Kaskasaba iti Bantay

Kaskasaba iti Bantay, ni Jorge Cocco

Pebrero 18–24

Mateo 5; Lucas 6

“Nagasatkayo”

Isuratmo dagiti naespirituan nga impresionmo bayat ti panagadalmo iti Mateo 5 ken Lucas 6. Umayto ti paltiing bayat ti panagkalikagummo a mangipaay kadagiti kasapulan ti klasem. Makatulong daytoy a balabala a mangipaay kadagiti mainayon a kapanunotan.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Kinuna ni Presidente Joseph Fielding Smith a ti Kaskasaba iti Bantay ti “kaindaklanan a [Kaskasaba] a naikasaban, kas iti pannakammotayo” (Teachings of Presidents of the Church: Joseph Fielding Smith [2013], 234). Apay a marikna dagiti miembro ti klase a pudno daytoy? Ania ti mabalin nga ibinglayda?

icon iti panangisuro

Isuro ti Doktrina

Mateo 5:1–12

Manayon a ragsak ti sumangbay manipud iti panagbiag iti wagas a nangisuruan ken nagbiagan ni Jesucristo.

• Ti Kaskasaba iti Bantay ti Mangisalakan, a kangrunaan a maiturong kadagiti kasingedan a disipulona, ket mangrugi kadagiti palawag a maam-ammo a Dagiti Naimbag a Gasat, nga inyawis ni Cristo kadatayo a mangpanunot manen no ania ti kaipapanan ti agbiag iti naparaburan a biag—ti biag ti manayon a ragsak. Tapno mangirugi iti panaglilinnawag maipapan iti manayon a ragsak, mabalinmo nga idawat kadagiti miembro ti klase a mangibinglay no ania dagiti mangparagsak kadakuada. Segun iti Naimbag a Gasat, ania ti kinuna ni Jesus a mamagbalin iti tao a “nagasat,” wenno agnanayon a naragsak? Kasano a maigidiat dagiti pannursuro ni Jesus iti dadduma pay a wagas a panangpadas dagiti tao nga agsapul iti ragsak?

• Tapno matulongan a maawatan dagiti miembro ti klase dagiti balikas a kas iti nadalus ti pusoda wenno dagiti mamagkakappia, mabalinmo nga ilista ti sumagmamano kadagiti balikas manipud kadagiti bersikulo 3–12 iti pisarra. Kalpasanna awisem dagiti miembro ti klase a mangisingasing iti kasupadi ti tunggal balikas ken no ania ti masursuroda maipapan iti tunggal balikas babaen ti panangaramid iti daytoy. Idawatmo kadagiti miembro ti klase a mangutob no ania ti mabalinda a baliwan tapno agbalinda a kita ti tao a nailadawan kadagitoy a bersikulo. Ania ti inayon ti 3 Nephi 12:3, 6 iti pannakaawattayo iti Mateo 5:3, 6?

• Sabali pay a wagas tapno mailawlawag dagitoy a bersikulo ket ti panangawis iti tunggal miembro ti klase a mangadal kadagiti mainayon a nasantuan a kasuratan maipapan iti maysa kadagiti Naimbag a Gasat ken ibinglay iti klase no ania ti nasursuroda. Kasano nga ipagwadan ti maysa a tao nga am-ammoda dayta a prinsipio?

Kaskasaba iti Bantay

Ti Kaskasaba iti Bantay, ni Frank Adams

Mateo 5:14–16

Nasken nga agbalin a silaw ti lubong dagiti disipulo ti Mangisalakan.

• Kasano ti rikna dagiti miembro ti klasem no basaenda ti insao ni Jesus nga isuda ti “silaw ti lubong”? Ania ti kayat a sawen ti mangilemmeng iti silaw iti “sirok ti maysa a salop,” ken apay a masulisogtayo a mangaramid iti daytoy? Mabalin a makaparegta ti palawag ni Elder Robert D. Hales iti “Dagiti Nainayon a Resources.” Asino ti nagbalin a “silaw” kadagiti miembro ti klasem?

