O Iesu o loo talanoa ma Nikotemo

6–12 Fepuari

Ioane 2–4

“E Ao Ina Toe Fanau Mai Outou”

I se vasega puupuu o le Peraimeri, o le a leai sou taimi e aoao atu ai mataupu faavae taua uma i le Ioane 2–4. Saili le taitaiga faaleagaga e uiga i mea e faamamafa atu ia sili ona faafetaiaia ai manaoga ma mea e fiafia i ai tamaiti.

aikona o le fefaasoaai

Valaaulia le Fefaasoaai

Fautuaina tamaiti e faasoa mai mea o loo latou aoaoina ma oo i ai, fesili atu i ai pe o a mea sa latou faia talu ai nei e avea ai o ni “fai faiva i tagata” (Mataio 4:19). Atonu e manaomia lou toe faamanatu ma i latou le lesona o le vaiaso na te’a nei.

aikona o le aoao atu

Aoao atu le Aoaoga Faavae: Tamaiti Laiti

Ioane 3:1–10

E tatau ona ou papatiso ma faamauina ina ia toe foi atu ai e nonofo faatasi ma le Tama Faalelagi.

O tamaiti o loo e faiaoga ai o loo saunia e faia ni laasaga taua e toe nonofo faatasi ai ma le Tama Faalelagi e ala lea i le papatisoina (fanau i le vai) ma faamauina (fanau i le Agaga). E mafai faapefea ona e fesoasoani ia latou malamalama i le taua o nei sauniga e lua?

Gaoioiga e Mafai Ona Fai

• Aotele le tala ia Iesu o loo aoao atu ia Nikotemo (tagai Ioane 3:1–10). Folafola atu i tamaiti a latou papatiso, o le a tuu atu e le Tama Faalelagi ia i latou le meaalofa o le Agaga Paia.

• Faaali atu i tamaiti le itulau o gaoioiga o lenei vaiaso, ma fai atu ia i latou e faamatala mai ia ata. Faitau le Ioane 3:5, ma molimau atu e manaomia ona tatou papatiso ma faamauina ina ia toe nonofo faatasi ai ma le Tama Faalelagi.

• Fai i tamaiti e talanoa e uiga i mea latou te fai e fafano ai o latou lima. Faaali atu le ata o le Teineitiiti o Loo Papatisoina (Tusi Ata o le Talalelei, nu. 104), ma fesoasoani i tamaiti e faatusatusa le fafano o o tatou lima i le vai i le mama faaleagaga e ala i le papatisoga.

Ioane 3:16

E alofa le Tama Faalelagi ia te au, o lea na Ia auina mai ai ia te au se Faaola.

E mafai faapefea ona e fesoasoani i tamaiti e aoao lenei upumoni taua?

Gaoioiga e Mafai Ona Fai

• Fai i tamaiti e faamaea ia fuaiupu e pei o lea: “Talu ai e alolofa o’u matua ia te au, ua la …” Faitau le Ioane 3:16. Ona fesoasoani lea i tamaiti taitasi e toe fai le Ioane 3:16, sui upu “i le lalolagi” i lona lava igoa. Fesoasoani i tamaiti e matau le mea o loo tau mai e lenei fuaiupu na faia e le Tama Faalelagi ona e alofa o Ia ia i tatou. Valaaulia tamaiti e tusi se ata o Iesu. Tuu atu ia i latou e faasoa mai a latou ata i le tasi ma le isi ma faailoa atu lo latou alolofa mo le Faaola.

• Usu faatasi se pese e faatatau ia Iesu, e pei o le “Na Ia Auina Mai Lona Alo” (Tusipese a Tamaiti, 20--21). Tuu atu i tamaiti e uu i luga se ata o Iesu i taimi uma latou te usuina ai se upu e pei o le “Atalii,” “Iesu,” po o le “Faaola.”

Ioane 4:5–15

O Iesu Keriso o lo’u “vai ola.”

E mafai e tamaiti o lau vasega ona fesootai uma i lagona o le fiainu. E mafai faapefea ona e faaaogaina lena aafiaga e fesoasoani ai ia i latou e malamalama pe o le a le tele o lo tatou manaomia o le vai ola ua ofo mai e Iesu Keriso?

Gaoioiga e Mafai Ona Fai

• Faaoaga le ata o i le otootoga o lenei vaiaso i le Sau, Mulimuli Mai ia e Au—Mo Tagata Taitoatasi ma Aiga e faamatala ai le tala ia Iesu ma le fafine i le vaieli (tagai Ioane 4:5–15). Fai i tamaiti e toe faamatala mai le tala.

• Faaali atu se ipu vai, ma talanoa ma tamaiti pe aisea tatou te manaomia ai le vai. Aotele faapuupuu le Ioane 4:5–15, ma molimau atu o Iesu ma Lana talalelei e aumaia le ola i o tatou agaga, e faapei foi ona aumaia e le vai le ola i o tatou tino.

aikona o le aoao atu

Aoao atu le Aoaoga Faavae: Tamaiti Matutua

Ioane 2:1–11

E mafai ona ou faamamaluina lo’u tina e faapei ona sa faia e Iesu.

I le faaipoipoga i Kana, na ta’u atu e Maria ia Iesu ua uma le uaina. E tusa ai ma le Faaliliuga a Iosefa Samita, na tali atu Iesu i Lona tina i le fesili atu, “Funa e, se a ea lau na ia te au? o le mea lea ou te faia” (i le Ioane 2:4, vaefaamatalagaa). O Iesu o se faataitaiga o le ala e tatau ona tatou taulima ai o tatou tina.

