“10–16 Ogis. Alma 53–63: ‘God I Sevem Olgeta wetem Bigfala Paoa blong Hem,’” Kam Folem Mi—Blong Sandei Skul: Buk blong Momon 2020 (2020)
“10–16 Ogis. Alma 53–63,” Kam Folem Mi—Blong Sandei Skul: 2020
Tu Taosen Yang Soldia, i kam long Arnold Friberg
10–16 Ogis
Alma 53–63
“God I Sevem Olgeta wetem Bigfala Paoa blong Hem”
Taem yu stap lukluk tru long ol aedia blong tij insaed long aotlaen ia, tingting long wanem bae i wok blong klas blong yu, mo stretem ol aktiviti blong i go wetem ol nid blong ol memba.
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Blong leftemap tingting blong ol memba blong klas blong oli serem wanem oli bin lanem long Alma 53–63, yu save askem olgeta blong lukluktru long ol japta ia, mo luk wan ves we oli save serem wetem wan we i stap fesem ol jalenj. Invaetem olgeta blong serem ves ia wetem wan aotsaed long klas.
Stap Tijim Doktrin
Alma 53:17–21; 56:43–48, 55–56; 57:20–27; 58:39–40
Taem yumi stap praktisim fet mo tras long God, bambae Hem i mekem yumi kam strong moa.
-
Yu save mekem toktok insaed long klas abaot ol soldia blong Hileman i kam rij moa taem yu stap droem wanem ol memba blong klas oli bin lanem long hom. Wan wei blong mekem hemia, i blong invaetem ol ol memba blong klas blong serem ol fasin blong ol yang strong soldia we i tajem olgeta (sam long ol fasin ia oli stap long Alma 53:17–21; 56:45–48; 57:20–21, 26–27; 58:40). ?Olsem wanem ol fasin ia oli bin helpem ol strong soldia ia long taem we oli bin faet? ?Olsem wanem nao oli save helpem yumi long taem we yumi faet o stap traehad long saed blong spirit? Ol memba blong klas oli save serem ol stori abaot sam “strong soldia” blong taem blong yumi tedei.
-
Maet ol papa mo mama insaed long klas blong yu oli stap hop se pikinini blong olgeta bae oli developem wan fet we i olsem hemia blong ol strong soldia. Blong helpem ol papa mo mama mo ol fiuja papa mo mama insaed long klas blong yu blong lanem samting aot long stori ia, yu save oganaesem wan panel, we insaed, i gat samfala pipol we oli save serem sam aedia abaot fasin blong bildimap fet long ol pikinini blong olgeta. Askem ol memba blong panel ia blong ridim Alma 56:47–48 mo 57:20–27 bifo oli kam long klas, mo oli kam mo rere blong serem ol niu tingting abaot wanem i bin helpem ol strong soldia ia blong developem fet. Givim taem long ol memba blong klas blong serem ol niu tingting taem ol memba blong panel oli stap presentem ol aedia. Ol nara risos we oli save helpem toktok raon long topik ia, oli ol toktok blong Sista Joy D. Jones we i stap long “Sam Moa Risos”, mo ol toktok blong Presiden Russel M. Nelson, “A Plea to My Sisters” (Ensign o Liahona, Nov. 2015, 95–97). Long en blong toktok insaed long klas, yu save givim sam minit long ol memba blong klas, blong oli tingting hevi long ol kwestin olsem: ?Huia nao maet i stap dipen long testemoni blong yu? ?Wanem nao yu save talem mo mekem blong mekem olgeta oli kam strong moa?
Ol Hiro (we Mama blong Olgeta i Tijim Olgeta), i kam long Liz Lemon Swindle
Yumi save jusum blong gat gudfala tingting long ol narawan mo no luk se man i mekem nogud long yumi.
