Introduction

’Ōmuara’a

Welcome to EnglishConnect!

Mānava i te EnglishConnect !

E ha’aputuputu te EnglishConnect i te ta’ata ’o tē ’imi nei i te fa’a’ā’ano i tā rātou rāve’a ma te ha’api’ira’a mai i te reo peretāne. Nō te mau fenua ’e’ē ato’a tātou ’e tē parau nei i te mau reo ’e’ē. E mau fāito ’aravihi ta’a ’ē paha tō tātou nō te reo peretāne, ’ia ’āmui rā tātou e nehenehe tātou e tāpae i tā tātou ’ōpuara’a.

Why Are You Learning English?

Nō te aha ’oe e ha’api’i mai ai i te reo peretāne ?

E nehenehe te roa’ara’a i te hō’ē ’ōpuara’a teatea e tauturu ia ’oe ’ia vai fa’atumu noa ’e te ’ana’anatae. E hi’o ana’e nō te aha ’oe e ha’api’i mai ai i te reo peretāne. Tē tītau ra ānei ’oe i te hō’ē ’ohipa maita’i a’e ? E hina’aro ānei ’oe e ha’api’i mai i te reo peretāne nō te tāmau ā i tā ’oe ha’api’ira’a ? ’A rave i te taime nō te pāpa’i i te mau tumu ’o tē tūra’i nei ia ’oe ’ia ha’api’i mai i te reo peretāne.

Tē hina’aro nei au e ha’api’i mai i te reo peretāne nō te mea :

E ha’amara’a te ha’api’ira’a mai i te reo peretāne i tā ’oe mau rāve’a nō te ha’api’ira’a, te ’ohipa, te tāvinira’a ’e te fa’ahoara’a. E nehenehe te EnglishConnect e tauturu ia ’oe ’ia tāpae i tā ’oe mau ’ōpuara’a.

What Is EnglishConnect?

E aha te EnglishConnect ?

E fa’anahora’a ’ōtahi roa te EnglishConnect nō te ha’api’ira’a mai i te reo peretāne, tei hōro’ahia mai e Te ’Ēkālēsia a Iesu Mesia i te Feiā Mo’a i te mau Mahana Hope’a nei. ’Ua fa’ata’ahia te EnglishConnect nō te tauturu ia ’oe ’ia fa’ananea i tō ’oe mau ’aravihi nō te reo peretāne i roto i te hō’ē arutaimareva o te fa’aro’o, te fa’ahoara’a ’e te tupura’a i te rahi. Tōna aura’a e’ita ’oe e rave te reira ’o ’oe ana’e. E ha’api’i mai ’oe ’e vetahi ’ē ’e e turu ’e e fa’aitoito ’outou te tahi ’e te tahi. E ti’a ato’a ia ’oe e fa’ananea i tō ’oe fa’aro’o ē, e nehenehe te Atua e tauturu ia ’oe ’ia ha’api’i mai.

I roto te EnglishConnect tē vai ra e rave rahi fāito. E tauturu te EnglishConnect 1 ’e 2 i te mau pīahi ’ia fa’ananea i te mau ’aravihi tumu nō te reo peretāne. E fa’aineine te EnglishConnect 3 i te mau pīahi nō te mau rāve’a o te ha’api’ipi’ira’a—nō te BYU–Pathway Worldwide iho ā ra. E nehenehe ’oe e ’ite rahi mai nō ni’a te BYU–Pathway i ni’a byupathway.org. ’A ha’api’i rahi mai nō ni’a te EnglishConnect i ni’a englishconnect.org.

What Makes EnglishConnect Unique?

E aha te mea e fa’ariro ai ia EnglishConnect ’ei mea ’ōtahi roa ?

I roto te EnglishConnect, e fa’ananea tātou i te mau ’aravihi nō te reo peretāne i roto i te hō’ē arutaimareva o te fa’aro’o, te fa’ahoara’a ’e te tupura’a i te rahi.

Faith

Faʼaroʼo

I roto te EnglishConnect, e ha’api’i mai tātou nā roto i te ’imira’a maita’i ’e te fa’aro’o. E ha’amata te ha’api’ira’a tāta’itahi ma te hō’ē parau tumu o te ha’api’ira’a mai. E mau parau tumu pae vārua teie ’o te tauturu ia tātou ’ia ti’aturi i ni’a i te Atua, nō te fa’arahi i tō tātou ’aravihi nō te ha’api’i mai. E fa’atupu mai te mau ti’aturira’a tā ’oe e vai ra nō ni’a i tō ’oe mau ’aravihi ’ia ha’api’i mai, i te hō’ē hope’ara’a maita’i i ni’a i tā ’oe mau tauto’ora’a ’e mau fa’aotira’a. E nehenehe te mau parau tumu o te ha’api’ira’a mai e tauturu ia ’oe, ’ia māramarama i tō ’oe fāito pūai mau ’e te ’aravihi o te Atua nō te tauturu ia ’oe. Teie te mau parau tumu tā ’oe e ’imi maita’i mai :

E tamari’i ’oe nā te Atua

« E tamari’i au nā te Atua ma te hō’ē fāito pūai ’e hō’ē ’ōpuara’a mure ’ore ».

