Հոբի դատաստանները, ըստ Ջոզեֆ Բրիքի

Օգոստոսի 1-7-ը

Հոբ 1–3, 12–14, 19, 21–24, 38–40, 42

«Ես նորան եմ յուսալու»

Հոբի պատմությունն ուսումնասիրելիս ինչ ուղերձներ գտաք ձեր կյանքի համար: Ըստ ձեզ, այդ ուղերձներից ո՞րը պետք է լսեն ձեր ուսուցանած երեխաները:

Գրի առեք ձեր տպավորությունները

Հրավիրեք կիսվել

Երեխաներին ցույց տվեք Հոբի նկարը (տես այս շաբաթվա համառոտ շարադրանքը Եկ, հետևիր ինձ. Անհատների և ընտանիքների համար ձեռնարկում): Հարցրեք երեխաներին, թե ըստ նրանց, ինչ կարող է զգալ նկարում պատկերված տղամարդը: Հրավիրեք նրանց կիսվել մեկ այլ բանով, ինչ նրանք գիտեն Հոբի մասին:

Ուսուցանեք վարդապետությունը. կրտսեր խմբի երեխաներ

Հոբ 1–2, 13.15

Երկնային Հայրը և Հիսուս Քրիստոսը կօգնեն ինձ դժվարին ժամանակներում, եթե ես հավատք ունենամ նրանց հանդեպ

Հոբը վստահեց Աստծուն և կարողացավ հավատարիմ մնալ նույնիսկ այն ժամանակ, երբ բախվեց շատ դժվար փորձությունների: Հոբի պատմությունը կարող է օգնել երեխաներին ամրապնդել իրենց հավատը Երկնային Հոր և Հիսուս Քրիստոսի հանդեպ, որպեսզի նրանք պատրաստ լինեն դիմակայել իրենց սեփական դժվարին փորձություններին:

Հնարավոր վարժություններ

• Հրավիրեք երեխաներին կիսվել Հոբի մասին իրենց գիտելիքներով և օգնեք նրանց հասկանալ, թե ինչ պատահեց նրան (տես Հոբ 1–2, «Հոբ» Հին կտակարանի պատմություններ): Հարցրեք երեխաներին, թե ինչ կզգային, եթե լինեին Հոբի փոխարեն: Ո՞վ կարող է օգնել մեզ, երբ տխուր բաներ են պատահում մեր կյանքում: Ցույց տվեք Հիսուս Քրիստոսի նկարը և բացատրեք, որ Հոբի հավատը Տիրոջ հանդեպ օգնեց նրան իր փորձությունների ժամանակ (տես Հոբ 1.21):

• Երեխաների համար կարդացեք Հոբի խոսքերը Հոբ 13.15-ում. «Ես նորան եմ յուսալու»: Օգնեք երեխաներին հասկանալ, թե ինչ է նշանակում վստահել Աստծուն, նրանց հետ խոսեք այլ մարդկանց մասին, ում իրենք վստահում են: Օրինակ՝ ի՞նչ մենք ենք վստահում, որ մեր ծնողներն անեն: Ի՞նչ ենք մենք վստահում, որ մեր ուսուցիչներն անեն: Ի՞նչ ենք վստահում, որ Երկնային Հայրն ու Հիսուս Քրիստոսն անեն: Արտահայտեք ձեր վստահությունը Երկնային Հոր և Հիսուս Քրիստոսի հանդեպ, և օգնեք երեխաներին մտածել, թե ինչպես կարող են ցույց տալ, որ նրանք սիրում և վստահում են Նրանց:

Հոբ 19.25

Հիսուս Քրիստոսն իմ Քավիչն է։

Հոբը կարողացավ դիմանալ իր փորձություններին և տառապանքներին Տիրոջ հանդեպ ունեցած հավատքի շնորհիվ: Ինչպե՞ս կօգնեք երեխաներին կերտել իրենց հավատը Հիսուս Քրիստոսի՝ մեր Քավիչի հանդեպ