-
Wanem we Hileman i mekem taem we ol ami blong hem oli no bin stap kasem sapot, i save stap olsem wan strong eksampol long yumi taem yumi filim se man i mekem rong samting long yumi. Blong leftemap tingting blong gat wan toktok raon long eksampol blong hem, yu save invaetem wan memba blong klas blong i kam, i rere fastaem blong talem sot situesen blong Hileman, mo ol risen from wanem gavman i no lukluk long ol nid blong hem (luk long Alma 58:1–9, 30–37; 61:2–8). Antap long bod, raetem Wanem Hileman i mekem mo Ol nara rod we i stap. Afta, invaetem klas blong luklukgud insaed long Alma 58:1–12 mo 30–37, mo andanit long wanwan heding, raetem wanem Hileman i bin tingting long hem, wanem hem i bin talem, mo wanem hem i bin mekem blong fesem situesen blong hem, mo, long narasaed, wanem nara samting bae hem i save tingting, talem o mekem. ?Wanem nao yumi mekem blong folem eksampol blong Hileman taem yumi filim se man i mekem rong samting agensem yumi, o taem yumi filim se man i no wantem save long yumi?
-
Taem Moronae i bin tokbaot nogud Pahoran long Alma 60, Pahoran i gat joes ia blong harem nogud. Be, hem i talem se hem “i no kros” mo “i glad long hat blong [Moronae] we i gud tumas” (Alma 61:9). Blong helpem ol memba blong klas blong lanem samting aot long eksampol blong Pahoran, yu save askem olgeta blong traem tingting se oli bin askem olgeta blong raetem wan atikol blong wan magasin blong Jos we i lukluk long eksampol blong Pahoran long Alma 61, blong save tij abaot ol wei blong no harem nogud taem ol narawan oli mekem nogud samting agensem yu. Afta, yu save serem ol memba blong klas long ol grup, mo askem olgeta blong ridim Alma 61:3–14 mo raetemdaon sam poen we oli save putum insaed long atikol ia. Advaes blong Elda David A. Bednar we i stap long “Sam Moa Risos” i save help tu.
?Yumi gat responsabiliti blong leftemap olgeta raon long yumi?
-
Moronae i bin raetem se God bae i mekem se Pahoran bae i responsibol long aksen blong hem sapos Pahoran i save se hem i no lukluk long ol nid blong ol ami blong Ol Man blong Nifae. Tingting blong invaetem ol memba blong klas blong ridim Alma 60:7–14 tugeta, mo afta, askem olgeta blong tingting long wan we oli save se hem i stap long nid, mo i filim se oli no wantem save long hem. ?Wanem nao yumi save mekem blong yumi savegud mo stap lukluk long ol nid blong ol narawan? ?Olsem wanem nao ol nara pipol oli lukluk long ol nid blong yu, mo hemia i tekem tu ol givhan brata mo sista blong yumi?
Yumi mas tingbaot Lod, long ol taem blong hadtaem mo long ol gud taem.
-
Ol samting we Ol Man blong Nifae oli bin mekem long tugeta taem ia, ol taem we i bin had mo ol taem we i bin gud (luk long Alma 62:39–41, 48–51,) i soem se yumi save jusum blong putum tingting blong yumi i stap daon taem yumi stap fesem hadtaem o stap gotru long gud taem. Yu save invaetem ol memba blong klas blong ridim ol ves ia mo serem wanem i kam strong long maen blong olgeta. Yu save invaetem olgeta blong toktok raon long ol tingting blong olgeta wetem wan narawan long klas bifo yu askem sam long olgeta blong serem wanem oli tokbaot wetem ful klas.
Stap Leftemap Tingting blong Lanem Samting long Hom
Blong givim insperesen blong oli gat intres long Hileman 1–6, yu save eksplenem long klas se long ol japta ia, Ol Man blong Nifae oli kam nogud mo Ol Man blong Leman, oli kam stret mo gud. Ol rol ia, we oli tanem, i holem ol impoten lesen blong yumi long ol taem blong denja long ol las dei ia.
Sam Moa Risos
Mekem ol pikinini blong yumi oli kam ol pikinini we oli save stanap agensem sin.
