Tijem̧ba 13–19

Baam̧le Eo: Juōn Naan in Kean̄ n̄an Laļ in

“Baam̧le eo Ej Dilepen Karōk eo an Rikōm̧anm̧an eo”

Ilo am̧ ekkatak “Baam̧le Eo: Juōn Naan in Kean̄ n̄an Laļ in” ilo wiik in, ļōmņak kōn m̧ool ko me renaaj rejtake ro uwaan kūlaaj eo ilo kijejeto ko aer n̄an kōkajoorļo̧k im̧ōko im̧wer im baam̧le ko aer.

Je En̄jake ko Rej Im̧we Eok

Kajjitōk bwe ren Kwaļo̧k

Kōketak ro uwaan kūlaaj eo n̄an kwaļo̧k ta eo raar ekkatak wiik in jān ekkatak eo aer kōn naan in kean̄ eo an baam̧le, kwomaron̄ kajjitōk ippāer n̄an kāālet jabdewōt perokūrāāp im ba ilo tukadu in ilo juon jāntōj ta eo perokūrāāp eo ej katakin.

Katakin Katak eo

“Baam̧le eo ej dilepen karōk eo an Rikōm̧anm̧an eo.”

• Kabun̄ in jeļā kake kōn kōmejaja eo an ioon baam̧le ko, im naan in kean̄ eo an baam̧le ej kwaļo̧k un ko an katak eo kōn kōmejaja eo. N̄an kōketak juon iien ekōnono kōn menin, kwomaron̄ kajjitōk ippān ro uwaan kūlaaj eo n̄an pijaikļo̧k an juon kar kajjitōk ippāer etke ekanooj in ļap an Kabun̄ in kōmejajaik baam̧le ko. Ta m̧ool ko jān naan in kean̄ eo jemaron̄ kwaļo̧ke n̄an uwaake kajjitōk eo an armej eo?

• Juon un naan in kean̄ eo an baam̧le ekanooj in aorōk ej bwe ej bar kapenļo̧k m̧ool ko me rej lukwarkwari ilo tōre in ad. Ta m̧ool ko ilo naan in kean̄ eo rejipan̄ kōj jab m̧oņ jān ļōmņak ko rebōd kōn baam̧le ko ilo laļ in rainin? Ekōjkan an m̧ool kein jelōt kāālet ko jej kōm̧m̧ani? Ennaan eo jān Būreejtōn Dallin H. Oaks ilo “Kein Jipan̄ ko jet” emaron̄ in jipan̄ ilo uwaake kajjitōk in.

  

  Ro jinen im jemān rej aikuj karūttoļo̧k ajri ro nejier ilo iakwe im jim̧we.

“M̧ōņōņō ilo mour in baam̧le ej maron̄ tōprak eļan̄n̄e ej pedped wōt ioon katak ko an Irooj Jisōs Kraist.”

• Ekōnono kōn pedped in katak ko ilo perokūrāāp jiljino im jiljilimjuon in naan in kean̄ eo an baam̧le emaron̄ jipan̄ ro uwaan kūlaaj eo am̧ lo eļapļo̧k m̧ōņōņō ilo jemjerā ko an baam̧le eo aer. Ļōmņak in kōllaajrak pedped in katak ko ioon boot eo im kajjitōk ippān ro uwaan kūlaaj eo n̄an kāālet juon pedped in katak n̄an ekōnono kake ruo iaan ruo. Remaron̄ kōjerbal kajjitōk ko āinwōt kein n̄an tōl iien ekōnono ko aer: Ta waanjon̄ak ko an pedped in katak in em̧ōj ad loe ilo mour in baam̧le? Ekōjkan an mour kōn pedped in katak in tōlļo̧k n̄an m̧ōņōņō ilo baam̧le ko ad? Ekōjkan an mour kōn pedped in katak in kōm̧m̧an bwe Rilo̧mo̧o̧r en pedped eo an mour in baam̧le eo ad? Ta eoon ko remaron̄ jipan̄ baam̧le ko ad em̧m̧anļo̧k aer meļeļe pedped in katak in? (Ro uwaan kūlaaj eo remaron̄ lo eoon ko ilo aer kōjerbal Topical Guide ak Unin Tōl eo n̄an Jeje Ko Rekwōjarjar [scriptures.ChurchofJesusChrist.org].) Innām kajjojo pea remaron̄ kwaļo̧k ippān kūlaaj eo ta eo rekar ekkatak.

  Lukkuun kōmejajaik bwe jekdo̧o̧n ta jekjek ko kiiō an baam̧le eo ad, jemaron̄ kajjieon̄ n̄an kalōk juon baam̧le indeeo ioon pedped eo an Rilo̧mo̧o̧r im gospel eo An.

