Introduction

Pasiuna

Welcome to EnglishConnect!

Welcome sa EnglishConnect!

Ang EnglishConnect magpundok sa mga tawo nga nagtinguha sa pagpalapad sa ilang mga oportunidad pinaagi sa pagkat-on og Iningles. Kitang tanan naggikan sa nagkalain-laing gigikanan ug nag-istorya og nagkalain-laing pinulongan. Kita mahimong adunay nagkalain-laing ang-ang sa abilidad sa Iningles, apan kon magkauban kita makakab-ot sa atong mga tumong.

Why Are You Learning English?

Nganong Magkat-on Ka man og Iningles?

Ang pagkaadunay tin-aw nga katuyoan makatabang nimo nga magpabiling nakatutok ug madasigon. Atong ikonsiderar kon nganong nagkat-on ka og Iningles. Naglaom ka ba nga makakuha og mas maayo nga trabaho? Kinahanglan ka ba nga magkat-on og Iningles aron ipadayon ang imong edukasyon? Paggahin og panahon sa pagsulat sa imong mga rason sa pagkat-on og Iningles.

Gusto kong makakat-on og Iningles tungod kay:

Ang pagkat-on og Iningles makapadugang sa imong mga oportunidad alang sa edukasyon, panarbaho, pagserbisyo, ug pakighigala. Ang EnglishConnect makatabang nimo nga makab-ot ang imong mga tumong.

What Is EnglishConnect?

Unsa Ang EnglishConnect?

Ang EnglishConnect usa ka talagsaong programa sa pagkat-on og Iningles nga gipasiugdahan sa Ang Simbahan ni Jesukristo sa mga Santos sa Ulahing mga Adlaw. Ang EnglishConnect gidisenyo aron sa pagtabang nimo nga mapalambo ang mga kahanas sa Iningles sa kahimtang nga adunay hugot nga pagtuo, pakigdait, ug paglambo. Kana nagpasabot nga dili nimo kini buhaton nga mag-inusara. Ikaw magkat-on kauban sa uban ug mosuporta ug modasig sa matag usa. Ikaw usab makapalambo sa imong hugot nga pagtuo nga ang Dios makatabang nimo nga makat-on.

Ang EnglishConnect naglakip sa daghang lebel. Ang EnglishConnect 1 ug 2 motabang sa mga tigkat-on nga mapalambo ang sukaranan nga mga kahanas sa Iningles. Ang EnglishConnect 3 moandam sa mga tigkat-on alang sa mga oportunidad sa edukasyon—ilabi na sa BYU–Pathway Worldwide. Makakat-on ka og dugang mahitungod sa BYU–Pathway Worldwide diha sa byupathway.org. Pagkat-on og dugang mahitungod sa EnglishConnect diha sa englishconnect.org.

What Makes EnglishConnect Unique?

Unsay Nakapahimong Talagsaon sa EnglishConnect?

Diha sa EnglishConnect, makapalambo kita og mga kahanas sa Iningles diha sa usa ka kahimtang sa hugot nga pagtuo, pakigdait, ug paglambo.

Faith

Hugot nga Pagtuo

Diha sa EnglishConnect, kita magkat-on pinaagi sa pagtuon ug pinaagi sa hugot nga pagtuo. Ang matag leksiyon magsugod sa usa ka baroganan sa pagkat-on. Kini espirituhanong mga baroganan nga makatabang nato nga mosalig sa Dios nga dugangan ang atong kapasidad sa pagkat-on. Ang imong mga gituohan mahitungod sa imong abilidad sa pagkat-on adunay dako kaayo nga epekto sa imong paningkamot ug mga sangpotanan. Ang mga baroganan sa pagkat-on makatabang nimo nga makasabot sa imong tinuod nga potensiyal ug sa abilidad sa Dios sa pagtabang nimo. Ang mosunod mao ang mga baroganan nga imong tun-an:

Ikaw Anak sa Dios

“Ako anak sa Dios nga may mahangtorong potensiyal ug katuyoan.”

(tan-awa sa Mga Taga-Roma 8:16–17; Ang Pamilya: Usa ka Pamayahag ngadto sa Kalibotan)

Mopakita og Hugot nga Pagtuo diha ni Jesukristo

“Si Jesukristo makatabang nako sa pagbuhat sa tanang butang kon ako mopakita og hugot nga pagtuo diha Kaniya.”

(tan-awa sa Mga Taga-Filipos 4:13; Ether 12:27; Moroni 7:33 )

Moangkon og Responsibilidad

“Ako adunay gahom sa pagpili, ug ako ang responsable sa akong kaugalingong pagkat-on.”

(tan-awa sa 2 Nephi 2:14, 16; Doktrina ug mga Pakigsaad 58:27–28)

Higugmaa ug Tudloi ang Usag Usa

“Ako makakat-on gikan sa Balaang Espiritu samtang ako mohigugma, motudlo, ug magkat-on kauban ang ubang tawo.”

