“Nobyembre 13–19. Santiago: ‘Tumana Ninyo ang Pulong, ug Dili kay Magpaminaw Ra Kamo Niini,’” Dali, Sunod Kanako—Alang sa Primary: Bag-ong Tugon 2023 (2021)
“Nobyembre 13–19. Santiago,” Dali, Sunod Kanako—Alang sa Primary: 2023
Nobyembre 13–19
Santiago
“Tumana Ninyo ang Pulong, ug Dili kay Magpaminaw Ra Kamo Niini.”
Ang Sulat ni Santiago naglangkob og daghang kamatuoran nga makapanalangin sa mga bata nga imong gitudloan. Sunda ang Espiritu aron sa pagtino kon unsa nga mga kamatuoran ang imong ipaambit kanila. Ang mga ideya niini nga latid makatabang.
Dapita ang Pagpaambit
Dapita ang mga bata sa pagpaambit og usa ka baroganan sa ebanghelyo nga ilang nahinumdoman nga nakat-onan uban sa ilang pamilya atol sa miaging semana o gikan sa ilang klase sa Primary sa miaging Dominggo. Human makapaambit ang matag bata, dapita ang laing bata diha sa klase sa pag-summarize sa unsay napaambit.
Itudlo ang Doktrina: Mas Gagmay nga mga Bata
Makahangyo ko sa Langitnong Amahan sa pagtabang kanako nga makat-on unsay tinuod.
Tabangi ang mga bata nga imong gitudloan nga makasabot nga mahimo silang modangop sa Langitnong Amahan alang sa kaalam. Ang pagbuhat sa ingon makapanalangin kanila pag-ayo kon mag-atubang sila og lisod nga mga pangutana.
Posible nga mga Kalihokan
-
Tabangi ang mga bata nga sublion ang pulongan nga “Apan kon diha kaninyo may nakulangan ug kaalam, papangayoa siya sa Dios” (Santiago 1:5). Sa unsang paagi nga kita makapangutana sa Dios? Sa unsang paagi nga Siya motubag kanato?
-
Ipakita ang usa ka hulagway sa Ang Unang Panan-awon (Libro sa mga Hulagway sa Ebanghelyo, nu. 90ChurchofJesusChrist.org). Ipasabot kon sa unsang paagi nga ang pagbasa sa Santiago 1:5 miaghat ni Joseph Smith sa paghangyo sa Langitnong Amahan sa pagtabang kaniya kabahin sa usa ka pangutana (tan-awa sa Joseph Smith—Kasaysayan 1:1–20). Ipaambit ang imong pagpamatuod nga ang Dios motubag sa mga pag-ampo, ug ipamatuod nga ang mga bata mahimong moampo Kaniya kon duna silay mga pangutana. Padrowinga ang mga bata og kaugalingon nilang mga hulagway ni Joseph Smith nga nagbasa sa Santiago 1:5 ug nag-ampo sa Langitnong Amahan.
Makapamulong ako uban sa kamabination.
Sama sa gipamatuod ni Santiago, ang pagkat-on sa pagsulti lamang og mabination nga mga butang ngadto sa uban makatabang kanato nga mahimong sama ni Jesukristo (tan-awa sa Santiago 3:2).
Posible nga mga Kalihokan
-
Ipakita ang mga hulagway sa usa ka butang nga tam-is ug usa ka butang nga aslom. Tabangi ang mga bata nga makasabot nga gihangyo kita sa Langitnong Amahan nga gamiton nato ang atong mga dila sa pagsulti og tam-is (o mabination) nga mga butang ug dili mosulti og aslom (o ngil-ad) nga mga butang (tan-awa sa Santiago 3:10). Tabangi sila sa paghunahuna og mga ehemplo sa maayo nga mga butang nga mahimo natong isulti sa uban.
-
Hatagi ang matag bata og yano nga drowing sa usa ka tawo nga namulong. Dapita ang mga bata sa pag-isa niini kon mosulti ka og maayong butang nga atong mabuhat sa atong mga pulong (sama sa pagsulti sa kamatuoran, paghatag og mga pagdayeg, ug pagtanyag og tabang sa usa ka tawo) ug sa pagpaubos niini kon mosulti ka og butang nga dili nato angayng buhaton sa atong mga dila (sama sa pagsulti og mga bakak, pagtawag sa ubang mga tawo og ngil-ad nga mga ngalan, ug pagdumili sa pagsunod sa usa ka ginikanan).
