9. Mga Sugo

tawo nga nagbayad sa ikapulo

9.1. Ang mga sugo mao ang mga balaod ug mga kinahanglanon nga gihatag sa Dios aron matabangan kita nga molambo ug mahimong sama Kaniya. Ang mga sugo mao ang pagpakita og gugma sa Dios kanato. Atong mapakita ang atong gugma alang Kaniya pinaagi sa pagsunod sa Iyang mga sugo (tan-awa sa Juan 14:15). Ang pagtuman sa mga sugo kanunay nga magdala og kalipay ug mga panalangin gikan sa Ginoo (tan-awa sa Mosiah 2:41; Alma 41:10). Ang Ginoo dili mohatag kanato og sugo nga dili mag-andam og paagi alang kanato nga matuman kini (tan-awa sa 1 Nephi 3:7).

9.2. Ang duha ka labing sukaranan nga mga sugo mao ang “higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. … Ug … higugmaa ang imong silingan sama sa imong kaugalingon” (tan-awa sa Mateo 22:36–39). Mahigugma ug maalagaran nato ang Dios pinaagi sa atong pagpili nga mohigugma ug moalagad sa uban (tan-awa sa Mosiah 2:17; Moroni 7:45, 47–48).

9.3. Usa sa pinakaunang sugo nga gihatag sa tawo mao ang pagbalaan sa adlawng Igpapahulay. Gisugo sa Dios ang Iyang mga anak sa pagtahud Kaniya pinaagi sa pagsunod sa Iyang kabubut-on kay sa atong kaugalingon sa adlawng Igpapahulay, ug misaad Siya og daghang panalangin sa mga tawo nga mobalaan sa Iyang adlaw (tan-awa sa Isaias 58:13–14).

9.4. Ang Napulo ka mga Sugo importante nga bahin sa ebanghelyo ug kini mahangturong mga baruganan nga gikinahanglan alang sa atong kahimayaan (tan-awa sa Exodo 20:3–17). Ang Ginoo mipadayag niini ngadto ni Moises sa karaang mga panahon, ug Siya mipahayag niini pag-usab diha sa mga pagpadayag sa ulahing mga adlaw.

9.5. Ang mga sugo sa Dios naglakip sa matag adlaw nga pag-ampo, pagtuon sa mga pulong sa Dios, paghinulsol, pagsunod sa balaod sa kaputli, pagbayad og hingpit nga ikapulo (tan-awa sa Malaquias 3:8–10), pagpuasa (tan-awa sa Isaias 58:6–7), pagpasaylo sa uban (tan-awa sa DP 64:9–11), pagsunod sa Pulong sa Kaalam (tan-awa sa DP 89:18–21), ug pagtudlo sa ebanghelyo ngadto sa uban (tan-awa sa Mateo 5:14–16; DP 18:15–16).

May kalabutan nga mga pakisayran: Genesis 39:9; 2 Timoteo 3:15–17; Santiago 1:5–6; 2 Nephi 32:3; 2 Nephi 32:8–9; Mosiah 18:8–10; Alma 39:9; 3 Nephi 18:15, 20–21; DP 58:42–43; DP 82:10

May kalabutan nga mga hisgutanan: Pag-angkon og Espirituhanong Kahibalo; Ang Pag-ula ni Jesukristo: Paghinulsol; Mga Ordinansa ug mga Pakigsaad