Appendix

Principles of Learning Glossary

Cov Lus Txhais tej lub Ntsiab Cai txog Kev Kawm Ntawv

Agency

Ywj Siab Xaiv: Vim peb yog Vajtswv cov me nyuam, peb muaj kev ywj siab xaiv, los sis lub hwj chim, kom txiav txim siab rau peb tus kheej. Peb xaiv tau seb peb xav ntseeg dab tsi, ua dab tsi, thiab hloov los ua neeg zoo li cas.

“Kev ywj siab xaiv yog rab peev xwm thiab lub cib fim uas Vajtswv muab rau peb xaiv thiab ua li peb lub siab nyiam.” (Txoj Moo Zoo tej Ntsiab Lus, “Kev Ywj Siab Xaiv thiab Kev Lav Ris,” ChurchofJesusChrist.org).

“Vim Nws hlub koj, Vajtswv tau muab kev ywj siab xaiv rau koj, los sis kev ywj siab kom txiav txim siab. Koj txoj kev ywj siab xaiv ua rau koj xaiv tau ua tej yam zoo thiaj li muaj kev zoo siab; kuj ua rau koj lav ris tej kev xaiv tej yam tsis zoo, uas ua rau koj raug kev tsis zoo siab thaum kawg. Vajtswv yuav tsis tab kaum koj tej kev xaiv; Nws cia koj txiav txim siab rau koj tus kheej thiab kawm los ntawm tej yam koj raug. Tiam sis Nws yeej muab kev pab rau koj kom kov yeej tej yam uas koj ua yuam kev thiab koj tej kev txhaum—yog lub hwj chim cawm seej ntawm Yexus Khetos. Txawm yog koj raug xwm txheej dab tsi los sis koj xaiv tej yam tsis zoo npaum li cas los, koj yeej xaiv tau kom hloov siab thiab nrhiav kev kaj siab lug dhau los ntawm Yexus Khetos” (“God Is There for You,” ComeuntoChrist.org).

Agent

Tus Muaj Kev Ywj Siab Xaiv: Ib tug uas muaj kev ywj siab xaiv muaj hwj chim xaiv tau tej yam rau nws tus kheej. Vim peb yog Vajtswv cov me nyuam, peb muaj kev ywj siab xaiv, los sis lub hwj chim, kom txiav txim siab rau peb tus kheej. Peb xaiv tau seb peb xav ntseeg dab tsi, ua dab tsi, thiab hloov los ua neeg zoo li cas.

Bible

Npaivnpaum: “Phau Npaivnpaum yog ib phau dawb huv uas muaj Vajtswv txoj lus. Nyob haud, Phau Vaj Lug Kub Npaivnpaum qhia tias Vajtswv yeej hlub Nws cov me nyuam txhua lub sij hawm. …Kev ua raws li tej lus qhia nyob hauv Phau Vaj Lug Kub Npaivnpaum pab peb paub tias Vajtswv yog leej twg … thiab to taub zoo dua hais tias Nws xav kom peb ua neej zoo li cas. …”

“Yexus Khetos yog Vajtswv Leej Tub uas los rau hauv lub ntiaj teb kom cawm peb dim kev txhaum, kev tu siab, kev kho siab, kev mob, thiab ntxiv. Yexus tau qhia tej zaj lus qhia zoo kawg txog kev pab thiab kev hlub thiab tau ua tej yam txuj ci tseem ceeb ntau thaum Nws nyob hauv lub ntiaj teb. Nyob hauv Phau Vaj Lug Kub Npaivnpaum, peb nyeem tej zaj lus no thiab pib paub tias yuav tsum ua li cas kom kov yeej tej yam nyuaj thaum muaj Yexus txoj kev pab” (“What Is the Holy Bible?,” ComeuntoChrist.org).

