“Oktubre 21–27. 1 ken 2 Taga Tesalonica: ‘Iti Saan a Mabayag Saan Koma a Madayyeg iti Panunot, wenno Mariribukan’” Umaykayo, Sumurot Kaniak—Para iti Sunday School: Baro a Tulag (2019)
“Oktubre 21–27. 1 ken 2 Taga Tesalonica,” Umaykayo, Sumurot Kaniak—Para iti Sunday School: 2019
Oktubre 21–27
1 ken 2 Taga Tesalonica
“Iti Saan a Mabayag Saan Koma a Madayyeg iti Panunot, wenno Mariribukan”
Insuro ni Alma, “Saankayo nga agtalek iti asino man nga agbalin a mannursuroyo wenno ministroyo, malaksid no isu ti tao ti Dios, a mangsursurot iti pagayatanna ken mangtungtungpal kadagiti bilinna” (Mosiah 23:14). Ania ti kayat nga isingasing daytoy nasantuan a kasuratan maipapan iti no kasano ti nasken a panangisaganam iti bagim a mangisuro?
Isuratmo Dagiti Impresionmo
Yawis ti Panagbibinninglay
Mangted kadagiti miembro ti klase iti sumagmamano a minuto a mangbasa iti 1 ken 2 Taga Tesalonica ket mangsapul iti maysa a bersikulo a mangawis iti riknada. Awisem ida a mangibinglay kadagiti bersikuloda iti maysa a tao iti klase, ket kalpasanna idawatmo iti sumagmamano a paris a mangibinglay no ania ti nasursuroda manipud iti tunggal maysa.
Isuro ti Doktrina
1 Taga Tesalonica 1:5–8; 2:1–13
Agikasaba dagiti ministro iti ebanghelio nga addaan sinseridad ken ayat.
-
Rinugian ni Pablo ti Suratna kadagiti Taga Tesalonica babaen ti panangipalagip kadagiti Santo iti wagas a nakaibinglayda ken dagiti dadduma pay iti ebanghelio kadakuada. Mabalin a daytoy ti nasayaat a gundaway nga amirisen dagiti miembro ti klasem no kumustan ti panangisuro ken panagsursuroda manipud iti tunggal maysa. Mabalinmo nga awisen dagiti miembro ti klase a mangbasa iti 1 Taga Tesalonica 1:5–8; 2:1–13 ket ilasin dagiti pagbatayan a mainaig iti panangibinglay iti ebanghelio a sisasamay. Kalpasanna mabalinda nga isurat dagiti saludsod a maibatay kadagitoy a bersikulo a mangtulongto kadakuada a mangamiris kadagiti panagkagumaanda a mangisuro iti ebanghelio iti dadduma. Kas pagarigan, mabalin ti maysa a saludsod a kas iti “Maysaak kadi a pagwadan dagiti banag nga ammok?” (kitaen iti 1 Taga Tesalonica 1:7). Kasano a ti panangsurot kadagiti pagbatayan iti daytoy a binatog ket makatulong kadatayo a nasaysayaat nga agserbi kadagiti sursuruantayo?
-
Ti panangbasa iti 1 Taga Tesalonica 1:5–8; 2:1–13 ket mangipalagip kadagiti miembro ti klase maipapan kadagiti mannursuro a kas ken ni Cristo a nasayaat a nangimpluensia kadakuada “kas maysa nga ama dagiti annakna” (1 Taga Tesalonica 2:11). Awisem dagiti miembro ti klase a mangsukisok kadagitoy a binatog a mangsarak iti maysa a kababalin ti maysa a napudno a ministro ket mangpanunot iti maysa a mannursuro nga am-ammoda a mangipagwadan iti dayta a kababalin. Mabalinmo nga idawat kadagiti miembro ti klase a mangted iti surat wenno mangaramid iti maysa a sertipiko ti gunggona para iti mannursuro a pampanunotenda. Allukoyem ida a mangiraman iti surat wenno gunggona iti maysa a bersikulo manipud iti 1 Taga Tesalonica ken ti maysa a pananglilawlawag no apay nga impagwadan ti mannursuro dayta a bersikulo. Mabalin a mariknada pay a naparegtada a mangted iti surat wenno gunggona iti tao nga inladawanda iti surat.
