ti pamilia a kumitkita iti photo album

Disiembre 31–Enero 6

Responsabletayo para iti Bukodtayo a Panagsursuro

Bayat ti panagbasam ken panagutobmo kadagiti binatog iti nasantuan a kasuratan iti daytoy a balabala, isuratmo dagiti naespirituan nga impresion a naawatmo. Daytoyto ti mangyawis iti Espiritu iti panagsaganam. Umaykayo, Sumurot Kaniak—Para kadagiti Indibidual ken Pamilia ken dagiti sumaganad a kapanunotan ket makatulong kenka a mangparegta kadagiti tao iti klasem a mangadal iti Baro a Tulag itoy a tawen.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Maysa kadagiti panggepmo kas maysa a mannursuro ket mangparegta kadagiti miembro ti klase nga agsursuro manipud kadagiti nasantuan a kasuratan iti bukodda ken kadua dagiti pamiliada. Ti pannakangngeg kadagiti padas dagiti dadduma ket mabalin a mangparegta kadakuada nga agsapsapul iti bukodda a padpadas. Iti kasta, iti rugi ti tunggal klase, kiddawem kadagiti miembro ti klase a mangibinglay kadagiti nasantuan a kasuratan manipud iti panagadalda a nangparegta wenno nakaawis iti imatangda.

icon iti panangisuro

Isuro ti Doktrina

Tapno sipupudno a masursuruan manipud iti Mangisalakan, nasken nga awatentayo ti awisna, “Umaykayo, Sumurot Kaniak.”

• Ti panagadal iti Baro a Tulag ket maysa a gundaway saan laeng nga agsursuro maipapan iti Mangisalakan ken ti doktrinana ngem ketdi tapno pay matakuatan no kasano ti mangsurot Kenkuana a naan-anay. Ti pakaammuan iti Mateo 19:16–22 ket nasayaat a wagas a mangyam-ammo iti daytoy a tema (kitaen met iti video “Christ and the Rich Young Ruler” iti LDS.org). Mabalinmo a kiddawen kadagiti miembro ti klase a mangsapul iti daytoy a pakaammuan para iti maysa a banag a masursuroda maipapan iti panagbalin a disipulo ni Jesucristo ken mangibinglay no ania ti makitada. Para iti sabali pay nga aktibidad iti kapanunotan a mainaig iti daytoy a prinsipio, kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.

Ti panagsursuro ket agkasapulan iti panagtignay iti pammati.

• Kasano a maparegtam dagiti miembro ti klasem nga umawat iti ak-aktibo nga akem iti panagsursuroda, imbes a panangted iti amin a pagrebbengan iti mannursuro? Ditoy ti maysa a kapanunotan. Awisem ti maysa a miembro ti klase a mangipuruak iti nalamuyot a banag kenka, idinto ta awan panangikarigatam a mangsippaw iti daytoy. Usarem daytoy nga aktibidad a mangirugi iti panaglilinnawag maipapan kadagiti akem dagiti agad-adal ken mannursuro iti panagsursuro iti ebanghelio. Ti palawag ni Elder David A. Bednar maipapan iti panagsursuro babaen ti pammati, a masarakan iti “Dagiti Nainayon a Resources,” ket makatulong iti daytoy a panaglilinnawag.

• Tapno matulongan dagiti miembro ti klase a maawatan a ti panangsursuro iti ebanghelio ket agkasapulan iti pammati nga agtignay, mabalinmo a bingaybingayen ida kadagiti grupo ket awisem ti tunggal grupo a mangbasa iti maysa kadagiti sumaganad a pakaammo: Marcos 5:25–34; Lucas 5:17–26; ken Juan 9:1–7. Ania ti inaramid dagiti tao iti tunggal pakaammuan a mangipakita iti pammatida iti Mangisalakan? Ania dagiti maaramidtayo a tignay tapno makasursuro iti ebanghelio ken mangipakita iti pammatitayo a ti Apo ti mangtulongto kadatayo nga agsursuro iti kinapudno?

