“Pebrero 20–26. Mateo 6–7: ‘Ang Iyang Pagtudlo Inubanan man sa Awtoridad,’” Dali, Sunod Kanako—Alang sa Primary: Bag-ong Tugon 2023 (2022)
“Pebrero 20–26. Mateo 6–7,” Dali, Sunod Kanako—Alang sa Primary: 2023
Jesus Teaching the People by the Seashore [Si Jesus nga Nagtudlo sa mga Tawo sa Daplin sa Baybayon], ni James Tissot
Pebrero 20–26
Mateo 6–7
“Ang Iyang Pagtudlo [Kanila] Inubanan man sa Awtoridad”
Sugdi pinaagi sa pagbasa sa Mateo 6–7, nga maghunahuna sa mga bata nga imong gitudloan. Unsa nga mga mensahe gikan niini nga mga kapitulo ang kinahanglan nilang madungog? Ang Dali, Sunod Kanako—Alang sa mga Indibidwal ug mga Pamilya ug kini nga latid makatabang sa paghatag kanimo og mga ideya sa pagtudlo kon gikinahanglan.
Dapita ang Pagpaambit
Hangyoa ang mga bata sa pagpaambit kon unsay ilang gibuhat sa miaging semana aron mahimong kahayag o ehemplo sa usa ka tawo.
Itudlo ang Doktrina: Mas Gagmay nga mga Bata
Makaampo ako sa akong Langitnong Amahan sama sa gibuhat ni Jesus.
Ang mga bata makakat-on sa pag-ampo pinaagi sa pagpaminaw sa mga pag-ampo sa uban. Unsaon nimo sa pagtabang kanila nga makakat-on gikan sa pag-ampo ni Jesukristo niini nga mga bersikulo?
Posible nga mga Kalihokan
-
Rebyoha ang mga pagtulon-an ni Jesus mahitungod sa pag-ampo nga makita diha sa Mateo 6:5–13. Mahimo nimong gamiton ang “Kapitulo 20: [Si] Jesus Mitudlo mahitungod sa Pag-ampo” (diha sa Mga Istorya sa Bag-ong Tugon, 51–52).
-
Gamita ang pahina sa kalihokan karong semanaha aron sa pagtabang sa mga bata sa paghinumdom sa lainlaing parte sa pag-ampo.
-
Drowinga pinaagi sa pagsubay [trace] ang kamot sa matag bata diha sa usa ka piraso nga papel. Hisgoti kon unsay kinahanglan natong buhaton sa atong mga kamot ug bukton samtang mag-ampo kita. Sa matag sinubay nga drowing, pagsulat og usa ka butang nga atong mahimo aron sa pagpakita og balaang pagtahod kon mag-ampo kita (sama pananglit, pagduko sa atong ulo, pagpiyong sa atong mga mata, ug uban pa).
-
Kantaha uban sa mga bata ang usa ka awit mahitungod sa pag-ampo (sama sa “Iduko ang Atong Ulo” (Songbook sa mga Bata, 18b), ug ipaambit ang imong pagpamatuod mahitungod sa gahom sa pag-ampo. Dapita ang mga bata sa pagpaambit sa ilang mga kasinatian bahin sa pag-ampo.
Makaampo ako sa akong Langitnong Amahan sama sa gibuhat ni Jesus.
Kinahanglang motratar ko sa uban sa paagi nga gusto pod nakong matratar.
Ang pagtulun-an ni Jesus sa Mateo 7:12—nailhan usab isip ang Bulawanong Lagda—naghatag og usa ka yano nga giya kon unsaon sa pagtratar sa uban. Unsay makatabang sa mga bata nga imong gitudloan sa pagsunod niini nga baroganan?
Posible nga mga Kalihokan
-
Basaha ang Mateo 7:12, ug isulti kini sa yano nga mga pulong nga masabtan sa mga bata. Tabangi ang mga bata sa paghunahuna og pipila ka paagi sa pagkompleto og kapahayag nga sama sa mosunod: “Ganahan ko kon ang uban alang kanako.” Human sa matag kapahayag, dapita sila sa pagsulti og balik uban kanimo sa, “Mao nga kinahanglan ko nga alang sa uban.”