Sista Joy D. Jones, Praemeri Jeneral Presiden, i bin serem ol ki poen ia blong resemap “wan jeneresen we i save stanap agensem sin”:
“Blong stat, … yumi mas helpem ol pikinini blong yumi blong save stret, we oli no gat kwestin long hemia, se oli ol boe mo ol gel blong wan Papa long Heven we i gat lav, mo Hem i tingting bigwan long olgeta.
“Nambatu, hem i blong andastanem doktrin blong sakem sin mo hao hem i wan impoten pat blong save stanap agensem sin. Blong save stanap agensem sin i no minim se yu nogat sin, be hem i save minim se yu gohed blong sakem sin, stap lukaot gud, mo gat strong tingting. Maet blong stanap agensem sin i kam olsem wan blesing blong oltaem stanap agensem sin. …
“… Wan nambatri ki blong helpem ol pikinini blong save stanap agensem sin, hem i blong stat taem oli smol nomo, blong putum long maen blong olgeta, ol besik doktrin mo prinsipol blong gospel —stat wetem ol skripja, Ol Toktok blong Bilif, smol buklet ia, Blong Ol Yut Oli Kam Strong, ol singsing blong Praemeri, mo testemoni blong yumiwan—we bae i lidim ol pikinini blong yumi i go long Sevya. …
“ … Blong stap helpem ol pikinini blong andastanem, mekem, mo kipim ol tabu kavenan, hem i wan nara ki. … Blong tijim ol pikinini blong kipim ol smolsmol promes taem oli yang bae i givim paoa long olgeta blong save kipim ol tabu kavenan long laef blong olgeta afta” (“Wan Jeneresen we I Save Stanap Agensem Sin,” Ensign o https://www.ChurchofJesusChrist.org/general-conference/2017/04/a-sin-resistant-generation?lang=bis, Epril 2017).
Olsem Wanem blong stap longwe long fasin blong harem nogud taem man i mekem nogud long yu.
Long mesej blong hem, “And Nothing Shall Offend Them” (Ensign o Liahona, Nov. 2006, 89–92), Elda David A. Bednar i givim kaonsel ia:
-
Yu mas luksave se blong harem nogud taem man i mekem nogud long yu, hem i wan joes. “Blong bilivim se wan man, o wan samting i save mekem yumi filim nogud, kros, harem i soa, o konkon taem oli mekem nogud long yumi, i daonem fridom blong joes blong yumi long wanem i gud mo nogud, mo i tanem yumi i kam ol samting we man i tantanem olbaot. Olsem ol man we i mekem samting, yu mo mi i gat paoa blong tekem aksen, mo jusum olsem wanem blong fesem wan situesen we i no stret o mekem man i harem nogud.”
-
Luk long Sevya. “Sevya i bigfala eksampol blong hao yumi mas mekem samting taem i gat ol situesen o taem we oli mekem yumi harem nogud” [luk long 1 Nifae19:9].
-
I gud blong stap andastanem ol wiknes blong ol narafala man. “Wan long ol bigfala mak blong hamas yumi raep long saed blong spirit, i kamkamaot long wei we yumi fesem ol wiknes, olgeta we oli no gat eksperiens, mo nogud aksen blong ol narawan.”
-
Toktok stret wetem narawan. Sapos wan i talem o mekem wan samting we yu ting se i no stret i spolem man, fas wok i blong no akseptem blong harem nogud, mo afta, toktok long praevet, wetem ones fasin, mo tok stret wetem man o woman ia. Kaen fasin olsem, i invaetem insperesen we i kam long Tabu Spirit, mo i givim spes blong kliarem ol samting we man i no andastanem gud, mo man i andastanem tru tingting blong man.
Stap Kam Antap long Fasin blong Yumi blong Stap Tij
Tekem ol eksperiens insaed long hom. From we hom i senta blong lanem gospel, tingting long hao nao, klasrum eksperiens bae i save tekem samting aot long wanem i stap hapen long hom. I olsem: yu save yusum mo stretem ol aktiviti we oli stap long Kam Folem Mi—Blong Wanwan Man, Woman mo Famli blong yusum long klas blong sapotem skripja stadi blong wanwan man, woman mo famli.