Paggamit sa Dali, Sunod Kanako—Alang sa Sunday School

Pagpangandam sa Pagtudlo sa Sunday School

Ang personal ug pamilya nga pagtuon diha sa panimalay kinahanglang mao ang sentro sa pagkat-on sa ebanghelyo. Mao usab kini alang kanimo ug alang niadtong imong tudloan. Samtang mangandam ka sa pagtudlo, sugdi pinaagi sa pagbaton og kaugalingon nimong mga kasinatian diha sa mga kasulatan. Ang imong labing importante nga pagpangandam mahitabo samtang mosiksik ka sa mga kasulatan ug magtinguha sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa ka mahinungdanon nga bahin sa imong personal nga pagtuon ug sa imong pagpangandam sa pagtudlo. Makatabang kini kanimo nga makaangkon og mas lawom nga panabut sa doktrinal nga mga baruganan nga makita diha sa mga kasulatan. Makapahimo usab kini nimo nga makadasig ug makadapit sa mga sakop sa klase sa paggamit sa Dali, Sunod Kanako—Alang sa mga Indibidwal ug mga Pamilya sa pagpalambo sa ilang personal ug pamilya nga pagtuon sa kasulatan (alang sa tabang sa pagbuhat niini, tan-awa sa “Mga Ideya alang sa Pag-awhag og Personal ug Pamilya nga Pagtuon” niini nga kapanguhaan). Sa pagbuhat nimo sa ingon, hinumdumi nga magmahimong sensitibo sa mga sakop sa klase kansang mga kahimtang sa pamilya mahimong wala magsuporta sa regular nga pamilya nga pagtuon sa kasulatan ug family home evening.

Atol sa imong pagpangandam, ang mga hunahuna ug mga impresyon moabut kanimo mahitungod sa mga tawo nga imong tudloan, kon sa unsang paagi nga ang mga baruganan diha sa mga kasulatan makapanalangin sa ilang kinabuhi, ug sa unsang paagi nga imo silang madasig sa pagdiskubre niadtong mga baruganan samtang magtuon sila sa mga kasulatan nga sila ra.

Mga Ideya sa Pagtudlo

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga gilatid sa pagtudlo niini nga kapanguhaan. Ayaw paghunahuna niining mga ideya isip mga instruksyon sa mga lakang nga buhaton apan isip mga sugyot sa pagdasig sa kaugalingon nimong inspirasyon. Nakaila ka sa imong mga sakop sa klase, ug mas mailhan nimo sila samtang kamo dungan nga magkat-on diha sa klase. Ang Ginoo nakaila usab kanila, ug dasigon ka Niya sa labing maayo nga mga paagi sa pagtabang sa mga sakop sa klase sa pag-ugmad og pagkat-on sa ebanghelyo nga ilang gibuhat diha sa panimalay.

Ikaw adunay daghan pang mga kapanguhaan nga anaa aron magamit nimo samtang mangandam ka, lakip na ang mga ideya diha sa Dali, Sunod Kanako—Alang sa mga Indibidwal ug mga Pamilya ug sa mga magasin sa Simbahan. Alang sa dugang nga impormasyon kabahin niini ug uban pang mga kapanguhaan, tan-awa ang seksyon nga giulohan og “Dugang nga mga Kapanguhaan” niini nga kapanguhaan.

Ubang mga Butang nga angayang Hinumduman

• Ang panimalay mao ang labing maayong palibut sa pagkat-on sa ebanghelyo. Isip magtutudlo, ikaw adunay importante nga responsibilidad sa pagsuporta, pag-awhag, ug pag-ugmad og pagkat-on sa ebanghelyo diha sa panimalay sa imong mga sakop sa klase.

• Ang pagkakabig sa mga sakop sa klase ngadto sa ebanghelyo ni Jesukristo mas molambo kon sila makasabut ug mogamit sa tinuod nga doktrina. Awhaga sila sa pagrekord ug pagsunod sa mga impresyon nga ilang madawat gikan sa Espiritu Santo.

• Ang pagtudlo mas labaw pa kay sa pag-lecture, apan mas labaw pa usab kini kay sa yano lamang nga paggiya og panaghisgutan. Kabahin sa imong tahas mao ang pagdasig og pag-apil nga makapalig-on ug gibase diha sa mga kasulatan. Kinahanglan usab nimong ipaambit ang makadasig nga mga panabut nga imong nadawat samtang nagtuon ka sa mga kasulatan.

• Ang Langitnong Amahan gusto nga molampus ka isip usa ka magtutudlo. Mihatag Siya og daghang kapanguhaan sa pagtabang nimo, lakip na ang mga miting sa teacher council. Niining mga miting mahimo kang makigtinambagay sa ubang mga magtutudlo mahitungod sa mga hagit nga imong giatubang. Mahimo usab nimong hisgutan ug praktison ang mga baruganan sa Kristohanon nga pagtudlo.

• Mas makakat-on ang mga tawo kon sila adunay mga oportunidad sa pagtudlo. Usahay, ikonsiderar ang pagtugot sa mga sakop sa klase, lakip na ang mga batan-on, sa pagtudlo og usa ka bahin sa leksyon. Ibase kini nga desisyon sa mga panginahanglan ug mga abilidad sa mga sakop sa klase. Kon modapit ka og usa ka sakop sa klase sa pagtudlo, paggahin og panahon sa pagtabang niya nga maandam daan pinaagi sa paggamit sa mga ideya nga makita niini nga kapanguhaan ug sa Dali, Sunod Kanako—Alang sa mga Indibidwal ug mga Pamilya. Hinumdumi nga isip gitawag nga magtutudlo, ikaw ang unang responsable sa unsay gitudlo diha sa klase.

• Kini nga kapanguhaan naglakip sa mga gilatid sa pagtudlo alang sa kada semana sa tuig gawas sa duha ka Dominggo kon ipahigayon ang kinatibuk-ang komperensya. Sa mga Dominggo nga walay ipahigayon nga Sunday School tungod sa stake conference o sa bisan unsa pang rason, ang mga pamilya mahimong mopadayon sa pagbasa sa Basahon ni Mormon diha sa panimalay sumala sa gilatid nga iskedyul diha sa Dali, Sunod Kanako—Alang sa mga Indibidwal ug mga Pamilya. Aron anaa sa iskedyul ang imong klase sa Sunday School, mahimo nimong pilion ang paglak-ang ba og leksyon o hiusahon ang duha ka leksyon. Aron malikayan ang kalibug, ang mga presidente sa Sunday School mahimong motambag sa sayo pa sa mga magtutudlo sa Sunday School mahitungod niining mga pagpahiangay.