Jesucristo

Septiembre 9–15

2 Taga Corinto 1–7

“Makikappiakayo iti Dios”

Irugim ti panagsaganam babaen ti panangbasam iti 2 Taga Corinto 1–7. Umaykayo, Sumurot Kaniak—Para kadagiti Indibidual ken Pamilia ket makatulong kenka tapno maawatam dagitoy a kapitulo, ken daytoy a balabala ti makaited kenka kadagiti kapanunotan iti panangisuro.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Mabalin nga addaan tisumagmamano kadagiti ubbing iti klasem kadagiti inaramid a surat itoy a lawas maipapan no kasano a a maysa a nasayaat a pagwadan ti maysa a disipulo ni Jesucristo ti maysa a miembro ti pamilia. No inaramidda, nasapsapa a kiddawem kadakuada a mangibinglay iti surat iti klase. Wenno kiddawen kadagiti ubbing nga ibinglayda ti maysa a sabali a banag a nasursuroda.

icon iti panangisuro

Isuro ti Doktrina

Dagiti In-inaudi nga Ubbing

2 Taga Corinto 1:3–4

Liwliwaennak ti Nailangitan nga Ama, ket mabalinko ti mangliwliwa kadagiti dadduma.

Kasano a maikkam dagitiubbing iti panagtalek a liwliwaento ida ti Nailangitan nga Ama? Kasano a maallukoymo ida a mangliwliwa kadagiti dadduma?

Dagiti Mabalin nga Aktibidad

• Mangitugot kadagiti banag iti klase a mangted iti gin-awa, a kas iti maysa nga ules wenno pagbenda. Kiddawen kadagiti ubbing no ania dagiti mangliwliwa kadakuada no nalidayda wenno mabutengda wenno addaanda kadagiti sabali a parikut. Ibasaem ti 2 Taga Corinto 1:3–4 kadagiti ubbing, ket ilawlawag a ti “rigat” ket sabali pay a balikas para kadagiti narikut a problema. Mangibinglay kadagiti sumagmamano a wagas a nakaliwliwaan kenka ti Nailangitan nga Ama, ken paneknekam a liwliwaennanto met dagiti ubbing.

• Ipakitam dagiti ladawan iti tattao a mabumbuniagan (kitaen iti Libro ti Arte ti Ebanghelio, blg. 103 ken 104) bayat ti panangbasam iti 2 Taga Corinto 1:4 ken Mosiah 18:8–9 kadagiti ubbing. Ilawlawag nga iti panagbuniag ikaritayo ti mangliwliwa kadagiti dadduma. Kasano a masurottayo ti balakad ni Pablo a “liwliwaen dagiti adda iti uray ania a pagladingitan”?

• Awisem dagiti ubbing a mangidrowing iti ladawan ti bagbagida a mangtultulong iti maysa a tao nga agkasapulan. Pailawlawag kadakuada no kasano a ti panangaramid kadagitoy a banag ket makaisangbay iti liwliwa kadagiti dadduma.

2 Taga Corinto 2:7–8, 10

Mapakawankodagiti dadduma.

Pumilika manipud kadagiti sumaganad nga aktibidad—wenno agaramid iti bukodmo—a tumulong a mangpapigsa iti tarigagay dagiti ubbing a mangpakawan kadagiti dadduma.

Dagiti Mabalin nga Aktibidad

• Ilawlawag kadagiti ubbing a kayat ni Pablo a mamakawan dagiti Santo a Taga Corinto iti maysa a tao a nagbasol. Basaem ti 2 Taga Corinto 2:7–8, 10, ket awisem dagiti ubbing nga iparabawda dagiti imada iti puspusoda tunggal kanito a mangngegda dagiti balikas a pakawanen ken pinakawan.

• Awisem dagiti ubbing a mangyakem no kasano a mabalinda ti agresponde kadagiti kasasaad no t nagaramid ti maysa a tao iti maysa a banag a saan a nasayaat. Pagsisinnublatem ida nga agkuna iti “Ladingitek” ken “Pakawanenka.” Kasano a makatulongtayo kadagiti tao a mangammo a pakawanentayo ida? Ilawlawag a ti maysa a wagas ket mabalin a “paneknekanyo ti ayatyo,” wenno mangipakita iti ayat kadakuada (2 Taga Corinto 2:8).

