“Oktubre 16–22. 1 ug 2 Mga Taga-Tesalonica: ‘Sangkapan ang Nakulang sa Inyong [Hugot nga] Pagtuo,’” Dali, Sunod Kanako—Alang sa Primary: Bag-ong Tugon 2023 (2021)
“Oktubre 16–22. 1 ug 2 Mga Taga-Tesalonica,” Dali, Sunod Kanako—Alang sa Primary: 2023
Oktubre 16–22
1 ug 2 Mga Taga-Tesalonica
“Sangkapan ang Nakulang sa Inyong [Hugot nga] Pagtuo”
Samtang mainampoon ka nga mobasa sa 1 ug 2 Mga Taga-Tesalonica nga maghunahuna sa mga bata, makakita ka og mga baroganan nga kinahanglan nilang masabtan.
Dapita ang Pagpaambit
Sa leksiyon sa miaging semana, gidapit ba nimo ang mga bata sa paggamit sa unsay ilang nakat-onan sa pipila ka paagi? Ipagamit sa mga bata ang unang pipila ka minuto sa klase niini nga semana aron sa pagpaambit sa ilang mga kasinatian.
Itudlo ang Doktrina: Mas Gagmay nga mga Bata
Samtang mosunod ko sa mga sugo sa Dios, mahimo akong andam alang sa Ikaduhang Pag-anhi ni Jesukristo.
Wala kita masayod kon kanus-a mobalik ang Manluluwas dinhi sa yuta. Apan mahimo kitang magpaabot Kaniya ug mangandam alang sa Iyang pag-anhi.
Posible nga mga Kalihokan
-
Dapita ang usa ka inahan nga mamulong og kadiyot kon sama sa unsa ang maghulat sa pagkatawo sa iyang anak. Basaha ang 1 Mga Taga-Tesalonica 5:2–3, ug sultihi ang mga bata nga si Jesukristo moanhi pag-usab sa yuta, apan walay usa nga nasayod kon kanus-a gayod—sama sa usa ka inahan nga wala masayod kon kanus-a gayod ipakatawo ang iyang anak.
-
Hangyoa ang mga bata sa paghisgot og higayon nga nangandam sila alang sa usa ka biyahe o kalihokan. Unsa ang ilang gibuhat sa pagpangandam? Pagdala og maleta o bag, ug sugoa ang mga bata nga magpakaaron-ingnon nga nag-empake niini agig pagpangandam sa usa ka biyahe. Sa matag butang nga nagpakaaron-ingnon sila sa pag-empake, tabangi ang mga bata sa paghunahuna og usa ka paagi nga kita makapangandam sa pag-anhi og usab ni Jesus.
-
Basaha ang 1 Mga Taga-Tesalonica 5:6 ngadto sa mga bata, ug ipasabot nga kon wala kita mangandam sa pag-anhi pag-usab ni Jesus, susama ra kini nga nakatulog kita ug dili kita mahimong andam alang Kaniya. Dapita ang mga bata nga magpakaaron-ingnon nga natulog. Ipasabot nga kon mangandam kita, susama kini nga nagmata kita ug naghulat Kaniya. Dapita sila sa pagmata.
-
Kantaha og dungan ang usa ka awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 46–47).
Mitudlo si Pablo nga mahitabo ang apostasiya sa dili pa si Jesukristo moanhi pag-usab.
Ang Simbahan nga giestablisar ni Jesukristo sa kataposan nahiagom sa apostasiya, nagpasabot nga ang awtoridad sa pagkapari ug ang mga kamatuoran sa ebanghelyo gikuha gikan sa yuta. Nanagna si Pablo nga kini nga apostasiya, o “pagsupil,” mahitabo sa wala pa ang Ikaduhang Pag-anhi sa Manluluwas.
Posible nga mga Kalihokan
-
Human mabasa ang 2 Mga Taga-Tesalonica 2:3 ngadto sa mga bata, patabanga sila kanimo sa pagtukod og tore gamit ang plastik nga mga baso o mga bloke. Sultihi ang mga bata nga ang mga baso o mga bloke nagrepresentar sa importante nga mga parte sa tinuod nga Simbahan, sama sa mga kamatuoran sa ebanghelyo, sa pagkapari, mga pagsilyo sa templo, ug mga propeta. Human mamatay si Pablo ug ang ubang mga Apostoles, kini nga mga butang nawala, ug ang tinuod nga Simbahan wala na dinhi sa yuta sulod sa daghang katuigan. Dapita ang usa ka bata sa paglumpag sa tore, ug ipasabot nga kini mao ang gitawag nga Apostasiya o “pagsupil.” Sa dihang gibalik ni Jesukristo ang Iyang Simbahan, gitawag kini nga ang Pagpahiuli.
-
Ipakita ang usa ka Basahon ni Mormon ug mga hulagway sa propeta ug ang usa ka templo. Dapita ang mga bata sa pagsulti og “Apostasiya” kon imong itago ang mga butang diha sa bag ug “Pagpahiuli” kon imong ipagawas og balik ang mga butang.
-
Pagkanta og mga awit nga nagtudlo og mga kamatuoran nga gikuha panahon sa Apostasiya ug gipahiuli sa atong panahon, sama sa “Ang Simbahan ni Jesukristo,” “Ang [Pagkapari] Gipahiuli,” ug “Gusto Ko nga Makita ang Templo” (Songbook sa mga Bata, 48–49, 60, 99).
Itudlo ang Doktrina: Mas Magulang nga mga Bata
Samtang mosunod ko sa mga sugo sa Dios, mahimo akong andam alang sa Ikaduhang Pag-anhi ni Jesukristo.
Ang tambag ni Pablo makatabang kanato nga mahimong andam ug magbantay alang nianang mahinungdanon nga adlaw sa dihang ang Manluluwas moanhi sa yuta pag-usab.
Posible nga mga Kalihokan
-
Pagdapit og bata nga mobasa sa 1 Mga Taga-Tesalonica 5:1–6 samtang magsunod ang ubang mga bata. Human sa matag bersikulo, hangyoa ang usa ka bata sa pag-summarize kon unsa kaha sa iyang hunahuna ang gipasabot sa bersikulo. Mahimo nimong ipasabot nga “ang pagbalik sa Ginoo” nagpasabot sa Ikaduhang Pag-anhi ni Jesukristo. Nganong ang Ikaduhang Pag-anhi matandi ngadto sa usa ka kawatan sa kagabhion o usa ka babaye nga hapit na manganak?
-
Sultihi ang mga bata sa paghunahuna nga ang Manluluwas mobisita sa inyong klase bisan unsang orasa karong adlawa. Unsaon nato sa pag-andam alang sa Iyang pagbisita? Tabangi ang mga bata sa paghunahuna sa mga butang nga mahimo natong buhaton aron maandam ang atong kaugalingon alang sa adlaw nga mobalik na si Jesukristo. Sama pananglit, mahimo kitang maghinulsol, mopasaylo, mopalambo sa atong mga relasyon uban sa atong pamilya, mosunod sa propeta, magtinguha nga makabaton sa impluwensiya sa Espiritu Santo, ug motuman sa atong mga pakigsaad. Awhaga ang mga bata sa pagpili og usa ka butang nga ilang buhaton aron maandam ang ilang kaugalingon sa pagdawat sa Manluluwas sa Iyang Pag-anhi.
Mitudlo si Pablo nga mahitabo ang apostasiya sa dili pa si Jesukristo moanhi pag-usab.
Kon makasabot ang mga bata nga ang Simbahan ni Jesukristo ug ang Iyang ebanghelyo gikuha gikan sa yuta panahon sa Dakong Apostasiya, ang panginahanglanon sa Pagpahiuli mahimong mas klaro kanila.
