Waan Kelo̧k eo an Rikalbuuj ro, jān James Tissot im ro jet

Juļae 11–17

2 Kiin̄ Ro 17–25

“Ear Lōke Irooj, Anij in Israel”

Ilo am̧ karōk m̧akūtkūt ko n̄an ajri ro, keememej bwe m̧akūtkūt ko n̄an ajri ro reddikļo̧k ilo laajrak in emaron̄ in oktak jen ajri ro rōrūttoļo̧k im ko jet.

Je En̄jake ko Rej Im̧we Eok

Kajjitōk bwe ren Kwaļo̧k

Je etan kajjojo ajri ro ilo kūlaaj eo am̧ ioon peba jidikdik ko, im likūt peba jidikdik ko ilo juon nine. Ilo jinoin kūlaaj eo, kōtļo̧k an ajri ro bōk kūņaer kālet juon āt. N̄e etan ajri eo ej jin̄a, kajjitōk bwe ajri eo en kwaļo̧k jet men ekar ekkatak kōn gospel eo ak kōn Jisōs Kraist. Āliji m̧ae kajjojo ajri rebōk kūņaer n̄an kwaļo̧k.

Katakin Katak eo: Ajri ro Reddikļo̧k

2 Kiin̄ Ro 18:3, 5

Imaron̄ leke Jemedwōj Ilan̄ im Jisōs Kraist.

Waanjon̄ak eo an Hezekiah ilo 2 Kiin̄ Ro 18:3, 5 emaron̄ jipan̄ ajri ro kwoj katakin n̄an likūt aer leke ilo Anij.

M̧akūtkūt ko Maron̄ Kōm̧m̧ani

• Kwaļo̧k etan jet men ko me juon kiin̄ em̧m̧an emaron̄ kar kōm̧m̧ani im jet me juon kiin̄ enana emaron̄ kōm̧m̧ani. Kajjitōk ippān ajri ro n̄an jutak im m̧ōņōņō kaki kōn men ko rem̧m̧an im jijet kōn men ko renana. Kōmeļeļeik n̄an ajri ro bwe Israel ekanooj lōn̄ an kiin̄, jet rem̧m̧an im jet rejjab. Kajjitōk ippān ajri ro n̄an ron̄jake ta eo ekōm̧m̧an bwe Hezekiah en juon kiin̄ em̧m̧an ilo am̧ riiti ̧2 Kiin̄ Ro 18:3, 5. Jipan̄ er ļōmņaki wāween ko jemaron̄ kwaļo̧k ad leke Irooj āinwōt kar Hezekiah.

• Kajjitōk ippān ajri ro ta meļeļein ta meļeļein leke ro jet. Kōnono kōn armej ro kwoj leke er, im kōtļo̧k an ajri ro kōm̧m̧an āindein. Kwaļo̧k juon pija in Jisōs Kraist. Etke jemaron̄ leke Jisōs Kraist? Kwaļo̧k am̧ leke bwe Jisōs Kraist ej iakwe kōj im naaj jipan̄ kōj jepļaak im mour indeeo ippān Jemedwōj Ilan̄.

2 Kiin̄ Ro 22:8–11; 23:2

Jeje ko rekwojarjar rej juon kōjeraam̧m̧an.

Men̄e ajri ro reddik rejjab maron̄ in riit ak meļeļe aolep men ilo jeje ko rekwojarjar, remaron̄ in jeraam̧m̧an kōn kajoor in jeje ko rekwojarjar. Ta eo kwomaron̄ kōm̧m̧ane n̄an jipan̄ er bōk juon ikdeleel n̄an bōk kōjeraam̧m̧aan jen naan in Anij?

M̧akūtkūt ko Maron̄ Kōm̧m̧ani

• Nooj juon kape in jeje ko rekwojarjar ilo ruum̧ eo, im kajjitōk ippān ajri ro n̄an kappukote. Kōmeļeļeik bwe ilo raan ko an Kiin̄ Josiah, elōn̄ armej rekar jab ekkatak jān jeje ko rekwojarjar m̧ae iien juon pris ekar lo er ilo tampeļ eo (lale 2 Kiin̄ Ro 22:8–11). Ta kein jeje ko rekwojarjar? Etke jej aikuji jeje ko rekwojarjar? Jiron̄ļo̧k ajri ro unin am̧ m̧ōņōņō bwe ewōr ippād rainin jeje ko rekwojarjar, im kōtļo̧k bwe ren kwaļo̧k en̄jake ko aer kōn jeje ko rekwojarjar.