2 Taga Corinto 4:1–2

Mamatiak iti panagbalin a napudno.

Insuro ni Pablo a dagiti katulongan ni Cristo ket saan nga agulbod kadagiti dadduma—“nagpanawan[da] dagiti mailemlemmeng a nakababain.” Utobem dagiti wagas a mangpabileg iti tarigagay dagiti ubbing nga agbalin a napudno iti amin a banag.

Dagiti Mabalin nga Aktibidad

• Tulongam dagiti ubbing a mangyulo iti ragup dagiti balikas a “Mamatikami iti kinapudno” (Pagannurotan ti Pammati 1:13). Isurat daytoy a ragup dagiti balikas iti papel a pulseras a mabalin a dekorasionan ken isuot dagiti ubbing iti pagtaengan. Ilawlawag a ti panagbalin a napudno kaipapananna ti panangibaga iti kinapudno.

• Kiddawen kadagiti ubbing a mangingato kadagiti imada no isaom ti maysa a banag a pudno ken ibabada dagitoy no isaom ti maysa a banag a saan a pudno. Agaramidka iti simple ngem nabatad a palawag, kas “Domingo ita nga aldaw” wenno “Tallo ti agongko.” Uliten ti aktibidad iti sumagmamano a daras, a pagsisinublatem dagiti ubbing a mangibaga ii maysa a pudno ken palso a sasao. Apay a nasayaat ti agbalin a napudno?

icon iti panangisuro

Isuro ti Doktrina

Dagiti In-inauna nga Ubbing

2 Taga Corinto 1:3–4

Liwliwaennak ti Nailangitan nga Ama, ket mabalinko ti mangliwliwa kadagiti dadduma.

Ti pananglaglagip no kasano a niliwliwa ti Dios ida ket mabalin a mangparegta kadagiti ubbing a mangted iti liwliwa kadagiti dadduma.

Dagiti Mabalin nga Aktibidad

• Bayat ti panangbasam iti 2 Taga Corinto 1:3–4, kiddawen kadagiti ubbing a dumngeg kadagiti sungbat iti saludsod “Ania ti ar-aramiden ti Dios para kadatayo?” Tulongam dagiti ubbing nga agaramid kadagiti wagas a pangliwliwaan kadatayo ti Dios. Awisem dagiti ubbing a mangibinglay kadagiti padas idi naliday wenno mariribukan wenno nagbutengda ket liniwliwa ida ti Dios.

• Awisem dagiti ubbing a mangibinglay iti wagas a kabaelantayo a mabalin a pangliwliwaantayo kadagiti dadduma. Mangted kadakuada iti gundaway a mangpanunot iti maysa a tao nga am-ammoda nga agkasapulan iti liwliwa ken agaramid ti plano a makatulong iti dayta a tao.

2 Taga Corinto 2:5–11

Mapakawankodagiti dadduma.

Mabalin a narigat ti mangpakawan kadagiti dadduma no natangsitda kadatayo. Ngem mapadasanto dagiti ubbing a sursuruam ti ayat, kappia, ken ragsak bayat ti panagsursuroda a mamakawan.

Dagiti Mabalin nga Aktibidad

• Ibagam kadagiti ubbing a maysa a tao iti Corinto ti nagbasol ket “nagpaleddaang” kadagiti Santo (kitaen iti 2 Taga Corinto 2:5). Kiddawen kadagiti ubbing a magsukisok iti 2 Taga Corinto 2:7–8 tapno mangsarak no ania ti kayat nga ipaaramid ni Pablo kadagiti Santo.

• Ibinglay ti maysa a padas idi pinakawanmo ti maysa a tao—wenno pinakawannaka ti maysa a tao —ken no ania ti nariknam kalpasanna.

2 Taga Corinto 5:6–7

“Magna[ak] gapu ti pammati, saan nga iti panagkita.”

