“30 ni Sepiteba–13 ni Okotova Efeso: ‘Mera Vakavinakataki Kina ko Ira sa Lotu’” Lako Mai, Mo Muri Au—Me Baleti Ira na Lalai: Veiyalayalati Vou 2019 (2019)
“30 ni Sepiteba–13 ni Okotova Efeso,” Lako Mai, Mo Muri Au—Me Baleti Ira na Lalai: 2019
30 ni Sepiteba–13 ni Okotova
Efeso
“Mera Vakavinakataki Kina ko Ira sa Lotu”
Ni o vulica na iVola vei ira na kai Efeso, vakasamataka na ivakavuvuli cava soti o rawa ni vakabibitaka mo vakalougatataki ira kina na gone o vakavulica. Vola na vakasama kece e votu mai ni o wilika tiko.
Vola na Veika o Uqeti Kina
Sureta na Veiwasei
Sureti ira na gone me ra tucake ena dua na laini. Kerei koya e liu taudua ena laini me wasea e dua na ka e se qai vulica wale toka ga ena vuli ivolanikalou vakamatavuvale, ena Lalai, se so tale na vanua. Kerea na ikarua ni gone ena laini me tokaruataka na ka sa wasea na gone e liu ka vakuria ena dua na ka sa vulica. Me caka tikoga me yacova ni ra sa vakaitavi kece na gone ena veiwasei.
Vakavulica na iVunau
Gone Sobu
O ira na lewe ni Lotu sa dodonu me ra veitokani ka “koro vata ga.”
Vakacava o ira na gone ena nomu kalasi era “vulagi” tiko beka se “koro vata ga” kei ira na kena vo kei ira na lewe ni tabanalevu? Vukei ira me ra kila ni dina ga ni tu na noda duidui, sa vukei keda na iVakabula me da duavata ka veilomani.
iTaviqaravi e Rawa ni Caka
-
Biuta e dua na iyaloyalo ni iVakabula ena lomadonu ni rumu. Sureti ira na gone me ra tu ena veivanua duidui ena rumu me ra matataki ira na “vulagi” se “kai tani.” Ni o wilika na Efeso 2:19, sureti ira me ra torova yani na iyaloyalo kei Karisito me yacova ni ra sa tu veivolekati. Tukuna vei ira ni da sa toro voleka yani vua na iVakabula, sa rawa ni yaco me da duavata kei ira tale eso vakaveitokani ka “koro vata ga.”
-
Raica mai na kedra iyaloyalo na gone mai na veiyasai vuravura, ka vunitaka wavoki ena loma ni rumu. Biuta e dua na iyaloyalo ni iVakabula ena muailiu ni rumu. Sureti ira na nomu kalasi me ra veisasa vaka na daukaulotu ka veivukevuke ena vaqarai ni kena iyaloyalo e dua na “vulagi” me biu volekata na iyaloyalo ni iVakabula. Vukei ira me ra vakila ni ra sa papitaiso na tamata, era sa yaco me tiki ni noda matavuvale vaka Lotu, se “lewe ni vale ni Kalou.” Eda rawa vakacava ni vukea e dua ka se ka vou me vakataukeitaki?
E vinakati au na Tamada Vakalomalagi meu talairawarawa vei rau na noqu itubutubu.
Ni o wilika na Efeso 6:1–3, vakasamataka na sala eso o rawa ni vukei ira kina na gone me ra kila na vuna e sa rui bibi kina me ra talairawarawa vei ira nodra itubutubu.
iTaviqaravi e Rawa ni Caka
-
Wilika na Efeso 6:1 vei ira ena kalasi, se vukea e dua vei ira na gone me wilika. Kerei ira me ra matanataka na gauna eso era a talairawarawa kina ki na nodra itubutubu. Na cava beka e rawa ni yaco kevaka era a sega ni talairawarawa?
-
Lagata vata e dua na sere baleta na talairawarawa, vaka na “Quickly I’ll Obey” (Children’s Songbook, 197). Cegu ni oti na imatai ni laini, ka kerea e dua na gone me cavuta e dua na ka a kerea e dua na itubutubu me cakava; qai vakaotia na sere. Lagata tale vakavica me rawa ni ra vakaitavi eso tale na gone.
-
Wasea e dua na gauna o a talairawarawa kina vei rau na nomu itubutubu ka qai vakalougatataki. Se wasea na italanoa baleti Chloe mai na vosa nei Sister Carole M. Stephens “Kevaka Dou Lomani Au, Talairawarawa ki na Noqu iVunau” (Ensign se Liaona, Nove. 2015, 118–20) se vakaraitaka na vidio “Going to Grandma’s” (LDS.org).
Sa rawa ni taqomaki au na isasabai ni Kalou.
O na vukei ira vakacava na gone me ra kila ni kena caka na veika dodonu e sa vaka na daramaki ni isasabai?
iTaviqaravi e Rawa ni Caka
-
Vakaraitaka na iyaloyalo ni dua na tamata e daramaka tu na isasabai, me vaka na kena ena tabana ni itaviqaravi ni macawa oqo se ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Ni o vakalekalekataka na Efeso 6:10–18, vakaraitaka vei ira na gone na kena taqomaki na tikiniyago duidui mai na tiki ni isasabai duidui. (Raica na “The Whole Armor of God,” Friend, June 2016, 24–25.)
