Sa‘ li yamyookil ch‘och‘, xb‘aan li xEva Koleva Timothy

30 enero–5 febrero

Mateo 4; Lukas 4–5

“Lix Musiq‘ li Qaawa‘ wank sa‘ inb‘een”

Naq nakatzol Mateo 4 ut Lukas 4–5, tz’iib’a li musiq’ejil na’leb’ nakak’ul. A’in tixb’oq chaq aamusiq’ankil re taaruuq taab’aanu li taatenq’anq re laa tzoleb’aal. Naru ajwi’ taak’oxla roksinkil Kim, Taaqehin—Choq’ reheb’ li komon ut li junkab’al jo’ ajwi’ li aatin tz’iib’anb’il arin re xtawb’al chik aana’leb’.

Xkanab‘ankileb‘ chi wotzok

Sa’ li hu eetanb’il choq’ re li xamaan a’in, wan li aatin a’in: “Ke’kanaak chi sachsookeb’ xch’ool rik’in lix k’utum, xb’aan naq na’aatinak rik’in xwankilal“ (Lukas 4:32; chi’ilmanq ajwi’ Markos 1:22). Patz‘ reheb‘ li komon naq te‘xwotz li raqal re Mateo 4 ut Lukas 4–5 li kitenq‘an reheb‘ chireek‘ankil lix wankilal li tzol‘leb‘.

Xk‘utb‘al li tzol‘leb‘

Mateo 4:1–11; Lukas 4:1–13

Li qaChoxahil Yuwa’ xk’e qe li wankilal ut li metz’ew re xq’axb’al ru li aaleek.

• Li esil tz’iib’anb’il chirix li Kolonel naq kixq’ax ru laj Satanas taaruuq chixtenq’ankileb’ li komon chirilb’al chan ru naq laj Satanas naxyal xq’e chiraalenkileb’ a’an. Eb‘ li komon naru te‘xsik‘ ru jun reheb‘ li aaleek li yeeb‘il resil sa‘ Mateo 4:1–11 malaj Lukas 4:1–13, ut te‘xk‘oxla jun li aaleek li nak‘ule‘ sa‘eb‘ li kutan a‘in li chanchan a‘an (li aatin sa‘ “Xkomon chik li k‘anjeleb‘aal” naru natenq‘an). K’a’ut naq us xnawb’al naq li Kolonel kixk’ul ajwi’ li aaleek chanchan li naqak’ul laa’o anajwan? K’a’ut naq li Kristo kiru chixq’axb’aleb’ ru li aaleek? Re xtawb’al chik li raqal sa’eb’ li loq’laj hu chirix li ani ke’xq’ax ru laj Satanas, chi’ilmanq Genesis 39:7–20; 2 Nefi 4:16–35; ut Moises 1:10–22.

• K‘a‘ru naru natenq‘an reheb‘ li komon chixq‘axb‘al ru li aaleek? Naru nakapatz‘ reheb‘ naq te‘ril Mateo 4:1–11 malaj Lukas 4:1–13 ut te‘xk‘e reetal chan ru naq lix nawom li Kolonel chirixeb‘ li loq‘laj hu kik‘anjelak re xsumenkil laj Satanas jo‘ chanru naq kixb‘aanu naq kixye, “Tz‘iib‘anb‘il.” K‘e xhoonaleb‘ li komon re naq te‘xsik‘ sa‘ “Aaleek, aalenk” sa‘ li K‘utul Raqal reheb‘ li Loq‘laj Hu junjunq raqal li naru naxkawob‘resiheb‘ naq te‘aaleeq.

Lukas 4:16–32

Li Jesukristo a‘an li Mesias li yeeb‘il chaq resil najter.

• Re xtenq‘ankileb‘ li komon chixtawb‘al ru li seraq‘ natawman sa‘ Lukas 4:16–32, naru taach‘olob‘ chiruheb‘ naq li k‘ab‘a‘ej Mesias ut Kristo neke‘raj xyeeb‘al “li yulb‘il.” Naq neke‘ril Lukas 4:18–21, patz‘ reheb‘ naq te‘xk‘oxla k‘a‘ru xyaalalil xyeeb‘al naq li Jesus a‘an li Kristo, li Mesias, malaj li Yulb‘il. Naru ajwi‘ te‘xk‘ul xtenq‘ankil rik‘in rilb‘al li aatin “Yulb‘il” sa‘ li K‘utul Raqal reheb‘ li Loq‘laj Hu. Chan ru naq li Jesus naxch’olob’ xyaalal naq a’an li Mesias sa’eb’ li kutan a’in? Patz‘ reheb‘ li komon chan ru naq xe‘ok chixnawb‘al naq li Jesukristo a‘an aj Kolol reheb‘.

