“Septyembre 11–17. 2 Mga Taga-Corinto 1–7: ‘Makig-uli Kamo sa Dios,’” Dali, Sunod Kanako—Alang sa Primary: Bag-ong Tugon 2023 (2022)
“Septyembre 11–17. 2 Mga Taga-Corinto 1–7,” Dali, Sunod Kanako—Alang sa Primary: 2023
Septyembre 11–17
2 Mga Taga-Corinto 1–7
“Makig-uli Kamo sa Dios”
Sugdi ang imong pagpangandam pinaagi sa pagbasa sa 2 Mga Taga-Corinto 1–7. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagtuon niini nga mga kapitulo, ug kini nga latid makahatag kanimo og mga ideya sa pagtudlo.
Dapita ang Pagpaambit
Pipila sa mga bata sa imong klase tingali naghimo og mga sulat niining semanaha mahitungod kon sa unsang paagi nga ang usa ka sakop sa pamilya maayo nga ehemplo sa usa ka disipulo ni Jesukristo (tan-awa sa latid niini nga semana diha sa Dali, Sunod Kanako—Alang sa mga Indibidwal ug mga Pamilya). Kon nakahimo sila, hangyoa sila daan sa dili pa magklase sa pagpaambit sa sulat diha sa klase. O hangyoa ang mga bata sa pagpaambit og laing butang nga ilang nakat-onan.
Itudlo ang Doktrina: Mas Gagmay nga mga Bata
Mohupay kanako ang Langitnong Amahan, ug makahupay ako sa uban.
Unsaon nimo paghatag sa mga bata og pagsalig nga ang Langitnong Amahan mohupay kanila? Unsaon nimo sila sa pag-awhag sa paghupay sa uban?
Posible nga mga Kalihokan
-
Ipakita sa mga bata ang pipila ka butang nga makahatag og kahupayan, sama sa usa ka habol o bendahe. Pangutan-a ang mga bata kon unsay makahupay kanila kon sila maguol o mahadlok o dunay ubang problema. Basaha ang 2 Mga Taga-Corinto 1:3–4 ngadto sa mga bata, ug ipasabot nga ang “kalisdanan” laing pulong alang sa lisod kaayo nga mga problema. Ipaambit ang pipila ka paagi diin ang Langitnong Amahan mihupay kanimo, ug ipamatuod nga mohupay usab Siya sa mga bata.
-
Ipakita ang mga hulagway sa mga tawo nga gibunyagan (tan-awa sa Libro sa mga Hulagway sa Ebanghelyo, mga nu. 103–4) samtang imong basahon ang 2 Mga Taga-Corinto 1:4 ngadto sa mga bata. Ipasabot nga kon kita bunyagan, nagsaad kita nga mohupay sa uban. Unsaon nato sa pagsunod sa tambag ni Pablo sa “[pag]dasig usab niadtong anaa sa tanang kalisdanan”?
Makapasaylo ko sa uban.
Pagpili gikan sa mosunod nga mga kalihokan—o paghimo og imong kaugalingon—aron makatabang sa paglig-on sa tinguha sa mga bata nga mopasaylo sa uban.
Posible nga mga Kalihokan
-
Ipasabot sa mga bata nga gusto ni Pablo nga pasayloon sa mga Santos sa Corinto ang usa ka tawo nga nakasala. Basaha ang 2 Mga Taga-Corinto 2:7–8, 10, ug dapita ang mga bata sa pagbutang sa ilang mga kamot tungod sa ilang kasingkasing sa matag higayon nga makadungog sila sa mga pulong nga pasayloa ug pasayloon.
-
Dapita ang mga bata sa pagdrama-drama kon unsay ilang buhaton sa mga sitwasyon nga dunay gibuhat nga dili maayo ang usa ka tawo. Papuli-puliha sila sa pagsulti og “Pasayloa ko” ug “Gipasaylo ko ikaw.” Unsaon nato sa pagtabang ang mga tawo nga masayod nga gipasaylo nato sila? Ipasabot nga usa ka paagi mao ang “pamatud-an … ang inyong gugma”, o magpakita og gugma ngadto kanila (2 Mga Taga-Corinto 2:8).