-
Kantaha uban sa mga bata ang usa ka awit nga para kanimo mosuporta sa Mateo 7:12, sama sa “Si Jesus Miingon Higugmaa ang Tanan” (Songbook sa mga Bata, 39). Paghimo og yano nga mga aksiyon nga mosabay sa awit. Pangutan-a ang mga bata kon unsay ilang nakat-onan mahitungod kon unsaon nato sa pagtratar ang uban gikan sa ehemplo sa Manluluwas.
-
Dapita ang mga bata sa paglista og mabination nga mga butang nga gihimo sa ilang mga ginikanan o ubang mga sakop sa pamilya alang kanila. Basaha ang Mateo 7:12, ug dapita ang mga bata sa pagngalan og mabination nga mga butang nga mahimo nila alang sa ilang mga pamilya.
Makatukod ako og lig-on nga pundasyon pinaagi sa pagsunod ni Jesus.
Ang paggamit sa sambingay sa Manluluwas mahitungod sa pagtukod og balay ibabaw sa balas o sa bato mahimong usa ka halandomong paagi sa pagtudlo sa mga bata mahitungod sa kaimportante sa paglihok sumala sa unsay atong nakat-onan.
Posible nga mga Kalihokan
-
Kantaha uban sa mga bata ang “Ang Tawong Maalam ug ang Tawong Walay Kaalam” (Songbook sa mga Bata, 132), ug paggamit og mga aksiyon nga mohaom sa mga pulong.
-
Gamita ang Mateo 7:24–27 aron sa pagtudlo mahitungod sa mga kalainan tali sa tawong maalam ug sa tawong walay kaalam. Dapita ang mga bata nga magpakaaron-ingnon nga nagtukod sila og balay. Sa unsang paagi kita mamahimong sama sa tawong maalam?
-
Padrowinga ang mga bata og mga hulagway sa sambingay sa tawong maalam ug sa tawong walay kaalam.
Itudlo ang Doktrina: Mas Magulang nga mga Bata
Ang Wali sa Bungtod naglangkob og mga mensahe alang kanako.
Kini nga mga kapitulo adunay daghang mensahe nga magamit alang sa mga bata nga imong gitudloan. Basaha kini nga maghunahuna sa mga bata. Unsay makahuloganon alang kanimo?
Posible nga mga Kalihokan
-
Pahinumdomi ang mga bata nga nagkat-on sila mahitungod sa unsay gitudlo ni Jesus atol sa Wali sa Bungtod. Unsa nga mga kamatuoran ang ilang mahinumdoman nga nakat-onan sa miaging semana?
-
Isulat diha sa pisara ang pipila ka pulongan gikan sa Wali sa Bungtod ug uban pang pulongan nga dili gikan sa mga kasulatan. Dapita ang mga bata sa pag-ila kon hain nga mga pulongan ang gikan sa Wali sa Bungtod. Hangyoa sila sa pagpaambit kon unsay ilang nakat-onan gikan niini nga mga pagtulon-an.
-
Pagpili og pipila ka bersikulo gikan sa Mateo 6–7 nga imong gibati nga makahuloganon ngadto sa mga bata. Isulat ang mga pakisayran sa kasulatan diha sa mga kard, ug tagoi kini diha sa tibuok kwarto. Ipapangita kini sa mga bata, ipabasa ang mga bersikulo, ug ipasabot nganong importante kanila kini nga mga pagtulon-an.
-
Ipaambit ang usa sa imong paborito nga mga tudling gikan sa Mateo 6–7, ug ipasabot kon nganong ganahan ka niini. Kon ang mga bata adunay tudling nga ilang ganahan, dapita sila sa pagpaambit kon nganong ganahan sila niini ug unsay ilang nakat-onan gikan niini.