• Riiti 2 Kiin̄ Ro 22:8–11 n̄an ajri ro, im kajjitōk ippāer n̄an ron̄jake ta eo kiin̄ eo ekar kōm̧m̧an n̄an jeje ko rekwojarjar. Etke eaorōk n̄an aolep ren ron̄ ta eo ekar jeje ilo jeje ko rekwojarjar? Al juon al kōn jeje ko rekwojarjar, āinwōt “Search, Ponder, and Pray” (Children’s Songbook, 109), im kajjitōk ippāer n̄an kōnono kake elmen aer en̄jake n̄e rej ron̄ katak ko im bwebwenato ko jen jeje ko rekwojarjar.

  

  Jeje ko rekwojarjar remaron̄ jipan̄ būruwōd oktakļo̧k n̄an Irooj.

Katakin Katak eo: Ajri ro Rerūttoļo̧k

2 Kiin̄ Ro 18:3–6; 19:14–19

Imaron̄ leke Jemedwōj Ilan̄ im Jisōs Kraist.

Ke Assyrian ro rekar kakkure Jerusalem, Kiin̄ Hezekiah eo ewānōk eaar oktaļo̧k n̄an Irooj io tōmak. Waanjon̄ak eo an Hezekiah emaron̄ jipan̄ eok im an ajri ro kōnono elmen ad maron̄ kwaļo̧k ad tōmak ilo Irooj, men̄e tōmak epen.

M̧akūtkūt ko Maron̄ Kōm̧m̧ani

• Kōjerbal Baibōļ m̧ab 3, “The Division of the 12 Tribes,” kōmeļeļeiki tukaduin n̄an ajri ro bwee Turōn in Tūroon eo an Israel kar anjo̧ jen armej ro ņaetaer Assyrian. Kōmeļeļeik bw Assyrian ro tokālik raar kajjieon̄ in anjo̧ ilo Turear in Tūroon eo an Juda. Kajjitōk ippān ajri ro n̄an katen wōt n̄e rej en̄jake n̄e ren kar jokwe ilo Juda im kar jeļā bwe Assyrian ro rej itok n̄an kakkure jikin eo. Kajjitōk ippān ajri ro n̄an riiti 2 Kiin̄ Ro 18:3, 5–6 n̄an lale etke Hezekiah, kiin̄ eo an Juda, ekar maron̄ in peran ke Assyrian ro rekar itok.

• Karuwaineneik ajri ro n̄an riiti 2 Kiin̄ Ro 19:14–19, lale ta eo Hezekiah ekar kōm̧m̧ane ke Assyrain ro rekar kakkure jikin eo an. Elmen kōm̧m̧ane an men kein kwaļo̧k an kar leke ilo Irooj? Ta eo jemaron̄ kōm̧m̧ane n̄an kwaļo̧k ad leke ilo Irooj n̄e jej aikuj jipan̄

2 Kiin̄ Ro 22:8–13; 23:2–3

Jeje ko rekwojarjar rej katakin kōj ewi wāween ļoor Anij.

Ālkin iiō in marok ilo jetōb, RiJu raar bar kakāāl kallim̧ur eo aer n̄an Irooj. Menin ekar waļo̧k kōnke Kiin̄ Josaia ekar lo bok in kien eo im kar riiti n̄an armej ro an. Bwebwenato in emaron̄ jipan̄ ajri ro meļeļe etke jeje ko rekwojarjar relukkuun aorōk.

