Alma ej kwaļo̧k naan

Katakin Katak ko Rem̧ool, jān Michael T. Malm

Juun 8–14

Alma 8–12

Jisōs Kraist Enaaj Itok im Lo̧mo̧o̧ren Armej ro An

Jino m̧aanjabpopo eo am̧ n̄an katakin jān riit Alma 8-12. Innām etale laajrak in n̄an ļōmņak ko jet me renaaj kōketak ro uwaan kūlaaj eo n̄an kwaļo̧k ta rekar ekkatak ilo katak eo aer.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Leļo̧k n̄an ro uwaan kūlaaj eo jejjo minit n̄an kejōkļo̧kjeņ kōn aer katak ko aer ippāer make im an baam̧le ko aer jeje ko rekwojarjar wiik in. Ewi wāween an kar katak eo aer kareel kālet ko aer rekar kōm̧m̧ani ilo wiik eo? Kajjitōk ippān jejjo ro uwaan kūlaaj eo bwe ren kwaļo̧k ļōmņak ko aer.

pija ej bōk jikin ekkatak

Katakin jKatak ko

Alma 8

Kijejeto ko ad n̄an kwaļo̧k kōn gospel eo ej aikuj ad kijejeto im kijenmej.

• Elōn̄ armej ro rej loe an pen kwaļo̧k gospel eo—eļaptata n̄e rekar en̄jake an armej jab eo̧ron̄ er, āinwōt kar Alma. Waanjon̄ak eo an Alma ekar jipan̄ er lōke Anij im lo peran n̄an wōnm̧aanļo̧k im kwaļo̧k naan in kam̧ool ko aer ippān ro jet. Ļōmņak kōn kajjitōk kein n̄an ekōnono kaki: Ta eo jej ekkatak jān ennaan eo an enjeļ eo n̄an Alma ilo Alma 8:15? Ak paaktokin Alma n̄an ennaan eo, loe ilo Alma 8:14–23, ej im̧we kōj n̄an wōnm̧aanļo̧k wōt im kwaļo̧k gospel eo men̄e armej rejjab kōņaan ron̄jake? Ta naan in kapilōk eo jenaaj leļo̧k n̄an juon eo ekar kajjieon̄ in kwaļo̧k gospel eo ak armej rekar jab eo̧ron̄ e? Naan in kapilōk eo an Elder Jeffrey R. Holland ilo “Kein Jipan̄ ko Jet” emaron̄ jipan̄ ilo oktaktok in.

• Bwebwenato eo an Alma im Amulek ej kōmeļeļeiki wāween an aorōk kijejeto ko an membōr ro n̄an jerbal in mijenede. Ta eo ro uwaan kūlaaj eo rej ekkatak jān Alma 8:19–30 kōn jem̧jerā eo ad ikōtaan membōr ro im mijenede ro rej jerbal aolep raan? (barāinwōt lale Alma 10:1–12).

  ruo baam̧le rej ioon doon

  Kwaļo̧k gospel eo ippān ro jej iakwe er emaron̄ erom̧ juon en̄jake elan̄lōn̄.

Alma 9:18–30

Anij ej ekajete ajri ro Nejin ekkar n̄an meram im jeļāļo̧kjeņ ko ewōr ippāer.

• Ewōr juon kakkōl eļap ilo eoon kein n̄an aolep ro uwaan Kabun̄ eo—ke jekar bōk meram im jeļāļo̧kjeņ eo, kōtmene eo ad ekar n̄an kaorōke, naajdiki, mour kake, im kōjerbale n̄an kōjeraam̧m̧an ro jet. N̄an jipan̄ ro uwaan kūlaaj eo etale kōtmāne in, kwoj aikuj kajjitōk ippāer n̄an riiti katak ko an Alma ilo Alma 9:18–30 im kwaļo̧k ennaan ko rej loe kōn eddo ko ewōr ippāer kōn ta eo rej jeļā. Etke emaron̄ wōr kakkure eļapļo̧k n̄e jej jerawiwi ņae meram eo? Leļo̧k iien n̄an an ro uwaan kūlaaj eo kejōkļo̧kjeņ kōn ta eo remaron̄ kōm̧m̧ane em̧ool ļo̧k n̄an meram im jeļāļo̧kjeņ eo rekar bōke. Komaron̄ kajjitōk bwe ren riiti Katak im Bujen ko 50:24 ilo tōre eo rej ļōmņak.

Alma 11–12

Karōk eo an Anij ej juon karōk in pinmuur.