Book of Mormon

Phau Ntawv Maumoos: “Phau Ntawv Maumoos muaj tej lus dawb ceev los ntawm cov uas coj raws li Yexus. Ib yam li Vajtswv hais lus rau Mauxes thiab Nau-as nyob hauv Phau Vaj Lug Kub Npaivnpaum, Nws kuj hais lus rau cov neeg nyob hauv Amelikas. Cov txiv neej no, hu ua cov yaj saub, tau sau Vajtswv cov lus cia. Thaum kawg ces ib tug yaj saub hu ua Maumoos tau muab lawv tej lus sau ua ke hauv ib phau ntawv. …

“Phau Ntawv Maumoos ua pov thawj tias Vajtswv hlub tag nrho Nws cov me nyuam thiab txhawb nqa lawv lub neej. Yog ib zaj lus tim khawv txog tej lus tseeb hauv Phau Vaj Lug Kub Npaivnpaum thiab Yexus Khetos tej lus qhia” (“What Is the Book of Mormon?,” ComeuntoChrist.org).

Doctrine and Covenants

Lus Qhuab Qhia thiab Kev Khi Lus: “Lus Qhuab Qhia thiab Kev Khi Lus yog ib phau vaj lug kub uas muaj tej kev tshwm sim uas tus Tswv muab rau tus Yaj Saub Joseph Smith thiab lwm tus yaj saub hauv hnub nyoog kawg. Yeej tsis zoo li lwm phau vaj lug kub vim tsis yog ib txoj kev txhais cov ntawv puag thaum ub.

“Lus Qhuab Qhia thiab Kev Khi Lus yog ib phau ntawm plaub phau vaj lug kub uas Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg siv (ib phau yog Phau Vaj Lug Kub Npaivnpaum, Phau Ntawv Maumoos, thiab phau Lub Hlaws uas Muaj Nqis Heev)” (Txoj Moo Zoo tej Ntsiab Lus, “Lus Qhuab Qhia thiab Kev Khi Lus,” ChurchofJesusChrist.org).

Faith

Kev Ntseeg: “Kev ntseeg yog ib lub ntsiab cai ntawm kev muaj peev xwm thiab hwj chim. Thaum twg peb khwv kom ua raws li ib lub hom phiaj zoo, peb muab siab rau ntseeg. Peb cia siab rau ib yam uas peb tsis pom. …”

“Kev ntseeg Yexus Khetos txhais hais tias yus tso siab plhuav rau nws—yus cia siab rau Nws lub hwj chim mus ib txhis, kev txawj ntse, thiab txoj kev hlub. Kev ntseeg Nws yog kev ntseeg Nws tej lus qhia. Kev ntseeg txhais hais tias txawm peb tsis to taub txhua yam, Nws txawj to taub. Vim Nws twb rau peb tej kev mob kev nkeeg, thiab tej kev txom nyem, Nws paub pab peb kov yeej tej yam uas nyuaj rau peb ua txhua hnub. … (saib Amas 7:11–12; Lus Qhuab Qhia thiab Kev Khi Lus 122:8).”

“Kev ntseeg tsis yog kev lam ntseeg xwb. Peb qhia tias peb muaj kev ntseeg dhau los ntawm tej yam peb ua—peb txoj kev ua neej. …”

“Kev ntseeg yog ib lub txiaj ntsim los ntawm Vajtswv, tiam sis peb yuav tsum tu peb txoj kev ntseeg kom muaj zog. Kev ntseeg yeej zoo li ib lub zog. Thaum twg yus siv, ces yuav muaj zog zuj zus. Tiam sis yog tias cia nyob, yus qaug zog” (Txoj Moo Zoo tej Ntsiab Lus, “Kev Ntseeg Yexus Khetos,” ChurchofJesusChrist.org).

God/Heavenly Father

Vajtswv/Leej Txiv Saum Ntuj Ceeb Tsheej: “Vajtswv Leej Txiv yog tus Neeg Zoo Tshaj Plaws uas peb ntseeg, tus uas peb hwm, thiab tus uas peb thov. Nws yog tus uas Tsim Txhua Yam, tus Thawj Coj, thiab tus uas Tshwj txhua yam tseg. Nws zoo tag nrho, muaj hwj chim tag nrho thiab paub txhua yam” (Txoj Moo Zoo tej Ntsiab Lus, “Vajtswv uas Yog Leej Txiv,” ChurchofJesusChrist.org).

“Vajtswv yog peb Leej Txiv Saum Ntuj. … Nws yog Leej Txiv ntawm [peb] tus ntsuj plig. … [Leej Txiv Saum Ntuj Ceeb Tsheej] hlub tag nrho Nws cov me nyuam, tsis hais koj los yog. … Nws xav nrog koj sib raug zoo” (“God’s Love,” ComeuntoChrist.org).

Nyob hauv cov vaj lug kub, lo lus Vajtswv hais txog Leej Txiv Saum Ntuj Ceeb Tsheej los sis Yexus Khetos vim tias nkawd koom siab muaj tib lub hom phiaj. Peb thov peb Leej Txiv Saum Ntuj Ceeb Tsheej.

Holy Spirit

Tus Vaj Ntsuj Plig Dawb Huv: “Tus Vaj Ntsuj Plig Dawb Huv yog ib tug uas ua tim khawv txog Vajtswv thiab Yexus Khetos. … tus Vaj Ntsuj Plig Dawb Huv nplij peb lub siab, pab peb paub qhov tseeb, thiab ua tim khawv txog Yexus. … Ib txoj kev uas Vajtswv nrog peb tham yog los ntawm tus Vaj Ntsuj Plig Dawb Huv. Tus Vaj Ntsuj Plig Dawb Huv hais lus rau peb lub siab lub ntsws hauv peb txoj kev xav” (“The Holy Spirit,” ComeuntoChrist.org).

Jesus Christ

Yexus Khetos: “Yexus yog tus Cawm Seej ntawm lub ntiaj teb thiab yog tus uas coj yam ntxwv zoo tag nrho. Thaum peb coj raws li Nws, peb yuav muaj kev kaj siab lug thiab kev zoo siab hauv lub neej no. …”

“Yexus Khetos yog Vajtswv Leej Tub. Vajtswv tau txib Nws Leej Tub, Yexus Khetos, los ris txhua tus uas nyob hauv lub ntiaj teb no tej kev txhaum kom peb thiaj txais tau kev zam txim. …”

“Yexus tau ua neej zoo tag nrho kom qhia peb paub txoj kev uas peb yuav tsum mus kom rov qab mus cuag peb Leej Txiv Saum Ntuj Ceeb Tsheej. …”

“Yexus Khetos tau raug txom nyem thiab tuag rau peb tej kev txhaum. Yexus ntiag tug hauj lwm hauv lub ntiaj teb yog kom cawm peb dim peb tej kev txhaum. Nws txaus siab raug txom nyem thiab muab Nws tus kheej txi kom them tus nqi ntawm tej yam peb ua yuam kev peb thiaj li yuav muaj sij hawm hloov siab lees txim thiab txais kev zam txim. …”

“Yexus tau sawv rov los kom peb yuav rov qab muaj sia. Peb hnub tom qab Nws tuag, Yexus tau sawv hauv lub ntxa los thiab tshwm sim rau Nws cov phooj ywg thiab cov thwj tim coob. Nws yog thawj tug uas tau sawv rov los, uas txhais hais tias Nws tus ntsuj plig rov qab mus koom nrog Nws lub cev nqaij daim tawv uas zoo tag nrho lawm tom qab Nws tau tuag. Vim Yexus tau kov yeej kev tuag, muaj ib hnub peb txhua tus yuav sawv rov los” (“Following Jesus Christ, Our Perfect Example,” ComeuntoChrist.org).

