O Iesu o loo faatuina le tagata mai le moega

27 Fepuari–5 Mati

Mataio 8; Mareko 2–4; Luka 7

“Ua E Ola i Lou Faatuatua”

A o e faitauina le Mataio 8; Mareko 2–4; ma le Luka 7 i lenei vaiaso, mafaufau i tamaiti o loo e aoaoina. Tatalo ina ia musuia oe e le Agaga Paia i manatu o le a fesoasoani ia i latou e iloa ai upumoni i nei mataupu.

aikona o le fefaasoaai

Valaaulia le Fefaasoaai

Fai i tamaiti e faasoa mai se tala ia Iesu o faatinoina se vavega (tagai i le lisi o vavega i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). E mafai foi ona e faaali atu ata e fesootai i ai (e pei o le Tusi Ata o le Talalelei, nu. 40).

aikona o le aoao atu

Aoao atu le Aoaoga Faavae: Tamaiti Laiti

Mataio 8; Mareko 2–3; Luka 7

E i ai le mana o Iesu e faatino ai vavega.

A o e faitau i vavega a le Faaola o le faamalologa, mafaufau pe o a vavega e faasoa atu. E mafai faapefea ona e fesoasoani i tamaiti o loo e faiaoga ai ia malamalama i le matafaioi a le faatuatua i vavega na faatino e Iesu?

Gaoioiga e Mafai Ona Fai

• Faasoa atu le tala i le tamaloa na ma’i supa mai le Mareko 2:1–12 Mo se fesoasoani, tagai “Mataupu 23: O Le Tagata Na Le Mafai Ona Savali” (i le Tala o le Feagaiga Fou, 57–58, po o le vitio talafeagai o loo i luga o le ChurchofJesusChrist.org). Faamalamalama atu i tamaiti o le tamaloa ma’i supa sa le mafai ona savali. Fesoasoani ia latou iloa na faamaloloina lenei tamaloa e le Faaola.

• Valaaulia tamaiti e talanoa e uiga i se taimi na mama’i ai. Faamatala se tasi o tala ia Iesu o loo faamaloloina e mama‘i, e pei o le Mataio 8:1–4, 5–13, 14–15; Mareko 3:1–5; Luka 7:11–16. Valaaulia tamaiti e toe faamatala le tala ia latou lava upu. Molimau atu e mafai e le mana o Iesu ona faamalolo, faamanuia, ma faamafanafana i tatou.

Mataio 8; Mareko 2–3; Luka 7

E mafai ona ou faaali atu le alofa mo isi e pei ona sa faia e Iesu.

Sa faaalia e Iesu le alofa sili e ala i le faamaloloina o e mama’i ma mafatia. Mafaufau loloto pe faapefea ona e aoao atu tamaiti e faaalia le agalelei mo tagata e manaomia le fesoasoani .

Gaoioiga e Mafai Ona Fai

• Filifili se tala se tasi pe sili atu e uiga ia Iesu o faaalia le alofa i se tasi e le tagolima, e pei o tala o loo i le Mataio 8:1–4, 5–13, 14–15; Mareko 2:1–12; 3:1–5; Luka 7:11–16. (Tagai foi i le vitio “Widow of Nain” i le ChurchofJesusChrist.org.) Faasoa atu se taimi na faaalia ai e se tasi le alofa mo oe ina ua e manaomia se fesoasoani ma pe na faapeī ou lagona. Valaaulia tamaiti e faasoa mai o latou lava aafiaga.

• Faaali le vitio “Gordon Hinckley: Lessons I Learned as a Boy” po o le “The Coat” (ChurchofJesusChrist.org). Na faapefea e tamaiti i nei vitio ona mulimuli i le faataitaiga a Iesu? Valaaulia tamaiti e faasoa mai isi tulaga atonu na i ai se tasi na manaomia se fesoasoani. O le a se mea e mafai ona tatou faia e fesoasoani ai ia i latou?

• Usu se pese e faatatau i le alofa ma le agalelei i isi, e pei o le “O Le Agalelei e Amata Ia Te A’u” (Tusipese a Tamaiti, 83).

O Iesu i le vaa o loo faatoafilemuina le matagi

Mai le Fefe i le Faatuatua, saunia e Howard Lyon

Mareko 4:35–41

A ou fefe pe i ai i se tulaga matautia, e mafai e Iesu ona fesoasoani mai ia te au ia ou maua le filemu.

O le tala ia Iesu na faafilemuina se matagi e mafai ona fesoasoani i tamaiti ia iloa e mafai e Ia ona avatu ia i latou le filemu pe a latou lagonaina le fefe.

Gaoioiga e Mafai Ona Fai

• Fesoasoani i tamaiti e manatu faapea o loo i ai i luga o se vaa a o e faitauina le Mareko 4:35–41. (Tagai foi “Mataupu 21: Ua Faatonu e Iesu ia Matagi ma Galu,” i le Tala o le Feagaiga Fou, 53, po o le vitio talafeagai o loo i le ChurchofJesusChrist.org.) Fai atu i tamaiti e mafaufau pe o a ni o latou lagona pe ana faapea sa latou i ai iina. O anafea na fefefe ai tamaiti? Na faapefea ona latou maua le mafanafana?

• Valaaulia tamaiti e fai ni leo o se afā ma taofi pe a fai atu se tasi, “Faalologo ia, ina malū ia.” Molimau atu e mafai e Iesu ona aumaia ia i tatou le filemu pe a i ai se afā i fafo, e mafai ona Ia aumaia le filemu i o tatou loto pe a tatou lagona le mafatia i totonu.

• Aoao tamaiti i taga e o faatasi ma le fuaiupu lona tolu o le“Tau Mai Tala ia Iesu” (Tusipese a Tamaiti, 57), ma usu faatasi le fuaiupu a o faia taga.

aikona o le aoao atu

Aoao atu le Aoaoga Faavae: Tamaiti Matutua

Mataio 8; Mareko 2–3; Luka 7

E mafai e Iesu ona faia vavega i lo’u olaga pe a ou faatuatua ia te Ia.

Sa faia e Iesu vavega e tele i le taimi o Lana galuega i la le tino. E mafai faapefea ona e fesoasoani ia iloa e tamaiti o loo tutupu lava vavega i aso nei?

Gaoioiga e Mafai Ona Fai

• Fai i tamaiti e filifili se tasi o vavega nei e faitau ma tusi ai se ata: Mataio 8:1–4, 5–13, 14–15; Mareko 2:1–12; 3:1–5; Luka 7:11–16. Valaaulia tamaiti e faamatala mai i le vasega a latou ata. O le a se mea ua tatou aoao e uiga ia Iesu mai i nei tala?

• Fai i tamaiti e faatino mai pe o a latou lagona pe a mama’i, faanoanoa, fefefe, pe popole. E mafai faapefea ona fesoasoani Iesu ia i tatou pe a tatou maua nei lagona? Molimau atu e mafai e Iesu ona fesoasoani i tamaiti i nei tulaga uma.

• Valaaulia tamaiti e faasoa mai ni aafiaga ina ua latou maua pe maua e se tasi latou te iloa se faamanuiaga faaleperisitua. Na faapefea ona faamaloloina pe faamanuiaina lena tagata?

Mareko 2:15–17; Luka 7:36–50

E alofa Iesu ia i tatou e tusa lava pe tatou te agasala ma manao e fesoasoani ia tatou salamo.

O tala o i le Mareko 2:15–17 ma le Luka 7:36–50 e mafai ona fesoasoani i tamaiti ia malamalama e alofa Iesu Keriso ia i tatou e tusa lava pe tatou te agasala. E finagalo o Ia e fesoasoani ia i tatou ia salamo ma faalatalata atu ia te Ia.

Gaoioiga e Mafai Ona Fai

• Tusi le E faapefea lagona o Iesu e uiga i le agasala? ma le E faapefea lagona o Iesu e uiga ia i tatou pe a tatou agasala? i luga o le laupapa. Fai i tamaiti e mafaufau e uiga i nei fesili a o latou faitauina faatasi le Mareko 2:15–17 ona faasoa mai lea o a latou tali. (Atonu e te manao e faitau faatasi le “Telona” i le Taiala i Tusitusiga Paia [scriptures.ChurchofJesusChrist.org].) Aisea e taua ai le iloa e alofa Iesu ia i tatou, e ui lava tatou te le atoatoa? E mafai faapefea e le iloaina o lenei mea ona fesoasoani ia i tatou pe a manaomia ona tatou salamo?

• I ni nai aso a o lei amataina le vasega, valaaulia se tasi o tamaiti ma se tagata o le aiga e sau saunia i le vasega e faasoa mai le tala o i le Luka 7:36–50. E mafai ona latou tusia ni ata e faaalia ai vaega o le tala e faaali atu i le vasega. Talanoa ma tamaiti po o le a le mea atonu e finagalo le Alii tatou te aoaoina mai lenei tala.

Mareko 4:35–41

A ou fefe pe i ai i se tulaga lamatia, e mafai e Iesu ona fesoasoani mai ia te au ia ou maua le filemu.

E tatau i tamaiti ona iloa e mafai e le Faaola ona avatu ia i latou le filemu pe a latou feagai ma afā o le olaga—i le taimi nei ma le lumanai.

Gaoioiga e Mafai Ona Fai

• Fai i se tamaitiiti e faaaoga le Mareko 4:35–41 ma le ata o Iesu o loo Faatoafilemuina le Afa (Tusi Ata o le Talalelei, nu. 40) e faamatala ai le tala ia Iesu o faatoafilemuina le afā. Fai atu i tamaiti e faamatala pe o a ni o latou lagona pe ana faapea sa latou i ai iina.

• Valaaulia tamaiti e faasoa mai aafiaga ina ua latou lagonaina le filemu sa latou tatalo ai mo se fesoasoani. Faamanatu ia i latou o lenei filemu e sau mai i le Faaola.

• Tuu atu i tamaiti taitasi se pepa ua tusi ai se ao timu, ma fai i ai e tusi ai i luga se tofotofoga atonu o feagai ma se isi. Tuu uma ao i luga o le laupapa, e ufiufi ai se ata o le Faaola. Valaaulia se tamaitiiti e aveese mai se ao se tasi ma fautua atu ni auala e mafai ona fesoasoani ai i se tasi o i ai lena faigata ina ia maua le filemu. A uma ona aveese uma ao, molimau atu i le mana o le Faaola e faatoafilemuina afā i o tatou olaga.

aikona aoaoina

Uunaia le Aoaoina i le Aiga

Fesoasoani i tamaiti e tusi i lalo se gaoioiga o le auauna atu o le a latou faia mo se tasi i lenei vaiaso.

Faaleleia o Lo Tatou Aoao Atu

E tiotio tamaiti. E i ai taimi atonu e te manatu ai, o le aumalolosi o tamaiti o se mea ua faalavelave i le aoaoina. Ae e mafai ona e galue i o latou natura tiotio e ala i le valaaulia o i latou e faatino mai se tala pe fai ia taga e o faatasi ma mea na tutupu i le pese po o le mau. (Tagai Aoao Atu i le Ala a le Faaola,25.)

itulau o gaoioiga: Pe a ou fefe pe i ai i se tulaga lamatia, e mafai e Iesu ona fesoasoani mai ia te au ia ou maua le filemu