Ibilang no kasano a maallukoymo dagiti ubbing a mangtungpal kadagiti bilin ti Dios uray no saanda a makita dagiti bendision a tarigagayanda a dagus.

Dagiti Mabalin nga Aktibidad

• Basaen ti 2 Taga Corinto 5:6–7 ken Alma 32:21 a kadua dagiti ubbing, ken kiddawen kadakuada a mangsapul kadagiti balikas ken ragup dagiti balikas a makatulong tapno mailawlawag ti kaipapanan ti pammati. Paisuratmo kadakuada dagiti panangilawlawagda, pabasam dagitoy iti napigsa, ken paikabilmo dagitoy iti pisarra.

• Piringam ti maysa kadagiti ubbing, ket idawatmo kadagiti dadduma nga ubbing a mangted kadagiti direksion a makatulong kenkuana a mangileppas iti aramid kas iti panangbangon iti maysa a torre nga usaren dagitii bloke, panangbukel a sangkamaysa iti maysa a puzzle, wenno pannagna iti siled. Kasano a makatulong kadatayo daytoy nga aktibidad tapno maawatan no ania ti kaipapanan ti “magna gapu ti pammati” iti Dios?

•  Ibinglay ti maysa a padas idi nasken nga adda pammatim iti Dios. Awisem dagiti ubbing a mangibinglay kadagiti ania man a padasda a mamagna gapu ti pammati.

2 Taga Corinto 7:8–11

Ti panagladingit a mayanurot iti dios ti mangiturong kaniak iti panagbabawi.

Gagangay a marikna dagiti ubbing a ti panagbain wenno mapabainan no matiliwan ida a nagaramid iti maysa banag a maikaniwas. Tulongam ida a mangilasin kadagitoy a rikna gapu iti panagladingit a mayanurot iti dios a mangiturong iti pudno a panagbabawi.

Dagiti Mabalin nga Aktibidad

• Ilawlawag nga iti 2 Taga Corinto 7:8–11, imbasar ni Pablo iti surat nga immun-una nga insuratna kadagiti Santo, a sibabatad a nangbalballaaganna kadakuada maipapan kadagiti basbasolda. Aggigiddan a mangbasa kadagitoy a bersikulo. Apay a naragsakan ni Pablo iti panagladingit dagiti Santo? Ilawlawag a daytoy a kita ti panagladingit ket maawagan a panagladingit a mayanurot iti dios.

• Kiddawem kadagiti ubbing nga ikidemda dagiti matada ken agpanunotda maipapan iti panawen idi nagaramidda iti maysa a banag a maikaniwas ket nagleddaangda gapu iti daytoy. Awisem ida a mangsaludsod iti bagbagida, “Apay a nagleddaangak?” Isurat iti pisarra dagiti sumagmamano a gapu ti pagleddaangan dagiti tao kalpasan ti panangaramid iti maysa a banag a maikaniwas, kas iti “Nagbutengak a madusaak” wenno “Mabainak iti no ania ti panunoten dagiti tao kaniak” wenno “Ammok a naupay kaniak ti Nailangitan Nga Ama.” Ania kadagiti sungbat iti pisarra ti kasla “panagladingit a mayannurot iti dios”? Apay a ti panagladingit a mayannurot iti dios ket nasaysayaat ngem iti sabali a kita ti ladingit a mariknatayo kalpasan ti panangaramid iti maysa a banag a maikaniwas?

icon iti panagsursuro

Yallukoy ti Panagsursuro iti Pagtaengan

Ibagam kadagiti ubbing a mabalinda nga ibinglay ti maysa kadagiti aktibidad manipud iti agdama a klase kadagiti pamiliada iti pagtaengan, nalabit kabayatan ti family home evening.

Panangpadur-as iti Panangisurotayo

I-display ti nasantuan a kasuratan Pumili iti maysa a bersikulo iti nasantuan a kasuratan a masarakam a napateg ken i-display daytoy iti siled ti klase a masansan a pakakitaanto dagiti ubbing iti daytoy. Nalabit nga agsisinnublat dagiti ubbing a mangpili iti nasantuan a kasuratan a mai-display.

panid ti aktibidad: mammatiak iti kinapudno