Nagtuo ako sa pagkamatinuoron.
Mitudlo si Pablo nga ang mga sulugoon ni Kristo “[mi]salikway … [sa] tanang tinago ug makauulawng mga buhat.” Pamalandongi ang mga paagi nga mapalig-on nimo ang tinguha sa mga bata nga mahimong matinuoron sa tanang butang.
Posible nga mga Kalihokan
-
Tabangi ang mga bata sa pagsag-ulo sa pulongan nga “Kami nagtuo sa pagkamatinuoron” (Mga Artikulo sa Hugot nga Pagtuo 1:13). Isulat kini nga pulongan diha sa mga pulseras nga papel nga mahimong butangan og dekorasyon sa mga bata ug isul-ob. Ipasabot nga ang pagkamatinuoron naglakip sa pagsulti sa kamatuoran.
-
Hangyoa ang mga bata sa pagpataas sa ilang mga kamot kon mosulti ka og usa ka butang nga tinuod ug ipaubos kini kon mosulti ka og butang nga dili tinuod. Paghimo og yano apan klaro nga pamahayag, sama sa “Dominggo karon” o “Aduna koy tulo ka ilong.” Balika ang kalihokan sa pipila ka higayon, nga papuli-pulihon ang mga bata nga maoy mosulti og tinuod ug dili tinuod nga mga pamahayag. Nganong gusto man ang Langitnong Amahan nga mosulti kita sa kamatuoran?
-
Itudlo ang Doktrina: Mas Magulang nga mga Bata
Mohupay kanako ang Langitnong Amahan, ug makahupay ako sa uban.
Ang paghinumdom kon giunsa sa Dios sa paghupay kanato makadasig sa mga bata sa paghatag og kahupayan ngadto sa uban.
Posible nga mga Kalihokan
-
Samtang imong basahon ang 2 Mga Taga-Corinto 1:3–4, hangyoa ang mga bata sa pagpaminaw alang sa tubag sa pangutana “Unsa ang gibuhat sa Dios alang kanato?” Tabangi ang mga bata sa paglista og mga paagi diin ang Dios naghupay kanato. Dapita ang mga bata sa pagpaambit og mga kasinatian sa dihang sila naguol o nabalaka o nahadlok ug ang Dios mihupay kanila.
-
Dapita ang mga bata sa pagpaambit og mga paagi nga kita makatuman sa atong pakigsaad sa bunyag sa paghupay sa uban (tan-awa sa Mosiah 18:9). Hatagi sila og panahon sa paghunahuna og tawo nga ilang kaila nga nagkinahanglan og kahupayan ug sa paghimo og plano aron sa pagtabang niana nga tawo.
Makapasaylo ko sa uban.
Mahimong lisod ang pagpasaylo sa uban kon dili sila mabination kanato. Apan ang mga bata nga imong gitudloan makasinati og gugma, kalinaw, ug kalipay samtang makat-on sila sa pagpasaylo.
Posible nga mga Kalihokan
-
Sultihi ang mga bata nga nakasala ang usa ka tawo sa Corinto ug “nakapasubo” sa mga Santos (tan-awa sa 2 Mga Taga-Corinto 2:5). Hangyoa ang mga bata sa pagsiksik sa 2 Mga Taga-Corinto 2:7–8 aron mangita sa unsay gusto ni Pablo nga buhaton sa mga Santos.
-
Pagpaambit og kasinatian sa dihang mipasaylo ka og usa ka tawo—o dunay tawo nga mipasaylo kanimo—ug ipasabot unsay imong gibati pagkahuman. Dapita ang mga bata sa pagpaambit sa ilang mga kasinatian sa pagpasaylo.