• Addaan ti amin a miembro ti klase iti pagrebbengan a mangawis iti Espiritu iti klase. Tapno matulongan dagiti miembro ti klase a maawatanda daytoy, kiddawem kadakuada ti mangbasa iti Alma 1:26 ken Doktrina ken Katulagan 50:13–22; 88:122–23 ken mangibinglay no ania ti maaramid dagiti mannursuro ken estudiante tapno maawis ti Espiritu. Mabalin a makatulong nga isurat dagiti sungbatda iti pisarra iti babaen dagiti paulo kas kadagitoy: Ania ti maaramid ti mannursuro ken Ania ti maaramid dagiti agad-adal. Makatulong kadi daytoy a mangaramid iti maysa a poster a nakaisuratan dagiti sungbatda a mabalin a maiparang kadagiti sumaruno a sumagmamano a lawas?

Nasken a maammuantayo ti kinapudno para iti bagbagitayo.

• Adu a binatog iti Baro a Tulag ti mangisuro kadagiti prinsipio a mabalin a mangiturong iti panagsapsapultayo iti kinapudno. Mairaman dagiti pagarigan iti Lucas 11:9–13; Juan 5:39; 7:14–17; ken 1 Taga Corinto 2:9–11. Mabalinmo nga awisen dagiti miembro ti klasem a mangbasa kadagitoy a binatog iti bukodda a panagadal tapno ibinglay no ania ti nasursuroda. Wenno mabalinyo a basaen dagitoy a binatog kas maysa a klase ket awisem dagiti miembro ti klase a mangiburay no kasano a nagun-odda dagiti pammaneknekda.

  agtutubo a lallaki ken babbai iti maysa a siled ti klase

  Ti panagkagumaan a manggun-od iti adal babaen ti pammati ket makatulongto kadatayo a maaddaan iti bukodtayo a pammaneknek.

• Uray no kasano ti kapaut ti kaaddatayon iti Simbaan, kasapulantayo amin ti kanayon a panangpapigsa kadagiti pammaneknektayo. Tapno matulongan dagiti miembro ti klase a mangilasin kadagiti kinapudno a nasken a maammuanda para iti bagbagida, mabalinmo nga isurat kadagiti pidaso ti papel ti sumagmamano a reperensia iti nasantuan a kasuratan a mangisuro kadagiti napapateg a kinapudno, a kas iti Juan 3:16–17; 1 Taga Corinto 15:22; Mosiah 3:13; Alma 7:11–13; ken Doktrina ken Katulagan 135:3. Kiddawen kadagiti miembro ti klase a mangbasa kadagitoy nasantuan a kasuratan, manggupgop kadagiti agnanayon a kinapudno a mabirokanda, ket paglilinnawagan no ania ti maaramidda tapno magun-od ti pammaneknek maipapan kadagitoy. Tapno maaramid daytoy nga aktibidad nga ad-adda a pakairamanan dagiti agtutubo, ibilang ti panangilemmeng kadagiti pidaso ti papel iti lawlaw ti siled ken panangawis kadagiti agtutubo nga “agsapul iti kinapudno.”

• Dagiti Aramid 17:10–12 ti mangiladawan kadagiti Santo a nagsukisok kadagiti nasantuan a kasuratan ken nakaagun-od iti bukodda a saksi ti kinapudno. Tapno maparegta dagiti miembro ti klase a mangsurot iti pagwadanda, aggigiddan a basaenyo dagitoy a bersikulo ket awisem dagiti miembro ti klase a mangibinglay kadagiti binatog ti nasantuan a kasuratan a nangpapigsa iti pammaneknekda iti ebanghelio.

Kasano a maaramidtayo a napatpateg ti panagadal iti nasantuan a kasuratan?

• Ti panangpadur-as iti kaugalian a panagadal iti nasantuan a kasuratan ket mabalin a mapannubok para kadagiti miembro ti klase a makarikna nga awananda iti kasapulan a panawen, pannakaawat, wenno paglaingan. Ania ti maaramidmo a makatulong kadakuada nga agballigi? Mabalinmo nga irugi babaen ti panangilawlawag iti estoria maipapan iti agwaswasay iti “Dagiti Nainayon a Resources.” Tapno matulongan dagiti miembro ti klase a makagun-od iti panagtalek a mangadal kadagiti nasantuan a kasuratan, mabalinmo nga ibinglay ti impormasion manipud iti “Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan” iti Umaykayo, Sumurot Kaniak—Para kadagiti Indibidual ken Pamilia. Nalabit a mabalinmo wenno dagiti dadduma pay a miembro ti klase ti mangibinglay kadagiti kapadasanna ti panagusar kadagitoy sumagmamano a kapanunotan wenno dagiti sabali pay a napapateg a padas iti panagadal kadagiti nasantuan a kasuratan. Mabalinmo pay ti pumili iti maysa a kapitulo iti Baro a Tulag ket padasen ti panagadal iti daytoy kas maysa a klase nga usaren ti sumagmamano kadagitoy a kapanunotan.