Հնարավոր վարժություններ

• Ցուցադրեք Հիսուսի նկարը խաչի վրա կամ գերեզմանում (տես Ավետարանի նկարների գիրք, հ. 57, 58): Հրավիրեք երեխաներին բացատրել, թե ինչ է տեղի ունենում նկարում: Երեխաների համար կարդացեք Հոբի վկայությունը Հոբ 19.25-ում: Ցուցադրեք հարություն առած Փրկիչի նկարը (տես Ավետարանի նկարների գիրք, հ. 59, 60, տես նաև այս շաբաթվա գործնական աշխատանքի էջը) և վկայեք, որ Հիսուս Քրիստոսը հարություն առավ և ապրում է այսօր: Ինչո՞ւ ենք մենք երախտապարտ, որ Հիսուս Քրիստոսը հարություն առավ:

• Ցույց տվեք Հոբի նկարը և բացատրեք, որ Հոբը ցավերի մեջ էր, քանի որ նրա մաշկը պատված էր վերքերով: Նա կորցրել էր տունը, իսկ երեխաները մահացել էին: Բայց Հոբը գիտեր մի շատ կարևոր բան, որը նրան մխիթարում էր: Կարդացեք Հոբ 19.25-ը, և հարցրեք երեխաներին, թե ինչ գիտեր Հոբը: Կիսվեք երեխաների հետ, թե ինչպես կարող եք իմանալ, որ Հիսուս Քրիստոսն ապրում է, և հրավիրեք նրանց կիսվել Նրա մասին իրենց վկայություններով:

  

  Հոբը, ըստ Գարի Լ․ Քափ

• Հանձնարարեք երեխաներին գունավորել այս շաբաթվա գործնական աշխատանքի էջը: Մինչ նրանք գունավորում են, երգեք որևէ երգ Հիսուս Քրիստոսի Հարության մասին, օրինակ՝ «Did Jesus Really Live Again?» կամ «Հիսուս հարյավ» (Children’s Songbook, 64, 55): Խնդրեք նրանց կիսվել, թե ինչպես են նրանք վերաբերվում Հիսուսին, և օգնեք նրանց հասկանալ, որ մենք կարող ենք լավ զգացմունքներ ունենալ Սուրբ Հոգուց, որոնք կօգնեն մեզ իմանալ, որ Հիսուս Քրիստոսն իրական է:

Ուսուցանեք վարդապետությունը. ավագ խմբի երեխաներ

Հոբ 1–2, 12, 19

Երկնային Հայրը և Հիսուս Քրիստոսը կօգնեն ինձ հաղթահարել իմ դժվարությունները, եթե ես հավատք ունենամ նրանց հանդեպ

Բոլորն էլ դժվար օրեր են ունենում, իսկ որոշ մարդկանց փորձությունները երկար են տևում: Հոբի հավատը առ Աստված աջակցեց նրան իր փորձությունների ընթացքում: Մտածեք, թե նրա պատմությունն ինչպես կարող է օգնել երեխաներին կառուցել իրենց հավատը Երկնային Հոր և Հիսուս Քրիստոսի հանդեպ, որպեսզի նրանք կարողանան դիմակայել իրենց փորձություններին՝ այժմ և ապագայում:

Հնարավոր վարժություններ

• Թող երեխաները կիսվեն Հոբի պատմության մասին իրենց իմացածով: Ինչպիսի՞ մարդ էր նա: Ի՞նչ պատահեց նրա հետ։ Նա ինչպե՞ս արձագանքեց իր մարտահրավերներին: Ուղղորդեք նրանց հետևյալ հատվածները՝ Հոբ 1–2 որպեսզի օգնեք նրանց պատմել պատմությունը (տես Հոբ 1.1, 13–22, 2.7–10, տես նաև «Հոբ» Հին Կտակարանի պատմություններ): Հրավիրեք երեխաներին կիսվել, թե ըստ նրանց, ո՞րն է Հոբի պատմության հիմնական ուղերձը:

• Ցուցադրեք մի քանի նկարներ, որտեղ Հիսուս Քրիստոսը շփվում է ուրիշների հետ, և հարցրեք երեխաներին, թե ըստ նրանց, այս նկարները ինչ են սովորեցնում մեզ այն մասին, թե ով է Հիսուս Քրիստոսը և ինչպիսին է Նա: Ուրիշ ի՞նչ գիտենք Նրա մասին: Հրավիրեք երեխաներին կարդալ հետևյալ հատվածներից մի քանիսը՝ պարզելով, թե Հոբը ինչ գիտեր Տիրոջ մասին. Հոբ 12.10, 13, 16, 19.25–27; Ինչո՞ւ է կարևոր իմանալ այս ամենը Փրկիչի մասին:

• Խնդրեք երեխաներին կարդալ Հոբ 19.14–19-ը, և հարցրեք նրանց, թե ըստ այս հատվածների, մարդիկ ինչպես էին վերաբերվում Հոբին: Մենք ինչպե՞ս կզգայինք, եթե դա պատահեր մեզ հետ: Հանձնարարեք երեխաներին կարդալ Հոբ 19.23–27-ը՝ պարզելով, թե ինչպես է Հոբը սփոփանք գտել այս իրավիճակում: Ի՞նչ են այս հատվածներն ուսուցանում մեզ Փրկիչի մասին: Ինչո՞ւ է կարևոր իմանալ, որ Նա ապրում է և սիրում է մեզ (տես Հովհաննես 17.3):

• Միասին երգեք որևէ երգ, որը վկայում է Հիսուս Քրիստոսի մասին, օրինակ՝ «Գիտեմ ապրում է Փրկիչն իմ» (Հիմներ և մանկական երգեր, հ. 38)։ Ի՞նչ է հուշում երգը այն մասին, թե ինչու է կարևոր վկայություն ունենալ, որ Հիսուս Քրիստոսն ապրում է: Ասեք երեխաներին, թե ինչպես գիտեք, որ Փրկիչն ապրում է, և ինչու եք շնորհակալ այդ գիտելիքի համար: Հրավիրեք նրանց նույնպես կիսվել իրենց զգացմունքներով և վկայություններով։

Հոբ 19.13–19, 22.5

Լավ ընկերները բարձրացնում և խրախուսում են միմյանց:

Երբ Հոբը մաքառումների մեջ էր, նրա ընկերներն ասացին, որ Աստված պատժում է նրան, քանի որ նա մեղք էր գործել: Այս պատմությունը կարող է օգնել ձեզ երեխաներին սովորեցնել, թե ինչպես ավելի լավ ձևով պատասխանել, երբ որևէ ընկերը դժվարություններ է ունենում (տես Հոբ 16.1–5):

Հնարավոր վարժություններ

• Խնդրեք երեխաներին վերանայել այն ծանր փորձությունները, որոնք պատահեցին Հոբի հետ (տես Հոբ 1.13–19, 2.7): Միասին կարդացեք Հոբ 19.14, 19-ը, փնտրելով, թե Հոբի ընկերներն ինչպես արձագանքեցին նրա փորձություններին (տես նաև Հոբ 22.1–5): Հրավիրեք երեխաներին պատկերացնել, որ իրենք Հոբի ընկերներն են: Ինչպե՞ս կփորձեն օգնել նրան: Խրախուսեք նրանց մտածել մի ընկերոջ մասին, որը, գուցե, դժվարին փորձությունների մեջ է, և ծրագրել մի բան, որով կարող են իրենց ընկերոջը սեր և աջակցություն ցուցաբերել:

• Խնդրեք երեխաներին թվարկել լավ ընկերոջ որոշ հատկություններ և նշեն այդ հատկություններն ունեցող որևէ ընկերոջ: Ցուցադրեք Հիսուս Քրիստոսի նկարը: Ի՞նչ ուղիներով է Հիսուսը լավ ընկեր մեզանից յուրաքանչյուրի համար: Մենք ինչպե՞ս կարող ենք հետևել Նրա օրինակին:

Խրախուսեք տնային ուսումնասիրությունը

Հրավիրեք երեխաներին կիսվել ընտանիքի անդամի կամ ընկերոջ հետ մի եղանակով, որով Երկնային Հայրը և Հիսուս Քրիստոսը կարող են օգնել նրանց, երբ անցնում են դժվար ժամանակների միջով:

Բարելավել մեր ուսուցումը

Վկայեք խոստացված օրհնությունների մասին։ Երբ Տերը պատվիրան է տալիս, Նա հաճախ օրհնություններ է խոստանում այդ պատվիրանը պահելու համար: Երբ դուք Երեխաների միության սաներին հրավիրում եք ապրել որևէ սկզբունքով, կիսվեք այն խոստումներով, որոնք Աստված մարգարեների միջոցով տվել է նրանց, ովքեր ապրում են այդ սկզբունքով: Դուք կարող եք բերել նաև ձեր վկայությունը այն օրհնությունների մասին, որոնք ստացել եք՝ ապրելով ըստ այդ սկզբունքի: