Chan ru roksinkil Kim, Taaqehin—Choq’ re li Tijonelil re Melkisedek ut li Komonil re Tenq’ank

Sa’ enero re 2018, Kim, Taaqehin—Choq’ re li Tijonelil re Melkisedek ut li Komonil re Tenq’ank taa’oksimanq sa’ chixjunil li Iglees ut tixk’am chaq li jale’k sa’eb’ li qach’utam re domingo. Eb’ li molam re li Tijonelil re Melkisedek ut eb’ li Komonil re Tenq’ank te’uxmanq a’ yaal jo’ chanru li tusleb’aal kutan a’in choq’ re li po:

Xb’een domingo: K’uub’ank na’leb’ sa’ komonil chirix li na’ajman ru sa’ li qana’aj, li naru taab’aanumanq, ut li ch’a’ajkilal; ut k’uub’ank na’leb’ chirix chan ru xk’anjelankil lix k’anjel li Qaawa’.
Xkab’ ut rox domingo: Xtzolb’aleb’ li esil re li ch’utub’aj-ib’ toje’ xnume’. Li awa’b’ejil re li molam, li ch’uut, malaj li Komonil re Tenq’ank neke’xsik’ ru li esil li te’tzole’q, us ta naru naq li obiisp malaj li awa’b’ej re oqech te’xk’e xna’leb’eb’. Eb’ li esil a’in te’oksimanq sa’ xna’aj jun ak’ hu Enseñanzas de los Presidentes de la Iglesia.
Xkaa domingo: Aatinak chirix jun na’leb’ sik’b’il ru xb’aan li Xb’eenil Awa’b’ejil ut lix Molameb’ li Kab’laju chi Apostol.
Ro’ domingo: Aatinak chirix jun na’leb’ sik’b’il ru xb’aan li obispil.

Re xtenq’ankileb’ laj jolominel ut li komon chixkawresinkil rib’ choq’ re li jale’k a’in, li junjunq chi teep naru te’xtz’il rix sa’ komonil Kim, Taaqehin—Choq’ re li Tijonelil re Melkisedek ut li Komonil re Tenq’ank sa’ li aplicación Biblioteca del Evangelio, sa’ comefollowme.lds.org, ut sa’ li Liahona wan wi’ li esil re li jolomil ch’utub’aj-ib’. Jo’ eetalil, eb’ laj jolominel naru:

Te’wanq sa’ jun ch’utam re li oqech malaj li teep re xtz’ilb’aleb’ rix li k’anjeleb’aal sa’ komonil ut re aatinak chirix li k’a’ru jalan (chi’ilmanq li “Tenq’anel hu chirix li aatinak sa’ komonil” re xtawb’al junjunq li patz’om us choq’ re li aatinak).
Te’xb’oqeb’ li jolomil ch’utam re li teep chixsik’b’al li na’leb’ choq’ re li ch’utam re k’uub’ank na’leb’ re li xb’een domingo li tixtenq’a li na’ajman ru sa’ li teep. Eb’ laj jolominel sa’ li tijonelil ut li Komonil re Tenq’ank naru te’xsik’ jo’q’e te’aatinaq chirixeb’ li junjunq chi na’leb’.
Te’xye resil ut te’aatinaq chirixeb’ li ak’ k’anjeleb’aal sa’ jun ch’utam chal re choq’ re li molam, li ch’uut, malaj li Komonil re Tenq’ank. Te’aatinaq chirix chan ru li junjunq komon naru tixkawresi rib’ choq’ reheb’ li jale’k a’in.
Te’xwaklesi xch’ooleb’ laj k’utunel re li tijonelil ut li Komonil re Tenq’ank chi okenk sa’ li ch’utam reheb’ laj k’utunel re xwotzb’al ut aatinak chirix li neke’xk’ul, lix ch’a’ajkilal, ut lix patz’om chirix li ak’ k’anjeleb’aal.

Tenq’anel hu chirix li aatinak sa’ komonil

B’oqeb’ laj jolominel ut li komon chixtz’ilb’al rix Kim, Taaqehin—Choq’ re li Tijonelil re Melkisedek ut li Komonil re Tenq’ank sa’ li aplicación Biblioteca del Evangelio malaj sa’ li Liahona wan wi’ li esil re li jolomil ch’utub’aj-ib’.

K’a’ru li mas narajsiheb’ xch’ool?
Chan ru te’jalaaq li ch’utam re domingo?
K’a’ruheb’ lix patz’om?

Naq nakatz’il rix li k’anjeleb’aal a’in rik’ineb’ li komon ut laj jolominel, eb’ li na’leb’ ut patz’om a’in naru tate’xtenq’a:

Xb’eenil na’leb’: K’uub’ank na’leb’ sa’ komonil chirix lix k’anjel li Qaawa’.

Chan ru jalan jalanq jun ch’utam re k’uub’ank na’leb’ rik’in jun tzol’leb’ malaj tzoleb’aal?
K’a’ruheb’ li usilal li te’chalq naq naqak’uub’ qana’leb’ sa’ komonil chirixeb’ li na’leb’ li wankeb’ rilom rik’in li qakomon?
Chan ru naq li qach’utam re k’uub’ank na’leb’ taaruuq tooxk’e chi k’anjelak chi kaw? (Re xtzilb’al rixeb’ li rajb’al li Tijonelil re Melkisedek ut li Komonil re Tenq’ank, chi’ilmanq Manual 2: Administración de la Iglesia, 7.1, 9.1.1.)

Xb’eenil na’leb’: Tzoleb’ ut k’anjelaheb’ li esil re li jolomil ch’utub’aj-ib’.

Chan ru naq too’osob’tesiiq rik’in xjayalinkil qib’ chixtzolb’aleb’ li esil re li jolomil ch’utub’aj-ib’?
K’a’ru xqatzol naq yooko chaq chiroksinkileb’ li hu Kim, Taaqehin choq’ reheb’ li saaj ut Li k’utuk jo’ li Kolonel?
K’a’ru naru te’xb’aanu li komon ut laj jolominel re naq chaab’ilaq li ruuchinihomeb’ li ak’ hu ut k’anjeleb’aal a’in?

Eb’ li komon ut laj jolominel tento naq ink’a’ te’xkanab’ k’uub’ank na’leb’ sa’ komonil ut rik’in li Qaawa’ naq neke’xyal chixb’aanunkileb’ li xninqal ru jale’k a’in.