1 Taga Tesalonica 3:9–13; 4:1–12
No surotentayo ni Jesucristo, makapagbalintayo a nasantuan.
-
Insuro ni Pablo kadagiti Santo iti Tesalonica a “Saannatayo nga inayaban ti Dios a maipaay iti kinarugit, no di iti kinasanto” (1 Taga Tesalonica 4:7). Tapno mairugi ti panaglilinnawag, isurat iti pisarra ti “More Holiness Give Me” (Hymns, no. 131). Idawat kadagiti miembro ti klase a mangilawlawag kadagiti kababalin ti kinasanto a nadakamat iti himno a kasla napateg kadakuada. Isurat iti pisarra ti Ad-adu a kinasanto, maited kaniak … , ket awisem dagiti miembro ti klase a mangsarak kadagiti balikas ken ragup ti balikas manipud iti 1 Taga Tesalonica 3:9–13; 4:1–12 a mangkumpleto iti binatog. Kasano a mapadur-astayo dagitoy a kababalin?
-
Para iti dadduma, ti awis nga agbalin a nasantuan ket kasla nakabutbuteng. Mabalin a makatulong daytoy no maawatan dagiti miembro ti klase a ti panangpadur-as iti kinasanto ket in-inut a proseso a kasapulan kadatayo a “rumang-ay a rumang-ay” iti panaglabas ti panawen (1 Taga Tesalonica 4:10). Tapno mailadawan daytoy a proseso, mabalinmo nga awisen ti maysa a miembro ti klase a mangisarita maipapan iti maysa a talento wenno naileppas a nagkasapulan iti agtultuloy a panagkagumaan iti adu a panawen, kas iti panagaramid iti kobre kama wenno panagtokar iti instrumento ti musika. Kasano a maipada daytoy iti proseso ti panagbalin a nasantuan? Awisem dagiti miembro ti klase a mangrebyu iti 1 Taga Tesalonica 3:9–13; 4:1–12 ket ibinglaymo dagiti nauneg a pannakaammo ken pannakaawat maipapan iti panagkagumaan a kasapulan tapno agbalin a nasantuan iti wagas nga inladawan ni Pablo. Ania ti nakatulong kadatayo a dumur-as iti kinasantuan?
1 Taga Tesalonica 4:11–12; 2 Taga Tesalonica 3:7–13
Nasken nga agtrabahotayo tapno maipaayantayo ti bagbagitayo ken dagiti agkasapulan.
-
Dagiti saludsod kas iti sumaganad ket makaparegta iti panaglilinnawag maipapan iti balakad ni Pablo maipanggep iti aramid: Ania dagiti bunga ti kinasadut? Ania iti panagkunam ti kayat a sawen ni Pablo iti balikas a “natalna” ken “sitatalna”? (1 Taga Tesalonica 4:11; 2 Taga Tesalonica 3:12). Mabalin a kayatmo nga isurat dagiti saludsod kas dagitoy iti pisarra nga utoben dagiti miembro ti klase bayat ti panangbasada iti 1 Taga Tesalonica 4:11–12 ken 2 Taga Tesalonica 3:7–13. Awisem ida a mangilawlawag kadagitoy a saludsod iti kada paris, iti babassit a grupo, wenno kas maysa a klase. Ania dagiti dadduma pay a nasantuan a kasuratan a makatulong kadatayo a makaawat iti kinapateg ti aramid ken dagiti peggad ti kinasadut? (kitaen dagiti singasing iti “Dagiti Nainayon a Resources”).
Ti ikakalilis iti kinapudno ket mapasamak sakbay ti Maikadua a Yaay ni Jesucristo.
-
Ti pannakaawat iti Dakkel nga Ikakalilis iti Kinapudno ket mangpapigsa iti pammaneknek dagiti miembro ti klasem maipapan iti Pannakaisubli ti ebanghelio ni Jesucristo. Balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangiramam iti adu a resources maipapan iti Ikakalilis iti Kinapudno. Mabalinmo nga awisen ti sumagmamano a miembro ti klase nga umay a nakasagana a mangibinglay kadagiti nauneg a pannakaammo ken pannakaawat manipud iti panagadalda kadagitoy a resources, wenno mabalinyo nga adalen ken paglilinnawagan dagitoy a sangkamaysa iti klase. Adda pay sumagmamano a video maipapan iti Ikakalilis iti Kinapudno iti “Dagiti Nainayon a Resources” a mabalin a mainayon iti panaglilinnawagyo.