-
Kauta mai eso na iyaya ki na kalasi ka rawa ni matataka na veitiki ni isasabai e tukuni ena Efeso 6:14–17 (me ivakaraitaki, e dua na isala se dua na eparoni), se cakava eso na tiki ni isasabai rawarawa ena pepa. Me ra veivukevuke na gone ena daramaki ni “isasabai.” Veivosakitaka na cava na kena ibalebale me ra taqomaki mai na ca vakakina na kena rawa ni taqomaki ira na daramaki ni veitiki yadua ni isasabai. Eda na tokara vakacava na isasabai ni Kalou? (me ivakaraitaki, ena vulici ni ivolanikalou, nodra qaravi na tani, masumasu, talairawarawa, kei na so tale).
Vakavulica na iVunau
Gone Qase Cake
Eda sa koro vata ka lewe ni vale ni Kalou.
Era sa vaqaqacotaki na gone ni ra vakaitokani vinaka ena kosipeli. O na vukei ira beka vakacava me ra tara cake na veitokani vinaka vakataki ira?
Eda sa “koro vata ga” kei ira na Yalododonu ni Kalou.
iTaviqaravi e Rawa ni Caka
-
Wilika vata na Efeso 2:19 ka veivosakitaka na kena ibalebale na vulagi se kai tani. Wasea e dua na gauna o a vakila kina ni o vulagi se kai tani ka qai vukei iko e dua mo vakataukeitaki ka ciqomi. Sureti ira na gone me ra wasea na mataqali gauna vata vaqori. Na cava eda rawa ni cakava me da “koro vata ga” ka sega ni vulagi? E tiko beka eso na gone ena nomu kalasi era sega ni dau lako wasoma mai, baleta beka ni vaka era vulagi? Vukei ira na gone me ra tuvatuvaka ni vukei ira na lewenilotu oya mera vakataukeitaki ka lomani.
-
Mo vukei ira na gone o vakavulica me ra veivolekati, vola eso na taro ena papa e uqeti ira me ra wasea e dua na ka baleti ira, me vaka na gauna cava sa bau saumi kina e dua na nomu masu? se Na cava na ka taleitaki o dau via cakava vata kei na nomu matavuvale? Wasei ira na gone me ra veisasa, ka sureti ira me ra veitarotarogi. Na cava beka e rau dui vulica me baleti rau?
E vinakata au na Tamada Vakalomalagi meu talairawarawa ka rokova na noqu itubutubu.
Vakasamataka eso na sala mo vukei ira kina na gone me ra kila na vuna e sa rui bibi kina na talairawarawa vei ira na tubutubu.
iTaviqaravi e Rawa ni Caka
-
Sureti ira na gone me ra wilika yadua na Efeso 6:1–3 ka vakatakila na malanivosa e duatani vei ira. Sureti ira me ra wasea na veimalanivosa oqo kei na vuna era nanuma kina ni ra sa bibi na malanivosa.
-
Sureti ira na gone me ra wasea na nodra ivakaraitaki na tamata ena ivolanikalou ka dau talairawarawa ka rokova na nodra itubutubu, me vaka na iVakabula (raica na Luke 2:42–52), Ruci (raica na Ruci 1), se Nifai (raica na 1 Nifa 3:1–8). Na cava na vuna e bibi kina me da talairawarawa ka rokova na noda itubutubu?
-
Solia vei ira na gone yadua e dua na tikinipepa kei na vosa rokova e cake. Veivosakitaka na ibalebale ni vosa. Sureti ira na gone me ra vola se droinitaka ena nodra pepa e dua na ka era rawa ni cakava me ra vakaraitaka ni ra rokova na nodra itubutubu.
Na isasabai ni Kalou sa rawa ni taqomaki au mai na veika ca.
Ni o wilika na Efeso 6:10–18, vakasamataka eso na ka rerevaki vakayalo era dau sotava na gone kei na ivakarau o rawa ni veivuke ni vaqaqacotaki ira tani mai kina na gone.
iTaviqaravi e Rawa ni Caka
-
Ni wilika e dua na gone na Efeso 6:10–18, kerea e dua tale na gone me tuva se droinitaka ena papa na veitiki ni isasabai e cavuti. Na cava na vuna e bibi kina na isasabai ena dua na ivalu? Me da na tokara tiko vakacava e veisiga na isasabai vakayalo?
-
Lesi ira yadua na gone me ra droinitaka ka vakayacana e dua na tiki ni isasabai e vakamacalataki ena Efeso 6:14–17. Ena taqomaki keda vakacava mai na ca na veitiki ni isasabai oqo? Na cava e yalataka na Turaga vei ira era tokara na isasabai ni Kalou? (raica na Efeso 6:13). Na cava na kena ibalebale mo “vorata rawa kina ena siga ca”?
Vakauqeta na Vuli e Vale
Sureti ira na gone me ra vakaraica toka ena macawa oqo e dua ena vaka me vulagi. Bolei ira me ra cakava e dua na ka me ra sudra yani kina vua na tamata oya.
Vakatorocaketaki Noda Veivakavulici
Vukei ira na gone sobu me ra vuli mai na ivolanikalou. Mo vukei ira na gone sobu ni vuli mai na ivolanikalou, vakanamata ki na dua na tikina ena ivolanikalou se dua mada ga na malanivosa bibi. O na sureti ira beka na gone me ra tucake ni ra rogoca e dua na vosa se malanivosa vakatabakidua. (Raica na Veivakavulici ena iVakarau ni iVakabula, 25–26.)