“Disiembre 23–29. Apocalipsis 12–22: ‘Ti Agballiginto Tawidennanto Amin Dagitoy a Bambanag’” Umaykayo, Sumurot Kaniak—Para iti Sunday School: Baro a Tulag 2019 (2019)
“Disiembre 23–29. Apocalipsis 12–22,” Umaykayo, Sumurot Kaniak—Para iti Sunday School: 2019
Ti Siudad nga Agnanayon, ni Keith Larson
Disiembre 23–29
Apocalipsis 12–22
“Ti Agballiginto Tawidennanto Amin Dagitoy a Bambanag”
Ania ti isuro kadakayo ti dangadang iti nagbaetan ti naimbag ken dakes a nailadawan iti Apocalipsis maipapan iti kinapateg ti panagsurot ken ni Cristo ditoy daga? Kalpasan ti panangutob iti daytoy a prinsipio, ibilangmo ti kasapulan dagiti miembro ti klasem. Ania dagiti kinapudno manipud iti Apocalipsis a makatulong kenka nga agaramid kadagiti nalinteg a pili?
Isuratmo Dagiti Impresionmo
Yawis ti Panagbibinninglay
Bayat ti yaasideg ti gibus ti panagadal dagiti miembro ti klasem iti Baro a Tulag, allukoyem ida a mangibinglay kadagiti kapanunotanda maipapan iti Baro a Tulag. Kasano a pinapigsa ti pammaneknekda ti panagadalda iti nasantuan a kasuratan?
Isuro ti Doktrina
Pinarmektayo ni Satanas “babaen ti dara ti Kordero, ken babaen ti balikas ti pammaneknek[tayo].”
-
Ti panangsursuro maipapan iti Gubat iti Langit ket makatulong kadatayo a nasaysayaat a makaawat iti biag iti daga. Mabalin a basaen dagiti miembro ti klase ti Patarus ni Joseph Smith, Apocalipsis 12:7–11 (iti Pangiwanwan iti Nasantuan a Kasuratan) ket ilasinda no kasano a pinarmektayo ni Satanas ken dagiti pasurotna iti Gubat iti Langit. Ania dagiti dadduma pay a nauneg a pannakaammo ken pannakaawat [insights] a magun-odtayo manipud kadagiti entry maipapan iti Gubat iti Langit iti Pangiwanwan iti Nasantuan a Kasuratan? Ania ti masursurotayo a makatulong kadatayo a mangparmek iti kabusor kabayatan dagiti mortal a biagtayo?
-
Ania ti kayat a sawen a ti Kordero “napapatay manipud idi pannakabangon ti lubong”? (Apocalipsis 13:8; kitaen met iti Apocalipsis 5:6). Ibilang ti panangawis kadagiti miembro ti klasem a mangsarak kadagiti sungbat iti daytoy a saludsod babaen ti panangbasa iti Mosiah 3:13 ken Moises 7:47 kas maysa a klase. Ania ti kayat a sawen ti mangparmek ken ni Satanas “babaen ti dara ti Kordero”? (Apocalipsis 12:11).
Nasken nga ilasintayo ti bagbagitayo manipud iti kinadangkes ti lubong.
-
Saan a makaay-ayo a basaen ti maipapan iti kinadangkes ti Babilonia ken ti pannakatnagna iti Apocalipsis 17–18, ngem makatulong daytoy gapu ta ti Babilonia ket mabalin a maysa a simbolo ti nadangkes a lubong a pagindegantayo iti agdama. Mabalinmo a bingayen dagitoy a kapitulo kadagiti babassit a grupo dagiti miembro ti klase ket idawatmo kadakuada nga agsapul iti sungbat kadagiti saludsod kas kadagitoy: Apay a nayasideg dagiti tao iti Babilonia, wenno kinailubongan? Apay a napeggad ti Babilonia? Anianto ti mapasamak iti Babilonia? Ania dagiti ballaag nga inted ni Juan a makatulong kadatayo a mangliklik iti gasat ti Babilonia?
-
Kalpasan ti panangbasa iti Apocalipsis 18:4, mabalin a kayat dagiti miembro ti klase a paglilinnawagan no kasano a mabalin a “rummuarda” iti Babilonia ken “di mairaman kadagiti basbasolna.” Kas pagarigan, ania dagiti nasantuan a kasuratan wenno mensahe manipud kadagiti lider ti Simbaan a nangtulong kadatayo a mangsupring kadagiti sulisog ti Babilonia, wenno ti lubong? Ibilang ti panangbasa iti palawag ni Elder Quentin L. Cook iti “Dagiti Nainayon a Resources.” Ania dagiti kapanunotan a mabalin nga ibinglay dagiti miembro ti klase maipapan no kasano a yaplikar ti dua a pagbatayan a dinakamat ni Elder Cook? Iti ania a kaipapanan a “rummuartayo” iti Babilonia? (kitaen, kas pagarigan, iti DkK 133:12–14). Ania ti maaramidtayo a mangallukoy kadagiti dadduma a mangaramid iti kasta met laeng?
Makapagsaganatayo para iti Maikadua a Yaay ti Apo ken ti Aldaw ti Panangukom.
-
Ti Maikadua a Yaay ni Jesucristo ket masansan a maawagan iti “dakkel ken nakakigkigtot nga aldaw ni Jehova” (Joel 2:31), ken maibasar iti Apocalipsis 19–20, a kasla nasayaat a panangiladawan. Ibilang ti panagisurat iti pisarra ti sumagmamano a pasamak a nailadawan iti Apocalipsis 19:5–20:15. Awisem dagiti miembro ti klase a mangsarak kadagiti bersikulo a mangiladawan kadagitoy a pasamak. Apay a maawagan iti dakkel ken nakakigkigtot dagitoy a pasamak? Ania ti masursurotayo manipud kadagitoy a bersikulo maipapan iti Mangisalakan ken dagiti sumurot Kenkuana? Ania ti maaramidtayo itan tapno maibilang kadagiti agragragsakto iti panawen ti yaayna?
-
Tapno maparegta ti panaglilinnawag maipapan iti libro ti biag, mabalinmo nga awisen dagiti miembro ti klase a mangaramid iti maysa a simple a libro babaen ti panangkulpi iti maysa a panid ti papel iti agkapat. Kalpasanna mabalinda a basaen ti Apocalipsis 20:12–15, utoben no ania ti kayatda nga isurat maipapan kadakuada iti libro ti biag, ket isuratda dagita a banag kadagiti libroda. (Mabalin a masarakan dagiti panangilawlawag para iti “libro ti biag” iti “Dagiti Mainayon a Resources.”) Ania koma ti mariknatayo no naawagantayo iti trono ti Dios ita nga aldaw? Ania ti maitulong dagitoy a mensahe iti daytoy a panaglilinnawag maipapan iti panagsagana para iti Aldaw ti Panangukom?
No napudnotayo, mabendisionantayto iti celestial a gloria.
-
Nupay naipadto dagiti maudi nga aldaw a mapnonto iti kinadangkes ken pagpeggadan, ti gunggona a nakita ni Juan para kadagiti napudno ket dakdakkel nga amang ngem iti panagtutuok a simmangbay kasakbayan daytoy. Tapno matulongan dagiti miembro ti klase a mangsukisok iti daytoy napintas a panggibus iti Apocalipsis, mabalinmo nga awisen ida a mangrebyu iti Apocalipsis 21:1–22:5, a mangsapsapul kadagiti ragup ti balikas a mangparegta kadakuada nga agkagumaan para iti celestial a gloria. Ania dagiti kari a naaramid kadagiti napudno? Kasano ti panangtulong kadatayo daytoy a panangiladawan no maipasangotayo kadagiti agdama a karit ken pannubok?