Ako “nagkinabuhi … pinaagi sa [hugot nga] pagtuo ug dili pinaagi sa … makita.”
Hunahunaa kon unsaon nimo sa pag-awhag ang mga bata sa pagsunod sa mga sugo sa Dios bisan kon dili nila makita ang mga panalangin nga ilang gitinguha dihadiha dayon.
Posible nga mga Kalihokan
-
Basaha ang 2 Mga Taga-Corinto 5:6–7 ug Alma 32:21 ngadto sa mga bata, ug hangyoa sila sa pagpangita og mga pulong ug mga pulongan nga makatabang sa pagpasabot kon unsa ang hugot nga pagtuo. Hangyoa sila sa pagsulat sa ilang mga kahulogan ug ipaambit kini sa usag usa.
-
Dapita ang usa sa mga bata sa pagpiyong sa iyang mga mata, ug hangyoa ang ubang mga bata sa paghatag og mga direksiyon aron sa pagtabang kaniya nga makakompleto og usa ka buluhaton sama sa pagtukod og usa ka tore gamit ang mga bloke o sa paglakaw tabok sa kwarto. Sa unsang paagi nga kini nga kalihokan makatabang kanato nga makasabot sa unsay gipasabot sa “nagkinabuhi … pinaagi sa [hugot nga] pagtuo” sa Dios?
-
Pagpaambit og kasinatian sa dihang nagkinabuhi ka pinaagi sa hugot nga pagtuo, ug awhaga ang mga bata sa pagpaambit og mga kasinatian.
Ang diosnon nga kasubo modala kanako ngadto sa paghinulsol.
Natural lamang nga mobati og kaulaw kon masakpan kita nga naghimo og sayop nga butang. Tabangi ang mga bata sa pag-ila niini nga mga pagbati gikan sa diosnon nga kasubo, nga mosangpot ngadto sa paghinulsol.
Posible nga mga Kalihokan
-
Ipasabot nga diha sa 2 Mga Taga-Corinto 7:8–10, naghisgot si Pablo kalabot sa usa ka sulat nga iyang gihimo ngadto sa mga Santos, nga maisogong nagpasidaan kanila mahitungod sa ilang mga sala. Basaha og dungan kini nga mga bersikulo. Nganong nalipay man si Pablo nga ang mga Santos nagmasulub-on? Ipasabot nga kini nga matang sa kasubo gitawag og diosnon nga kasubo.
-
Hangyoa ang mga bata sa paghunahuna og higayon sa dihang nakabuhat sila og sayop ug mibati og dili maayo mahitungod niini. Dapita sila sa pagpangutana sa ilang kaugalingon, “Nganong dili man maayo ang akong gibati?” ug dayon ipaambit ang ilang mga tubag. Isulat ang ilang mga tubag diha sa pisara (sama pananglit, “Nahadlok ko nga magkaproblema ko” o “Nasayod ko nga akong napakyas ang Langitnong Amahan” o “Napahilak nako ang usa ka tawo”). Hain sa mga tubag diha sa pisara ang daw sama sa “diosnon nga kasubo”? (2 Mga Taga-Corinto 7:10). Nganong ang diosnon nga kasubo mas maayo man kay sa ubang matang sa kasubo nga atong bation human makabuhat og sayop?
Awhaga ang Pagkat-on diha sa Panimalay
Dapita ang mga bata nga ipaambit ngadto sa ilang mga pamilya ang usa sa mga kalihokan sa klase karon, tingali atol sa family home evening.
Pagpalambo sa Atong Pagtudlo
Ipakita ang usa ka kasulatan. Pagpili og usa ka bersikulo sa kasulatan nga makahuluganon kanimo ug ipakita kini diha sa lawak klasehanan diin kanunay kining makita sa mga bata. Tingali mahimong magpuli-puli ang mga bata sa pagpili og kasulatan nga ipakita.