Independence, Missouri, mai vei Al Rounds

24–30 ni Me.

Vunau kei na Veiyalayalati 58-59

“Gumatua ena Cakacaka Vinaka”

Ni o wilika na Vunau kei na Veiyalayalati 58–59, vola na veivakauqeti vakayalo o ciqoma. Na veivakauqeti oqo e rawa ni vukea nomu tuva mo vakavulica na ivakavuvuli o sa vulica vei ira na gone. E rawa talega mo raica na vakasama ena ituvatuva ni lesoni oqo, ena Lako Mai, Mo Muri Au—Baleta na Tamata Yadua kei na Matavuvale, se ena mekasini ni Lotu.

Vola na Veika o Vakauqeti Kina

Sureta na Veiwasei

Sureti ira e vica na gone me ra wasea na veika era a cakava ena loma ni macawa me ra vulica na ivolanikalou.

Vakavulica na iVunau: Gone Sobu

Vunau kei na Veiyalayalati 58:27–28

Sa solia vei au na Tamada Vakalomalagi na kaukauwa meu digidigi.

Vukei ira na gone me ra kila ni Tamada Vakalomalagi e gadreva me da digidigi vinaka me kauta mai na marau ki na noda bula kei ira tale eso.

iTaviqaravi e Rawa ni Caka

• Wilika na malanivosa mai na Vunau kei na Veiyalayalati 58:27–28 me ra vukei na gone me ra kila ni rawa ni ra digitaka me ra kitaka na ka vinaka. Biuta e dua na mata mamarau ena dua na yasa ni rumu kei na dua na mata rarawa ena yasana kadua. Na cava eda na vakila ni da digitaka me da cakavinaka? Vakamacalataka e vica na ituvaki vata kei na dua na digidigi cala se digidigi donu me baleti ira yadua. Ni vakamacalataka na ituvaki kei na digidigi yadua, kerei ira na gone mera tucake ena yasa ni mata mamarau kevaka e vinaka na digidigi kei na yasa ni mata rarawa kevaka e ca.

• Vakaraitaka vei ira na gone e dua na koniteina ka vuqa na peni duiroka era tu kina. Vakaraitaka vei ira e dua tale na koniteina e tiko kina e dua ga na peniroka. Taroga vei ira na gone o cei ga vei rau na koniteina oqo era via vakayagataka. Na cava na vuna? Vakamacalataka ni noda rawa ni digidigi e dua na veivakalougatataki mai vua na Tamada Vakalomalagi. Vakadinadinataka ni o Tamada Vakalomalagi kei Jisu Karisito erau lomani keda ka rau vinakata me da digidigi vinaka.

• Tukuna vei ira na gone me baleta e dua na gauna o vakayacora kina e dua na digidigi vinaka, ka vakamacalataka na veika o vakila ni oti o ya. Sureti ira na gone me ra droinitaka na iyaloyalo ni kemu italanoa se dua ga na nodra italanoa. Me ra qai wasea na nodra iyaloyalo ki na kalasi ka tukuna na veika era sa vulica mai na italanoa.

Vunau kei na Veiyalayalati 59:7

E vinakata na Tamada Vakalomalagi meu dau vakavinavinaka.

O na vukei ira vakacava na gone mera kila vakavinaka na bibi ni nodra vakavinavinakataka vei Tamada Vakalomalagi na nodra veivakalougatataki?

iTaviqaravi e Rawa ni Caka

• Tukuna vei ira na gone e dua na ka o sa vakavinavinakataka, ka kerei ira mera wasea na veika era sa vakavinavinakataka. Wilika na Vunau kei na Veiyalayalati 59:7, ka vukei ira na gone me ra vakasamataka na sala e rawa ni ra vakavinavinakataka kina na Tamada Vakalomalagi me baleta na nodra veivakalougatataki. Na cava era rawa ni cakava me ra kauta i vale me vakananuma vei ira me ra vakavinavinakataka kina na Tamada Vakalomalagi me baleta na nodra veivakalougatataki?

• Lagata vata e dua na sere ni vakavinavinaka, me vaka na “Tiki ni Bula kei na Kaukauwa” (iVolanisere ni Gonelalai,18A). Sureti ira na gone me ra sosomitaka na vosa ena sere ena veika tale eso era vakavinavinakataka.

• Kerei ira na gone mera cavuta eso na ka era vakavinavinakataka.

Vunau kei na Veiyalayalati 59:9–12

Na siga ni Vakacecegu e siga ni Turaga.

Ni ko wasea na reki o sa kunea ena nomu rokova na Siga ni Vakacecegu, sa rawa mo vukei ira na gone me ra raica na siga ni Vakacecegu me siga ni da qarava na Turaga.

iTaviqaravi e Rawa ni Caka

• Kauta mai na itaba se iyaya ka na vakatakarakarataka na veika vinaka e rawa ni da cakava ena Sigatabu me da qarava kina na Turaga ka kunea na reki. Era tiko eso na vakasama ena Vunau kei na Veiyalayalati 59:9–12 ka “Vakarokorokotaki na Siga ni Vakacecegu” (Me iSakisaki ni iTabagone, 30–31). Me kena ivakaraitaki, me matataka na sakaramede, e rawa ni o vakaraitaka na iyaloyalo 108 ena Gospel Art Book se dua na bilo ni sakaramede kei na dua na tiki ni madrai. Ena vukei keda vakacava na veika oqo me da voleka cake vei Tamada Vakalomalagi kei Jisu Karisito ena siga ni Vakacecegu?

• Vakacavara vata kei ira na gone na tabana ni itaviqaravi ni macawa oqo me vakauqeti ira ena vakasama me vakatabui kina na Siga ni Vakacecegu.

  

  Noda vakayagataka na sakaramede ena vukei keda me da rokova na Siga ni Vakacecegu.

Vakavulica na iVunau: Gone Qase Cake

Vunau kei na Veiyalayalati 58:27–28

Na galala sai koya na dodonu ni digidigi.

Sa solia vei keda na Kalou na kaukauwa me da digidigi, ena kaukauwa o ya “me da vakayacora na veika dodonu” (tikina e 27). O na vukei ira vakacava na gone o vakavulica me ra raica ni dina ga ni tu na ca e vuravura, “sa tu vei ira na kaukauwa” me ra “cakava na ka vinaka”? (tikina e 28).

iTaviqaravi e Rawa ni Caka

• Vakaraitaka vei ira na gone e dua na tiki ni pepa ka tiko kina na vosa digidigi ka volai tu ena dua na yasana kei na vosa kena isau me volai toka ena yasana kadua. Vakamacalataka ni digidigi e tiko na kena revurevu, se na vua ni ivalavala. Sureta e dua na gone me tomika cake na tiki ni pepa me vakaraitaka ni o tomika na tiki ni pepa, o sa taura ruarua na digidigi kei na isau ni digidigi o ya. Kerea e dua na gone me wilika na Vunau kei na Veiyalayalati 58:27–28. Na digidigi cava soti e rawa meda cakava me da “vakayacora na veika dodonu” se kena revurevu vinaka? (tikina e 27). Na gauna cava beka eda a digidigi vinaka kina ka vakalougatataki ira tale eso na kena revurevu?

• Vola e dua na malanivosa mai na Vunau kei na Veiyalayalati 58:27–28 ena tiki ni pepa, vei ira yadua na gone. Sureti ira me ra wilika lo na veitikina ka vakasamataka vakatitobu na nodra malanivosa. Sureti ira na gone me ra dabe ena nodra tikina donu me vaka na nodra malanivosa ena tikina e 27– 28 ka veiwaseitaka na veika era sa vulica. Na cava na itukutuku ni Turaga vei keda ena veitikina oqo?

• Lagata e dua na sere me baleta na digidigi, me vaka na “Digitaka na Dodonu” (Sere ni Lotu, naba 142). Taroga na taro me ra vukei na gone me ra vakasamataka vakatitobu na qaqa ni sere—me vaka, O cei ena vukei iko mo digidigi donu? O cei ena tovolea me uqeti iko mo digidigi cala? Ena vakacava na yalomu ni o digidigi donu?

Vunau kei na Veiyalayalati 59:9–16

Na siga ni Vakacecegu e siga ni Turaga.

E kaya na Turaga ni kena rokovi na siga ni Vakacecegu ena vukea me “kua ni tauvi keda na duka ni ka vakavuravura” (Vunau kei na Veiyalayalati 59:9). Mo vukei ira vakacava na gone o vakavulica me ra dau rokova na Siga ni Vakacecegu ka me ivakatakilakila ni nodra lomana na Tamada Vakalomalagi kei Jisu Karisito?

iTaviqaravi e Rawa ni Caka

• Sureti ira na gone me ra wilika na Vunau kei na Veiyalayalati 59:9–16 vakaveisa, ka kerei ira na isa yadua me ra vola e dua na ka era sa vulica me baleta na siga ni Vakacecegu mai na veitiki ni ivolanikalou yadua. Ni oti e vica na miniti, kerea na veisa yadua me ra wasea ki na kalasi na ka era sa vola. Na cava meda cakava e duatani ena siga ni Vakacecegu ena vuku ni veika eda sa vulica?

• Vakarautaka e dua na qito rawarawa sara ni veivakasotari me ra vakasotara kina na gone na malanivosa mai na Vunau kei na Veiyalayalati 59:9–16 ki na tikina dodonu. Digitaka na malanivosa e vakavulica na veika e vinakata na Turaga meda cakava ena siga ni Vakacecegu. Veivosakitaka na cava e vakavulica vei keda na veimalanivosa oqo me baleta na siga ni Turaga kei na sala eda rawa ni toro voleka kina Vua.

• Na siga ni Vakacecegu sai koya “na siga ni Turaga” (Vunau kei na Veiyalayalati 59:12)—e dua na siga me vakaraitaka ni da nanuma na nona cakacaka levu na Turaga ni da sa sokalou vua (raica na Bible Dictionary, “Sabbath”). Vukei na gone me ra vakasamataka vakatitobu na cakacaka oqo ena nomu sureti ira me ra wilika na veitiki ni ivolanikalou oqo ka vakaraitaka vei ira na kena iyaloyalo: iVakatekivu 2:1–3 (raica na Gospel Art Book, naba 3); Joni 20:1–19 (raica na Gospel Art Book, naba 59). Na cakacaka cecere cava tale eso ni Turaga e rawa ni da nanuma ena siga ni Vakacecegu? Na cava soti tale eda rawa ni vulica me baleta na siga ni Vakacecegu mai na Vunau kei na Veiyalayalati 59:9–16?

Vakauqeta na Vuli e Vale

Sureti ira na gone me ra wasea ena nodra matavuvale na veika e rawa ni ra cakava me vakatabui kina na Siga ni Vakacecegu.

Vakatorocaketaki Noda Veivakavulici

Tara cake nodra yalodei na gone. Eso beka na gone era sega ni rawa ni vulica vakataki ira ga na kosipeli. Yalataka vei ira na gone ni na vukea nodra vuli na Yalo Tabu.