Yallukoy ti Panagsursuro iti Pagtaengan
Tapno maparegta dagiti miembro ti klase a mangadal iti Libro ni Mormon iti umay a tawen—tunggal maysa ken kadua ti pamiliada—ibinglay ti sumagmamano kadagitoy a naimpadtuan a kari.
Presidente Gordon B. Hinckley: “Awanan panagkedked ikarik kadakayo a no [agbasanto iti Libro ni Mormon] ti tunggal maysa kadakayo, saan a nasken no namin-ano man a binasayon [daytoy] iti napalabas, addanto sumangbay iti biagyo ken kadagiti pagtaenganyo a nayon a rukod ti Espiritu ti Apo, maysa a napigsa a panangeddeng tapno magna nga agtungpal kadagiti bilinna, ken maysa a napigpigsa a pammaneknek maipapan iti sibibiag a kinapudno ti Anak ti Dios” (“A Testimony Vibrant and True,” Ensign, Ago. 2005, 6).
Presidente Thomas S. Monson: “Allukoyek ti tunggal maysa kadatayo a nainkararagan nga adalen ken utobentayo ti Libro ni Mormon iti inaldaw. No aramidentayo daytoy, addatayto iti saad a dumngeg iti timek ti Espiritu, a mangliklik iti sulisog, mangparmek iti duadua ken buteng, ken umawat iti tulong iti biagtayo” (“The Power of the Book of Mormon,” Ensign wenno Liahona, Mayo 2017, 87).
Dagiti Nainayon a Resources
Panagpili iti kinalinteg a maibusor iti kinadangkes ti Babilonia.
Insuro ni Elder Quentin L. Cook:
“Ditayo maliklikan dagiti nailubongan nga impluensia. Saan a sungbat ti maysa a naiputputong a panagbiag. Iti nasayaat a kaipapanan, ti tulongtayo iti lubong ket saan a paset ti karittayo ken kasapulan no nasken a padur-asentayo dagiti talentotayo. … Nasken a mairaman dagiti miembro ti Simbaan iti lubong iti maysa a positibo a wagas. Kasano ngarud a matimbengtayo ti panagkasapulan a positibo a panangtulong iti lubong ket saantayo nga agtulnog kadagiti basol ti lubong? (Kitaen iti DkK 25:10; DkK 59:9.) Dua a pagbatayan ti mangaramidto iti napateg a pagdumaan.
“1. Ipakaammom kadagiti tao a maysaka a nagkumit a Santo iti Ud-udina nga Aldaw. …
“2. Agbalinka a managtalek ken agbiagka kadagiti pammatim” (“Lessons from the Old Testament: In the World but Not of the World,” Ensign, Peb. 2006, 54–55).
Ti libro ti biag.
Taga Filipos 4:3; Apocalipsis 3:5; 17:8; 2 Nephi 29:11; Alma 5:58; Doktrina ken Katulagan 127:6–7, 9; 128:6–7.
“Maysa a kaibatogan ti libro ti biag ti naan-anay a kapanunotan ken tignay ti maysa a tao—ti kasuratan ti kabibiagna. Nupay kasta, ipakita dagiti nasantuan a kasuratan nga intalimeng dagiti natulnog ti nailangitan a sinurat, a pakairamanan dagiti naganda ken pakaammuan kadagiti nalinteg nga aramidda” (Pangiwanwan iti Nasantuan a Kasuratan, “Libro ti Biag”).
Panangpadur-as iti Panangisurotayo
OK laeng nga isao ti “Diak ammo.” Idinto a gagangay a kayatmo a sungbatan ti tunggal saludsod, iti sumagmamano a situasion ket maitutop a sawen laeng ti, ‘diak ammo. Adalentayo koma dayta a saludsod iti bukodtayo iti daytoy a lawas, ket paglilinnawagantayo daytoy iti sumaruno a gundaway’” (Panangisuro iti Wagas ti Mangisalakan, 24). Kalpasanna idawat kadagiti miembro ti klase a mangsukisok kadagiti nasantuan a kasuratan ken dadduma pay a resources ti Simbaan para kadagiti sungbat.