(hi’o Roma 8:16–17 ; Te ’Utuāfare : E Poro’i i tō te Ao nei)

Fa’a’ohipa i te fa’aro’o ia Iesu Mesia

« E nehenehe Iesu Mesia e tauturu iā’u ’ia rave i te mau mea ato’a, ’a fa’a’ohipa ai au i te fa’aro’o iāna ».

(hi’o Philipi 4:13 ; Etera 12:27 ; Moroni 7:33 )

Rave i te hōpoi’a

« E mana tō’u ’ia mā’iti ’e e hōpoi’a nā’u tō’u iho ha’api’ira’a mai »

(hi’o 2 Nephi 2:14, 16 ; Te Ha’api’ira’a Tumu ’e te mau Fafaura’a 58:27–28)

Here ’e ha’api’i i te tahi ’e te tahi

« E nehenehe au e ha’api’i mai nā roto mai i te Vārua Maita’i, ’a here ai au, ’a ha’api’i ai ’e ’a ha’api’i mai ai ’e vetahi ’ē ».

(hi’o Ioane 13:34–35 ; Ioane 14:26–27 ; Te Ha’api’ira’a Tumu ’e te mau Fafaura’a 88:77, 88:122–123)

Haere i mua

« Ma te tauturu a te Atua, e nehenehe au e haere i mua noa atu e fa’aruru vau i te mau tāfifira’a ».

(hi’o 2 Nephi 31:20 ; 2 Nephi 32:9 ; Te Ha’api’ira’a Tumu ’e te mau Fafaura’a 50:41–42)

E ui atu i te Fatu

« E ha’amaita’i au i tā’u ha’api’ira’a mai ma te uira’a atu i te Atua i te mau mahana ato’a nō ni’a i tā’u mau tauto’ora’a ».

(hi’o Maseli 3:5–6 ; Mataio 7:7–8 ; Alama 37:37)

’Ua riro te mau parau tumu o te ha’api’ira’a mai ’ei mau ha’apāpūra’a nō te parau mau. E nehenehe ’oe e parau i teie mau ha’apāpūra’a nō ’oe iho, ’ia hina’aro ana’e ’oe te fa’a’ana’anataera’a ’aore rā te fa’aitoitora’a. Ma te fa’a’ohipara’a i teie mau parau tumu, e mara’a tō ’oe ’aravihi ’ia ha’api’i mai. E ’ite ’oe ē, nā roto i te tauturu a te Atua e nehenehe ’oe e tāpae i tā ’oe mau ’ōpuara’a.

Fellowship

Fa’ahoara’a

Hō’ē tuha’a faufa’a roa nō te tāmata te EnglishConnect ’o te ha’api’ira’a mai ïa ’e vetahi ’ē. E here te mau pupu EnglishConnect, e tauturu ’e e turu i te tahi ’e te tahi. Tā ’outou mau rurura’a pupu ’o te hō’ē ïa vāhi pāpū nō te fa’a’ohipa i te paraura’a ’e te ravera’a i te mau hapehape. E nehenehe te ’āmuira’a atu i roto i te hō’ē pupu EnglishConnect, e tauturu ia ’oe ’ia vai ’ana’anatae noa ’e ’ia patu i te fa’ahoara’a.

Growth

Tupura’a i te rahi

Te EnglishConnect, ’ua hau atu ïa i te hō’ē fa’anahora’a nō te ha’api’i mai i te reo peretāne. Noa atu te huru i reira ’oe e ha’amata ai, te mau ’itera’a tā ’oe e ora mai e tauturu te reira ia ’oe ’ia riro ’ei pīahi maita’i a’e. E rāve’a nō ’oe ’ia :

• Fa’a’ohipa i te mau mahana ato’a te reo peretāne.

• Hi’o i tō ’oe haerera’a i mua.

• Ha’api’i mai ’e vetahi ’ē.

• Pure i te Atua nō te tauturu mai ’ia rave fa’aoti i tā ’oe mau ’ōpuara’a.

What Will I Do in EnglishConnect?

E aha tā’u e rave i roto i te EnglishConnect ?

I roto te EnglishConnect, e rave ’oe i tā ’oe iho ’imira’a maita’i, e fa’a’ohipa i te ’āparaura’a pupu ’e te ’ohipara’a i te mau mahana ato’a. ’Ua vāhihia te ha’api’ira’a tāta’itahi o te buka nā te mau pīahi e piti tuha’a—« Te ’imira’a maita’i a te ta’ata hō’ē » ’e « Te pupu ’āparaura’a ».

