Ni Jesus kadua ti bassit nga ubing

Maysaka a Mannursuro kadagiti Ubbing

Inawagannaka ti Dios a mangisuro kadagiti annakna iti wagas ti Mangisalakan. Nai-set apartka iti daytoy a pagrebbengan babaen ti turay ti nasantuan a priesthoodna. Uray no saanka a eksperiensado a mannursuro, no agbiagka a maikari, agkarkararag iti inaldaw, ken agadal kadagiti nasantuan a kasuratan, ipaay ti Dios kenka ti impluensia ken bileg ti Nasantuan nga Espiritu (kitaen iti 2 Nephi 33:).

Dagidiay naitalek kenka nga maasikaso ket dagiti annak ti Nailangitan Nga Ama, ken ammona no ania ti kasapulanda ken no kasano ti kasayaatan a makatulong kadakuada. Babaen ti Espiritu Santo, mangtarabayto kenka ti Dios bayat ti panagsaganam ken bayat ti panangsursurum. Ipaltiingnanto kenka no ania ti nasken nga isaom ken no ania ti nasken nga aramidem.

Iti isu amin nga aspeto ti biagda, dagitoy napapateg nga ubbing ti kanayon a tantandaanan ti impormasion, panangbukel ken pananggugor iti kapanunotanda, ken panagaramid ken panangibinglay dagiti natakuatan. Daytoy ket nangnangruna a pudno iti ebanghelio, agsipud ta dagiti ubbing ket nakasagana ken aggagar a mangadal dagiti simple a kinapudnona. Ti pammatida iti naespirituan a banag ket napigsa ken puro, ken makitada iti tunggal kanito a kas panangsursuro a kanito. Situtulokda nga agtignay no aniaman ti nasursuroda, uray saan pay a kompleto ti pannakaawatda. Kastoy ti nasken a panangawattayo ti ebanghelio. Kas ti Insuro ni Jesus: “Siasinoman a di umawat ti pagarian ti Dios a kas iti panangawat ti maysa nga ubing saanto a makastrek sadiay”(Lucas 18:17).

Ti awag kenka a mangisuro kadagiti ubbing ket maysa a sagrado a panagtalek. Gagangay a masmasdaaw ti marikna no maminsan. Ngem laglagipem a inawagankayo ti Nailangitan Nga Ama, ken saanka kaano man baybay-an. Daytoy ti aramid ti Apo, ken bayat ti panangserbim “iti amin a pusom, kabaelam, panunot ken pigsam” (DKK 4:2), palawaenanto dagiti pagrebbengan, sagut, ken talento, ken ti serbisiom ket mabendisionan ti biag dagiti sursuruam nga ubbing.