“Mayo 22–28. Joseph Smith—Mateo 1; Mateo 24–25; Marcos 12–13; Lucas 21: ‘Inig-Anhi sa Anak sa Tawo,’” Dali, Sunod Kanako—Alang sa Primary: Bag-ong Tugon 2023 (2022)
“Mayo 22–28. Joseph Smith—Mateo 1; Mateo 24–25; Marcos 12–13; Lucas 21,” Dali, Sunod Kanako—Alang sa Primary: 2023
The Second Coming [Ang Ikaduhang Pag-anhi], ni Harry Anderson
Mayo 22–28
Joseph Smith—Mateo 1; Mateo 24–25; Marcos 12–13; Lucas 21
“Inig-Anhi sa Anak sa Tawo”
Pamalandongi kon unsay gikinahanglan nga makat-onan sa mga bata nga imong gitudloan sa Joseph Smith—Mateo 1; Mateo 24–25; Marcos 12–13; ug Lucas 21. Ayaw pagpanagana sa pagpahiangay sa mga ideya alang sa mas magulang nga mga bata dinhi niini nga latid alang sa mas gagmay nga mga bata ug vice versa.
Dapita ang Pagpaambit
Pagdala sa klase og usa ka butang o hulagway nga may kalabotan ngadto sa usa sa mga sambingay o mga istorya sa basahonon niini nga semana (sama sa lana nga magrepresentar sa napulo ka dalagang birhen o mga sensilyo nga magrepresentar sa mga puntil nga salapi o sa gagmayng mga salapi nga tumbaga sa biyuda). Hangyoa ang mga bata sa pagpaambit sa unsay ilang nahibaloan mahitungod sa sambingay o istorya.
Itudlo ang Doktrina: Mas Gagmay nga mga Bata
Sa dili pa moanhi pag-usab si Jesus, ang ebanghelyo isangyaw sa tibuok kalibotan.
Usa ka timailhan nga hapit na mobalik si Jesus mao ang pagsangyaw sa Iyang ebanghelyo sa tibuok kalibotan. Ang mga bata makatabang sa pagtuman niini nga panagna pinaagi sa pagpaambit sa ebanghelyo.
Posible nga mga Kalihokan
-
Pagpakita og usa ka mapa, globo, o litrato sa kalibotan (tan-awa sa Libro sa mga Hulagway sa Ebanghelyo, nu. 3) ug tabangi ang mga bata nga moingon, “Kini nga Ebanghelyo … isangyaw diha sa tibuok nga kalib[o]tan” (Joseph Smith—Mateo 1:31). Nganong gusto man sa Dios nga ang tanan Niyang mga anak makadungog sa Iyang ebanghelyo?
-
Dapita ang mga bata sa pagmartsa nga magpundo samtang kantahon ninyo og dungan ang usa ka awit mahitungod sa pagpaambit sa ebanghelyo, sama sa “Gusto Ko Karon nga Mamisyonaryo” o “Gitawag sa Pagserbisyo” (Songbook sa mga Bata, 90, 94-95).
-
Unsa ang pipila ka paagi nga makapaambit kita sa ebanghelyo?
Ang ebanghelyo isangyaw ngadto sa tibuok kalibotan. Litrato sa Maayong Kabubut-on sa NASA Johnson Space Center
Akong magamit ang mga gasa nga gihatag sa Dios kanako.
Ang gagmay nga mga bata nagdiskobre sa ilang mga gasa ug mga abilidad. Tabangi sila nga makasabot nga kini nga mga gasa ug mga abilidad nagagikan sa Langitnong Amahan.
Posible nga mga Kalihokan
-
Pagdala og pipila ka sensilyo nga magamit samtang imong isaysay ang sambingay sa mga puntil nga salapi, nga makita sa Mateo 25:14–30. Mahimo kang mohangyo og tulo ka bata sa pagrepresentar sa tulo ka sulugoon. Ipasabot nga sa panahon ni Jesus, ang mga puntil nga salapi nagpasabot sa kwarta, apan karon ang mga puntil nga salapi mahimong magpasabot sa atong mga gasa ug mga abilidad.
-
Hangyoa ang mga bata sa pagngalan og mga paagi nga ang ilang mga ginikanan, mga igsoon, mga magtutudlo, o mga higala nakatabang kanila. Unsa nga mga talento ang anaa niini nga mga tawo nga nakatabang kanila sa pagserbisyo sa uban?
-
Paghimo og mubo nga sulat ngadto sa mga bata nga magsulti sa matag usa kanila mahitungod sa mga gasa o mga abilidad nga imong namatikdan diha kanila. Samtang imong ipaambit sa matag usa sa mga bata ang mga gasa nga imong nakita kanila, awhaga sila sa pagpalambo sa ilang mga gasa ug sa paggamit niini sa pagserbisyo sa uban.
Gusto ni Jesus nga moserbisyo ko sa uban.
Giserbisyohan nato ang Langitnong Amahan ug si Jesukristo pinaagi sa pagserbisyo sa mga tawo sa atong palibot. Tabangi ang mga bata sa paghunahuna og mga paagi nga sila makaserbisyo sa uban.
Posible nga mga Kalihokan
-
I-summarize ang sambingay diha sa Mateo 25:34–46. Tabangi ang mga bata nga makasabot nga kon nagserbisyo kita sa uban, nagserbisyo kita ni Jesus.
-
Ipataas ang litrato sa usa ka bata nga adunay litrato ni Jesus nga nakatago sa luyo niini. Unsa ang atong mahimo aron sa pagserbisyo niini nga bata? Tangtanga ang litrato sa bata ug ipasabot nga kon kita nagserbisyo sa usag usa, kita nagserbisyo ni Jesus.
-
Dapita ang mga bata sa pagdrowing og mga hulagway sa ilang kaugalingon nga nagserbisyo sa uban sa mga paagi nga gihulagway sa Manluluwas diha sa Mateo 25:35–36. Hangyoa ang ubang mga bata sa pagtagna kon unsa ang ilang gidrowing.
-
Dapita ang mga bata sa pagpaambit og mga kasinatian sa dihang ang usa ka tawo mipakita og Kristohanong pagserbisyo ngadto kanila o sa ilang mga pamilya.
Itudlo ang Doktrina: Mas Magulang nga mga Bata
Sa dili pa moanhi pag-usab si Jesus, ang ebanghelyo isangyaw sa tibuok kalibotan.
Ang mga bata nga imong gitudloan makatabang sa pagsangyaw sa ebanghelyo sa tibuok kalibotan sa wala pa ang Ikaduhang Pag-anhi sa Manluluwas.
Posible nga mga Kalihokan
-
Dapita ang mga bata sa pagpaambit og mga panalangin nga ilang nadawat o madawat tungod kay sila mga miyembro sa Simbahan ni Kristo. Basaha og dungan ang Joseph Smith—Mateo 1:31, ug pangutan-a ang mga bata kon sa unsang paagi nga ang ebanghelyo makapanalangin sa mga anak sa Dios sa tibuok kalibotan.
-
Ipakita sa mga bata ang usa ka mapa sa kalibotan o sa inyong nasod, ug tabangi sila sa pag-ila sa pipila ka dapit diin misangyaw sa ebanghelyo ang usa ka sakop sa pamilya o higala nga nagmisyon.
-
Dapita ang pipila ka bata nga motungha nga andam nga magpaambit kon sa unsang paagi nga ang mga sakop sa ilang pamilya o ang ilang mga katigulangan nakahibalo sa ebanghelyo.
-
Hangyoa ang matag bata sa pagsulat sa ngalan sa usa ka tawo nga mahimo niyang istoryahan mahitungod kang Jesukristo o dapiton sa simbahan. Hangyoa usab ang mga bata sa paglista sa mga butang nga ilang mabuhat aron mahimong mga misyonaryo karon.
Responsable ako sa akong kaugalingon nga pagkakabig ngadto kang Jesukristo.