Personal Study

’Imira’a maita’i a ta’ata hō’ē

E fa’aineine te tuha’a « ’Imira’a maita’i a te ta’ata hō’ē » ia ’oe nō tā ’oe pupu ’āparaura’a. I roto te « Imira’a maita’i a te ta’ata hō’ē », e rave ’oe i te mau ’ohipara’a i muri nei :

Study the Principle of Learning

Te ’imira’a maita’i i te parau tumu o te ha’api’ira’a mai

Tē vai ra i roto te ha’api’ira’a tāta’itahi hō’ē parau tumu o te ha’api’ira’a mai. E mau parau tumu pae vārua teie ’o te tauturu ia ’oe ’ia ’āpiti atu ’e te Atua, nō te ha’api’i mai i te reo peretāne. Hou tā ’oe pupu ’āparaura’a, ’a tai’o i te parau tumu o te ha’api’ira’a mai, ’a feruri i te mau uira’a ’e ’a pāpa’i i tō ’oe mau mana’o.

Memorize Vocabulary

Tāmau ’ā’au i te pu’e ta’o

Ha’api’i mai i te aura’a ’e te fa’ahitira’a i te ta’o tāta’itahi. Rave te pu’e ta’o nō te fa’a’ohipa i te mau hi’ora’a. E nehenehe ato’a ’oe e mā’imi i te mau ta’o o te pu’e ta’o hau atu ā, ’o te nehenehe e fa’a’ohipahia i roto i te hi’ora’a.

Practice the Patterns

Fa’a’ohipa i te mau hi’ora’a

Ha’amata ma te tāmau-’ā’au-ra’a i te mau hi’ora’a o te pereota. Fa’a’ohipa i muri iho i te mau hi’ora’a nō te hāmani i tā ’oe iho mau uira’a ’e mau pāhonora’a. E nehenehe ’oe e mono i te mau ta’o tei rēnihia, ’e te tahi atu mau ta’o nō roto mai i te tāpura o te pu’e ta’o. Tāmau noa i te ha’api’ipi’ira’a ma te reo pūai ē tae roa i te taime e nehenehe ai ’oe, e fa’a’ohipa i te mau hi’ora’a ma te ti’aturi nō te ui ’e nō te pāhono i te mau uira’a.

Conversation Group

Pupu ’āparaura’a

Te tuha’a « Pupu ’āparaura’a », tei roto te mau ’ohipara’a ’o tā ’oe e fa’a’ohipa atu nō te ha’api’i mai ’e vetahi ’ē. I roto i te « Pupu ’āparaura’a », e rave ’oe i te mau ’ohipara’a i muri nei :

Discuss the Principle of Learning (20–30 minutes)

’Āparau i te parau tumu o te ha’api’ira’a mai (20–30 minuti)

I roto i tā ’oe pupu, ’a tai’o ’e ’a ’āparau i te parau tumu o te ha’api’ira’a mai. E rāve’a te reira nō te fa’a’ite atu ’e nō te ha’api’i mai nā roto mai ia vetahi ’ē.

Activities

Mau ’ohipara’a

I roto i te mau ’ohipara’a 1, 2, ’e 3, ’a fa’a’ohipa i te pu’e ta’o ’e te mau hi’ora’a o te pereota, nō te ’āmui atu i roto i te ’āparaura’a maita’i a’e. E tauturu te mau ’ohipara’a ia ’oe ’ia nu’u i mua mai te ha’api’ipi’ira’a tāmau i te hāmanira’a i tā ’oe iho ’āparaura’a. E fa’aineine te ’ohipara’a tāta’itahi ia ’oe nō te ’ohipara’a i muri mai.

Activity 1: Practice the Patterns (10–15 minutes)

’Ohipara’a 1 : Fa’a’ohipa i te hi’ora’a (10–15 minuti)

I roto i te ’ohipara’a 1, ’a hi’o fa’ahou i te pu’e ta’o ’e te mau hi’ora’a tā ’oe i ha’api’i mai i roto i tā ’oe iho ’imira’a maita’i. Tā ’oe ’ōpuara’a ’o te fa’a’ohipara’a ïa i te mau hi’ora’a, nō te parau ’e nō te hāro’aro’a i te mau uira’a ’e te mau pāhonora’a ’ōhie.

Activity 2: Create Your Own Sentences (10–15 minutes)

’Ohipara’a 2 : Hāmani i tā ’oe iho mau pereota (10–15 minuti)

I roto i te ’ohipara’a 2, fa’atumu i ni’a i te fa’a’ohipara’a i te mau hi’ora’a nō te hāmani i tā ’oe iho mau pereota. ’Ia riro ’ei ta’ata hāmani. Tā ’oe ’ōpura’a ’o te fa’a’ohipara’a ïa i te mau hi’ora’a nō te hāmani e rave rahi uira’a ’e mau pāhonora’a ’o tā ’oe e nehenehe.

Activity 3: Create Your Own Conversations (15–20 minutes)

’Ohipara’a 3 : Hāmani i tā ’oe iho ’āparaura’a (15–20 minuti)

I roto i te ’ohipara’a 3, ’a fa’a’ohipa i te mau ’āparaura’a ti’a i roto i te mau tupura’a mau. Tā ’oe ’ōpuara’a ’o te fa’ari’ira’a ïa i te mau ’āparaura’a maita’i a’e ma te fa’a’ohipara’a i te reo peretāne ’o tā ’oe i ha’api’i mai.

Evaluate (5–10 minutes)

Hi’opo’ara’a (5–10 minuti)

I te fa’aotira’a te pupu ’āparaura’a tāta’itahi, ’a hi’opo’a i tō ’oe nu’ura’a i mua nō ni’a i te mau ’ōpuara’a o te ha’api’ira’a. Fa’a’ohipa te « Pe’e i te ’imira’a maita’i a te ta’ata hō’ē », nō te hi’opo’a i tā ’oe mau tauto’ora’a i roto i te ’imira’a maita’i a te ta’ata hō’ē ’e ’a ha’amau i te mai ’ōpuara’a nō te ha’amaita’i. Rave i te taime nō te ha’apōpou i tō ’oe nu’ura’a i mua ’e tā ’oe mau tauto’ora’a.

Daily Practice

Ha’api’ipi’ira’a tāmahana

Nō te ha’api’i mai i te reo peretāne, e ti’a ia ’oe ’ia fa’arahi i te hō’ē huru nō te ha’api’ipi’ira’a tāmahana. Hau atu i te ravera’a i te taime nō te ’imira’a maita’i, ’a ’ite mai i te mau rāve’a nō te mono i tā ’oe mau ’ohipara’a tāmahana ma te reo peretāne. ’Ei hi’ora’a, ’ia fa’aro’o ana’e ’oe i te pehe, ’a fa’aro’o nā roto i te reo peretāne. ’Ia hi’o ’oe i te hō’ē hōho’a teata, ’a hi’o te reira nā roto i te reo peretāne ’aore rā ’a tu’u i te pāpa’i i raro nā roto i te reo peretāne. I te mau taime ato’a ’a tīa’i ai ’oe i te hō’ē vāhi, ’a ha’api’ipi’i mai i te mau ’āparaura’a nā roto i te reo peretāne i roto i tō ’oe ferurira’a. ’Ia pure ana’e ’oe, ’a parau e rave rahi taime mai tā ’oe e nehenehe nā roto i te reo peretāne. Tē tāviri nō te ha’api’ipi’ira’a tāmahana ’o te fa’a’ohipara’a ïa i te reo peretāne i roto i tā ’oe ravera’a mātauhia.

E nehenehe ato’a ’oe e fa’atupu i te mau ’ohipara’a o te ha’api’ira’a ’e te hi’opo’ara’a nā ni’a te natira’a i te englishconnect.org/learner/resources ’e i roto te buka ’ohipa EnglishConnect

’A tāmau noa ai ’oe i te rave i te mau ’ohipara’a nō te ’imira’a maita’i a te ta’ata hō’ē nō te ha’api’ira’a tāta’itahi ’e te ha’api’ipi’ira’a tāmahana, e ha’api’i ’oi’oi mai a’e ’oe ’e e ’ineine maita’i a’e nō tā ’oe pupu ’āparaura’a. Fa’a’ohipa te « Pe’e te ’imira’a maita’i a te ta’ata hō’ē » e vai ra i te hope’a o teie ’ōmuara’a nō te pe’e i tā ’oe mau tauto’ora’a ’e tā ’oe mau ’ōpuara’a.

Remember This

’A ha’amana’o i teie

’A tāmau noa ai ’oe i te rave i te mau ’ohipara’a nō te ’imira’a maita’i a te ta’ata hō’ē, te ha’api’ipi’ira’a tāmahana i te reo peretāne ’e te ’āmuira’a mai ma te itoito i tā ’oe pupu ’āparaura’a, e fa’ananea ’oe i tō ’oe mau ’aravihi nō te ’āparaura’a nā roto i te reo peretāne. Mea faufa’a atu ā, mai te mea e fa’a’ohipa ’oe i te mau parau tumu o te ha’api’ira’a mai ’e te purera’a nō te fa’ari’i i te tauturu a te Atua, e nehenehe ’oia e tauturu ia ’oe ’ia tāpae i tā ’oe mau ’ōpuara’a, i teienei ’e i muri nei.