icon iti panangsursuro

Yallukoy ti Panagsursuro iti Pagtaengan

Tapno maallukoy dagiti miembro ti klase a mangadal iti Mateo 1 ken Lucas 1 iti pagtaengan kas panagsagana para iti panaglilinnawag iti sumaruno a lawas, mabalinmo a damagen daytoy a saludsod: “Naidawat kadin kadakayo nga agaramid iti maysa a banag a kasla imposible?” Iladawan dagitoy a kapitulo ti kinapudno nga “iti Dios awanto ti imposible” (Lucas 1:37).

resources icon

Dagiti Nainayon a Resources

Pananggun-od kadagiti naespirituan a pannakaammo para iti bagbagitayo.

Inlawlawag ni Elder David A. Bednar: “Napaliiwko ti maysa a gagangay a kababalin kadagiti mannursuromi nga addaan iti kaindaklanan nga impluensia iti biagko. Tinulongandak nga agkagumaan a manggun-od iti adal babaen ti pammati. Nagkedkedda nga ited kaniak dagiti nalaka a sungbat kadagiti narigat a saludsod. Ti kinapudnona, saandak nga inikkan kadagiti ania man a sungbat. Ketdi, intudoda ti wagas ken tinulongandak a mangala kadagiti addang tapno mangsarak kadagiti bukodko a sungbat. … Ti sungbat nga inted ti sabali a tao ket gagangay a saan a malagip iti nabayag unay, no malagip pay daytoy. Ngem ti matakuatan wenno magun-odmi a sungbat babaen ti panangaramat iti pammati, gagangay nga agtalinaed agingga iti tungpal biag. … Iti kastoy laeng a wagas a makapagtignay ti maysa a tao iti labes ti panagpannurayna iti naespirituan a pannakaammo ken padas dagiti dadduma ken pananggun-od kadagita a bendision para iti bagina” (“Seek Learning by Faith,” Ensign, Sept. 2007, 67).

Panangilatang iti panawen para iti panangadal iti nasantuan a kasuratan.

Insuro ni Brother Tad R. Callister:

“Dua nga agwaswasay … ti nagsalisal tapno mangikeddeng no asino ti makapukan iti ad-adu pay a kayo iti uneg ti maysa nga aldaw. Nairugi ti salisal iti isisingising ti init. Tunggal oras nagallaalla iti kabakiran ti basbassit a tao iti uneg ti 10 a minuto. Tunggal kanito nga aramidenna daytoy, napaisem ken nagtung-ed ti kasalisalna, ninamnama a maunnaanna iti pannubok. Di kaano man pinanawan ti dakdakkel a tao ti puestona, di kaano man nagsardeng iti panagpukan, di kaano man naginana.

“Idi aggibus ti aldaw, nasdaaw idi maammuan ti dakdakkel a tao a ti kasalisalna, a kasla nangsayang iti adu unay nga oras, ket ad-adu ti napukanna a kayo ngem isuna. ‘Kasano nga inaramidmo daytoy idinto ta namin-aduka a naginana a nagpukan?’ dinamagna.

“Insungbat ti nangabak, ‘O, as-asaek ti wasayko.’

“Tunggal kanito nga adalentayo dagiti nasantuan a kasuratan, as-asaentayo dagiti naespirituan a wasaytayo” (“The Joy of Learning,” Ensign, Okt. 2016, 14).

Panangpadur-as iti Panangisurotayo

Agtalinaed a nakapokus iti doktrina. Siguraduen a dagiti paglilinnawagan iti klase ket agtalinaed a nakaipamaysa kadagiti nasantuan a kasuratan ken pannursuro dagiti propeta. Mabalinmo nga aramiden daytoy babaen ti panagdamag kadagiti saludsod kas kadagitoy: “Ania dagiti kinapudno ti ebanghelio a masursurotayo manipud kadagiti masao a nangngegantayo?” wenno “Makaibinglay kadi ti maysa a tao iti nasantuan a kasuratan a mainaig iti napaglilinnawagantayo?” (Kitaen iti Panangisuro iti Wagas ti Mangisalakan, 20–21.).)