(tan-awa sa Juan 13:34–35; Juan 14:26–27; Doktrina ug mga Pakigsaad 88:77, 88:122–123)

Padayon sa Unahan

“Pinaagi sa tabang sa Dios, ako makapadayon sa unahan bisan kon ako nag-atubang og mga babag.”

(tan-awa sa 2 Nephi 31:20; 2 Nephi 32:9; Doktrina ug mga Pakigsaad 50:41–42)

Makigtambag uban sa Ginoo

“Mapalambo nako ang akong pagkat-on pinaagi sa pagpakigtambag uban sa Dios matag adlaw mahitungod sa akong mga paningkamot.”

(tan-awa sa Mga Panultihon 3:5–6; Mateo 7:7–8; Alma 37:37)

Ang mga baroganan sa pagkat-on mga pahayag sa kamatuoran. Mahimong isulti nimo kini nga mga pamahayag sa imong kaugalingon kon ikaw nagkinahanglan og pagdasig o pag-abiba. Samtang imong gamiton kini nga mga baroganan, ang imong abilidad sa pagkat-on madugangan. Imong mahibaloan nga uban sa tabang sa Dios, ikaw makakab-ot sa imong mga tumong.

Fellowship

Pakigdait

Usa ka importanteng bahin sa kasinatian sa EnglishConnect mao ang pagkat-on kauban sa ubang tawo. Ang EnglishConnect nga mga grupo mohigugma, motabang, ug mosuporta sa usag usa. Ang inyong mga panagtagbo sa grupo usa ka luwas nga dapit sa pagpraktis sa pag-istorya ug paghimo og mga sayop. Ang pag-apil sa usa ka grupo sa EnglishConnect makatabang nimo nga magpabiling madasigon ug magmugna og mga panaghigalaay.

Growth

Paglambo

Ang EnglishConnect labaw pa kay sa usa lamang ka programa sa pagkat-on og Iningles. Bisan asa ka pa man magsugod, ang imong mga kasinatian makatabang nimo nga mahimong mas maayo nga tigkat-on. Ikaw makabaton og mga oportunidad sa:

• Pagpraktis og Iningles kada adlaw.

• Pagsubay sa imong kalamboan.

• Pagkat-on kauban sa ubang tawo.

• Pag-ampo ngadto sa Dios alang sa tabang aron makab-ot ang imong mga tumong.

What Will I Do in EnglishConnect?

Unsay Akong Buhaton diha sa EnglishConnect?

Diha sa EnglishConnect, ikaw maghimo og personal nga pagtuon, magpraktis sa panag-istoryahanay nga grupo, ug kada adlaw nga pagpraktis. Ang matag leksiyon sa manwal sa tigkat-on sa EnglishConnect gibahin sa duha ka bahin—“Personal nga Pagtuon” ug “Panag-istoryahanay nga Grupo.”

Personal Study

Personal nga Pagtuon

Ang seksiyon sa “Personal nga Pagtuon” mag-andam nimo alang sa imong panag-istoryahanay nga grupo. Diha sa “Personal nga Pagtuon,” imong kompletohon ang mosunod nga mga kalihokan:

Study the Principle of Learning

Pagtuon sa Baroganan sa Pagkat-on

Ang matag leksiyon maglakip og usa ka baroganan sa pagkat-on. Kini espirituhanong mga baroganan nga motabang nimo nga makigpares sa Dios sa pagkat-on og Iningles. Sa dili pa ang imong panag-istoryahanay nga grupo, basaha ang baroganan sa pagkat-on, pamalandongi ang mga pangutana, ug isulat ang imong mga hunahuna.

Memorize Vocabulary

Memoryaha ang Bokabularyo

Pagkat-on sa kahulogan ug paglitok sa matag pulong. Gamita ang bokabularyo aron sa pagpraktis sa mga sundanan. Ikaw mahimo usab nga mangita og dugang nga mga pulong sa bokabularyo nga magamit diha sa sundanan.

Practice the Patterns

Pagbansay sa mga Sundanan

Pagsugod pinaagi sa pagmemorya sa mga sundanan sa kapahayag. Dayon gamita ang mga sundanan aron magmugna og imong kaugalingon nga mga pangutana ug mga tubag. Mahimo nimong pulihan ang gilinyahan nga mga pulong og lain nga mga pulong gikan sa listahan sa bokabularyo. Ipadayon ang pagpraktis og kusog hangtod nga ikaw masaligon nga mogamit sa mga sundanan sa pagpangutana ug pagtubag sa mga pangutana.

