ’a tū’ati i te mau ta’ata o te orara’a mau.
Te mau ha’amaita’ira’a i parauhia
E nehenehe te Vārua e pārahi noa i pīha’i iho ia ’oe. E fa’a’ite pāpū mai te Vārua Maita’i ia ’oe nō te Metua i te ao ra ’e nō Iesu Mesia. E tāmāhanahana ’oia ia ’oe, e arata’i ’oia, e fa’aara ’e e ha’amo’a ho’i. E tauturu ’oia ia ’oe ’ia ’ite e aha te parau mau ’e ’ia hi’o i te maita’i i roto i te ao.
Uira’a ’e pāhonora’a
Nāhea vau e ’ite ai ē, ’o te Vārua Maita’i e paraparau mai ra ? Tītauhia te tahi taime nō te ha’api’i i te fa’aro’o i te Vārua, tītauhia te tahi taime ha’api’ipi’ira’a ’e te fa’a’oroma’i. Tē paraparau nei ’oia i te mau ta’ata rau nā roto i te mau rāve’a rau. ’Eiaha te mau mea ’ōhie ’ia tāu’a-’ore-hia—te mana’o hau e tae mai i te fa’aro’ora’a i te ’itera’a pāpū o te hō’ē ta’ata, ’aore rā te mana’o pāpū ’ore e tae mai i muri iho i te ravera’a i te hō’ē mā’itira’a hape. ’A imi i roto i te mau pāpa’ira’a mo’a i te mau rāve’a ta’a ’ē tā te Vārua e paraparau, ’a pure nō te reira, ’e ’a tāmau noa i te hi’o i te mau rāve’a au nō te putapū i te Vārua.
E aha te mau hōho’a faufau ? Nō te aha e ’ape i te reira ? E fa’ahi’ora’a te hōho’a faufau, e mau hōho’a ’aore rā e mau parau, tei hāmanihia nō te fa’ariro ia ’oe ’ei ta’ata ’ā’au ma’irohe. ’Ua rau te huru o te hōho’a faufau, mai te mau video, te mau hōho’a, te mau buka ’e te pehe. E mau parau ato’a paha, ’aore rā e mau hōho’a, ’o tē hāponohia i rotopū i te mau hoa. Tē fa’a’ohipa nei te hōho’a faufau i te mau mea mo’a—tō tātou tino ta’ata ’e te hereherera’a—ma te fa’a’ino. Pēnei a’e e ’ite ’oe i te hōho’a faufau e ’ere rā nā ’oe i tītau atu. ’Ia ’ite ’oe i te hōho’a faufau tā ’oe i tītau ’aore rā ’aita, ’a fāriu ’ē atu i reira ra. Pēnei a’e e paraparau ato’a i te hō’ē metua ’aore rā i te hō’ē ta’ata pa’ari pāpū. E hara te tītaura’a ’e te hi’ora’a i te hōho’a faufau, ’e e ha’apēpē te reira i tō ’oe ’aravihi ’ia putapū i te Vārua. E ha’aparuparu te reira i tō ’oe mana i ni’a ia ’oe iho, ma te fa’ahuru ’ē ho’i i tā ’oe huru hi’ora’a ia ’oe iho ’e i te ta’ata. E mana tō Iesu Mesia nō te tauturu ia ’oe ’ia ’aroti’a i te hōho’a faufau ’e ’ia tātarahapa. ’A fāriu i ni’a iāna ; ’a fāriu ’ē i te pōiri. E ti’a i tō ’oe ’episekōpo ’ia tauturu ia ’oe ’ia fāri’i i te pūai ’e te fa’a’orera’a hara nā roto i te Fa’aora.
Hi’o Amosa 5:14 (’imi i te maita’i) ; Galatia 5:22–23 (te mau hotu nō te Vārua) ; Moroni 7:18–19 (te māramarama nō te Mesia) ; Te Ha’api’ira’a Tumu ’e te mau Fafaura’a 6:23 (te paraparau nei te Fatu i te parau hau) ; 20:77, 79 (nā pure ’ōro’a).
Te mau uira’a nō te parau fa’ati’a nō te hiero
’Ua parau te Fatu ē, ’ia « rave-mā-hia » te mau mea ato’a i mua iāna (Te Ha’api’ira’a Tumu ’e te mau Fafaura’a 42:41). Tē tūtava ra ānei ’oe ’ia vai mā i te pae mōrare, i roto i tō ’oe mau mana’o ’e te mau haere’a ? Tē ha’apa’o ra ānei ’oe i te ture nō te vi’ivi’i ’ore ?
Tē tūtava ra ānei ’oe i te ha’amo’a i te mahana Sābati, i te fare ’e i te fare purera’a ; i te haere i tā ’oe mau rurura’a ; i te fa’aineine nō te rave ti’amā i te ’ōro’a ’e i te ora i te orara’a e au i te mau ture ’e te mau fa’auera’a o te ’evanelia ?