• Wankeb’ junjunq li na’leb’ li te’tenq’anq qe chixnawb’al k’a’ut naq eb’ laj Nazaret ink’a’ ke’xk’ul li Jesus jo’ li Mesias li yeeb’il chaq resil xb’aaneb’ li profeet. K‘a‘ru xyaalal yeeb‘il sa‘ Lukas 4:22–24? Chirix a‘an, eb‘ li komon naru neke‘xjuntaq‘eeta li na‘leb‘ a‘an rik‘in li xmalka‘an aj Sarepta ut aj Nahaman sa‘ li Najter Chaq‘rab‘, li moko eb‘ aj Israelita ta (chi‘ilmanq Lukas 4:25–27). Taaruuq taab’oqeb’ wiib’ li komon chi rub’elaj ut taapatz’ reheb’ naq te’xkawresi rib’ re xyeeb’al chi k’osb’il ru li wiib’ chi esilal a’in (chi’ilmanq 1 Reyes 17:8–242 Reyes 5:1–17Lukas 4:16–30 K‘a‘ru neke‘xk‘ut chiqu li seraq‘ a‘an chirix li wank choq‘ xtzolom li Jesukristo? Sa‘ li raatin li Kolonel choq‘ reheb‘ laj Nazaret, ma naqil junaq aatin choq‘ qe?

Mateo 4:18–22Lukas 5:1–11

Xtaaqenkil li Kristo naraj naxye xkanab‘ankil li qajom laa‘o ut xk‘ulub‘ankil li re a‘an.

• Wan naq sa’ xtiklajik ink’a’ natawman ru li na’leb’ k’eeb’il xb’aan li Qaawa’. Eb’ li komon te’ruuq chixtz’ilb’al rix Lukas 5:1–11, re xtawb’al k’a’ru kixye li Kolonel naq tixb’aanu laj Pedro, ut k’a’ut naq laj Pedro kiru raj kixk’oxla naq maak’a’ ru li kixpatz’. Chan ru naq rik‘in li k‘a‘ru kik‘ulman kijala xch‘ool laj Pedro chirix li Kolonel, ut chirix ajwi‘ a‘an? Naru nakapatz‘ reheb‘ li komon naq te‘xye resil jun sut naq ke‘xk‘anjela li paab‘aal chirix jun choxahil taqlahom, us ta ink‘a‘ xe‘xtaw ru. K’a’ru xe’xk’ul naq xe’xk’anjela lix paab’aaleb’?

  

  “Chineetaaqe, ut texink‘e chi karib‘k re xsik‘b‘aleb‘ li winq“ (Mateo 4:19).

• Jo’ chanru naq eb’ laj kar “ke’xkanab’ chixjunil“ re xtaaqenkil li Jesukristo (Lukas 5:11), wan k’a’ru tento taqakanab’ laa’o re wank choq’ xtzolom a’an. K‘a‘ru naqatzol sa‘ Mateo 4:18–22 chirix lix na‘leb‘eb‘ ut lix paab‘aaleb‘ laj Pedro, laj Andres, laj Santiago, ut laj Jwan? Maare us raj xk‘amb‘al jun li soq‘ re karab‘k sa‘ li tzoleb‘aal. Ut taapatz‘ reheb‘ li komon naq te‘xtz‘iib‘a k‘a‘ raj ru wanqeb‘ xch‘ool chixkanab‘ankil, malaj li ak xe‘xkanab‘, re xtaaqenkil li Kristo ut te‘xk‘e sa‘ li soq‘. Naru taapatz’ re junjunq komon naq te’xwotz chan ru naq xjale’ lix yu’ameb’ naq xe’xsik’ ru xkanab’ankil chixjunil re xtaaqenkil li Kolonel.

Xkomon chik li k‘anjeleb‘aal

Li jar paay chi aaleek.

Chirix aatinak chirixeb‘ li aaleek kixnumsi li Kolonel sa‘ li yamyookil ch‘och‘, li Awa‘b‘ej David O. McKay ki‘aatinak chirix oxib‘ paay li aaleek:

“(1) Li aaleek xb‘aan li atawank ut li rahink-u;

“(2) Li aaleek xb‘aan li q‘etq‘etil malaj xna‘leb‘eb‘ li winq;

“(3) Li aaleek chixk‘ulb‘al li b‘ihomal re ruchich‘och‘, malaj li wankilal sa‘ xb‘eeneb‘ li ch‘och‘ ut li k‘a‘ru eechaninb‘il xb‘aaneb‘ li winq sa‘ li ruchich‘och‘ ” (Enseñanzas de los Presidentes de la Iglesia: David O. McKay [2003], 91).

Xkawresinkil qib‘ jo‘ aj k‘utunel

K‘e xb‘antioxinkileb‘ li neke‘tzolok aawik‘in. “Milaatz‘o‘ aawu sa‘ li k‘utuk toj reetal naq ink‘a‘ nakab‘antioxi raatineb‘ li neke‘tzolok aawik‘in. Aajel ru naq te‘xnaw naq nakawoxloq‘i lix na‘leb‘ ut lix nawom” (Li k‘utuk jo‘ li Kolonel, 33).