Samuel, Man Lemanaet i stap tij antap long wol

Samuel, Wan Man blong Leman Antap long Wol i kam long Arnold Friberg

31 Ogis–6 Septemba

Hileman 13–16

“Ol Gudnius blong Bigfala Glad”

?Wijwan long ol tijing mo profesi blong Samuel, Man blong Leman, yu yu filim se bae i givim moa help long ol memba blong klas blong yu? Taem yu stap stadi Hileman 13–16, tingting hevi ol wei we yu save helpem olgeta blong faenem mining insaed long ol japta ia.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Invaetem ol memba blong klas blong oli serem wetem wan patna, wan samting we oli bin lanem, wan samting we oli andastanem i gud moa, o wan samting we oli bin praktisim taem oli bin stap ridim stori blong Samuel, Wan Man blong Leman, we i stap long Hileman 13–16 long wik ia. Afta, letem sam long olgeta oli serem wetem ful klas.

tijing pikja bokis

Stap Tijim Doktrin

Hileman 13

Ol wokman blong Lod oli toktok mo mekem samting i folem daereksen blong God.

• Lod i bin askem Samuel, Man blong Leman ia, blong mekem wan samting we yumi luk se i had: blong prij long ol pipol, we bifo finis, oli bin sakem hem aot long taon blong olgeta. Taem bae oli ridim Hileman 13:2–5, maet hemia bae i mekem ol memba blong klas oli tingbaot ol had samting we Lod i bin askem olgeta blong mekem. Invaetem olgeta blong serem ol eksperiens blong olgeta. ?Olsem wanem nao Lod i bin helpem olgeta? Eksampol: maet ol memba blong klas oli save ol eksperiens blong wan taem we Lod i bin putum samting long hat blong olgeta, we Hem i bin wantem olgeta blong talem long wan man o woman (luk long ves 4). ?Wanem blesing ol memba blong klas oli bin luk taem oli bin folem daereksen blong Lod?

  Presiden Russell M. Nelson

  Profet i poenem yumi i go long Jisas Kraes.

• I nomata we ol woning blong Samuel i go long Ol Man blong Nifae we hat blong olgeta i strong i stap, insaed long Hileman 13, i gat sam lesen we oli blong yumi evriwan. Blong helpem ol memba blong klas blong faenem wan mining long ol toktok blong Hileman, we i blong olgeta nomo, invaetem olgeta blong lukluk gud insaed long Hileman 13 blong faenem wan mesej we i stret long taem blong yumi tedei. (Sapos oli nidim help, maet yu save raetem olgeta ves ia long bod: 8, 21–22, 26–29, 31, mo 38.) Afta, oli save serem wanem oli faenem; oli save tutu, o stap long smol grup, o wetem ful klas. ?Wanem semmak mesej nao ol profet oli givim long yumi tedei?

Hileman 14; 16:13–23

Ol saen mo ol sapraes i save mekem fet i kam strong, hemia long olgeta we oli no mekem hat blong olgeta i kam strong.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong lukaotem ol saen we Lod i givim long yumi blong “[yumi] save biliv long nem blong hem” (Hileman 14:12). Maet ol memba blong klas oli save serem wanem oli faenem taem oli bin stap tingting hevi long aedia ia. Meksua blong poenemaot se ol saen insaed long laef blong yumi, oli no bigwan tumas, mo oli blong yumiwan nomo; oli no semmak long ol saed we Samuel i talem. ?Wanem nara stamba tingting nao oli givim, long saed blong ol saen, we i stap long Hileman 14:28–30? Ol memba blong klas oli save serem ol nara samting we Lod i bin mekem blong helpem olgeta blong gat moa fet long Hem.

• Sapos yufala i ridim olsem wanem ol profesi blong Samuel oli kam blong hapen, i save bildimap fet blong klas long Jisas Kraes mo misin blong Hem. Maet ol memba blong klas oli save yusum Hileman 14 blong krietem wan jat we i givim lis blong evri profesi blong Samuel abaot taem we Kraes bae i bon i kam long wol, mo ded blong Hem long wan saed, mo ol skripja refrens we ol profesi ia oli bin kamtru, long nara saed. Sam long ol refrens ia, i save gat ol ves we oli stap long 3 Nifae 1:15–21 mo 3 Nifae 8:5–25. ?From wanem i impoten blong yumi save abaot ol profesi ia, mo save se oli bin hapen?

• Ol memba blong klas oli bin luk—insaed long Hileman 16 mo ol nara ples long ol skripja—se blong luk ol saen mo ol sapraes, i no mekem wan man o woman i save biliv long Kraes. Invaetem olgeta blong serem sam eksampol, aot long ol skripja, blong ol man mo woman we oli bin luk ol saen, be yet, oli no bin biliv. Folem wanem i stap long Hileman 16:13–23, ?from wanem plante pipol long taem blong Samuel, Man blong Leman, oli no bin bilivim ol saen mo ol profesi? ?Olsem wanem Setan i stap winim tingting blong ol pipol blong “dipen long paoa blong olgeta nomo, mo long ol waes tingting blong olgeta nomo” tedei? (Hileman 16:15). ?Wanem yumi stap lanem aot long ol stori ia we i save helpem yumi blong stap longwe long ol semfala mistek?

Hileman 15:3

Lod i stretem olgeta we Hem i lavem.

