Kidavaki ira tiko na tamata o Jisu Karisito enai Karua ni Nona Lako Mai

Na Koro Tawamudu, mai vei Keith Larson

25–31 ni Tiseba

Ai Vakatakila 15–22

“O Koya Sa Gumatua Ena Rawata na Ka Kecega.”

Ni o vakarau mo veivakavulici, taura na ka o sa vulica mai na Ai Vakatakila 15–22 vakai iko se vata kei na nomu matavuvale. Na cava a votu mai vei iko? Na cava soti o a vakauqeti kina? Nanuma tiko na itaviqaravi kece e vakaturi ena idusidusi oqo sa rawa ni moici me baleti ira na gone ena i tabayabaki cavaga.

ivakatakilakila ni veiwasei

Sureta na Veiwasei

Sureti ira na gone me ra wasea na vuna era vinakata kina me ra laki bula vata tale kei na Tamada Vakalomalagi. Ena gauna taucoko ni lesoni, vukei ira me ra vaqara na veika era rawa ni cakava me ra vakavakarau ni lesu tale Vua.

ivakatakilakila ni veivakavulici

Vakavulica na iVunau: Gone Sobu

Ai Vakatakila 15:2–4

Au rawa ni vakacaucautaka na Kalou ena lagasere.

Era a lagata na Yalododonu ka tukuna o Joni ena Ai Vakatakila 15:2–4 na vakacaucau vua na Kalou ena Nona vinaka. Na sere ni veivakacaucautaki cava e rawa ni vukei ira na gone ni vakaraitaka nodra lomana na Tamada Vakalomalagi kei Jisu Karisito?

iTaviqaravi e Rawa ni Caka

• Ni o wilika e cake na veitiki ni Ai Vakatakila 15:2–4, kerei ira na gone me ra cakava na ivukivuki eso me vaka ni ra vakatagitaka tiko e dua na api se liutaka e dua na matasere. E dau vakacava nai tovo ni yaloda ni da seretaki Jisu?

• Kerei ira na gone me ra wasea eso na nodra sere taleitaki me baleti Tamada Vakalomalagi kei Jisu Karisito. Lagata vata e vica na sere, ka vukei ira na gone me ra kila na ka era vakavulica vei keda na sere me baleta na Tamada Vakalomalagi kei na iVakabula.

Ai Vakatakila 19:7

Au rawa ni vakavakarau ki nai Karua ni Lako Mai i Jisu Karisito ena digitaki ni dodonu.

O na vukei ira vakacava na gone me ra kila ni na dua na gauna marautaki vei keda nai Karua ni Lako Mai kevaka eda muria na vunau i Jisu?

iTaviqaravi e Rawa ni Caka

• Tarogi ira na gone kevaka era sa bau lako mada ki na dua na vakamau. E a vakacava beka? Cava na vuna era marau kina na tamata ena vakamau? Vakaraitaka nai yaloyalo ni Karua ni Lako Mai ni iVakabula ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale, ka wilika na Ai Vakatakila 19:7. Vakamacalataka na “vakawati ni Lami” sa matataka nai Karua ni Lako Mai i Jisu Karisito. Cava na vuna eda na reki kina ni sa lako tale mai na iVakabula? Vukei ira na gone me ra vakatauvatana na reki ni dua na vakamau ki na reki ni lesu mai ni iVakabula.

• Wasea vei ira na gone na vuna o sa vakanamata tiko kina ki nai Karua ni Lako Mai i Jisu. O rawa talega ni lagata vata e dua na sere baleta nai Karua ni Lako Mai, vaka na “Ena Lesu Tale Beka Mai” (iVolanisere ni Gonelalai, 46).

• Sureti ira na gone me ra wasea na ka era dau cakava me ra vakavakarau kina ki na lotu ena Sigatabu. Cava na vuna eda cakava kina na veika oqo ni bera noda gole ki lotu? Cava na vuna me da vakavakarau kina ki nai Karua ni Lako Mai i Karisito? Ena tabana ni taviqaravi ni macawa oqo, me ra droinitaka na gone na ka era rawa ni cakava me ra vakavakarau kina ki nai Karua ni Lako Mai.