• Mangpanunot iti maysa a wagas tapno maipakita iti pannursuro ni Cristo a datayo dagiti silaw iti lubong. Mabalinmo nga ipakita ti ladawan ti maysa a siudad a nasilawan iti rabii? Mabalinmo kadi ti mangitugot iti flashlight ket ilemmeng daytoy iti uneg ti maysa a basket? Apay nga idilig ti Mangisalakan dagiti disipulona iti silaw? Kasano a mausartayo daytoy a pannakaawat tapno agbalin a silaw kadagiti dadduma? (kitaen iti DkK 103:9–10). Mabalin a paglilinnawagan wenno yakem dagiti miembro ti klase dagiti wagas a pakapagrimatan ti silaw ti ebanghelio iti biagda ken mangbendision kadagiti dadduma.

• Mairaman ti dadduma pay a sumagmamano a nasantuan a kasuratan iti panaglilinnawagyo maipapan iti silaw ti 3 Nephi 18:24; Doktrina ken Katulagan 50:24; 84:44–47; 88:50, 67; ken 93:36–40. Mabalin a magustuan pay dagiti miembro ti klase ti panagkanta kadagiti himno maipapan iti silaw kas iti “The Lord Is My Light” ken “Lead, Kindly Light,” Dagiti Himno, nos. 89, 97. Ania ti inayon dagitoy a himno ken nasantuan a kasuratan iti pannakaawattayo iti Mateo 5:14–16?

Mateo 5:17–48

Insuro ni Jesucristo ti nangatngato a linteg a makaiturong kadatayo iti kinaan-anay.

• Nalawag dagiti nailadawan a kasasaad iti Mateo 5 iti aldaw ti Mangisalakan, ngem sapasap dagiti prinsipio nga insurona. Tapno matulongan a makita dagiti miembro ti klase dagiti panangyaplikarda iti biagda, awisem ida a pumili iti maysa kadagiti sumaganad a binatog ken mangpanunot maipapan iti pagwadan iti kabaruanan nga aldaw a mangiladawan no ania ti isursuro ti Mangisalakan: dagiti bersikulo 21–24; 27–30; 33–37; 38–39; 40–42; ken 43–44. Maaramidda daytoy a saggaysa wenno kas grupo ket ibinglayda dagiti pagwadanda iti klase.

• Mabalin a magustuan dagiti agtutubo ti ay-ayam a paris paris a makatulong kadakuada a mangkita a dagiti pannursuro ti Mangisalakan a masarakan iti Mateo 5:21–48 ket mangsukat iti paglintegan ni Moises. Mabalin a mangaramidka iti maysa nga asmang dagiti kard a nasuratan iti balikas a mangrugi iti “nangngegyo” (a mangiladawan iti linteg ni Moises) manipud iti Mateo 5:21–44. Mangaramidka iti sabali pay nga asmang a nasuratan kadagiti balikas manipud kadagiti bersikulo a mangrugi iti “ngem kunak” (a mangiladawan iti nangatngato a linteg ni Cristo). Agpada nga ipakleb dagiti asmang ti kard, ket pagpiliem ti miembro ti klase iti maysa kadagiti kard a nasuratan iti “nangngegyo,” a sarunuen ti maysa manipud iti sabali nga asmang, a mangsapsapul kadagiti agparis. Ituloy agingga a napagparis ti miembro ti klase ti linteg ni Moises iti baro a pannursuro ni Cristo. Para iti tunggal asmang, paglilinnawagan no apay a kasapulan ti pannursuro ti Mangisalakan iti panawentayo.

• Kasano a matulongam dagiti miembro ti klase a mangkita a ti kayat a sawen ti bilin ti Mangisalakan nga agbalin a “naan-anay,” kas iti inlawlawag ni Presidente Russell M. Nelson, nga agbalin a “kumpleto” wenno “nalpasen”? (Mateo 5:48; “Perfection Pending,” Ensign, Nob. 1995, 86–88). Adtoy ti maysa a kapanunotan: manggetteng iti maysa a ladawan ni Jesus iti maysa a puzzle, ken mangawis kadagiti miembro ti klase a mangisurat iti likud ti tunggal pedaso iti maysa a pannursuro manipud iti Mateo 5 a mariknada a naparegtada a mangyaplikar iti biagda. Bay-an ida nga agtitinnulong a sangkamaysa tapno makumpleto ti puzzle. Kasano a matulongannatayo ti Pannubbot ni Jesucristo nga agbalin a “kumpleto” wenno “nalpasen”? (kitaen iti Pangiwanwan iti Nasantuaan a Kasuratan, “Parabur”).

• Mabalinmo pay nga awisen dagiti miembro ti klase a mangituding iti panggep a tun-oyen nga agtignay iti parikna a naawatda bayat ti panagadalda iti Mateo 5. Ibilang no kasano a masurnadam daytoy nga awis kadagiti sumaruno nga adalen.

icon iti panangsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Mateo 6–7 kabayatan ti umay a lawas, mabalinmo nga isarita kadakuada nga inawagan ni Presidente Harold B. Lee ti Kaskasaba iti Bantay iti “pagalagadan para iti naan-anay a biag” (Teachings of Presidents of the Church: Harold B. Lee [2000], 200).

resources icon

Dagiti Nainayon a Resources

Mateo 5; Lucas 6

Panagbalin a maysa a silaw.

Insuro ni Elder Robert D. Hales: “Pinampanunotyo kadin a nalabit a dakayo ti silaw nga imbaon ti Nailangitan nga Ama a mangiturong iti sabali a sitatalged iti pagtaengan wenno agbalin a maysa a parola manipud iti adayo tapno mangipakita iti dana nga agsubli iti nalinteg ken akikid a dalan nga agturong iti agnanayon a biag? Ti silawyo ket maysa a parola ket saan koma nga agsardeng iti panagraniagna wenno mangyaw-awan kadagiti agsapsapul iti dalan nga agawid iti pagtaenganda” (“That Ye May Be the Children of Light” [Brigham Young University fireside, Nob. 3, 1996], 9; speeches.byu.edu).

Panagkalikagum a manggun-od iti kinaan-anay.

Insuro ni Presidente Harold B. Lee: “Ipapanyo kadi nga isingsingasing ti Mangisalakan ti maysa a panggep a tun-oyen a saan a mabalin a maragpat ket iti kasta laisennatayo kadagiti panagkagumaantayo nga agbiag a maragpat dayta a kinaan-anay? Imposible kadatayo ditoy a mortalidad a mapan iti dayta a kasasaad ti kinaan-anay nga insarita ti Maestro, ngem iti daytoy a biag inkabiltayo ti pundasion a pangbangonantayo iti kinaagnanayon; ngarud, nasken a penkentayo a maikabil ti pundasiontayo iti kinapudno, kinalinteg ken pammati” (Teachings of Presidents of the Church: Harold B. Lee, 195).

Kinuna ni Presidente Joseph Fielding Smith: “Ti [kinaan-anay] ket saanto a mapasamak iti mamimpinsan, ngem iti tunggal binatog ken iti tunggal pammilin, iti tunggal pagarigan, ken uray saan agingga a sibibiagtayo iti daytoy mortal a biag. … Ngem ditoy nga ikabiltayo ti pundasion. Ditoy ti pakaisuruantayo kadagitoy simple a kinapudno ti Ebanghelio ni Jesucristo, iti daytoy pakasubokantayo a kasasaad, a mangisagana kadatayo para iti dayta a kinaan-anay. Pagrebbengak, pagrebbenganyo, nga agbalinak a nasaysayaat ita ngem idi kalman, ken nasaysayaatkayo ita ngem idi kalman, ken nasaysayaatkayo inton bigat ngem ita” (Teachings of Presidents of the Church: Joseph Fielding Smith [2013], 234–35).

Panangpadur-as iti Panangisurotayo

Paaduem ti pannakiraman dagiti miembro ti klase. Mabalin a maaramid ti adu nga aktibidad kas maysa a klase, iti babassit a grupo, iti sagsangaparis, wenno kas maysa a panaglilinnawag iti panel. Usarem ti nadumaduma a pamay-an a mangpalugod kadagiti tao a makiraman a mabalin a no saan a maaddaan iti gundaway. (Kitaen iti Panangisuro iti Wagas ti Mangisalakan, 33.)