Introduction

Lus Cev

Welcome to EnglishConnect!

Tos Txais Koj rau EnglishConnect!

EnglishConnect pab tib neeg koom ua ke cov uas nrhiav kev muaj cib fim ntxiv los ntawm kev kawm lus Askiv. Peb nyias muaj nyias caj ceg keeb kwm thiab nyias hais nyias yam lus. Tej zaum peb txhua tus txoj kev txawj hais lus Askiv ib leeg txawv ib leeg, tiam sis nyob ua ke peb yuav muaj peev xwm ua raws li peb tej lub hom phiaj.

Why Are You Learning English?

Vim Li Cas Koj Kawm Lus Askiv?

Qhov uas koj muaj ib lub hom phiaj uas meej yuav pab koj tsom ntsoov thiab muaj siab xav kawm. Cia peb xav txog vim li cas koj kawm lus Askiv. Koj puas xav tau ib txoj hauj lwm zoo dua? Koj puas xav kawm lus Askiv kom koj txawj kawm ntawv ntxiv? Cia li siv sij hawm rau ib me pliag sau yog vim li cas koj kawm lus Askiv.

Kuv xav kawm lus Askiv vim:

Kev kawm lus Askiv yuav pab koj muaj ib fim kawm ntawv, ua hauj lwm, pab lwm tus, thiab ntaus phooj ywg. EnglishConnect yuav pab koj ua raws li koj lub hom phiaj.

What Is EnglishConnect?

EnglishConnect Yog Dab Tsi?

EnglishConnect yog ib lub txheej xwm kawm lus Askiv uas Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua. Twb tsim EnglishConnect kom pab koj txawj hais lus Askiv nyob hauv ib qho chaw uas txhawb nqa kev ntseeg, kev ua phooj ywg, thiab kev vam meej. Qhov no txhais hais tias koj yuav tsis nyob koj ib leeg. Koj yuav nrog lwm tus kawm hais lus thiab nej ib leeg yuav txhawb nqa ib leeg. Koj txoj kev ntseeg hais tias Vajtswv muaj peev xwm pab koj kawm yuav loj tuaj thiab.

EnglishConnect muaj peb theem. EnglishConnect 1 thiab 2 pab cov neeg uas kawm muaj txuj ci txawj hais lus Askiv qib yooj yim. EnglishConnect 3 npaj cov neeg txawj mus kawm ntawv—qhov tseem ceeb yog BYU–Pathway Worldwide. Koj kawm tau ntxiv BYU–Pathway Worldwide nyob ntawm byupathway.org. Kawm ntxiv txog EnglishConnect nyob ntawm englishconnect.org.

What Makes EnglishConnect Unique?

Vim Li Cas EnglishConnect Txawv Lwm Yam?

Nyob hauv EnglishConnect, peb kawm tej txuj ci hais lus Askiv nyob hauv ib qho chaw uas muaj kev ntseeg, kev ua phooj ywg, thiab kev ua zoo zuj zus.

Faith

Kev Ntseeg

Nyob hauv EnglishConnect, peb kawm los ntawm kev kawm ntawv thiab kev ntseeg. Muaj ib lub ntsiab cai txog kev kawm ntawv uas qhib txhua zaj lus qhia. Tej no yog tej lub ntsiab cai ntawm sab ntsuj plig uas pab peb tso siab rau Vajtswv kom ua rau peb txawj kawm. Tej yam uas koj ntseeg txog koj txoj kev txawj kawm ntawv yuav hloov koj txoj kev txawj ua hauj lwm loj heev. Tej lub ntsiab cai txog kev kawm ntawv pab tau koj to taub koj muaj peev xwm kawm dab tsi thiab Vajtswv txoj kev muaj peev xwm pab tau koj. Tej no yog tej lub ntsiab cai uas koj yuav kawm:

Koj Yog Vajtswv Ib tug Me Nyuam

“Kuv yog Vajtswv ib tug me nyuam uas muaj peev xwm thiab lub hom phiaj nyob mus ib txhis.”

(saib Loos 8:16–17; Tsev Neeg: Ib zaj Lus Tshaj Tawm rau lub Ntiaj Teb)

Muab Siab rau Ntseeg Yexus Khetos

“Yexus Khetos pab tau kuv ua txhua yam thaum kuv muab siab rau ntseeg Nws.”

(saib Filipis 4:13; Ethaws 12:27; Maulaunais 7:33)

Lav Ris Kev Kawm

“Kuv muaj hwj chim xaiv, thiab kuv lav ris kuv txoj kev kawm.”

(saib 2 Nifais 2:14, 16; Lus Qhuab Qhia thiab Kev Khi Lus 58:27–28)

Ib Leeg Hlub thiab Qhia Ib Leeg

“Kuv kawm tau los ntawm tus Vaj Ntsuj Plig Dawb Huv thaum kuv hlub, qhia, thiab kawm nrog lwm tus.”

(saib Yauhas 13:34–35; Yauhas 14:26–27; Lus Qhuab Qhia thiab Kev Khi Lus 88:77, 88:122–123)

Mus Lawm Tom Hauv Ntej

“Nrog Vajtswv txoj kev pab, kuv thiaj li muaj cuab kav mus lawm tom hauv ntej thaum kuv raug tej kev cov nyom.”

(saib 2 Nifais 31:20; 2 Nifais 32:9; Lus Qhuab Qhia thiab Kev Khi Lus 50:41–42)

Sab Laj Nrog tus Tswv

“Kuv yuav kawm tau zoo dua ntxiv thaum kuv nrog Vajtswv sab laj txog kuv tej hauj lwm.”

(saib Paj Lug 3:5–6; Mathais 7:7–8; Amas 37:37)

Tej lub ntsiab cai txog kev kawm ntawv yog kev hais lus tseeb. Koj hais tau tej lus no rau koj tus kheej thaum koj xav tau kev txhawb nqa. Thaum koj ua raws li tej lub ntsiab cai no, koj txoj kev txawj kawm yuav loj tuaj. Koj yuav paub tias thaum Vajtswv pab koj, koj yuav muaj peev xwm ua raws li koj tej lub hom phiaj.

Fellowship

Kev Ua Phooj Ywg

Ib yam tseem ceeb ntawm EnglishConnect yog kev nrog lwm tus kawm ntawv. Tej pawg EnglishConnect sib hlub, sib pab, thiab ib leeg txhawb nqa ib leeg. Koj pawg tej kev sib ntsib yeej yog tej qhov chaw zoo rau nej xyaum hais lus thiab hais lus yuam kev. Kev koom nrog ib pawg EnglishConnect pab tau koj xav kawm thiab ua phooj ywg zoo.

Growth

Kev Ua Zoo Zuj Zus

EnglishConnect tsis yog ib lub txheej xwm kawm lus Askiv xwb. Txawm koj txawj npaum li cas tam sim no los, tej yam uas koj ua no yuav pab koj hloov los ua ib tug neeg kawm zoo dua. Koj yuav muaj cib fim:

• Xyaum hais lus Askiv txhua hnub.

• Teev koj txoj kev kawm ntawv.

• Nrog lwm tus kawm ua ke.

• Thov Vajtswv kom pab koj ua raws li koj tej lub hom phiaj.

What Will I Do in EnglishConnect?

Kuv Yuav Ua Dab tsi hauv EnglishConnect?

Nyob hauv EnglishConnect, koj yuav kawm ntawv koj tus kheej, xyaum hais lus hauv ib pawg sib tham, thiab xyaum hais lus txhua hnub. Txhua zaj lus qhia nyob hauv EnglishConnect phau ntawv rau cov neeg kawm los muab faib ua ob feem—“Kev Kawm Ntawv Koj tus Kheej” thiab “Pawg Sib Tham.”

Personal Study

Kev Kawm Ntawv Yus tus Kheej

Zaj hu ua “Kev Kawm Ntawv Koj tus Kheej” yuav pab koj npaj rau koj pawg sib tham. Nyob hauv “Kev Kawm Ntawv Koj tus Kheej,” koj ua tej yam no:

Study the Principle of Learning

Kawm tej lub Ntsiab Cai txog Kev Kawm Ntawv

Txhua zaj lus qhia muaj ib lub ntsiab cai txog kev kawm ntawv. Nov yog tej lub ntsiab cai ntawm sab ntsuj plig uas cia koj txais Vajtswv txoj kev pab kom kawm lus Askiv. Ua ntej koj pawg sib tham, cia li nyeem lub ntsiab cai txog kev kawm ntawv, xav txog tej lus nug, thiab sau ntawv txog koj tej kev xav.

Memorize Vocabulary

Cim Ntsoov tej Lo Lus

Cia li kawm lub ntsiab thiab txoj kev hais txhua lo lus. Siv tej lo lus kom xyaum tus txheej txheem hais lus. Koj kuj nrhiav tau tej lo lus ntxiv uas siv tau hauv tus txheej txheem hais lus.

Practice the Patterns

Xyaum tej Txheej Txheem Hais Lus

Pib cim ntsoov tej txheej txheem hais kab lus. Ces koj siv tau tej txheej txheem no kom tsim koj tej lus nug thiab tej lus teb. Koj muab tej lo lus pauv tau cov lus uas muaj ib txoj kab hauv qab. Yeej meem xyaum hais lus mus txog thaum koj txawj siv tej txheej txheem no kom nug thiab teb tej lus nug.

Conversation Group

Pawg Sib Tham

Zaj hu ua “Pawg Sib Tham” muaj tej kev kawm uas koj yuav siv kom nrog lwm tus kawm ua ke. Nyob hauv “Pawg Sib Tham,” koj ua tej yam no:

Discuss the Principle of Learning (20–30 minutes)

Sib Tham txog tej lub Ntsiab Cai txog Kev Kawm Ntawv (20–30 feeb)

Nyob hauv koj pawg, cia li nyeem thiab sib tham txog lub ntsiab cai txog kev kawm ntawv. Nov yog ib lub cib fim kom hais lus thiab kawm los ntawm lwm tus.

Activities

Tej Kev Kawm

Nyob hauv tej kev kawm 1, 2, thiab 3, siv tej lo lus thiab tej txheej txheem kom sib tham ua ke. Tej kev kawm pab koj kawm zuj zus los ntawm kev xyaum rov qab hais dua ntxiv mus txog thaum koj txawj nrog lwm tus tham. Txhua yam kev kawm npaj koj rau qhov uas yuav ua tom qab.

Activity 1: Practice the Patterns (10–15 minutes)

Kev Kawm 1: Xyaum tej Txheej Txheem Hais Lus (10–15 feeb)

Nyob hauv kev kawm 1, rov qab hais tej lo lu thiab tej txheej txheem hais lus uas koj kawm thaum koj kawm koj tus kheej. Koj lub hom phiaj yog kev siv tej txheej txheem hais lus thiab to taub tej lus nug thiab tej lus teb.

Activity 2: Create Your Own Sentences (10–15 minutes)

Kev Kawm 2: Tsim tej Kab Lus rau Koj Hais (10–15 feeb)

Nyob hauv kev kawm 2, tsom ntsoov rau tej txheej txheem kom tsim tau tej kab lus tshiab. Tawm tswv yim tshiab. Koj lub hom phiaj yog kev siv tej txheej txheem kom txawj tsim tej lus nug thiab tej lus teb.

Activity 3: Create Your Own Conversations (15–20 minutes)

Kev Kawm 3: Tsim Kev Sib Tham (15–20 feeb)

Nyob hauv kev kawm 3, xyaum sib tham raws li yuav ua hauv lub neej tiag tiag. Koj lub hom phiaj yog kom hais lus Askiv sib tham txog tej yam uas muaj nqis.

Evaluate (5–10 minutes)

Ntsuam Xyuas (5–10 feeb)

Thaum txhua pawg sib tham yuav kaw, cia li ntsuam xyuas seb koj ua raws li tej lub hom phiaj zoo li cas. Siv “Kev Teev Kev Kawm Ntawv rau Koj tus Kheej” kom tshuaj ntsuam koj txoj kev siv zog kawm ntawv, thiab cuab hom phiaj kom ua zoo dua. Siv sij hawm ua koob tsheej txog tej yam koj ua tau thiab koj txoj kev siv zog.

Daily Practice

Xyaum Txhua Hnub

Yog xav kawm lus Askiv, koj yuav tsum xyaum txhua hnub. Ntxiv rau lub sij hawm rau koj kawm ntawv, nrhiav kev kom hais lus Askiv thaum ua tej yam txhua hnub. Piv txwv hais tias, thaum koj mloog nkauj, cia li mloog lus Askiv. Thaum koj saib movie, mloog lawv hais lus Askiv los sis nyeem ntawv Askiv. Thaum koj nyob qhov twg tos ib yam dab tsi, xyaum hais lus Askiv hauv koj lub siab. Thaum koj thov Vajtswv, cia li nyeem lus Askiv feem ntau. Qhov tseem ceeb kom xyaum hais lus txhua hnub yog kev hais lus Askiv thaum koj ua tej yam thaum nruab hnub.

Koj kuj ua tau tej kev kawm thiab tej kev ntsuas kev kawm nyob saum huab cua nyob ntawm englishconnect.org/learner/resources thiab nyob hauv EnglishConnect Phau Kawm Ntawv.

Thaum koj ua tej kev kawm koj tus kheej hauv txhua zaj lus qhia thiab xyaum txhua hnub, koj yuav kawm nrawm dua thiab npaj zoo dua rau koj pawg sib tham. Siv “Kev Teev Kev Kawm Ntawv rau Koj tus Kheej” uas nyob ntawm zaj lus qhia qhov kawg kom teev koj txoj kev ua zoo li cas thiab koj tej lub hom phiaj.

Remember This

Nco Ntsoov txog Qhov No

Thaum koj ua tej kev kawm koj tus kheej, xyaum hais lus Askiv txhua hnub, thiab nrog koj pawg sib tham ua ke, koj yuav txawj hais lus Askiv zuj zus. Qhov tseem ceeb, thaum koj ua raws li tej lub hom phiaj txog kev kawm ntawv thiab thov Vajtswv pab, Nws yuav pab koj ua raws li koj tej lub hom phiaj tam sim no thiab thaum yav tom ntej.