-
Kantaha uban sa mga bata ang usa ka awit mahitungod sa Manluluwas ug sa Iyang mga pagtulon-an, sama sa “Maninguha Kong Mahimong Mahisama Kang Jesus” (Songbook sa mga Bata, 40–41). Hunonga ang awit sa dihang moabot kamo sa usa ka pulongan nga adunay kalabotan sa usa ka baroganan nga gitudlo sa Mateo 6–7. Tabangi ang mga bata nga makahimo og mga koneksiyon sa mga butang nga ilang nakat-onan gikan niini nga mga kapitulo.
Ang Langitnong Amahan maminaw ug motubag kanako kon mag-ampo ako.
Samtang magtuon ka sa Mateo 6:5–13; 7:7–11, unsay imong gibati nga kinahanglang masabtan sa mga bata mahitungod sa pag-ampo?
Posible nga mga Kalihokan
-
Dapita ang mga bata sa pagbasa og kusog sa Mateo 6:9–13 ug dayon sa paglista sa mga butang nga gisulti sa Manluluwas diha sa Iyang pag-ampo. Unsaon nato pagsunod ang Iyang ehemplo kon mag-ampo kita?
-
Kantaha uban sa mga bata ang usa ka awit mahitungod sa pag-ampo, sama sa “Ikaw Naghunahuna ba sa Pag-ampo?” (Mga Himno, nu. 82). Tabangi ang mga bata sa pagsiksik sa mga pulong sa himno aron sa pagpangita sa mga rason nganong mag-ampo kita ug sa mga panalangin nga moabot gikan sa pag-ampo.
-
Tabangi ang mga bata sa pagsag-ulo sa Mateo 7:7 pinaagi sa pagdula og sama sa mosunod: Ang usa ka bata mosulti sa unang pulong o pulongan gikan sa bersikulo ug dayon moitsa og bola ngadto sa laing bata, kinsa mosulti dayon sa sunod nga pulong o pulongan.
-
Ipadrama-drama sa mga bata ang Mateo 7:9–10 gamit ang yano nga mga props. Hangyoa ang mga bata sa pagpaambit kon unsa ang gitudlo niini kanila mahitungod sa pag-ampo.
-
Pagpaambit og kasinatian diin ang imong mga pag-ampo natubag.
Makatinguha ako og mahangtorong mga bahandi imbes sa kalibotanong mga bahandi.
Unsaon nimo pagtabang ang mga bata nga imong gitudloan nga hatagan og mas dakong bili ang mahangtorong mga butang kay sa kalibotanong mga butang?
Posible nga mga Kalihokan
-
Pagdala og kahon sa mga “bahandi” nga gisudlan og mga butang o mga hulagway nga nagrepresentar sa mga butang nga gipakabili sa kalibotan—sama pananglit, kwarta o mga dulaan. Basaha og dungan ang Mateo 6:19–21, ug dayon hangyoa ang mga bata nga tabangan ka sa paghunahuna og langitnong mga bahandi nga ikapuli sa kalibotanong mga butang diha sa kahon.
-
Dapita ang mga bata sa pagngalan o pagdrowing og pipila ka butang nga ilang mabuhat aron sa “pagtigom … [o]g mga bahandi … didto sa langit” (Mateo 6:20).
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya sa ilang paborito nga pagtulon-an gikan sa Wali sa Bungtod.
Pagpalambo sa Atong Pagtudlo
Tinguhaa ang pagsabot sa mga sakop sa imong klase. Nakaila ka sa mga bata nga imong gitudloan. Ang mga ideya niini nga mga latid mahimong kinahanglan usbon aron makatubag sa labing maayong paagi sa mga panginahanglan sa imong klase. Mahimo nimong rebyohon ang tanang kalihokan nga gilista dinhi niini nga latid, dili lamang ang mga kalihokan nga gilain alang sa edad sa mga bata nga imong tudloan, aron makakaplag og mga ideya alang sa imong klase. (Tan-awa sa Pagtudlo sumala sa Pamaagi sa Manluluwas, 7.)