jodikdik eo ej kōnono

Kadkad in Doctrinal Mastery

Ilo Bok in Mormon, rikanaan Hilamōn ekar katakin ļōm̧aro nejin, “Ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami” (Hilamōn 5:12). Kalōk ad ejm̧aan ioon Jisōs Kraist—eo ekitbuuj meļeļe, tōmak, im mour ekkar n̄an katak eo An—naaj kam̧wilaļļo̧k oktak eo ad im wujlepļo̧k āinwōt rikaļoor ro An, kōjparok kōj ņae im̧we ko an rikōjdāt eo, im jipan̄ kōj kōjeraam̧m̧an mour ko an ro jet.

Juon iaan wāween ko jej kadedeļo̧k menin ej ilo ekkatak jeje ko rekwojarjar ippān doon ilo kūlaaj. Bar juon wāween jej kalōk pedped eo ad ilo Jisōs Kraist im katak eo An ej ilo juon kijejeto ņa etan Doctrinal Mastery.

Doctrinal Mastery eo ej mije ruo kōttōpar ko:

1. Ekkatak im mour kake pedped in katak ko rekwojarjar n̄an bōk jeļāļo̧kjeņ an jetōb. Jemedwōj Ilan̄ eaar kwaļo̧k pedped ko n̄an bōk jeļāļo̧kjeņ an jetōb. Pedped kein ekoba jerbal kōn tōmak, etale katak ko im kajjitōk ko kōn juon erreim̧aanļo̧k indeeo, im kappukot meļeļe ko kōn kein jipan̄ ko me litok me rekwojarjar. Jej ejaake doctrinal mastery ilo ad mour kake pedped kein ilo iien kūlaaj im itulikin kūlaaj im kappukot uwaak ko n̄an kajjitōk ko ikkijeen katak eo, an juon make, im mour in iaio̧, im kōn bwebwenato ko etto ilo juon wāween me ej karuwaineneik Jetōb Kwojarjar n̄an kōkajoorļo̧k ad tōmak ilo Jemedwōj Ilan̄ im Jisōs Kraist.

2. Tijem̧ļo̧k ilo doctrinal mastery eoon ko im katak eo an gospel in an Jisōs Kraist me rej katakin. Kōttōpar in ej tōprak jen:

   1. Jeļā katak eo kar kwaļo̧k ilo eoon in katak eo.

   2. Kōmeļeļeik katak eo kar kwaļo̧k ilo eoon in katak eo.

   3. Maron̄ keememej im jeļā eoon in katak eo im kakkilōklōkki eoon ko raorōk.

   4. Mour kake katak eo an gospel eo an Jisōs Kraist im pedped in katak eo n̄an bōk jeļāļo̧kjeņ an jetōb ilo kālet ko ad kajjojo raan im ilo ad uwaaki unin kōnono ko im kajjitōk ko ikkijeen katak eo, an juon make, im mour in iaio̧, im kōn bwebwenato ko etto.