• Ol toktok blong Samuel, oli gat ol strong toktok blong stretem man, be Hileman 15:3 i givim wan lukluk we i wan speselwan long saed blong fasin blong Lod blong stretem man. Wan wei blong helpem ol memba blong klas blong andastanem niufala lukluk ia, hem i blong ridim ves ia tugeta, mo invaetem olgeta blong serem pruf se oli stap luk lav mo sore blong God long ol profesi mo woning blong Samuel. ?Olsem wanem nao, taem Lod i stretem yumi, i wan saen blong lav blong Hem long yumi?

• Blong helpem ol memba blong klas blong oli andastanem mesej we i stap long Hileman 15:3, yu save serem ol trifala stamba tingting ia blong fasin blong stretem man, we Elda D. Todd Christofferson i stap tijim (luk long “Sam Moa Risos”). Serem klas long tri grup, mo askem wanwan grup blong toktok raon long wan long ol stamba tingting ia (ol skripja mo vidio we i stap long “Sam Moa Risos” oli save help). Afta, wanwan grup i save serem wetem klas eni niu tingting we i kamaot long storian blong olgeta we i helpem olgeta blong oli andastanem gud moa se Lod i stap stretem olgeta we Hem i lavem olgeta.

Hileman 16

Profet i poenem yumi i go long Lod.

• Long Hileman 16, ?wanem nao yumi lanem aot long olgeta ia we oli bin akseptem ol tijing blong Samuel? ?Wanem nao yumi lanem aot long olgeta we oli sakemaot hem? Bae i save stap olsem wan insperesen blong harem ol memba blong klas oli serem olsem wanem oli kasem testemoni blong olgeta long saed blong hamas i impoten blong stap folem ol profet we oli stap laef. Mo tu, oli save serem olsem wanem bae oli yusum Hileman 16 o ol toktok blong Elda Andersen, we oli stap long “Sam Moa Risos,” blong eksplenem from wanem oli jusum blong folem profet.

lanem samting pikja bokis

Stap Leftemap Tingting blong Lanem Samting long Hom

Blong leftemap tingting blong ol memba blong klas blong ridim 3 Nifae 1–7 long nekis wik, talem long olgeta se plante long ol profesi we oli stap rid abaot long wik ia, bae oli kamtru long olgeta japta ia.

risos pikja bokis

Sam Moa Risos

Ol stamba tingting blong fasin blong God blong stap stretem man.

Elda D. Todd Christofferson i serem trifala stamba tingting blong fasin blong God blong stap stretem man (luk long “As Many as I Love, I Rebuke and Chasten,” Ensign o Liahona, May 2011, 97–100):

1. “Blong winim tingting blong yumi blong sakem sin.” Luk long Ita 2:14–15; Doktrin mo Ol Kavenan 1:27; 93:41–50; 105:6.

2. “Blong mekem yumi kam gud moa mo mekem yumi kam tabu.” Luk long Mosaea 23:21–22; Doktrin mo Ol Kavenan 101:1–5; 136:31.

3. “Blong jenisim rod blong yumi long laef blong folem wanem we God i save se i wan rod we i gud moa.” Luk long stori blong Presiden Hugh B. Brown mo bus we i stap long toktok blong Elda Christofferson (ol pej 98–99); “The Will of God” (vidio, ChurchofJesusChrist.org).

Yumi glad blong gat wan profet.

Elda Neil L. Andersen i tijim:

“Wan profet i no stanap bitwin yu mo Sevya. Be, hem i stanap long saed blong yu, mo i poenem rod i go long Sevya. Bigfala responsabiliti mo hae presen olgeta we wan profet i givim long yumi, i sua witnes blong hem, stret save blong hem, se Jisas, Hem i Kraes. Olsem Pita blong bifo, profet blong yumi i talem: ‘Hem, Hem i Kraes, Pikinini blong God we i stap laef’ [Matiu 16:16; luk tu long Jon 6:69].

“Wan dei, long fiuja, taem bae yumi luklukbak long laef blong yumi long wol ia, bambae yumi glad se yumi bin wokbaot long wol ia taem wan profet we i stap laef i stap. Long dei ia, mi prea se bae yumi save talem:

‘Mifala i bin lisin long Hem. Mifala i bin biliv long Hem. Mifala i bin stadi long ol toktok blong Hem wetem longfala tingting mo wetem fet. Mifala i bin prea from Hem. Mifala i bin stanap long saed blong Hem. Mifala i bin gat tingting i stap daon inaf blong save folem Hem. Mifala i bin lavem Hem.(“Profet blong God,” Ensign o Liahona, May 2018, 24).

Stap Kam Antap long Fasin blong Yumi blong Stap Tij

Kam blong save gud olgeta we yu stap tij. I no gat tu pipol we tufala i semsemmak. Wanwan man o woman we yu stap tijim, hem i gat ples blong hem we i kamaot long hem, i gat lukluk blong hem, mo i gat ol samting we hem i save mekem. Prea blong save olsem wanem yu save yusum ol defren samting ia blong helpem ol memba blong klas blong oli lanem samting. Taem yu stap andastanem gud moa olgeta ia we yu stap tijim olgeta, yu save krietem sam taem blong tij we bae oli gat mining mo oli no save fogetem. (Luk long Teaching in the Savior’s Way, 7.)