-
Suportahi ang mensahe sa Santiago 3:1–13 pinaagi sa pagkanta og dungan sa usa ka awit mahitungod sa pagkamabination, sama sa “Pagkamabination Magsugod Kanako” (Songbook sa mga Bata, 83).
Ang pagdawat sa mga panalangin sa Dios nagkinahanglan og pailob.
Ang pailob dili kanunay moabot sa natural nga paagi, ilabi na sa mga bata. Ikonsiderar kon unsaon nimo sa paggamit ang tambag ni Santiago aron sa pagtabang sa mga bata nga imong gitudloan nga makakat-on og pailob.
Posible nga mga Kalihokan
-
Tabangi ang mga bata sa paghunahuna sa mga panahon sa dihang kinahanglan nilang maghulat alang sa usa ka butang nga gusto kaayo nila. Pagpaambit og kasinatian sa dihang kinahanglan kang maghulat. Ipasabot nga ang paghulat nga walay pagbagulbol alang sa usa ka butang nga gusto nato mao ang gitawag nga pagpailob.
-
I-summarize ang Santiago 5:7 sa kaugalingon nimong mga pulong, ug ipakita ang usa ka hulagway sa usa ka liso o binhi. Nganong gikinahanglan man nato ang pailob kon magpatubo kita og mga tanom? Unsa ang mahitabo kon atong sulayan sa pagbira ang binhi aron mapadali ang pagtubo niini? Mahimong maghisgot usab ka sa mga bata kon unsay gipasabot nga magmapailobon sa uban ug sa atong kaugalingon. Pagpamatuod nga ang Dios makatabang kanato nga magkat-on nga magmapailobon.
-
Ipaambit ang istorya ni Job, kinsa gihisgotan diha sa Santiago 5:11 isip usa ka ehemplo sa pailob (tan-awa sa “Job,” diha sa Mga Istorya sa Daang Tugon ChurchofJesusChrist.org). Sa unsang paagi nga napanalanginan si Job tungod sa pagkamapailobon?
Itudlo ang Doktrina: Mas Magulang nga mga Bata
Ang Langitnong Amahan motabang kanako nga makakat-on sa kamatuoran kon magtinguha ako sa Iyang tabang.
Ang mga bata nga imong gitudloan mas bata lang og pipila ka tuig kay ni Joseph Smith sa dihang mibasa siya sa Santiago 1:5 ug nadasig nga moduol sa Langitnong Amahan pinaagi sa pag-ampo. Ikonsiderar kon sa unsang paagi nimo matabangan ang mga bata nga imong gitudloan sa pagpalambo sa ilang hugot nga pagtuo nga ang Dios motabang kanila kon nagkulang sila sa kaalam.
Posible nga mga Kalihokan
-
Hangyoa ang mga bata sa pagsulti kanimo sa istorya sa Unang Panan-awon ni Joseph Smith gamit ang kaugalingon nilang mga pulong (tan-awa sa Joseph Smith—Kasaysayan 1:5–20 ChurchofJesusChrist.org). Sa unsang paagi ang pagbasa sa Santiago 1:5 nakatabang ni Joseph? Tabangi ang mga bata sa paghunahuna og ubang mga ehemplo sa mga tawo diha sa mga kasulatan kinsa nakadawat og tubag sa ilang mga pag-ampo sama ni Nephi (tan-awa sa 1 Nephi 11:1–6) ug ang igsoon nga lalaki ni Jared (tan-awa sa Ether 2:18–3:9). Unsa ang pipila ka butang nga mahimo natong pangayoon sa Langitnong Amahan diha sa pag-ampo?
-
Basaha uban sa mga bata ang Joseph Smith—Kasaysayan 1:10–14. Dapita ang mga bata sa pagpangita sa mga butang nga gibuhat ni Joseph Smith aron makadawat og mga tubag sa iyang mga pangutana. Unsaon nato pagsunod sa ehemplo ni Joseph kon duna kitay mga pangutana?