“Kōmij kūr ioon ro aer eddo … n̄an iuun m̧aanļok kakien ko ļōmi n̄an kōjparok im kōkajoorļok Baam̧le.”

• Ekōjkan am̧ maron̄ jipan̄ ro uwaan kūlaaj eo am̧ meļeļe eddo eo aer n̄an dāpij wōt m̧ool ko ilo naan in kean̄ eo an baam̧le? N̄an jino iien ekōnono eo, kwomaron̄ ekōnono kōn ta eo ro uwaan kūlaaj eo rej ekkatak jān taitōļ eo an naan in kean̄ eo. Ta naan in kean̄? Ta eo ekar kōm̧m̧an bwe Būreejtōnji eo Kein Kajuon im Ko̧o̧njeļ eo an Doulul eo an Jon̄oulruo Rijilik ro kwaļo̧k juon naan in kean̄ n̄an laļ in ikkijien baam̧le ko? Ro uwaan kūlaaj eo remaron̄ kōllaajrak ta eo rej ļōmņak bwe ej lukkuun ennaan ko an naan in kean̄ eo (kōketak er n̄an aer ba lukkuun eoon ko). Innām remaron̄ ekōnono kōn wāween ko n̄an kajedede ennaan kein ilo jukjuk in pād ak laļ eo aer. Ennaan eo an Sister Bonnie L. Oscarson “Rijojomar ro an Naan in Kean̄ eo an Baam̧le” epād ie waanjon̄ak ko kom̧ maron̄ lale ippān doon āinwōt juon kūlaaj (Ensign ak Liaona, Māe 2015, 14–17). Kom̧ maron̄ barāinwōt alooje pija in alooj eo “Defenders of the Faith” (ChurchofJesusChrist.org).

Kein Jipan̄ ko Jet

Baam̧le ko ilo karōk eo an Anij.

Būreejtōn Dallin H. Oaks ekar katakin:

“Armej ro Rekwojarjar ro remeļeļe kōn karōk in lo̧mo̧o̧r eo an Anij ewōr juon aer jeļā eo ejjejet me ejipan̄ er lo tokjen kien ko an Anij, piktokin kain̄i ko An rejjamin okoktak, im jerbal eo an ad Rilo̧mo̧o̧r, Jisōs, Kraist. Pinmuur eo an ad Rilo̧mo̧o̧r eaar wiaik kōj jān mej im, eļan̄n̄e jej ukweļo̧k, naaj lo̧mo̧o̧reņ kōj jān jerawiwi. Kōn meļeļe eo an laļ in, Armej ro Rekwojarjar ewōr aer kōttōbar ko im̧aantata im iminene ko me kar kōjeraam̧m̧an er kōn kajoor eo n̄an niknik ilo inepata ko im metak ko an mour in. …

“Karōk in gospel eo kajjojo baam̧le rej aikuj ļoore n̄an m̧aanjabpopo n̄an mour indeeo im mour ijo euteijtata ej elaajrak ilo naan in kean̄ eo an Kabun̄ in ilo 1995, ‘Baam̧le Eo: Juōn Naan in Kean̄ n̄an Laļ in.’ Kean̄ ko rej, ilo em̧ool, reoktak jen jet kien ko kiiō, imminene ko, im jipan̄ ko ilo laļ in ijo jej mour ie. Tōre in ad, oktak ko rekanooj in alikkar rej mour ippān doon ilo ejjeļo̧k m̧are, m̧are an m̧aan n̄an m̧aan ak kōrā n̄an kōrā, im karūttoļo̧k ajri ro ilo kain jemjerā kein. Ro rejjab tōmak ak rej kappukot n̄an mour ijo eutiejtata im rej reel lo men ko an laļ in ļōmņak kōn kean̄ in an baam̧le ej juon ennaan in kean̄ me ej aikuj oktak. Ilo bar juon wāween, Armej ro Rekwojarjar ilo Raan ko Āliktata rej kwaļo̧k bwe naan in kean̄ eo an baam̧le ej kalikkar kain jemjerā ko an baam̧le ijo m̧ōttan eo eaorōk tata an eddōkļo̧k indeeo eo ad emaron̄ waļo̧k” (“The Plan and the Proclamation,” Ensign ak Liahona, Nob. 2017, 29).

Kōkōm̧anm̧anļo̧k Ad Katakin

Mour kōn gospel eo kōn aolepān būruwōm̧. “Kajoor ej itok n̄e juon rūkaki ekar kōm̧m̧ane aolep men me emaron̄e n̄an m̧aanjabpopo, ejjab wōt ilo juon katak, ak ilo dāpij wōt an mour eo an ekkeijel ippān Jetōb eo” (Boyd K. Packer, Teach Ye Diligently [1975], 306).