Posible nga mga Kalihokan
-
Dapita ang usa sa mga bata sa pagbasa sa 2 Mga Taga-Tesalonica 2:1–3. Sumala niini nga mga bersikulo, unsay kinahanglan nga mahitabo sa dili pa “ang adlaw [ni Kristo],” nga nagpasabot sa Ikaduhang Pag-anhi? Unsay gipasabot sa pulong nga “pagsupil”? Seguroha nga ang mga bata nakasabot nga nangahulogan kini sa Dakong Apostasiya, nga nahitabo human sa kamatayon sa Apostoles sa Manluluwas. Mahimo nimong ipaambit ang impormasyon gikan sa “Hingpit nga Pagbiya” diha sa Giya ngadto sa mga Kasulatan (scriptures.ChurchofJesusChrist.org).
-
Tabangi ang mga bata sa paglista diha sa pisara sa pipila ka kamatuoran ug mga panalangin nga atong natagamtam tungod sa ebanghelyo. Papasa kini nga mga butang og tagsa-tagsa, ug pangutan-a ang mga bata kon sa unsang paagi nga lahi ang ilang kinabuhi kon wala kini nga mga butang. Ipasabot nga kini nga mga kamatuoran nawagtang panahon sa Dakong Apostasiya. Nganong importante man nga ang Simbahan ni Jesukristo ipahiuli sa yuta sa ulahing mga adlaw? Dapita ang mga bata nga “ipahiuli” o isulat og balik ang mga kamatuoran ug mga panalangin diha sa pisara.
Gusto sa Langitnong Amahan nga motrabaho ko.
Unsaon nimo sa pagtabang ang mga bata nga motan-aw sa trabaho isip usa ka panalangin, dili usa ka butang nga angayng likayan?
Posible nga mga Kalihokan
-
Dapita ang mga bata nga magpuli-puli sa pagbasa sa mga bersikulo gikan sa 2 Mga Taga-Tesalonica 3:7–13 ug sa pagpangita sa problema nga giatubang sa mga Santos. Nganong gusto man sa Langitnong Amahan nga motrabaho kita? Unsa ang mahitabo kon wala gayod kita makat-on sa pagtrabaho og maayo? Papuli-puliha ang mga bata sa pag-aksiyon og yano nga mga buluhaton samtang tag-anon sa ubang mga bata kon unsay ilang gibuhat.
-
Dapita ang mga bata sa paghisgot sa usa ka higayon dihang mitrabaho sila og maayo sa usa ka buluhaton, proyekto, o tumong. Unsa ang ilang gibati sa ilang kaugalingon sa dihang nahuman na sila? Unsay ipasabot sa “ayaw kamo pagtapol sa pagbuhat ug maayo”? (2 Mga Taga-Tesalonica 3:13). Unsay makatabang kanato nga magpadayon kon ang trabaho mabati nga lisod?
Awhaga ang Pagkat-on diha sa Panimalay
Dapita ang mga bata nga sultihan ang usa ka sakop sa pamilya o higala sa usa ka rason nganong mapasalamaton sila nga anaa kanato ang ebanghelyo dinhi sa kalibotan karon (ang pahina sa kalihokan niini nga semana makahatag kanila og mga ideya).
Pagpalambo sa Atong Pagtudlo
Suportahi ang mga ginikanan sa mga bata. “Ang mga ginikanan maoy labing importanting mga magtutudlo sa ebanghelyo sa ilang mga anak—anaa kanila ang labing dako nga responsibilidad ug ang labing dako nga gah[o]m sa pag-impluwens[i]ya sa ilang mga anak (tan-awa sa Deuteronomio 6:6–7). Samtang magtudlo ka sa mga bata diha sa simbahan, pagmainamp[o]on nga motinguha og mga paagi sa pagsuporta sa ilang mga ginikanan sa ilang mahinungdanong tahas” (Pagtudlo sumala sa Pamaagi sa Manluluwas, 25).