“Ang [hugot nga] pagtuo nga dili ubanag mga buhat walay kapuslanan.”
Unsaon nimo pagtabang ang mga bata nga makakita sa koneksiyon tali sa unsay ilang gituohan ug unsa ang ilang buhaton?
Posible nga mga Kalihokan
-
Pakit-a ang mga bata og flashlight nga walay mga bateriya, lapis nga walay tahal, o lain pang butang nga walay pulos o “patay.” Hangyoa ang mga bata sa pagbasa sa Santiago 2:14–17. Sa unsang paagi gipakita niini nga mga butang ang kamatuoran niini nga mga bersikulo?
-
Dapita ang pipila ka bata nga hilom nga basahon ang Santiago 1:22–27 ug ang uban basahon ang 2:14–18. Dayon dapita sila sa pagpaambit sa unsay ilang mabuhat aron mapakita nga sila mga tigtuman sa pulong. Sama pananglit, giunsa nila pagtuman ang ilang pakigsaad sa bunyag? Duna ba silay nailhan kinsa masakiton o nag-inusara nga mahimo nilang bisitahon? Unsaon man nila nga mas makaserbisyo pa sa ilang mga pamilya? Mahimo usab nimo silang pahinumdoman sa mga pulong nga tingali ilang nadunggan sa panagtigom alang sa sakramento karong adlawa. Unsaon nato nga mahimong mga tigtuman niini nga mga pulong?
“Si Abraham mituo sa Dios” (Santiago 2:23). Abraham on the Plains of Mamre [Si Abraham didto sa Kapatagan sa Mamre], ni Grant Romney Clawson
Makapili ako nga mabination nga mamulong.
Ang mga pulong nga atong isulti sa usag usa murag dili importante, apan sama sa gipamatuod ni Santiago, mahimong kini adunay gamhanan nga impluwensiya, alang sa maayo o daotan.
Posible nga mga Kalihokan
-
Aduna bay tawo sa ward, tingali usa sa mga bata nga imong gitudloan, nga nakatrabaho sa mga kabayo o dunay nahibaloan mahitungod sa mga sakayan? Mahimo nimo siyang dapiton sa paghatag og mga panabot mahitungod sa mga pagtulon-an ni Santiago diha sa Santiago 3:3–4 mahitungod sa paggamit og mabination nga mga pulong. O paghatag og pipila sa imong kaugalingong mga panabot. Unsa ang atong makat-onan mahitungod sa pagkontrolar sa atong mga dila gikan niini nga mga ehemplo?
-
Dapita ang mga bata sa pagbasa sa Santiago 3:1–13 ug sa pagdrowing og hulagway sa usa ka butang nga ilang nakit-an nga nagtudlo mahitungod sa pagkontrolar sa atong mga dila. Hatagi sila og panahon sa pagpaambit sa ilang mga hulagway ug sa unsay ilang nakat-onan. Kantaha og dungan ang usa ka awit mahitungod sa paggamit og mabination nga mga pulong, sama sa “Maayong Pulong Atong Gamiton” (Mga Himno, nu. 144).
-
Human marebyo og dungan ang Santiago 3:1–13, rebyoha ang mga sumbanan alang sa pinulongan diha sa Alang sa Kalig-on sa mga Kabatan-onan ([booklet, 2022], 12). Tabangi ang mga bata sa pagtakda og tumong aron mapalambo ang ilang pagpakigsulti sa uban, ug awhaga sila sa paghangyo sa Langitnong Amahan sa pagtabang kanila niini nga tumong.
Awhaga ang Pagkat-on diha sa Panimalay
Dapita ang mga bata sa pagbuhat og usa ka butang niini nga semana aron magamit ang unsay ilang nakat-onan sa klase, sama sa pag-ampo nga adunay pangutana sa Langitnong Amahan o sa pagpaningkamot nga mahimong mas mapailobon. Hangyoa sila sa pagpaambit sa ilang kasinatian sa sunod nga klase.
Pagpalambo sa Atong Pagtudlo
Tabangi ang mga bata nga mahimong aktibo. “Samtang ikaw magtudlo sa mga bata, tugoti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).