M̧akūtkūt ko Maron̄ Kōm̧m̧ani

• Jiron̄ļo̧k ajri ro bwe Kiin̄ Josaia ekar jiron̄ armej ro an n̄an bar kōm̧m̧ane tampeļ eo, im ke rekar kōm̧m̧ane, raar lo jet men ko relukkuun aorōk. Karuwaineneik ajri ro n̄an riiti 2 Kiin̄ Ro 22:8–11 n̄an lo kar ta eo. Kōmeļeļeik bwe bok eo rekar loe epād ie bujen ko im kien ko me ro nejin Israel rekar jab jeļā kake. Ta en kar waļo̧k n̄an kōj n̄e en kar jab wōr ippād jeje ko rekwojarjar? Kajjitōk ippān ajri ro etke rej kam̧m̧oolol kōn jeje ko rekwojarjar. Etke en kar pen n̄an ļoor Rilo̧mo̧o̧r n̄e eban kar wōr ippād jeje ko rekwojarjar

• Leļo̧k n̄an kajjojo ajri jidik peba, im kajjitōk ippāer n̄an potakke. Kōmeļeļeiki bwe Kiin̄ eo ilo tōre ko an Josaia, jet iien armej ro rej kekōļ ak “kekōl,” nuknuk ko aer n̄e rej illu. Kajjitōk ippān ajri ro n̄an pukot naan eo “kekōl” ilo 2 Kiin̄ Ro 22:11. Etk Josaia ekar aikuj illu? Jipan̄ ajri ro n̄an pukot naan eo ilo eoon 13 Etke eaorōk n̄an kōj bwe jen riiti jeje ko rekwojarjar aolep raan?

• Riiti 2 Kiin̄ Ro 23:2–3 ippān doon, im kajjitōk ippān ajri ro n̄an lale elmen an jeje ko rekwojarjar kar jipan̄ Josaia im armej ro an. Kwaļo̧k n̄an ajri ro juon eoon me ekar im̧we eok n̄an “etetal im̧aan Irooj” (eoon 3), im kajjitōk ippān ajri ro n̄an kwaļo̧k eoon ko rekar jipan̄ er. Al ippān doon “I Will Walk with Jesus” (ChurchofJesusChrist.org).

2 Kiin̄ Ro 23:3

Inaaj kōjparok bujen ko aō ippān Anij.

Ke Josaia im armej ro an raar jeļā kōn kien ko an Anij, raar kōm̧m̧ane juon bujen n̄an mour ippāer. Kwomaron̄ jipan̄ ajri ro kwoj katakin er ikdeleel n̄an tiljek wōt n̄an bujen ko raar kōm̧m̧ani ilo iien peptaij.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti 2 Kiin̄ Ro 23:3 im pukoti naan ko ak naan ko me rej kwaļo̧k elmen an kar armej ro en̄jake kōn kien ko an Irooj. Kajjitōk ippāer n̄an jutak im kōnono kake ta meļeļein “[jutak] kōn bujen eo.” Kajjitōk ippāer n̄an etetal ilo jikin eo im kōnono kake ta meļeļein “etela im̧aan Irooj.” Kajjitōk ippāer n̄an likūt peier ilo būruweer im kwaļo̧k wāween ko jemaron̄ kōjparok kien ko “kōn aolepen [būruwōd].”

• Jipan̄ ajri ro kōm̧m̧ane juon elaajrak in kallim̧ur ko raar kōm̧m̧ani ilo iien peptaij (lale Mosaia 18:10; Katak im Bujen Ko 20:37, 77, 79). Ta eo Anij ekar kallim̧uri kōj n̄e jej kōjparok bujen ko ad? Ta eo jaar ekkatak jān 2 Kiin̄ Ro 23:3 kōn wāween ad aikuj kōjparok bujen ko ad?

Kōketak Ekkatak ilo M̧weo

Kajjitōk ippān ajri ro n̄an kwaļo̧k ippān ro uwaan baam̧le juon eoon jen jeje ko rekwojarjar ak bwebwenato jān jeje ko rekwojarjar me ekar kōjeraam̧m̧an er.

Kōkōm̧anm̧anļo̧k Ad Katakin

Kalōk leke ilo ajri ro. Juon wāween n̄an jipan̄ er kalōk lōke eo ej n̄an nōbar er n̄e rej bōk koņaer ilo kūlaaj. Kallim̧uri ajri ro bwe Jetōb Kwojarjar eo enaaj jipan̄ er ilo aer ekkatak.