Prayer

Thov Vajtswv: Kev thov Vajtswv yog “kev txuas lus nrog Vajtswv thaum ib tug neeg ua Vajtswv tsaug thiab thov kom tau cov koob hmoov. Peb thov peb Leej Txiv Saum Ntuj Ceeb Tsheej los ntawm Yexus Khetos lub npe” (Phau Qhia txog Vaj Lug Kub, “Thov Vajtswv,” ChurchofJesusChrist.org).

Vajtswv yog koj Leej Txiv Saum Ntuj Ceeb Tsheej uas hlub koj, thiab Nws xav hnov koj thov Nws” (“How to Pray,” ComeuntoChrist.org).

Prophet

Yaj Saub: “Ib tug yaj saub yog ib tug uas Vajtswv tau hu kom coj neeg nyob thoob plaws lub ntiaj teb. Xws li Anplaham thiab Mauxes thiab cov yaj saub ua muaj niaj hnub no, Vajtswv yeej ua raws li tus txheej txheem coj Nws cov me nyuam mus dhau los ntawm cov yaj saub” (“God Speaks to Us through Prophets,” ComeuntoChrist.org).

Savior

Cawm Seej: “Ib tug uas cawm neeg dim. … ‘Cawm Seej’ yog ib lub npe ntawm Yexus Khetos” (Phau Qhia txog Vaj Lug Kub, “Cawm Seej,” ChurchofJesusChrist.org).

Yexus Khetos yog peb tus Cawm Seej vim Nws txo Nws txoj sia thiab sawv rov los kom peb yuav kov yeej kev txhaum thiab kev tuag thiab rov qab mus nrog Vajtswv nyob.

“Yexus Khetos tau raug txom nyem thiab tuag rau peb tej kev txhaum. Yexus ntiag tug hauj lwm hauv lub ntiaj teb yog kom cawm peb dim peb tej kev txhaum. Nws txaus siab raug txom nyem thiab muab Nws tus kheej txi kom them tus nqi ntawm tej yam peb ua yuam kev peb thiaj li yuav muaj sij hawm hloov siab lees txim thiab txais kev zam txim. …”

“Yexus tau sawv rov los kom peb yuav rov qab muaj sia. Peb hnub tom qab Nws tuag, Yexus tau sawv hauv lub ntxa los thiab tshwm sim rau Nws cov phooj ywg thiab cov thwj tim coob. Nws yog thawj tug uas tau sawv rov los, uas txhais hais tias Nws tus ntsuj plig rov qab mus koom nrog Nws lub cev nqaij daim tawv uas zoo tag nrho lawm tom qab Nws tau tuag. Vim Yexus tau kov yeej kev tuag, muaj ib hnub peb txhua tus yuav sawv rov los” (“Following Jesus Christ, Our Perfect Example,” ComeuntoChrist.org).

Scripture

Vaj Lug Kub: “Thaum Vajtswv cov neeg dawb huv sau los sis hais lus los ntawm tus Vaj Ntsuj Plig Dawb Huv lub hwj chim, ces lawv tej lus ‘yeej yog vaj lug kub, yeej yog tus Tswv lub siab nyiam, yeej yog qhov tus Tswv xav, yeej yog tus Tswv txoj lus, yeej yog tus Tswv lub suab, thiab Vajtswv lub hwj chim rau kev cawm seej’ (Lus Qhuab Qhia thiab Kev Khi Lus 68:4). …

“Lub hom phiaj ntawm cov vaj lug kub yog kom ua tim khawv txog Khetos thiab coj Vajtswv cov me nyuam mus kom los cuag Nws thiab txais txoj sia nyob mus ib txhis li (saib Yauhas 5:39; 20:31; 1 Nifais 6:4; Mauxiyas 13:33–35)” (Txoj Moo Zoo tej Ntsiab Lus, “Vaj Lug Kub,” ChurchofJesusChrist.org).