“Eprōļ 13–19. Mosaia 1–3: ‘Obrak kōn Iakwe n̄an Anij im Armej Otemjeļo̧k,’” Itok, Ļoor Eō—N̄an Jabōt Jikuuļ: Bok in Mormon 2020 (2020)
“Eprōļ 13–19. Mosaia 1–3,” Itok, Ļoor Eō—N̄an Jabōt Jikuuļ: 2020
Minerva K. Teichert (1888–1976), King Benjamin’s Farewell Address, 1935, oil on masonite, 36 x 48 inches. Brigham Young University of Art
Eprōļ 13–19.
Mosaia 1–3
“Obrak kōn Iakwe n̄an Anij im Armej Otemjeļo̧k”
Elōn̄ pedped in katak ko ilo Mosaia 1–3 ko me komaron̄ ekōnono kaki ippān kūlaaj eo am̧. Jar kōn tōl n̄an jeļā ewi wōt pedped in katak eo eaorōk n̄an ro kwoj katakin.
Je En̄jake ko Rej Im̧we Eok
Kajjitōk bwe ren Kwaļo̧k
N̄an leļo̧k n̄an ro uwaan kūlaaj eo juon iien aer kōnono kōn aer ekkatak ippāer make ak ekkatak eo an baam̧le jān Mosaia 1–3, kajjitōk ippāer n̄an kwaļo̧k ippān bar juon armej eoon eo rekar loe im ej im̧we er.
Katakin Katak ko
Bōk naan eo an Anij ej aikuji ad m̧aanjabpopo.
-
Juon wāween n̄an jino juon ekōnono kōn m̧aanjabpopo n̄an bōk naan eo an Anij emaron̄ erom̧ n̄an kōnono kōn jekjek ko an m̧aanjabpopo—ak jab m̧aanjabpopo—n̄an men ko jet. N̄an waanjon̄ak, ro uwaan kūlaaj eo remaron̄ in kwaļo̧k en̄jake ko aer kōn wāween aer kōpooj er ak jabwe m̧aanjabpopo ej jelet juon aer en̄jake ilo jikuuļ ak jerbal ak m̧akūtkūt ko jet. Ālkin aer kwaļo̧k, komaron̄ in kajjitōk jimettan in kūlaaj eo n̄an riiti Mosaia 2:1–9, pukot men ko armej ro an Kiin̄ Benjamin rekar kōpooji n̄an bōk naan ko an Anij. Jimettan eo juon emaron̄ pukot ejja eoon ko wōt, lali ta ko Kiin̄ Benjamin ekar kōm̧m̧ani me rej kwaļo̧k ewi wāween an en̄jake kōn naan eo an Anij im aikuj eo n̄an kwaļo̧ke. Innām kajjitōk ippān kajjojo kūrub n̄an kwaļo̧k ļōmņak ko aer. Ta eo jemaron̄ ekkatak jān eoon kein me remaron̄ jipan̄ kōj bōk naan ko an Anij?
N̄e jej jerbal n̄an ro jet, jej barāinwōt jerbal n̄an Anij.
-
Kiin̄ Benjamin ekar juon waanjon̄ak in rijerbal n̄an Anij im n̄an ro ipeļaakin. Ta eo me ro uwaan kūlaaj eo rej ekkatak jān e n̄an jipan̄ er ilo kijejeto ko aer n̄an jerbal n̄an ro jet? Ļōmņak in jino ekōnono eo ilo am̧ kajjitōk ippān ro uwaan kūlaaj eo n̄an kōlaajrake men ko rej bōbrae armej rej jelm̧ae ilo aer jerbal n̄an ro jet—āinwōt un ko jejjab jerbal ak un ko jerbal ko rejjab jipan̄ āinwōt aer aikuj in kar. Innām er remaron̄ ekkatak Mosaia 2:10–26 im kōm̧m̧ane juon laajrak in m̧ool ko Kiin̄ Benjamin ekar katakin kōn jerbal n̄an ro jet me emaron̄ jipan̄ er anjo̧ jān men ko rej bōbrae rekar kōllaajraki. Ta eo kajjojo armej im baam̧le ko remaron̄ kōm̧m̧ane n̄an mijōk wōt jerbal ilo aolep iien in mour ko aer? Ļōmņak in kwaļo̧k bwebwenato in jān Thomas S. Monson ilo “Kein Jipan̄ ko Jet” āinwōt juon ļōmņak.
-
Juon al āinwōt “A Poor Wayfaring Man of Grief” (Hymns, no. 29) ak pija in alooj āinwōt “The Old Shoemaker” (ChurchofJesusChrist.org) emaron̄ kapenļo̧k ennaan eo loe ilo Mosaia 2:17—n̄e jej jerbal n̄an ro jet, jej jerbal wōt n̄an Anij. Ewi wāween am̧ maron̄ kōjerbal kain kein jipan̄ ko n̄an kapenļo̧k ennaan eo an Kiin̄ Benjamin? Bōlen ro uwaan kūlaaj eo remaron̄ in kwaļo̧k en̄jake ko ewōr ippāer ke rekar jerbal n̄an ro jet ak bōk jerbal āinwōt an Kraist jān juon armej. Āinwōt m̧ōttan wōt ekōnono eo am̧, ļōmņak in kwaļo̧k kout in jān Būreejtōn Henry B. Eyring: “N̄e jej leļo̧k jipan̄ n̄an jabdewōt armej, Rilo̧mo̧o̧r eo ej en̄jake āinwōt n̄e jekar pukotļo̧k E n̄an jipan̄ E” (“Is Not This the Fast That I Have Chosen?” Ensign ak Kweilo̧k eo Eļap, Māe 2015, 22). Etke kwoj ļōmņak jej jerbal n̄an Anij n̄e jej jerbal n̄an armej ro jet?
Jerbal n̄an ro jet ej jipan̄ kōj en̄jake iakwe eo an Anij.
Lem̧ōņōņō ej itok jān kōjparok kien ko an Anij.
-
N̄an jipan̄ ro uwaan kūlaaj eo “ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij,” emaron̄ jipan̄ jino kōn juon meļeļe in lem̧ōņōņō. Ewi wāween an ro uwaan kūlaaj eo kōmeļeļeiki lem̧ōņōņō eo ej itok jān pokake Anij? Bōlen remaron̄ pijaik ilo kōļmenļo̧kjeņ bwe ewōr juon m̧ōttāer eo ej ba bwe ej m̧ōņōņō ilo an jab kōjparok kien ko. Kajjitōk ippāer n̄an riiti Mosaia 2:28–41 im ekōnono kōn wāween aer maron̄ jipan̄ eo m̧ōttāer meļeļe oktak ko ikōtaan m̧ōņōņō ko an laļ in im m̧ōņōņō eo ejjeļo̧k jem̧ļo̧kin. Ta en̄jake ko ak waanjon̄ak ko jān mour ko an armej ro uwaan kūlaaj eo remaron̄ kwaļo̧k ippān ro jet eo me ej waanjon̄ak in lem̧ōņōņō eo ejjeļo̧k jem̧ļo̧kin?
Lo̧mo̧o̧r ej itok wōt “kōn wōt etan Kraist, Irooj.”
-
Ennaan eo an Kiin̄ Benjamin ej kitbuuj kanaan ko rekajoor im remeļeļe kōn ļotak, jerbal in karejar, im katok in pinmuur eo an Jisōs Kraist. Komaron̄ kajjitōk ippān ro uwaan kūlaaj eo n̄an kwaļo̧k eoon kein jān Mosaia 3:1–20 me eļaptata aer im̧we er im jipan̄ er meļeļe Rilo̧mo̧o̧r eo im mijen eo An. Kajjitōk ippāer n̄an kwaļo̧k etke eoon kein rej im̧we er.
-
Kadkad in Bok in Mormon eo ej katakin bwe bok eo ej “ļamļame tok karōk im lo̧mo̧o̧r eo.” N̄an jipan̄ ro uwaan kūlaaj eo loe wāween an kwaļo̧k eo an Kiin̄ Benjamin jipan̄ kōttōbrak jibadbad in an Bok in Mormon eo, komaron̄ je ioon boot eo Jisōs Kraist ej Kōm̧m̧an bwe Lo̧mo̧o̧r en Pidodo. Ro uwaan kūlaaj eo remaron̄ in etale Mosaia 3:1–20, innām kwe ak er remaron̄ in kōllaajrake ioon boot eo m̧ool ko rej ekkatak kōn karōk in lo̧mo̧o̧r eo. Kajjitōk ippān ro uwaan kūlaaj eo ta eo rej ekkatak kōn wāween an Jisōs Kraist kōm̧m̧ane bwe karōk in lo̧mo̧o̧r eo en pidodo. Innām leļo̧k n̄an ro uwaan kūlaaj eo iien n̄an etale Mosaia 3:18–19 innām kwaļo̧k ta eo jej aikuj in kōm̧m̧ane n̄an erom̧ armej ro rekwojarjar im bōk lo̧mo̧o̧r. Ewi wāween an Pinmuur eo an Jisōs Kraist jipan̄ kōj kōtōbbak menin? Kajjitōk ippān ro uwaan kūlaaj eo bwe ren kwaļo̧k en̄jake ko aer kōn eddo eo an Rilo̧mo̧o̧r eo ilo karōk in lo̧mo̧o̧r eo.
Kōketak Ekkatak ilo M̧weo
Ekar lōn̄ ke iaan ro uwaan kūlaaj eo am̧ ekar wōr juon an en̄jake ke juon katak kar ekkatak kake ilo juon kōnono, katak, ak eoon ekar ukōt er? Ba n̄an er bwe ilo Mosaia 4–6 renaaj riit kōn wāween eo eļap ekar jelet m̧ool ko kar katakin jān Kiin̄ Benjamin ippān armej ro an.
Kein Jipan̄ ko jet
Jerbal n̄an ro jet.
Būreejtōn Thomas S. Monson eaar ba:
“Jejjo iiō remootļo̧k ikar riiti juon bwebwenato kar jeje jān Jack McConnell, MD. Ekar rūttoļo̧k ilo bat ko ilo turōk turilik in Virginia ilo United States āinwōt juon iaan jiljilimjuon ajri nejin juon rūkaki in Methodist im juon m̧am̧a ej pād m̧weo im lale. Jekjek ko aer rekar lukkuun ettā. Ekar keememej menin ke ej juon ajri, aolep raan ilo an baam̧le eo an jijet ipeļaakin juon tebōļ in kōjota, jemān enej kajjitōk ippān kajjojo iaer n̄an uwaak, ‘Im ta eo kwaar kōm̧m̧an n̄an juon armej rainin?’ Ajri ro rekar kwaļo̧k n̄an kōm̧m̧ane juon kajjitōk aolep raan bwe ren maron̄ riboot n̄an jemāer bwe rekar jipan̄ juon armej. Dr. McConnell ej ņaetan kamminene in ej juon bwebwenato elukkuun aorōk an jemān eo me kōtmāne im naan ko rekar im̧we e im ajri ro nejin n̄an jipan̄ ro jet ilo aolepān mour ko aer. Ilo aer rūttoļo̧k im kekemo̧o̧j, aer ikdeleel n̄an leļo̧k jipan̄ ekar oktak n̄an juon ikdeleel ilowa n̄an jipan̄ ro jet.
“Ijjelo̧kin jerbal in taktō eo an Dr. McConnell … ekar ejaake juon doulul ņaetan Volunteers in Medicine, eo ej leļo̧k an taktō em̧ōj aer kakkije jān jerbal juon iien aer jerbal in jipan̄ ilo jikin taktō ko ejjeļo̧k wōnāer jerbal n̄an rijerbal eo ejjeļo̧k aer joortoklik. Dr. McConnell ekar ba iien kakkije eo an jān ke ekar kakkije jān jerbal ekar ‘ukote n̄an 60 awa in jerbal ko ilo wiik ko jab bōk wōņāān jān jerbal, ak kajoor eo [an] ekar ļapļo̧k im ekar juburuwōn kōn mour eo [an] jān kar m̧oktak.’ [Jack McConnell, “Im Ta eo Kwaar Kōm̧m̧ane n̄an Juon Armej Rainin?” Newsweek, June 18, 2001, 13.] …
“Aaet, kōj aolep jejjab maron̄ āinwōt Dr. McConnells, ejaake jikin taktō ko n̄an jipan̄ ro rejaramōļ; ijoke, aikuj ko an ro jet rej pād, im kōj kajjojo remaron̄ in kōm̧m̧ane juon men n̄an jipan̄ juon armej. …
‟Ro jeiū im jatū, elōn̄ wōt ro raikuji kōj n̄an ad keememej er, rejan̄ ko ad, jipan̄ eo ad, kaenōm̧m̧an eo ad, ad jouj— eļan̄n̄e nukud er, ro jerad, ro repaake kōj, ak rumaejet. Kōj jej pein Irooj ijin ioon laļ in, kōn kean̄ n̄an jerbal im n̄an lijur ro Nejin. E ej kōjatdikdik ioodwōj kajjojo. … Jemaron̄ kajjitōk ippād make kajjitōk in eo kar iakiakweik Dr. Jack McConnell im ļaddik ro im leddik ro jein im jatin kajjojo jota ilo iien kōjota eo: “Ta eo ikar kōm̧m̧ane n̄an juon armej rainin?’”” (“What Have I Done for Someone Today?” Ensign ak Liahona, Nov. 2009, 84–87).
Kōkōm̧anm̧anļo̧k Ad Katakin
Erom̧ juon kein jerbal an Jetōb eo. Kōttōbar eo am̧ āinwōt juon rūkaki ejjab n̄an kōm̧m̧ane juon kwaļo̧k ak n̄an jipan̄ ro jet bōk kareel eo an Jetōb Kwojarjar—rūkaki eo em̧ool. (Lale Teaching in the Savior’s Way, 10.)