-
Mabalin a makatulong a mangilawlawag iti sumagmamano kadagiti metapora nga inusar dagiti propeta a pangiladawan iti Ikakalilis iti Kinapudno, kas iti ti pannakatnag (kitaen iti 2 Taga Tesalonica 2:3), panagbisin (kitaen it Amos 8:11–12), narawet a lobo a sumrek iti arban (kitaen iti Dagiti Aramid 20:28–30), ken gagatel a laplapayag (kitaen iti 2 Timoteo 4:3–4). Ibilang ti panangbingay kadagiti miembro ti klase iti kada paris ket idawat kadakuada a mangbasa iti maysa wenno ad-adu pay kadagitoy a nasantuan a kasuratan (wenno sabali pay a piliem) ket iladawan no ania ti isuro dagiti bersikulo maipapan iti Dakkel nga Ikakalilis iti Kinapudno. Ania ti insuro dagiti propeta maipapan iti Ikakalilis iti Kinapudno ken ti epekto nga adda iti daytoy?
-
Tapno matulongan dagiti miembro ti klase nga agsursuro iti ad-adu pay maipapan iti Dakkel nga Ikakalilis iti Kinapudno, awisem ida a mangpanunot nga adda maysa a gayyemda a saan a makaawat iti panagkasapulan iti pannakaisubli ti ebanghelio. Mangaramid iti maysa a tsart a dua ti kolumna iti pisarra ket ikkam iti label a Dagiti Gapu ti Ikakalilis iti Kinapudno ken Dagiti Epekto ti Ikakalilis iti Kinapudno. Awisem dagiti miembro ti klase a mangsukisok iti benneg a napauluan iti “The Great Apostasy” iti Preach My Gospel (dagiti panid 35–36) iti kada paris wenno babassit a grupo, a mangbirok kadagiti gapu ken epekto ti Ikakalilis iti Kinapudno tapno isuratda iti pisarra. Ania dagiti nauneg a pannakaammo ken pannakaawat manipud iti daytoy a tsart a mausarda a makatulong iti gayyemda a makaawat iti panagkasapulan iti Pannakaisubli?
-
Mairanud kadi ti klasem manipud iti panangilawlawag no kasano a malapdan dagiti bagitayo iti “pannakatnag”? Mabalinmo nga awisen ida a mangsukisok iti 2 Taga Tesalonica 2 ket sapulem dagiti pammagbaga a maitedda iti maysa a gayyem a makatulong kenkuana a mangliklik iti ikakalilis iti kinapudno.
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti 1 ken 2 Timoteo, Tito, ken Filemon iti daytoy a lawas, awisem ida a mangipapan a nakaawatda iti personal a surat manipud iti maysa nga Apostol a naglaon iti balakad maipapan no kasano ti mangipatungpal kadagiti takemda [calling] iti Simbaan. Isingasing a panunotenda maipapan kadagiti takemda bayat ti panagbasada kadagitoy personal a surat a naggapu ken Pablo kadagiti immuna a dadaulo ti Simbaan.
Dagiti Nainayon a Resources
1 ken 2 Taga Tesalonica
Dagiti nasantuan a kasuratan maipapan iti aramid ken kinasadut.
Panangpadur-as iti Panangisurotayo
Agusar iti nadumaduma a pamay-an iti panangisuro. Mabalin a nalaka nga agbalin a komportable iti maysa a masinunuo nga estilo ti panangisuro, ngem dagiti nadumaduma a pamay-an iti panangisuro ti mangtulong iti nadumaduma a miembro ti klase. Agsapulka kadagiti wagas a mamagdumaduma iti approachmo ti panangisuro, kas iti panangusar kadagiti video, artwork, wenno musika wenno panangted iti gundaway a mangisuro kadagiti miembro ti klase (kitaen iti Panangisuro iti Wagas ti Mangisalakan, 22).