mamoe o loo mulimuli ia Iesu

Going Home, saunia e Yongsung Kim

12–18 Iulai

Mataupu Faavae ma Feagaiga 77–80

“O Le a Ou Taitaia Outou i le Ala”

Ao e suesue i le Mataupu Faavae ma Feagaiga 77–80, vaai mo fuaitau ma fuaiupu e ono fesoasoani i tamaiti e malamalama lelei ai i mataupu faavae o le talalelei. Ia lagona le saoloto e faasoa atu fuaiupu na e mauaina, tusa lava pe e le o i ai i totonu o gaoioiga o loo i lalo.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tamaiti e faasoa mai mea latou te faafetai ai. O a ni mea o latou faia ma o latou aiga e faaali atu ai i le Tama Faalelagi lo latou loto faafetai mo Ana faamanuiaga?

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 77:2

Na faia e le Atua meaola uma i luga o le lalolagi.

O le aoao e uiga i mea na faia e le Atua e mafai ona fesoasoani i tamaiti o e aoaoina ia lagona Lona alofa mo i latou.

Gaoioiga e Mafai Ona Fai

• Faaali atu i tamaiti ata o manuvaefa, e aofia ai iniseti ma manulele. Ao e faitauina upu “manu,” “mea fetolofi,” ma “manu felelei o le ‘ea” mai le Mataupu Faavae ma Feagaiga 77:2, valaaulia tamaiti e faasino i ata talafeagai. Molimau atu na Ia faia mea uma nei ona e alofa o Ia ia i tatou ma e finagalo ia tatou fiafia (tagai foi Mataupu Faavae ma Feagaiga 59:16–20).

• Usu faatasi ma tamaiti se pese e uiga i foafoaga a le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). Fesili i tamaiti pe faapefea ona fesoasoani mea o loo latou pepese e uiga i ai latou te lagona ai le alofa o le Atua.

  pepe i luga o se fugalaau

  Na faia e le Atua le lalolagi ma mea uma o i ai.

Mataupu Faavae ma Feagaiga 78:6

E mafai ona ou faasoa atu mea ua ou maua i isi.

E finagalo le Tama Faalelagi ia tatou faasoa saoloto atu o tatou faamanuiaga i isi ina ia mafai ona tatou “tutusa i mea faaletino” ma i “mea faalelagi” (fuaiupu 6).

Gaoioiga e Mafai Ona Fai

• Ina ia aoao atu le uiga o le “tutusa i mea faaletino” (fuaiupu 6), tuu atu i tamaiti ata o tagata o loo manaomia le fesoasoani (e pei o tagata o loo fiaaai, manunua, pe maalilili). Ona tuu atu lea i isi tamaiti ni mea faitino e mafai ona fesoasoani ai (e pei o meaai, o se fusi manua, po o se palanikete). Valaaulia ia nei tamaiti e faasoa mai a latou mea o i ai e fesoasoani ai i tagata o loo i totonu o nei ata. Tuu atu i isi tamaiti ia maua se avanoa e faasoa atu ai. Fesoasoani i tamaiti ia malamalama e finagalo le Tama Faalelagi i Ana fanau uma ia maua mea o loo latou manaomia, ma ina ia faia lenei mea, e masani ona Ia faimai ia i tatou e faasoa mea ua tatou maua i isi tagata.

• Faitau atu i tamaiti fuaiupu o loo i lalo o ata muamua e lua o le “Mataupu 28: Na Toe Malaga Atu le Perofeta o losefa Samita i Misuri” (Tala o le Mataupu Faavae ma Feagaiga, 108). Fai atu i tamaiti e faafoliga o loo latou fesoasoani i se tasi e fau se fale, faasoa atu meaai, po o auauna atu i se isi auala. O a ni o tatou lagona pe a tatou fesoasoani ma faasoa atu? Fesoasoani i tamaiti e mafaufau i mea e faasoa mai e Iesu Keriso ia i tatou.

Mataupu Faavae ma Feagaiga 78:18

O le a taitai a’u e Iesu Keriso i le ala.

Afai tatou te naunau e tuu i le Alii e “taitaia [tatou] i le ala,” e mafai ona tatou “ia fiafia,” e tusa lava pe i ai ni mea e “le mafai ona [tatou] taulimaina … i le taimi nei” (fuaiupu 18).

Gaoioiga e Mafai Ona Fai

• Valaaulia tamaiti e faasoa mai ni taimi na avea ai i latou ma se taitai, e pei o le pito i luma o se laina po o le taitaiina o musika. O le a le mea e fai e se taitai? Faaali atu se ata o le Faaola ao e faitauina le fuaitau lenei mai le Mataupu Faavae ma Feagaiga 78:18: “Ia fiafia, ona o le a Ou taitaia outou i le ala.” Faaaoga le itulau o gaoioiga o le vaiaso lenei e fesoasoani ai i tamaiti e mafaufau i auala e mafai ai ona tatou mulimuli i le Faaola.

• Valaaulia tamaiti e mulimuli ia Iesu, ma taitai i latou faataamilo i le potu ao e uuina se ata o Iesu. Ao e faia lea mea, usu faatasi se pese e faatatau i le mulimuli ia Iesu Keriso, e pei o le “O Loo Ou Taumafai e Avea e Pei o Iesu” po o le “Filifili Le Ala Sa’o” (Tusipese a Tamaiti, 40, 82). Ia feauaua’i tamaiti i le uuina o le ata ma le taitaiina o isi tamaiti.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 77

E mafai ona ou maua tali i a’u fesili e faatatau i tusitusiga paia.

O le aoaoina o tamaiti e uiga i le auala na sailia ai e Iosefa Samita tali i ana fesili, e mafai ona fesoasoani latou te iloa ai o le a tali mai le Tama Faalelagi pe a latou saili atu mo Lana taitaiga. Mafaufau e faasoa atu ni aafiaga i ni taimi na e maua ai ni tali mai ia te Ia.

Gaoioiga e Mafai Ona Fai

• Faitau atu i tamaiti upu o loo i lalo o ata muamua e tolu o le “Mataupu 27: Sa Faaauau e le Perofeta Lana Galuega e Ui Lava i Sauaga,” (Tala o le Mataupu Faavae ma Feagaiga, 104). Fesili i tamaiti pe e i ai se taimi na latou lagona ai le le malamalama i se mea i tusitusiga paia, e pei o Iosefa. Tuu atu ia i latou e faasoa mai o latou aafiaga. O le a le mea na faia e Iosefa e maua ai tali? Taʻu i tamaiti se taimi na fesoasoani ai le Tama Faalelagi ia te oe e malamalama i se mea i totonu o tusitusiga paia.

• O tamaiti o loo e aoaoina atonu e fiafia e faitau ni fuaiupu i le tusi o Faaaliga lea na i ai ni fesili a Iosefa Samita e uiga i ai. Ona latou vaavaai lea i totonu o le Mataupu Faavae ma Feagaiga 77 mo le mea na finagalo le Alii ia malamalama i ai o ia. Filifili ni nai fuaiupu e te lagona o le a anoa.

Mataupu Faavae ma Feagaiga 78:3–7

E mafai ona ou fesoasoani e “ave i luma le faamoemoe” a Iesu Keriso.

I le vaega 78, na tuuina mai ai e le Alii ni faatonuga patino i taitai o le Ekalesia o le a faapea ona fesoasoani ia i latou e “ave i luma le faamoemoe” o le Alii (fuaiupu 4). Fesoasoani i tamaiti e mafaufau po o a ni o latou tiute i le aveina i luma o le faamoemoe a le Alii.

Gaoioiga e Mafai Ona Fai

• Fai atu i tamaiti e faitau le Mataupu Faavae ma Feagaiga 78:4. O le a le “faamoemoe” na tatou “tautino i ai” (taliaina pe filifili e lagolago) i le taimi na tatou papatiso ai? Faamalosiau i latou e saili i totonu o mau faapenei mo ni tali talafeagai: Mosaea 18:8–10; Mataupu Faavae ma Feagaiga 20:37; Mose 1:39.

• Faamalamalama atu i tamaiti o Newel K. Whitney sa onaina se faleoloa ma na fetalai atu le Alii ia te ia ma isi tamaloloa e faaaoga ni nai a latou tupe e fesoasoani e totogi ai mo le galuega a le Alii (tagai Mataupu Faavae ma Feagaiga 63:42–43). Valaaulia i latou e faitau le Mataupu Faavae ma Feagaiga 78:3–7 ma vaai mo mafuaaga na talosagaina ai nei tamaloloa e fai lea mea. Mata o a ni o tatou lagona pe ana talosagaina i tatou e faasoa atu e pei ona sa faia e Newel? Fesoasoani ia i latou e mafaufau i auala e saofaga ai tagata i le galuega a le Alii i o tatou aso, e pei o le totogiina o sefuluai ma taulaga anapogi, auauna i valaauga, ma isi mea faapena.

Mataupu Faavae ma Feagaiga 78:19

E tatau ona ou taliaina “mea uma ma le faafetai.”

E masani ona faamanuia i tatou e le Alii pe a tatou loto faafetai mo mea ua uma ona Ia tuuina mai ia i tatou. E faʻapefea ona e fesoasoani i tamaiti o loʻo e aoaoina ia loto faafetai mo o latou faamanuiaga?

Gaoioiga e Mafai Ona Fai

• Fai atu i tamaiti e faitau le Mataupu Faavae ma Feagaiga 78:19 ma saili mea ua folafola mai e le Alii ia i latou e loto faafetai. Fesoasoani i tamaiti ia malamalama i le uiga o le “sautuaselau lava,” atonu e ala i le faaali atu o se mea faitino laitiiti ona faaali atu lea o le 100 o lena mea faitino.

• Usu se pese e faatatau i le loto faafetai, e pei o le “I Am Glad for Many Things” (Children’s Songbook, 151), pe matamata i le vitio “Think to Thank” (ChurchofJesusChrist.org). Tuu atu i tamaiti se taimi e fai ai ni lisi o mea latou te loto faafetai ai. Uunai i latou e lisi mea uma e mafai i le taimi lea e te tuuina atu ia i latou.

aikona o le aoaoina

Fautuaina le Aoaoina i le Aiga

Mafaufau pe e tatau ona logo matua o tamaiti o loo e aoaoina ma fautua atu i ai se fesili e mafai ona latou fesili atu i a latou fanau e uiga i se mea na latou aoaoina i totonu o le vasega.

Faaleleia o Lo Tatou Aoao Atu

Molimau atu i faamanuiaga ua folafola mai. Pe a e valaaulia tamaiti o le Peraimeri e ola i se mataupu faavae patino, faasoa atu ia folafolaga ua faia e le Atua e auala mai i perofeta ia i latou o e ola ai i lena mataupu faavae. O se faataitaiga o se folafolaga e mafai ona e faasoa atu o loo maua i le Mataupu Faavae ma Feagaiga 78:19. (Tagai foi i le Aoao Atu i le Ala o le Faaola,35.)

itulau o gaoioiga: O le a taitai a’u e Iesu Keriso i le ala