O Paulo o loo tusia se tusi

5-11 Aokuso

Roma 1–6

“O Le Mana Lava Lea o le Atua E Ola Ai”

Faitau ma le agaga tatalo le Roma 1–6 ma mafaufau i tagata o lau vasega. O le a fesoasoani lenei mea e te nofouta ai i uunaiga a le Agaga a o e sauni e aoao atu.

Tusifaamaumau Lagona e Uunaia Ai Oe

aikona fefaasoaai

Valaaulia le Fefaasoaai

Mafaufau e tuu atu i tagata o le vasega ni nai minute e sue ai i le Roma 1–6 ia se fuaiupu e faapitoa ona latou fiafia i ai. Ona latou faasoa atu lea o le fuaiupu ua latou filifilia i se tasi o nofo latalata i ai.

aikona aoao atu

Aoao atu Aoaoga Faavae

Roma 1:16–17

“Ou te le ma i le talalelei a Keriso.”

• Pe ua feagai tagata o lau vasega ma ni tauemuga ona o o latou talitonuga? Valaaulia i latou e faitau le Roma 1:16–17 ma mafaufau i tulaga mai le tusi o Galuega lea sa faaalia ai e Paulo sa lei ma o ia i le talalelei. O a nisi o mea tatou te le mama ai e avea ma tagata O Le Ekalesia a Iesu Keriso o le Au Paia o Aso e Gata Ai? Valaaulia tagata o le vasega e faasoa mai ni aafiaga sa latou faaalia ai pe sa faaalia foi e isi, latou te lei mama i le talalelei a Iesu Keriso.

Roma 1:16–17; 2:28–29; 6:1–11

O le avea moni ma soo e maua i a tatou tautinoga i totonu, ae le na o a tatou amioga.

• E faapefea ona tatou iloiloina o tatou lava tulaga o le avea ma se soo? E mafai ona fesoasoani le fautuaga a Paulo i Roma ia tatou manatua ai e aua le taulai atu i le faaumaina o se lisi o mea o galuega e fai, ae ia taulai atu “i le loto lea [ma] o loo i la le agaga lea” (Roma 2:29). Ina ia fesoasoani i lau vasega ia malamalama i le fautuaga a Paulo, e mafai ona e tusia i luga o le laupapa le anotusi mai le Roma 2:28–29 . Sui le upu Iutaia i le Au Paia o Aso e Gata Ai ae o le upu peritomeina i le o le feagaiga. O le a se mea ua faaopoopo e lenei suiga i lo tatou malamalama i aoaoga a Paulo? E mafai foi ona outou talanoaina faataitaiga o mea tatou te faia o ni tagata o le Ekalesia ia e sili atu le anoa ma mamana pe a faia “i le loto [ma] o loo i la le agaga lea” (Roma 2:29). Mo se faataitaiga, tagai i le tautalaga a Elder Jeffrey R. Holland e uiga i faiaoga o aiga, “Sui Vaaia i le Ekalesia” (Ensign po o le Liahona, Nov. 2016, 61–67), po o le lauga a Elder Neil L. Andersen e uiga i le galuega faafaifeautalai, “O Se Molimau a le Atua” (Ensign po o le Liahona, Nov. 2016, 35–38).

Roma 3–6

“Ua silisili lava le alofa tunoa, ina o faateleina le agasala.”

• Atonu e i ai tagata i lau vasega o e manaomia le fesoasoani e malamalama ai i aoaoga a Paulo i nei mataupu e uiga i le faatuatua, galuega, ma le alofa tunoa (tagai foi otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga ma le Faaliliuga a Iosefa Samita mo nei mataupu i vaefaamatalaga ma le faaopoopoga o le Tusi Paia). E mafai faapefea ona e fesoasoani ia i latou ia aoao mai i le tasi ma le isi? Mafaufau e faailoa atu vaaiga nei e lua e fesoasoani ai i tagata o le vasega ia malamalama, e le tatau ona tatou vaai i a tatou galuega lelei o se auala e faamaonia ai lo tatou agavaa, pe tatau ona tatou vaai atu i le alofa tunoa o Keriso o se pogai e alo i ai i a tatou measese ma agasala. Valaaulia tagata o le vasega e sue ni upumoni i le Roma 3:20–31; 5:1–2; 6:1–2, 21–23 e mafai ona fesoasoani ai ia Gloria ma Justin. O a isi upumoni o aoaoga faavae o i ai i le “Punaoa Faaopoopo” o le a fesoasoani latou te malamalama ai i le taua o le faia o galuega amiotonu ma le talitonu i le alofa tunoa o Keriso? E mafai ona e fai atu i tagata o le vasega e faasoa mai ni mea sa latou maua pe fai le faatinoga o se talanoaga.

Ata 1

E i ai sau uo e igoa ia Gloria o le ua lagona le lofituina i ana taumafaiga ina ia avea ma se soo faamaoni. E galue malosi o ia e fai mea uma ua ia manatu e tatau ona ia faia, ae e masani ona popole faapea, e le lava ana taumafaiga. E mafaufau o ia, “O lava ea lo’u lelei?” “Pe o le a talia ea au e le Alii?”

Ata 2

E i ai sau uo e igoa ia Justin o le e le popole tele i le faia o filifiliga amiotonu. E talitonu o ia ia Iesu Keriso, e auai i ana fonotaga faalelotu, ma o ia o se tama agaalofa ma se tuaoi lelei. Ae peitai, ua filifili o ia e le ola i tulaga faatonuina o le a agavaa ai o ia mo se pepa faataga o le malumalu. A taumafai lona aiga ma ana uo e uunaia o ia ia saunia mo le malumalu, e tali atu o ia, “O au o se tagata lelei. Ou te faatuatua ia Keriso. Ua uma ona Ia totogia le tau mo au agasala, ma ou te manatu o le a Ia le taofia ai a’u i fafo o le malo selesitila i ni faafitauli laiti faapena.”

aikona aoaoina

Fautuaina le Aoaoina i le Aiga

Ina ia uunaia tagata o le vasega e faitau le Roma 7–16, e mafai ona e fai atu ia i latou, sa faamatalaina e Paulo se taua i totonu ia te ia—ma [totonu] o i tatou uma. I le Roma 7–16 tatou te iloa ai po o le a lena taua ma pe faapefea ona manumalo ai.

aikona o punaoa

Punaoa Faaopoopo

Roma 1–6

Faatuatua, alofa tunoa, ma galuega.

E ui e tatau ona tatou taumafai e mulimuli i poloaiga, o le nao le usiusitai i tulafono a le Atua o le a le faaolaina ai i tatou (tagai Roma 3:27–31). E tusa lava po o a a tatou taumafaiga sili ona lelei tatou te “agasala uma lava, ma ua le oo i le viiga mai le Atua” (Roma 3:23). O le mafuaaga lena, tatou te manaomia uma ai Iesu Keriso, o lona alofa tunoa e mafai ai ona faamagaloina i tatou i a tatou agasala ma mafai ai ona tatou faaauau ona faia galuega lelei. E pei ona aoao mai o Paulo, “Ua silisili lava le alofa tunoa, ina o faateleina le agasala” (Roma 5:20).

Sa faasoa mai e Peresitene David O. McKay se talafaafaatusa e uiga i se tamaitiiti sa amata ona malemo ao taeele ma ana uo: “O le mea na laki ai, o se tasi sa i ai lona mafaufau ma vavave ana gaoioi, sa seiina mai se laau mai se pa uilo [willow] ma faalala atu le tasi o pito i le tamaitiiti na malemo [o le] sa tago mai i ai, uumau lava ma sa faasaoina ai.

“Sa tautino mai e tamaiti uma o le alii lea sa faafiaula, ua nofoaitalafu lona ola i le tamaitiiti na saunia le auala na laveai mai ai.

“E le masalomia lava o le mea moni lea; ae peitai e ui lava i auala sa tuuina atu ia te ia, ana le tago mai le tamaitiiti e faaaoga, ana ia le tuuina i ai ana taumafaiga patino atoa i lana poloaiga, semanu e malemo lava, e ui lava i le gaoioiga toa a lana uo” (David O. McKay, “The Gospel of Work,” Instructor, Jan. 1955, 1).

O le saunoa ai e uiga i le fesili pe faasaoina i tatou i le faatuatua po o galuega, sa tusia ai e le tusitala Kerisiano o C. S. Lewis: “E [foliga] mai ia te au e pei o le fesili po o le fea o le lau o le seleulu e sili ona manaomia” (Mere Christianity, 148).

Ata 1

• Eteru 12:27

• Moronae 10:32–33

• J. Devn Cornish, “O Lava Ea Lou Lelei? Pe O Le A Ou Ausia Ea? Ensign po o le Liahona, Nov. 2016, 32–34

“O le faaolataga e le mafai ona faatauina i le usiusitai; ae e faatauina i le toto o le Alo o le Atua [tagai Galuega 20:28]. …

“O le alofa tunoa o le meaalofa a le Atua, ma o lo tatou manao ina ia usiusitai i poloaiga taitasi a le Atua, o le auala lea tatou te faailoa atu ai i lo tatou Tama Faalelagi tatou te mananao i lenei meaalofa paia” (Dieter F. Uchtdorf, “O Le Meaalofa o le Alofa tunoa,” Ensign po o le Liahona, Me 2015, 109–10).

Ata 2

• Iakopo 2:17–26

• Helamana 12:23–24

• D. Todd Christofferson, “Tumau i Lo’u Alofa,” Ensign po o le Liahona, Nov. 2016, 48–51.

“Afai o le alofa tunoa o se meaalofa a le Atua, aisea la ua taua tele ai le usiusitai i poloaiga a le Atua? Aisea e ātu ai i poloaiga a le Atua—po o le salamo, mo lena mea? …

“O lo tatou usiusitai i poloaiga a le Atua e sau mai se taunuuga masani o lo tatou alolofa ma le lotofaafetai le mafaamutalia mo le lelei o le Atua. O lenei ituaiga o alofa faamaoni ma le lotofaafetai o le a tuufaatasia faavavega ai a tatou galuega faatasi ma le alofa tunoa o le Atua” (Dieter F. Uchtdorf, “O Le Meaalofa o le Alofa tunoa,” Ensign po o le Liahona, Me 2015, 109).

O le tatou manaomia faifai pea o le alofa tunoa.

“E le gata i le manaomia o le alofa tunoa mo lou faaolataga tupito, e te manaomia foi lenei mana faaola i aso uma o lou olaga. A o e faalatalata atu i lou Tama Faalelagi i le maelega, lotomaualalo, ma le agamalu, o le a siiae ma faamalosia oe e ala i Lona alofa tunoa (tagai Faataoto 3:34; 1 Peteru 5:5; MFF 88:78; 106:7–8). O le faalagolago i Lona alofa tunoa e mafai ai ona e alualu i luma ma tuputupu ae i le amiotonu” (Faamaoni i le Faatuatua, 78).

Faaleleia o Lo Tatou Aoao Atu

O lou valaauga ua musuia. I le avea ai ma se faiaoga, ua valaauina oe e le Alii e faamanuia Lana fanau. E finagalo le Alii e te manuia, o lea a o e ola agavaa i Lana fesoasoani, o le a Ia tuu atu ia te oe le faaaliga e te sailia. (Tagai Aoao Atu i le Ala a le Faaola, 33.)