Ang sambingay sa napulo ka dalagang birhen nagtudlo nga dili nato mahulaman ang atong pagkakabig ngadto sa Manluluwas gikan sa uban. Unsaon nimo pagtabang ang mga bata nga angkonon ang responsibilidad sa ilang kaugalingon nga pagkakabig?
Posible nga mga Kalihokan
-
Hangyoa ang usa ka bata nga motungha nga andam sa pagpaambit kon sa unsang paagi nga siya nakakat-on diha sa panimalay niini nga semana mahitungod sa sambingay sa napulo ka dalagang birhen.
-
Pagdrowing og de lana nga lamparilya diha sa pisara, ug sulati kini og pagpamatuod. Hatagi ang matag bata og piraso sa papel nga giporma og tinulo sa lana, ug hangyoa ang matag bata sa pagsulat niini og usa ka butang nga iyang buhaton aron mahimong mas makabig ngadto sa Manluluwas. Ipapilit ang ilang mga tulo diha sa pisara palibot sa lampara.
-
Dapita ang mga bata sa pagtabang kanimo sa paghimo og lista sa mga butang nga buhaton aron mangandam alang sa usa ka espesyal nga bisita. Sa unsang paagi nga kini nga mga butang susama o lahi sa mga paagi nga mahimo kitang mangandam sa espirituwal nga paagi alang sa Ikaduhang Pag-anhi sa Manluluwas?
-
Sa lima ka ginunting nga papel, pagsulat og mga butang nga dili puwedeng mahulaman. Sa laing lima ka ginunting nga papel, pagsulat og mga butang nga puwedeng mahulaman. Isagol-sagol ang mga ginunting, ug hangyoa ang mga bata sa paghan-ay niini ngadto sa duha ka grupo. Basaha og dungan ang Mateo 25:1–13. Nganong importante man nga dili magsalig sa uban alang sa atong pagkakabig ngadto kang Jesukristo?
Atol sa Kataposang Paghukom, mohatag kita sa Ginoo og usa ka subay bahin sa atong kinabuhi.
Human sa Pagkabanhaw, ang Ginoo mohukom kanato base sa atong pagkamasulundon sa Iyang mga sugo ug pagdawat sa Iyang maulaong sakripisyo. Ang sambingay sa mga puntil nga salapi ug ang sambingay sa mga karnero ug mga kanding nagtudlo kanato mahitungod niining Kataposan nga Paghukom.
Posible nga mga Kalihokan
-
Dapita ang katunga sa klase sa pagbasa sa Mateo 25:14–30 ug ang laing katunga sa pagbasa sa Mateo 25:31–46. Hangyoa ang mga grupo sa pagdrama-drama sa mga sambingay alang sa klase. Unsa ang gitudlo sa Ginoo kanato dinhi niini nga mga sambingay?
-
Dapita ang mga bata sa pagbasa sa Mateo 25:35–36 nga magpares ug sa paghimo og lista sa mga butang nga ilang mahimo aron sa pagpakita sa ilang gugma alang ni Jesukristo.
Awhaga ang Pagkat-on diha sa Panimalay
Hangyoa ang mga bata sa pagpaambit ngadto sa ilang mga pamilya sa mga paagi nga mahimo silang mas maayo nga mga misyonaryo ug sa paghisgot uban sa ilang mga pamilya mahitungod sa mga tawo nga mapaambitan nila sa ebanghelyo.
Pagpalambo sa Atong Pagtudlo
Paminawon o idrama-drama ang usa ka istorya. Tungod kay ang mga bata ganahan og mga istorya, pangita og mga paagi nga maapil sila diha sa mga istorya sa kasulatan nga imong ipaambit. Mahimo silang magkupot og mga litrato o mga butang, magdrowing og mga hulagway sa istorya, magdrama-drama sa istorya, o motabang sa pagsaysay sa istorya. Balika ang mga istorya aron sa pagtabang kanila sa pag-ila sa importanting mga detalye ug mga pagtulon-an sa ebanghelyo.