Conversation Group

Panag-istoryahanay nga Grupo

Ang “Panag-istoryahanay nga Grupo” nga seksiyon naglakip sa mga kalihokan nga imong gamiton aron magkat-on kauban sa ubang tawo. Diha sa “Panag-istoryahanay nga Grupo” imong kompletohon ang mosunod nga mga kalihokan:

Discuss the Principle of Learning (20–30 minutes)

Maghisgot sa Baroganan sa Pagkat-on (20–30 minutos)

Diha sa imong grupo, basaha ug hisgoti ang baroganan sa pagkat-on. Kini usa ka oportunidad sa pagpakigbahin ug pagkat-on gikan sa uban.

Activities

Mga Kalihokan

Sa mga kalihokan 1, 2, ug 3, gamita ang mga sundanan sa bokabularyo ug kapahayag aron makaapil sa makahuloganon nga panag-istoryahanay. Ang mga kalihokan makatabang nimo nga mouswag gikan sa balikbalik nga pagpraktis ngadto sa paghimo og imong kaugalingong panag-istoryahanay. Ang matag kalihokan moandam nimo alang sa sunod nga kalihokan.

Activity 1: Practice the Patterns (10–15 minutes)

Kalihokan 1: Pagpraktis sa mga Sundanan (10–15 minutos)

Diha sa kalihokan 1, rebyoha ang bokabularyo ug mga sundanan nga imong nakat-onan sa imong personal nga pagtuon. Ang imong tumong mao ang paggamit sa mga sundanan aron sa pagsulti ug pagsabot og yano nga mga pangutana ug mga tubag.

Activity 2: Create Your Own Sentences (10–15 minutes)

Kalihokan 2: Pagmugna og Imong Kaugalingon nga mga Kapahayag (10–15 minutos)

Diha sa kalihokan 2, tutoki ang paggamit sa mga sundanan aron sa pagmugna og imong kaugalingon nga mga kapahayag. Pagmamugnaon. Ang imong tumong mao ang paggamit sa mga sundanan aron magmugna og daghang pangutana ug mga tubag kutob sa imong mahimo.

Activity 3: Create Your Own Conversations (15–20 minutes)

Kalihokan 3: Pagmugna og Imong Kaugalingon nga mga Panag-istoryahanay (15–20 minutos)

Sa kalihokan 3, pagpraktis og kompleto nga panag-istoryahanay sa tinuod nga kinabuhi nga mga eksena. Ang imong tumong mao ang pagmugna og makahuloganon nga mga panag-istoryahanay gamit ang Iningles nga imong nakat-onan.

Evaluate (5–10 minutes)

Pagsukod (5–10 minutos)

Sa kataposan sa matag panag-istoryahanay nga grupo, sukda ang imong paglambo sa mga katuyoan sa leksiyon. Gamita ang “Tigsubay sa Personal nga Pagtuon” aron sa pagsukod sa imong paningkamot sa personal nga pagtuon, ug pagtakda og mga tumong aron molambo. Paggahin og panahon aron saulogon ang imong pag-uswag ug ang imong mga paningkamot.

Daily Practice

Inadlaw nga Pagpraktis

Aron makakat-on og Iningles, ikaw kinahanglang mopalambo og kinaiya sa pagpraktis matag adlaw. Agig dugang sa mapahinungoron nga panahon sa pagtuon, pangita og mga paagi nga mapulihan ang imong inadlaw-adlaw nga mga kalihokan og Iningles. Pananglitan, kon maminaw ka og musika, maminaw ka sa Iningles. Kon motan-aw ka og sine, tan-aw og Iningles o adto sa Iningles nga mga subtitle. Sa matag higayon nga ikaw maghulat sa usa ka dapit, pagpraktis og mga panag-istoryahanay nga Iningles sa imong hunahuna. Kon ikaw mag-ampo, sulti og daghan nga Iningles kutob sa imong mahimo. Ang importante sa inadlaw nga pagpraktis mao ang paggamit sa Iningles sa imong normal nga buluhaton.

Mahimo usab nimong kompletohon ang mga kalihokan sa leksiyon ug ang mga pagsusi sa online diha sa englishconnect.org/learner/resources ug diha sa EnglishConnect Workbook.

Samtang imong kompletohon ang mga kalihokan sa personal nga pagtuon alang sa matag leksiyon ug magpraktis kada adlaw, ikaw mas dali nga makat-on ug mas makapangandam og maayo alang sa imong panag-istoryahanay nga grupo. Gamita ang “Tigsubay sa Personal nga Pagtuon” nga gilakip sa kataposan niini nga pasiuna aron masubay ang imong mga paningkamot ug imong mga tumong.

Remember This

Hinumdomi Kini

Samtang imong kompletohon ang mga kalihokan sa personal nga pagtuon, magpraktis og Iningles kada adlaw, ug aktibong moapil sa imong panag-istoryahanay nga grupo, imong mapalambo ang mga kahanas sa pakig-istoryahanay sa Iningles. Mas importante, samtang imong gamiton ang mga baroganan sa pagkat-on ug mag-ampo alang sa tabang sa Dios, Siya makatabang nimo nga makab-ot ang imong mga tumong karon ug sa umaabot.