Gaoioiga e Mafai Ona Fai

• Valaaulia tamaiti e faitau le Ioane 2:1–11 ma feauauai e toe faamatala vaega o lea tala i a latou lava upu.

• Fai i tamaiti e lisi mai ni mea e ono manaomia ai e o latou tina se fesoasoani. Valaaulia i latou e faataitai mea e mafai ona latou fai atu ia te ia e faaaoga ai nisi o upu a Iesu: “Funa e, se a lau na ia te au?” (Ioane 2:4, vaefaamatalagaa).

• Valaaulia nisi o tina e asiasi ane i lau vasega ma faasoa mai mea e fai e a latou fanau e faailoa ai lo latou faaaloalo ia i latou.

O Iesu o loo talanoa ia Maria i le tausamaaga o le faaipoipoga

Na fai atu Iesu i lona tina, “Funa e, se a lau na ia te au?” (Faaliliuga a Iosefa Samita, Ioane 2:4 [i le Ioane 2:4, vaefaamatalagaa]).

Ioane 3:1–8

O le papatisoina ma le faamauina e pei o le toefanau mai.

A papatisoina i tatou, lea sa ta’u e Iesu o le “fanauina i le vai,” ua tatou maua se faamagaloga o a tatou agasala ma mafai ona “ulu atu i le malo o le Atua” (Ioane 3:5). E mafai faapefea ona e fesoasoani i tamaiti o loo e faiaoga ai ia malamalama i le uiga o le toefanauina?

Gaoioiga e Mafai Ona Fai

• Fai ni fasi pepa o upu o loo faaali ai upu a le Faaola i le Ioane 3:3, ma tuu i tamaiti e faavasega i le faatulagaga sa’o. E faapefea e le papatisoina ma le faamauina ona pei o le toefanauina?

• Faaali atu se ata o se pepe faatoa fanau ma se tasi o le a papatisoina ma faamauina (tagai Tusi Ata o le Talalelei, nu. 104–5). E faapefea ona pei i tatou o se pepe fou faatoa fanau mai pe a uma ona tatou papatiso ma faamauina? (tagai Ioane 3:3–5).

• Valaaulia tamaiti e faasoa mai mea latou te manatua i o latou papatisoga. Faitau le Mosaea 18:8–10 ma le Mataupu Faavae ma Feagaiga 20:37 e toe faamanatu ai le feagaiga o le papatisoga. Aoao tamaiti o le aai ma feinu i le faamanatuga ma le migao i vaiaso taitasi o se ala lea e faaauau ai pea le faagasologa o le toe fanauina.

• Fesoasoani i tamaiti e tauloto le Mataupu Faavae o le Faatuatua 1:4.

Ioane 3:16-17

E alofa le Tama Faalelagi ia te au, o lea na Ia auina mai ai Lona Alo.

E mafai faapefea ona e fesoasoani i tamaiti ia iloa o le auina mai o Iesu i le lalolagi o se faaalia lea o le alofa o le Tama Faalelagi?

Gaoioiga e Mafai Ona Fai

• Fai i tamaiti e tusi se ata o la latou meaalofa e fiafia i ai ma le tagata na avatu ai lena meaalofa. Fai i se tamaitiiti e faitau le Ioane 3:16. O le a le meaalofa na tuuina mai e le Tama Faalelagi ia i tatou? O faapefea ona faaalia mai e lenei meaalofa Lona alofa?

• Fai i tamaiti e sue tali i le fesili “Aisea na auina mai ai e le Tama Faalelagi ia i tatou ia Iesu Keriso?” a o latou faitaua le Ioane 3:16–17 pe usu pe faalogologo i le “Na Ia Auina Mai Lona Alo” (Tusipese a Tamaiti, 20).

Ioane 4:5–23

Ua ofoina mai e Iesu Keriso ia te au le “vai ola.”

E faapei ona sa faaaoga e Iesu le vai e aoao ai le fafine o Samaria, e mafai foi ona e faaaogaina le vai e aoao ai tamaiti pe aisea tatou te manaomia ai le talalelei a Iesu Keriso.

Gaoioiga e Mafai Ona Fai

• I le faaaogaina o le Ioane 4:5–23, tusi fuaiupu o aotelega mai le tala o le fafine i le vaieli. Fai i tamaiti e faasino atu i fuaiupu nei e tuu ai fuaiupu i le faasologa sao. O le a le mea sa taumafai Iesu e aoao atu i le fafine?

• Tuu atu i tamaiti se vai e feinu ai, ma fai i ai e faasoa mai o latou aafiaga ina ua latou fia feinu. Talanoa pe o a ni lagona ina ua maua se vai e inu. Valaaulia tamaiti e faaigoa mai mea, e pei o se ipuvai, e faamalie ai i tatou mo sina taimi. O a mea e pei o le “vai ola” e mafai ona faamalie ai i tatou e faavavau?

• Tusi i le laupapa le E faapefea ona pei le talalelei o le vai? Fai i tamaiti e mafaufau pe faapefea ona latou taliina le fesili lea a o latou faitauina le Ioane 4:5–23.

aikona o le aoaoina

Uunaia le Aoaoina i le Aiga

Mafaufau e fai i tamaiti e avatu i tagata o o latou aiga se ipuvai e inu pe a latou taunuu i le fale. A latou faia, e mafai ona latou faasoa atu mea sa latou aoaoina e uiga i le vai ola.

Faaleleia o Lo Tatou Aoao Atu

Faaaoga itulau o gaoioiga. A maea ona faaaoga e tamaiti ia itulau o gaoioiga, faaaoga le taimi e toe faamanatu ai mataupu faavae mai le lesona.

itulau o gaoioiga: E manaomia ona ou papatiso ma faamauina.