• Komaron̄ jino juon iien ekōnono kōn katakin in ilo am̧ kajjitōk ippān juon uwaan kūlaaj eo bwe en jin̄aiki juon pija in karōk in pinmuur eo ioon boot eo. Innām remaron̄ ajije jākjen ko an Alma 11–12 ilubwilijin ro uwaan kūlaaj eo im kajjitōk ippāer n̄an pukot m̧ool ko me renaaj kobaikļo̧k n̄an pija eo. N̄an waanjon̄ak, ta eo karōk eo an Anij ej pinmuuri kōj jāne? (lale Alma 11:38–45). Jeļā kōn m̧ool kein kōn karōk in pinmuur eo, ewi wāween an kōjeraam̧m̧an mour ko ad?

• N̄an jipan̄ ro uwaan kūlaaj eo kwaļo̧k ta eo Alma 11–12 ej katakin er kōn karōk in pinmuur eo, komaron̄ je laajrak in naan kein ilōn̄ ioon boot eo: Wōtļo̧k eo, Pinmuur eo, Ukweļo̧k, Mej, Jerkakpeje, im Ekajet. Ro uwaan kūlaaj eo remaron̄ kālet juon iaan unin kōnono kein im etale Alma 11–12 kōn m̧ool ko rej ekkatak kake. Kajjitōk ippān ro uwaan kūlaaj eo bwe ren je m̧ool ko rej loi, ippān juon eoon jān jeje ko rekwojarjar, ium̧win naan eo ilōn̄tata ekkar ioon boot eo. Āinwōt juon kūlaaj, ekōnono kōn wāween jeļā m̧ool kein ej kareel mour ko ad im jokālet ko ad jej kōm̧m̧ani.

• Ro uwaan kūlaaj eo am̧ remaron̄ in jeraam̧m̧an jān juon iien ekōnono ej pedped wōt ioon Alma 12:31–32, ijo Alma ekar katakin bwe ālkin Wōtlo̧k eo, Anij ekar leļo̧k n̄an Adam im Iv kien ko—ak ālkin wōt an katakin er karōk eo An. Jeļā kōn karōk eo ewi wāween an jelet wāween ad lo ak en̄jake kōn kien ko? Bōlen komaron̄ kōnono kōn jejjo kien ko; n̄an waanjon̄ak, jeļā kōn karōk eo an Anij ewi wāween an jipan̄ kōj kōjparok kwojarjar eo an raan in Jabōt ak pokake kien erreo?

• Jet uwaan kūlaaj eo emaron̄ in wōr aer kajjitōk kōn Alma 11:26–39, eo me Amulek ekar ba bwe ewōr wōt juon Anij. Laajrak in eoon kein rej kameejļo̧k ewi wāween an ro uwaan Doulul in Anij “juon Anij” ilo aer armej ro rej jenolo̧k jān doon: Jon 17:20–23; 2 Nipai 31:21; im  3 Nipai 19:29. Naan in kapilōk eo an Elder Jeffrey R. Holland emaron̄ barāinwōt jipan̄: “Kōm̧ij tōmak Er rej juon ilo aolep wāween ko rem̧m̧an im jekje eo an indeeo ijjelo̧kin tōmak Er bwe rej jilu armej ro rej koba ilo juon kajoor” (“The Only True God and Jesus Christ Whom Thou Hast Sent,” Ensign ak Liahona, Nov. 2007, 40).

Alma 12:9–14

Eļan̄n̄e jeban kapen buruō, jemaron̄ bōk eļapļo̧k naan an Anij.

• Juon iaan ennaan ko Alma im Amulak rekar katakin jet iien ekar ewi wāween an jekjek in an būruwōd kareel ewi jon̄an m̧ool eo jej bōk jān Irooj. N̄an jipan̄ ro uwaan kūlaaj eo loe m̧ool ko an pedped in katak eo, komaron̄ kajjitōk ippāer n̄an riiti Alma 12:9–14 ilo ruo iaan ļo̧k ruo ak kūrub ko reddik im ekōnono kōn tōprak in wōr juon bōro epen. (Komaron̄ barāinwōt kajjitōk ippāer n̄an riiti Alma 8:9–11; 9:5, 30–31; im 10:6, 25.) Ta meļeļe n̄an bōk juon bōro emera? (lale Jeremaia 24:7; Alma 16:16; Hilamōn 3:35). Ewi wāween an juon bōro epidodo jipan̄ kōj em̧m̧anļo̧k ad meļeļe kōn naan eo an Anij?

• Alma ekar katakin bwe n̄e jej kapen būruwōd, jej bōk “ijo edikļo̧k” in naan eo an Anij (Alma 12:10). Bōlen ro uwaan kūlaaj eo remaron̄ kwaļo̧k en̄jake ko jān jeje ko rekwojarjar me rej kōmeļeļeiki pedped in. Ewi wāween an Irooj kapidodoikļo̧k būruwōd bwe jen maron̄ wōnm̧aanļo̧k im ekkatak eļapo̧k jān E? Ta en̄jake ko ippem make jemaron̄ kwaļo̧ki?

• N̄an jipan̄ ro uwaan kūlaaj eo meļeļe ta meļeļein wōr juon bōro epidodo, komaron̄ kwaļo̧k jet iaan waanjon̄ak ko rej ellaajrak ilo “Kein Jipan̄ ko Jet.”

pija ej bōk jikin ekkatak

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti Alma 13–16 wiik in, komaron̄ ba n̄an er bwe renaaj lo wāween an naan ko an Alma kar kūrm̧ool ilo mour ko a Zeezrom im armej in Ammōnaia ro.

pija ej bōk jikin kein jipan̄

Kein Jipan̄ ko Jet

Bōk juon peran n̄an jutak.

Elder Jeffrey R. Holland ekar leļo̧k laajrak in naan in rōjan̄ n̄an ro rej em̧m̧an aer kōm̧m̧an n̄an er kōn aer kwaļo̧k ak jojom̧ar e gospel eo:

“Eļan̄n̄e kwojan̄in, kwonaaj juon raan loe aer kūr eok make n̄an jojomare tōmak eo am̧ ak bōlen aaet niknik kōn jet kakkure ko an juon make kōnke kwoj juon uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata. Iien rōt kein naaj aikuji jim̧or peran im m̧wil ko rem̧m̧an kōn ijo kūnaam̧.

“… Komaron̄ kajjitōk ippam make eļan̄n̄e ewōr tokjān n̄an bōk m̧wil eperan im jutak ilo high school ak etal n̄an juon mijen bwe kwōn bōk mōņōņō eo eļap kōn tōmak eo am̧ ak n̄an deploke elōn̄ men ko ilo mour in im rej kajirere kōn mour ilo kijejeto an ro rej tōmak. Aaet, ewōr tokjān. …

“Ro m̧ōtta, eļaptata jodikdik ro m̧ōtta, bōk juon bōro. Iakwe eo erreo an Kraist ej itok jān jimwe eo em̧ool emaron̄ ukōt laļ in. …

“Kwon kajoor. Mour kōn gospel eo ilo tiljek jekdoon n̄e ro ipelakūm rejjab. Jojomare tōmak ko am̧ kōn m̧ōņōņō im kōn tūriamo̧, ak jojomari” (“Wōņāān eo—im Kōjeram̧m̧an ko—an Rikaļooran,” Ensign ak Kweilo̧k eo Eļap, Māe 2014, 6–9).

Būruweer rekar pidodo.

Laajrak in kōnono kein jān kweilo̧k eo eļap rej letok waanjon̄ak ko kōn armej ro būruweer rekar pidodo jān Irooj:

• Bwebwenato eo an baam̧le eo an Hatfield ilo ennaan eo an Būreejtōn Russell M. Nelson “Oņāān Kajoor in Priesthood eo” (Ensign ak Liahona, Māe 2016, 66–67).

• Bwebwenato eo an Harold Gallacher ilo ennaan eo an Būreejtōn Thomas S. Monson “The Sacred Call of Service” (Ensign ak Liahona, May 2005, 55).

• Bwebwenato eo an David ilo ennaan eo an Būreejtōn Dieter F. Uchtdorf “Katak jān Alma im Amulek” (Ensign ak Liahona, Nob. 2016, 73–74).

Kōkōm̧anm̧anļo̧k Ad Katakin

Reilo̧k kōn Māj ko Mejān Anij Kajjieon̄ n̄an lale ro uwaan kūlaaj eo am̧ āinwōt an Anij lale er, im Jetōb eo enaaj kwaļo̧k n̄an kwe tokjen ekwojarjar im jibadbad eo aer. Ilo am̧ kōm̧m̧ane menin, kwonaaj tōl ilo kijejeto eo am̧ n̄an jipan̄ er (lale Teaching in the Savior’s Way, 6).