Լեռ Եգիպտոսում, որն ավանդաբար համարվում էր Սինայ սար։

Ապրիլի 18-24-ը

Ելից 18-20

«Եհովայի բոլոր ասածները կանենք»

Երբ կարդաք Ելից 18-20-ը, մտածեք այն սկզբունքների մասին, որոնք շատ իմաստալի կլինեն երեխաների համար: Հնարավոր է, որ դուք ոգեշնչվեք շեշտադրել մեկ այլ սկզբունք, բացի ստորև տրվածներից:

Գրի առեք ձեր տպավորությունները

Հրավիրեք կիսվել

Խնդրեք երեխաներին կիսվել տասը պատվիրաններից որևէ մեկով (կամ նրանց հետ կրկնեք մի քանի պատվիրաններ), և ինչու են նրանք համարում, որ կարևոր է ենթարկվել այդ պատվիրանին:

Ուսուցանեք վարդապետությունը. կրտսեր խմբի երեխաներ

Ելից 18.8-12

Իմ վկայությունը կարող է օրհնել ուրիշներին:

Հոթորը ուրախացավ, երբ Մովսեսը կիսվեց, թե Տերն ինչ էր արել Իսրայելի զավակների համար: Այս պատմությունը կարող է ոգեշնչել ձեր ուսուցանած երեխաներին ուրիշների հետ կիսվել նրանով, որն ըստ իրենց, ճշմարիտ է։

Հնարավոր վարժություններ

• Երեխաների համար կարդացեք հետևյալ խոսքերը Ելից 18.8-ից. «Եւ Մովսէսն իր աներին պատմեց այն ամենը՝ որ Եհովան արաւ»: Երեխաներին հարցրեք՝ արդյոք նրանք հիշում են, թե Տերն ինչ է արել, որ օգնի Իսրայելի զավակներին փախչել Եգիպտոսից։ (Որպեսզի օգնեք նրանց հիշել, ցույց տվեք նախորդ դասերի նկարները կամ գործնական աշխատանքի էջերը:) Տերը ի՞նչ է արել, որ օգնի մեզ: Օգնեք երեխաներին իմանալ, որ Մովսեսի նման մենք կարող ենք ուրիշներին պատմել այն հրաշալի բաների մասին, որոնք Տերը արել է մեզ համար։

• Երեխաների միության դասարանը կարող է հրաշալի տեղ լինել երեխաների համար, որ սովորեն կիսվել պարզ վկայությունով: Ձեր վկայությունով կիսվեք նրանց հետ և օգնեք նրանց միմյանց հետ կիսվել ավետարանական ճշմարտություններով, որոնց նրանք հավատում են:

Ելից 20.3-17

Աստված պատվիրաններ է տալիս, քանի որ Նա ցանկանում է, որ ես երջանիկ լինեմ:

Պատվիրանները Երկնային Հոր հրահանգներն են, որ մենք գտնենք խաղաղություն այս կյանքում և ուրախություն՝ հավերժության մեջ: Ինչպե՞ս կարող եք խրախուսել երեխաներին հնազանդվել Աստծո պատվիրաններին։

Հնարավոր վարժություններ

• Ցույց տվեք նկարներ «The Ten Commandments»-ից (Old Testament Stories), և հրավիրեք երեխաների կիսվել այս պատմության մասին իրենց իմացածով: Օգնեք նրանց հասկանալ այս պատմության ցանկացած մաս, որի հետ նրանք ծանոթ չեն։

• Երբ երեխաների համար կարդաք պատվիրաններից մի քանիսը Ելից 20.3–17-ից (կամ վերապատմեք դրանք ձեր բառերով, որ նրանց հասկանալի լինի), խնդրեք նրանց հավանության նշան ցույց տալ, եթե պատվիրանը մի բանի մասին է, որը մենք պետք է կատարենք, և մերժման նշան, եթե դա մի բանի մասին է, որը մենք չպետք է անենք: Կիսվեք ձեր վկայությամբ այն մասին, որ երջանկությունը գալիս է Աստծո պատվիրաններին հնազանդվելուց (տես Մոսիա 2.41):

• Երեխաների հետ որևէ երգ երգեք այն մասին, թե Երկնային Հայրն ինչպես է օրհնում մեզ, երբ մենք հնազանդվում ենք պատվիրաններին, օրինակ՝ «Keep the Commandments» (Children’s Songbook, 146–47): Հրավիրեք երեխաներին լսել բառերը և պարզել, թե մենք ինչ օրհնություններ ենք ստանում, երբ հնազանդվում ենք:

Ելից 20.12

Ես կարող եմ պատվել իմ ծնողներին:

Ծնողներին պատվելը ներառում է ավելին, քան պարզապես նրանց հնազանդվելը: Օգնեք երեխաներին հասկանալ, թե ուրիշ ինչ եղանակներով նրանք կարող են պատվել իրենց ծնողներին:

Հնարավոր վարժություններ

• Օգնեք երեխաներին սովորել հատևյալ արտահայտությունը՝ «Պատուիր քո հորը եւ քո մորը» (Ելից 20.12): Անհրաժեշտության դեպքում բացատրեք, որ «պատվել» ինչ-որ մեկին՝ նշանակում է հարգանք ցուցաբերել կամ երջանկացնել նրան: Ի՞նչ արեց Հիսուսը Իր Երկնային Հորը պատվելու համար: Նա ինչպե՞ս պատվեց Իր մորը (տես Ղուկաս 2.48–51, Հովհաննես 19.26–27): Օգնեք երեխաներին մտածել, թե ինչ կարող են անել իրենց ծնողներին պատվելու համար, և խնդրեք նրանց բեմականացնել իրենց գաղափարները:

• Հրավիրեք երեխաներին իրենց ծնողների համար պատրաստել շնորհակալական բացիկներ: Նրանք կարող են բացիկի վրա գրել կամ նկարել ինչ-որ բան, որը կատարելով կարող են պատվել իրենց ծնողներին։

Ուսուցանեք վարդապետությունը. ավագ խմբի երեխաներ

Ելից 18.13-26

Ես կարող եմ Տիրոջ աշխատանքը կատարելու «բեռը թեթևացնել»։

Մովսեսը իմացավ, որ Իսրայելի զավակներին միայնակ առաջնորդելը «լավ բան չէ» (Ելից 18.17): Սիրելով և ծառայելով միմյանց, կարող ենք թեթևացնել մեր ղեկավարների բեռները:

Հնարավոր վարժություններ

• Հրավիրեք երեխաներին գրատախտակին նկարել շատ շրջաններ՝ ներկայացնելով ծխի անդամներին: Նկարեք մի շրջան՝ եպիսկոպոս անվանումով: Ինչո՞ւ պետք է խնդիրներ առաջանան, եթե եպիսկոպոսը լիներ միակ մարդը, ով օգնում է մնացածներին: Միասին կարդացեք Ելից 18.13-26-ը, գտնելով, թե Հոթորն ինչ խորհուրդ տվեց, երբ Մովսեսը փորձում էր ամեն բան մենակ անել: Խնդրեք երեխաներին անվանել մյուս շրջանակները, ներկայացնելով ծխի մյուս ղեկավարներին և անդամներին, ովքեր օգնում են եպիսկոպոսին ծառայել ուրիշներին: Մյուս ղեկավարներն ու անդամները ինչպե՞ս են թեթևացնում եպիսկոպոսի բեռը: Ինչպե՞ս կարող ենք նույնը անել մեր ծխի ղեկավարների համար և մեր ծնողների համար տանը:

• Օգնեք երեխաներին կազմել ձեր ծխի ղեկավարների ցուցակը։ Դասարանով ընտրեք մեկին և քննարկեք, թե այդ մարդն ինչ է անում Տիրոջ աշխատանքը կատարելու համար, և երեխաներն ինչ կարող են անել օգնելու համար:

  

  Ուրիշներին ծառայելը մի եղանակ է, որով մենք կարող ենք օգնել Տիրոջ աշխատանքին:

Ելից 20.1-7

Իմ կյանքում կարևոր է Տիրոջը դնել առաջին տեղում։

Մեր կյանքում բոլորս ունենք այնպիսի բաներ, որոնք կարող ենք գայթակղվել և գերադասել Աստծուց: Ինչպե՞ս կարող եք օգնել երեխաներին հասկանալ, թե ինչ է նշանակում Երկնային Հորը դնել առաջին տեղում:

Հնարավոր վարժություններ

• Միասին կարդացեք Ելից 20.1–7-ը և բացատրեք, որ ցանկացած բան, որը մեր կյանքում գերադասում ենք Աստծուց, կարող է նման լինել «ուրիշ աստուածների» և «կուռք[երի]», որոնք նշված են հատվածներ 20.3–4-ում: Հարցրեք երեխաներին, թե Երկնային Հայրն ինչու է ցանկանում, որ մենք Իրեն դնենք առաջին տեղում։ Ի՞նչ օրհնություններ է նա խոստանում մեզ, եթե այդպես վարվենք։ Հարցրեք երեխաներին, թե մենք ինչպես կարող ենք Երկնային Հորը ցույց տալ, որ Նա ավելի կարևոր է, քան ցանկացած այլ բան մեր կյանքում:

• Մտածեք որևէ գործողություն, որն ունի կարևոր առաջին քայլը, օրինակ՝ լվանալ մեր ձեռքերը ուտելուց առաջ կամ հագնել կիսագուլպաները՝ նախքան կոշիկները հագնելը: Ի՞նչ տեղի կունենա, եթե կարևոր բաները առաջինը չանենք: Ինչպե՞ս է այդ օրինակը նման Երկնային Հորը մեր կյանքում գերադասություն տալուն։ Կիսվեք ձեր վկայությամբ, թե ինչպես եք օրհնվել, երբ Աստծուն դրել եք առաջին տեղում ձեր կյանքում, և հրավիրեք երեխաներին ևս կիսվել իրենց վկայություններով։

• Երգեք Աստծո մասին մի երգ, օրինակ՝ «My Heavenly Father Loves Me», (Children’s Songbook, 228–29): Ի՞նչ ենք սովորում երգից այն մասին, թե ինչու է կարևոր Երկնային Հորը դնել առաջին տեղում մեր կյանքում։

Ելից 20.3-17

Աստված պատվիրաններ է տալիս, քանի որ Նա ցանկանում է, որ ես երջանիկ լինեմ:

Երեխաները, ավելի հավանական է, որ կպահեն պատվիրանները, եթե նրանք համարեն դրանք որպես Աստծո սիրո արտահայտություններ և հնարավորություններ՝ արտահայտելու իրենց սերը Նրա հանդեպ:

Հնարավոր վարժություններ

• Պատրաստեք թերթիկներ, որոնց վրա գրված լինեն Ելից 20.3–17-ի պատվիրանները։ Գրատախտակին գրեք 1-10 թվերը և հրավիրեք երեխաներին թերթիկները ճիշտ հերթականությամբ դնել գրատախտակին։ Խոսեք այն մասին, թե մենք ինչպես կարող ենք հետևել այս պատվիրաններին: Գաղափարների համար նրանք կարող են կարդալ Ավետարանական թեմաների «Տասը պատվիրանները» հոդվածը (topics.ChurchofJesusChrist.org):

• Հանձնարարեք երեխաներին նկարել հուշող բառերի նկարներ պատվիրաններից, որոնք կօգնեն նրանց հիշել դրանք։

• Պատմեք Քլոեի պատմությունը քույր Քերոլ Մ. Սթեֆենսի ելույթից «Եթէ ինձ սիրում էք, իմ պատուիրանքները պահեցէք» (Լիահոնա, նոյեմբեր 2015, 118–20): Ինչպե՞ս է այս պատմությունն օգնում մեզ հասկանալ, թե Տերն ինչու է մեզ պատվիրաններ տալիս։ Մեր հնազանդությունն ինչպե՞ս է ցույց տալիս մեր սերը Աստծո հանդեպ:

Խրախուսեք տնային ուսումնասիրությունը

Հրավիրեք երեխաներին մտածել ինչ-որ բանի մասին, որը նրանք կցանկանային անել դասարանում իրենց սովորածի շնորհիվ: Օգնեք նրանց մի փոքրիկ հիշեցում պատրաստել այն մասին, թե ինչ կանեն, որը կկարողանան տուն տանել:

Բարելավել մեր ուսուցումը

Օգնեք երեխաներին ճանաչել Հոգուն: Երեխաները կարող են ճանաչել Հոգու ազդեցությունը։ Ուսուցանեք երեխաներին, որ խաղաղության, սիրո և ջերմության զգացումները, որ նրանք ունենում են Հիսուս Քրիստոսի և Նրա ավետարանի մասին խոսելիս կամ երգելիս, գալիս են Սուրբ Հոգուց: