faatanoa o le vai papatisoga o le malumalu

4–10 Setema

1 Korinito 14–16

“O Le Atua E Le o le Atua ia o le Faasoesa, a o le Filemu”

A o e faitauina le 1 Korinito 14–16, o le a fesoasoani le Agaga Paia ia te oe ia e iloa le mea e aoao atu i tamaiti o lau vasega. Toe faamanatu lenei otootoga mo ni manatu faaopoopo.

aikona o le fefaasoaai

Valaaulia le Fefaasoaai

E mafai ona e amataina le lesona o lenei vaiaso i le faitauina leotele o le 1 Korinito 14:26 . Ta’u i tamaiti pe a tatou potopoto faatasi i le lotu, e mafai ona tatou fa’agae’etiaina (pe atia’e ma fesoasoani) i isi pe a tatou fefa’asoaa’i mea tatou te aoaoina. Fesili i tamaiti pe o le a se mea e mafai ona latou faasoa atu e faagaeetia ai se tasi i le vasega i le aso.

aikona o le aoao atu

Aoao atu le Aoaoga Faavae: Tamaiti Laiti

1 Korinito 15:12–22

E mafai ona ou ola faatasi ma le Tama Faalelagi pe a ou oti aua sa toetu mai Iesu Keriso.

E mafai faapefea ona e aoao atu ia tamaiti ona sa toetu Iesu Keriso o lea ua mafai ai ona tatou toe ola?

Gaoioiga e Mafai Ona Fai

• Toe faifai soo le fasifuaitau lenei faatasi ma tamaiti: “E toe faaolaina uma ia Keriso” (1 Korinito 15:22). Faaali atu se ata o le Faaola toetu (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga) pe faaali le vitio “Jesus Is Resurrected” (ChurchofJesusChrist.org). Faamalamalama atu o le a i ai se aso tatou te oti uma ai, ae ona sa toetu mai Iesu, o lea o le a tatou toe ola uma ai pe a tatou oti.

• Faaali atu i tamaiti se peleue, lea e faatusa i o tatou tino faaletino. A o tatou ola, e i ai o tatou agaga i totonu o o tatou tino, ma e mafai ona gaoioi o tatou tino (faamaulu le peleue). A tatou oti, e tuua e o tatou agaga o tatou tino faitino, ma e le mafai ona gaoioi o tatou tino (aveese le peleue ma tuu i luga o se laulau po o se nofoa e faatusa i se tino ua le o i ai se agaga). A tatou toetutu, e toe foi mai o tatou agaga i o tatou tino (toe faamaulu le peleue), ma e le toe tuueseesea lava. Tuu i tamaiti e feauaua’i e faamaulu le peleue ma toe aveese a o faamalamalama e se isi tamaitiiti le mea e tupu pe a tatou toetutu mai.

1 Korinito 15:29

E mafai ona ou papatiso mo tagata ua maliliu.

A o sauniuni tamaiti mo o latou lava papatisoga, mafaufau pe mafai faapefea ona e fesoasoani ia i latou e tulimatai atu foi i le avanoa e papatiso ai mo e ua maliliu.

Gaoioiga e Mafai Ona Fai

• Fesoasoani i tamaiti e mafaufau i mea e le mafai ona latou faia mo i latou lava. O ai e fesoasoani ia i latou e faia nei mea? Faaali se ata o se tasi o ou augatama ua oti e aunoa ma le papatisoina. Tau atu i tamaiti e uiga i lenei tagata, ma faamatala atu e manaomia e lenei tagata la tatou fesoasoani ina ia papatisoina.

• Fesili i tamaiti pe i ai ni tagata o o latou aiga ua o i le malumalu e faia papatisoga mo e ua maliliu. Faaali atu se ata o le faatanoa o le vai papatisoga o se malumalu. Fesili atu i tamaiti pe latou te iloa le mea e tupu iinei. Faamalamalama atu o totonu o le malumalu e mafai ona tatou papatiso ai mo tagata o e ua maliliu ae le’i papatisoina. Ona mafai lea e na tagata ona filifili pe latou te taliaina le papatisoga.

1 Korinito 15:40-41

E finagalo le Tama Faalelagi ia ou ola faatasi ma Ia i le malo selesitila.

E mafai faapefea ona e aoao atu i tamaiti e uiga i malo selesitila, terasitila, ma le telesitila? E mafai ona fesoasoani gaoioiga nei.

Gaoioiga e Mafai Ona Fai

• Tusi i le laupapa le selesitila, terasitila, ma le telesitila. Fesoasoani i tamaiti e a’o le ta’uga o nei upu.

• Faaali ni ata o le la, masina, ma fetu. Valaaulia tamaiti e faatulaga lelei i latou mai i le e sili ona malamalama seia oo i le e itiiti le malamalama. Faitau i tamaiti le 1 Korinito 15:40–41 (tagai foi Faaliliuga a Iosefa Samita i le fuaiupu 40, vaefaamatalagaa). Faamalamalama atu o le la, masina, ma fetu e faatusa i malo e mafai ona tatou nonofo ai pe a tatou toetutu. I le malo selesitila, e mafai ona tatou nonofo ai ma le Tama Faalelagi.

• Tuu atu i tamaiti se kopi o le itulau o gaoioiga o lenei vaiaso e valivali. A o latou valivali, faasoa atu ia i latou ou lagona e uiga i le Faaola ma mea ua Ia faia ina ia mafai ai e i tatou ona toe nonofo faatasi ma le Tama Faalelagi.

la oso

“E ese le pupula o le la” (1 Korinito 15:41).

aikona o le aoao atu

Aoao atu le Aoaoga Faavae: Tamaiti Matutua

1 Korinito 15:12–22

Ona o Iesu Keriso ma Lona Toetu, o le a ou toetu ai.

Pe o malamalama tamaiti o loo e faiaoga ai i le taua o le Toetu o Iesu Keriso? E mafai ona fesoasoani manatu nei.

Gaoioiga e Mafai Ona Fai

• Valaaulia ia tamaiti e feauaua’i i le faitauina o fuaiupu i le 1 Korinito 15:12–22, ma vaavaai mo tali i le fesili “Mata o le a se mea e tupu pe ana leai se toetu?”

• Valaaulia ia tamaiti e faatino mai taga pe faapefea ona faamalamalama atu le toetu i se tasi. Mo ni manatu, e mafai ona latou toefaamanatu se pese e uiga i le Toetu o le Faaola, e pei o le “Pe Na Toe Soifua Moni Mai ea Iesu?” (Tusipese a Tamaiti, 45). Tagai foi i le vitio “Until We Meet Again” (ChurchofJesusChrist.org). Tuu atu lau molimau i le Toetu o Keriso.

1 Korinito 15:12–13, 20–22, 29

E mafai ona ou saunia e alu i le malumalu e papatiso mo e ua maliliu.

O le papatisoga mo e ua maliliu o se galuega fiafia o le alofa mo o tatou tuaa. E mafai faapefea ona e fesoasoani i tamaiti ia saunia e auai i lenei galuega?

Gaoioiga e Mafai Ona Fai

• Faitau le 1 Korinito 15:29. O le a le mea na faia e le Au Paia i ona po o Paulo ua tatou faia foi i ona po nei? Fesili i tamaiti pe aisea tatou te papatiso ai mo e ua maliliu. Afai e tatau ai, faamalamalama atu o le toatele o o tatou augatama, sa le’i maua le avanoa e papatiso ai ma faamau i lenei olaga. I totonu o le malumalu, e mafai ona tatou papatiso ai ma faamau mo i latou.

• I nai aso a o loma le vasega, talosaga i se matua o se tasi o tamaiti e fesoasoani i lana tama e sau sauniuni e faasoa mai le gafa o lona aiga, pe faamatala se tala e uiga i se augatama. E mafai foi ona e faasoa atu e uiga i ou lava augatama.

• Valaaulia se tasi o le au epikopo po o se talavou i le tou uarota e faasoa mai ni nai mea e mafai e tamaiti ona fai e saunia ai e ulu atu i le malumalu. Valaaulia tamaiti e faaopoopo mai o latou manatu. Valaaulia i latou e faia se sini e o i le malumalu i se aso.

1 Korinito 15:40-41

A ou toetu, e mafai ona ou nofo i le malo selesitila.

Ina ia aoao atu i tagata i Korinito e uiga i tino o le a tatou maua i le Toetutu, sa ta’u atu e Paulo ia tikeri e tolu o le mamalu: selesitila, terasitila, ma le telesitila.

Gaoioiga e Mafai Ona Fai

• Faitau le 1 Korinito 15:40–41 ma valaaulia se tamaitiiti e tusi se ata o le la, masina, ma le fetu i le laupapa. Fai i tagata o le vasega e faailoa mai pe o le fea ituaiga tino toetu e faatusa i ai ata taitasi.

• Usu faatasi se pese e faatatau i le autu, e pei o le “Ia Tuu Mai E Le Alii Se Malumalu” (Tusipese a Tamaiti, 73). Pe faaali le vitio “Our Eternal Life” (ChurchofJesusChrist.org). O le a se mea o aoao mai e le pese po o le vitio ia i tatou e uiga i le sauniuni e nofo i le mamalu selesitila?

• Faamalamalama atu sa vaaia e Iosefa Samita se faaaliga lea na ia vaai ai i malo e tolu lea e fetaui ma ituaiga o tino o loo faamatala mai e Paulo. Fesoasoani i tamaiti e sue mai ia fasifuaitau mai le Mataupu Faavae ma Feagaiga 76:50–53, 70; 76:71–79; 76:81–82 o loo faamatala mai ai nei malo e tolu.

aikona o le aoaoina

Uunaia le Aoaoina i le Aiga

Valaaulia ia tamaiti e fai i o latou matua e faamatala atu ia i latou se tala e uiga i se tasi o o latou augatama. E mafai ona latou faasoa mai le tala i le vasega i le vaiaso a sau.

Faaleleia o Lo Tatou Aoao Atu

Fautuaina tamaiti e fai fesili. “Taumafai e tagai atu i [fesili a tamaiti] o ni avanoa, ae le o se faalavelave po o ni faalavefau i lau lesona. … O na fesili e tuuina atu ai ia te oe ni malamalamaaga taua e uiga i mea o loo mafaufau i ai tamaiti, o a popolega o ia i latou, ma pe faapefea ona latou tali atu i mea o loo latou aoaoina. Fesoasoani ia latou vaai o tali i a latou fesili e mafai ona maua i totonu o tusitusiga paia ma upu a perofeta soifua” (Aoao Atu i le Ala o le Faaola, 25–26).

itulau o gaoioiga: malo selesitila, terasitila, ma le telesitila