Ai Vakatakila 21:1, 3–4, 22–27; 22:1–2

Sa vinakata na Tamada Vakalomalagi meu bula vata kei Koya ena matanitu vakasilesitieli.

Ena iotioti ni rua na wase ni Ai Vakatakila, a vakayagataka o Joni na vosa totoka me vakamacalataka na lagilagi vakasilesitieli era na marautaka na yalodina.

iTaviqaravi e Rawa ni Caka

• Vukea me ra droinitaka na gone na vunikau ka vakamacalataki ena Ai Vakatakila 22:2 ena papa ni volavola. Vakamacalataka ni vunikau oqo sa ikoya na vunikau ni bula, ka sa matataka na loloma ni Kalou na vuana (raica na 1 Nifai 11:21–22). Solia vei ira na gone na tikinipepa eso e buli tu vaka na vuanikau, ka sureti ira me ra droinitaka ena pepa e dua na ka e vukei ira ni vakila na loloma ni Tamada Vakalomalagi. Vakamacalataka ni o ira era lomana ka talairawarawa vua na Tamada Vakalomalagi era na bula vata kei Koya ena matanitu vakasilesitieli.

• Wasea vei ira na gone na ivakatakarakara se veika eso a vakayagataka o Joni me vakamacalataka kina na lagilagi vakasilesitieli (raica na Ai Vakatakila 21:1, 3–4, 22–27; 22:1–2), ka sureti ira na gone me ra droinitaka na iyaloyalo ni veika oqo.

• Ni lagata vata e dua na sere ka vakavulica na sala me da vakavakarau kina ni lesu ki na itikotiko ni Kalou, vaka na “Meu Muria na Nona Lewa” (iVolanisere ni Gonelalai, 86). Sureti ira na gone me ra vakatakila na ka era rawa ni cakava me ra laki bula tale kina kei na Tamada Vakalomalagi.

ivakatakilakila ni veivakavulici

Vakavulica na iVunau: Gone Qase Cake

Ai Vakatakila 19:7–8

Au rawa ni vakavakarau ki nai Karua ni Lako Mai i Jisu Karisito ena digitaki ni dodonu.

O na vukei ira vakacava na gone o vakavulica me ra kila ni na dua na ka marautaki vei ira na yalododonu nai Karua ni Lako Mai i Jisu Karisito?

iTaviqaravi e Rawa ni Caka

• Wilika vata na iVakatakila 19:7–8, ka vukea me ra kila na gone na ivakatakarakara ena veitikina oqo—na vakawati sai Karua ni Lako Mai ni iVakabula, na Lami sai koya na iVakabula, kei na Watina sai koya na Lotu (se o keda kece). Na cava so eda rawa ni cakava me da vakarautaka kina na lako tale mai ni iVakabula?

• Railesuva ka cavuqaqataka na Yavu ni Vakabauta 1:10 vata kei ira na gone. Vakamacalataka ni yavu ni vakabauta oqo e vakamacalataka na veika taleitaki ka lagilagi ena yaco ni sa lako tale mai o Jisu. Vakaraitaka na iyaloyalo ni Karua ni Lako Mai i Jisu ena Lako Mai, Mo Muri Au—Me Baleti Ira na Tamata Yadua kei na Matavuvale, ka sureti ira na gone me ra droinitaka na nodra nanuma se na vakacava tu nai Karua ni Lako Mai i Jisu.

Ai Vakatakila 20:12–13

Au na lewai mai vua na Kalou.

Dua na siga eda na tu taucoko ena mata ni Kalou me da lewai. O rawa ni vukei ira na gone me ra kila deivaki ni Nona vakatulewa ena dodonu, veiganiti, ka vakasakiti.

iTaviqaravi e Rawa ni Caka

• Vola ena papa ni volavola Ena vakacava tu beka na Siga ni Veilewai? Sureti ira na gone me ra vaqara na isaunitaro ena Ai Vakatakila 20:12–13 kei na “Veilewai, na iOtioti ni” ena iDusidusi ki na iVolanikalou (scriptures.ChurchofJesusChrist.org). Na cava sa cakava na iVakabula me rawa ni siga rekitaki kina na Siga ni Veilewai? (raica na Yavu ni Vakabauta 1:3–4). Na cava eda rawa ni cakava me dua kina na siga rekitaki vei keda?

  O Jisu kei ira na tamata ni rarama e Ligana imatau kei ira na tamata ni butobuto ena nona imawi

  Na iOtioti ni Veilewai, mai vei John Scott

• Kauta mai ki na kalasi e dua na ivolalailai e matataka na “ivola ni bula” (Ai Vakatakila 20:12), o sa vola tu kina eso na nodra ivakarau va-Karisito kei na nodra caka vinaka na gone ena nomu kalasi. Wilika vei ira na gone na veika o vola tu, ka sureti ira me ra veivosakitaka na ivakarau va-Karisito era sa raica vakai ira. Wasea na nomu ivakadinadina ni sa vukei keda o Jisu Karisito meda vakataki Koya vakalevu cake ka vakarautaka vei keda na sala meda veivutuni ka ulabaleta na ivalavala ca.

Ai Vakatakila 21:1, 3–4, 22–27; 22:1–2, 17

Sa vinakata na Tamada Vakalomalagi meu bula vata kei Koya ena matanitu vakasilesitieli.

Ni o wilika na vakamacala i Joni me baleta na lagilagi vakasilesitieli ena Ai Vakatakila 21–22, na cava e votu mai vei iko? Na cava o sa vakauqeti kina mo wasea vata kei ira na gone o vakavulica?

iTaviqaravi e Rawa ni Caka

• Sureti ira na gone me ra vaqara ena veitikina oqo na vosa se malanivosa eso a vakayagataka o Joni me vakamacalataka kina na lagilagi vakasilesitieli: Ai Vakatakila 21:1, 3–4, 22–27; 22:1–2. Me ra digitaka e dua na ka ena veitikina oqo era na vinakata me ra droinitaka. Sa rawa ni ra qai veitalanoataka na nodra droini ki na kalasi. Vakayaloqaqataki ira me ra wasea na nodra droini ki na nodra matavuvale e vale.

• Wilika vata na Ai Vakatakila 22:17, ka vakamacalataka ni watina‑yalewa ka kaya “Lako Mai” sa ikoya na Lotu. O cei eda vinakata, vaka lewe ni Lotu, ni sureti ira na tani me ra “lako mai” vua? (raica na Moronai 10:30–33). Na cava ena “viagunu” kina o ira na wavoliti keda tu? Na cava na sala vinaka eso me sureti kina na tamata me ra “lako mai”?

ivakatakilakila ni vuli

Vakauqeta na Vuli e Vale

Vukei ira na gone me ra tuvakarau ni wilika na iVola i Momani ena yabaki mai oqo ena nodra sureti me ra kerea e dua na lewe ni matavuvale se itokani me wasea e dua na tikina se italanoa taleitaki mai na iVola i Momani.

Vakatorocaketaki Noda Veivakavulici

Vakavulica na gone me ra vola na veika era uqeti kina. Ke sa rawa ni vulica na gone me ra matau ena volai ni veika era uqeti kina, ena vukei ira me ra vakila ka muria na Yalotabu. E rawa ni ra vola na gone na veika era uqeti kina ena vakatakilakilataki ni ivolanikalou, droinitaki ni yaloyalo, se vakaleweni ni ka eso ena ivolaniveisiga. (Raica na Veivakavulici ena iVakarau ni iVakabula, 30.)

tabana ni itaviqaravi: ena lako tale mai o Jisu Karisito