8. Faaipoipoga ma le Aiga, Pepa Autu o le Atamai i Aoaoga Faavae(2018)
8. Faaipoipoga ma le Aiga
8.1. O le faaipoipoga i le va o se alii ma se tamaitai, ua faauuina e le Atua ma o le aiga o le totonugalemu lea o Lana fuafuaga o le faaolataga ma lo tatou fiafia (tagai Kenese 2:24; MF&F 49:15–17). Ua na o le ulufale atu ma le tausia faamaoni o le feagaiga o le faaipoipoga selesitila e mafai ai e le alii ma le tamaitai ona faataunuu lo la malosiaga paia, ma faavavau (tagai 1 Korinito 11:11;MF&F 131:1–4).
8.2. Ua poloaiina e le Atua Ana fanau ia fanafanau ma faatumu ai le lalolagi (tagai Kenese 1:28). O mana paia o le foafoaga e tatau ona faaaogaina tau lava o le va o le alii ma le tamaitai ua faaipoipoina faaletulafono o se tane ma se ava (tagai Kenese 39:9; Alema 39:9). O le tane ma le ava ua i ai se tiutetauave paia e alolofa ma tausi e le tasi le isi ma a la fanau. E tatau i matua ona tausia a latou fanau i le alofa ma le amiotonu ma saunia mea latou te manaomia faaleagaga ma le faaletino.
8.3. E maua le fiafia i le olaga faaleaiga pe a faavae i aoaoga a le Alii o Iesu Keriso. E ala atu i le mamanu paia, e tatau ona pulefaamalumalu tamā i o latou aiga i le alofa ma le amiotonu, ma tuuina atu mea e manaomia o le olaga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa.
8.4. O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Sa foafoaina le lalolagi ma faaalia mai le talalelei ina ia mafai ai ona fausia aiga, faamauina, ma faaeaina e faavavau. E ala atu i le talafaasolopito o aiga ma auaunaga faalemalumalu, e mafai ai ona tatou faia sauniga ma feagaiga o le talalelei ua avanoa i o tatou tuaa (tagai Malaki 4:5–6).
(Faafetauia mai O Le Aiga: O Se Folafolaga i le Lalolagi,” Ensignpo o le Liahona,Nov. 2010, 129.
Mau fesootai: Mose 1:39; Kenese 1:26–27; Esoto 20:3–17; Mataio 16:15–19; Ioane 17:3; 1 Korinito 6:19–20; 2 Nifae 2:22–25; Mosaea 2:41; Alema 41:10; MF&F 84:20–22
Autu fesootai: O le Fuafuaga o le Faaolataga; Poloaiga