young woman writing

Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí

Ko ha ngaahi fakakaukau ʻeni ke tokoni ki hono poupouʻi e kau mēmipa ʻo e kalasí ke nau ako fakataautaha mo fakafāmili ʻi ʻapi e folofola ʻa e ʻOtuá. Manatuʻi ʻoku ʻi ai ha niʻihi ʻi he kalasí ʻoku ʻikai ke nau lava ʻo ako folofola mo honau ngaahi fāmilí (fakatātā ʻaki ʻeni, ʻoku ʻi ai ha kau mēmipa ʻe niʻihi ʻoku nau nofo tokotaha pe ʻi ha ngaahi fāmili ʻoku ʻikai ke nau kau kotoa ki he Siasí).

• Fakaafeʻi e kau mēmipa ʻo e kalasí ke nau vahevahe ha ngaahi meʻa kuo nau aʻusia ʻi heʻenau ako e folofolá ʻi ʻapí. Hangē ko ʻení, te ke lava ʻo kole ange ke nau vahevahe ha veesi naʻe mahuʻinga kiate kinautolu mei heʻenau laukonga ʻi he uike ní, pea fakamatalaʻi e ʻuhinga naʻe ʻuhingamālie ai ia kiate kinautolú.

• Kole ki he kau mēmipa ʻo e kalasí ke nau ʻomi ha ngaahi sīpinga ʻo e meʻa ʻoku nau fai ke ʻuhingamālie ange ai ʻa e ako folofola fakatāutahá pe fakafāmilí. (ʻE lava ke maʻu ha ngaahi fakakaukau ʻe niʻihi ʻi he “Ngaahi Fakakaukau ki hono Fakatupulaki ʻo e Ako Folofola Fakatāutahá mo e Fakafāmilí” mo e “Ngaahi Fakakaukau ke Fakatupulaki Hoʻomou Ako Folofola Fakafāmilí” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.)

• Fakaafeʻi e kau mēmipa ʻo e kalasí ke nau vahevahe e founga kuo nau ngāueʻi ai ha ngaahi ongo ne nau maʻu lolotonga ha kalasi kuo ʻosi pe lolotonga ʻenau ako folofola fakatāutahá pe fakafāmilí.

• Fakaʻaongaʻi ha ngaahi miniti siʻi ʻo fakaʻaliʻali ki he kau mēmipa ʻo e kalasí ha niʻihi ʻo e ngaahi maʻuʻanga tokoni ʻoku ʻomi ʻe he Siasí ke tokoni ki he kau mēmipá ʻi hono ako e ongoongoleleí, hangē ko e ngaahi tokoni ki he ako folofolá ʻoku maʻu ʻi he scriptures.lds.org; “Ngaahi Talanoa Mei He Folofolá” ʻi he children.lds.org; ngaahi nāunau ki he toʻu tupú ʻi he youth.lds.org; ngaahi tohi lēsoni semineli mo e ʻinisititiutí; mo e ngaahi vitiō, ngaahi hiki tepi mo e ngaahi ʻīmisi (vakai, medialibrary.lds.org). ʻOku maʻu foki ha konga lahi ʻo e ngaahi maʻuʻanga tokoni ko ʻení ʻi he Gospel Library app.

• Fakaʻaongaʻi ha ngaahi miniti siʻi ʻo fakamatalaʻi e founga hono ngāue ʻaki ʻo e Gospel Library app ki hono ako e folofolá; kau ai e founga hono fakaʻilongaʻi e ngaahi vēsí mo hono lekooti ʻo e ngaahi ongó.

• Fakaafeʻi ha mēmipa ʻe taha ʻo e kalasí pe lahi ange ke nau vahevahe e founga ʻoku nau akoʻi ai ha tefitoʻi moʻoni pau ʻo e ongoongoleleí ʻi honau ngaahi fāmilí.