ubing a babai nga agsursurat iti pisarra

Panangipaay kadagiti Kasapulan dagiti In-inaudi nga Ubbing

Nakasagana ken aggagar dagiti ubbing a masursuruan iti ebanghelio no maidatag daytoy iti wagas a maawatanda. Nangnangruna no mangisuroka kadagiti in-inaudi nga ubbing, ibilang ti panangusar kadagiti sumaganad a kita ti aktibidad tapno matulongam ida nga agsursuro.

• Agkanta. Hymns ken dagiti kanta manipud iti Children’s Songbook ket nabileg a mangisuro iti doktrina. Usarem ti topics index iti likudan ti Children’s Songbook tapno makasapul kadagiti kanta a mainaig kadagiti pagbatayan ti ebanghelio nga isursurom. Tulongam dagiti ubbing a manginaig iti mensahe dagiti kanta iti biagda. Kas pagarigan, mabalin a agsaludsodka maipapan kadagiti balikas wenno ragup ti balikas iti liriko. Kas nayon iti panagkanta, makaaramid dagiti ubbing kadagiti garaw a maigiddan kadagiti kanta wenno dumngeg laeng kadagiti kanta kas background a musika bayat ti panangaramidda kadagiti sabali pay nga aktibidad.

• Dumngeg wenno mangyakem iti estoria. Magustuan dagiti inaudi nga ubbing dagiti estoria—manipud kadagiti nasantuan a kasuratan, manipud iti biagmo, manipud iti pakasaritaan ti Simbaan, wenno manipud kadagiti magasin ti Simbaan. Mangsarak kadagiti wagas a mangiraman kadakuada iti panagisalaysay iti estoria. Mabalinda ti agiggem kadagiti ladawan wenno banag, agdrowing kadagiti ladawan dagiti mangmanggegda, agyakem iti estoria, wenno tumulong nga agisalaysay iti estoria. Tulongam dagiti ubbing a mangbigbig kadagiti kinapudno ti ebanghelio kadagiti estoria nga ibinglaymo.

• Basaen ti nasantuan a kasuratan. Mabalin a saan unay a kabaelan dagiti inaudi nga ubbing ti agbasa, ngem mabalinmo latta nga iraman ida nga agsursuro manipud kadagiti nasantuan a kasuratan. Mabalin a kasapulam ti agpokus iti maysa a bersikulo, ti kangrunaan a ragup dagiti balikas, wenno balikas. Bayat iti napigsa a panangbasam iti nasantuan a kasuratan, mabalin nga awisem dagiti ubbing a tumakderda wenno ingato dagiti imada no mangngeganda ti maysa a balikas wenno ragup dagiti balikas a kayatmo nga ipokus. Mabalin a kabaelanda ti mangyulokadagiti ababa a ragup dagiti balikas manipud kadagiti nasantuan a kasuratan no ulitenda dagitoy iti sumagmamano a gundaway. Bayat ti pannakangngegda iti balikas ti Dios, mariknadanto ti Espiritu.

• Agbalin nga aktibo. Gapu ta masansan a naregta dagiti babassit nga ubbing, mangplano kadagiti wagas tapno mapalugodanda nga aggunay iti lawlaw—agmartsa, aglagto, aglagtolagto, agrukob, magna, ken dadduma pay a garaw a mainaig iti pagbatayan wenno estoria nga isursurom. Mabalin nga epektibo dagitoy a panaggaraw bayat ti panagkantayo nga aggigiddan.

• Kumita iti maysa a ladawan wenno agbuya iti video. No ipakitam kadagiti ubbing ti maysa a ladawan wenno video a mainaig iti pagbatayan ti ebanghelio wenno iti estoria iti nasantuan a kasuratan, agdamagka kadakuada kadagiti saludsod a makatulong kadakuada manipud kadagiti nasursuroda kadagiti makitkitada. Kas pagarigan, mabalinmo a saludsoden, “Ania ti mapaspasamak iti daytoy a ladawan wenno video? wenno “Kasano nga iparikna daytoy kenka?” Ti Gospel Library app, medialibrary.ChurchofJesusChrist.org, ken children.ChurchofJesusChrist.org ket nasasayaat a pagbuyaan kadagiti video.

• Ibinglay dagiti padas. Awan unay ti maibinglay dagiti babassit nga ubbing kas iti kaadu ti maibinglay dagiti in-inauna nga ubbing, ngem no mangtedka kadakuada iti nalawag a pannarabay, makaibinglayda kadagiti rikna ken padasda maipapan iti no ania ti nasursuroda.

• Agpartuat. Mabalin dagiti ubbing ti agparnuay, agdrowing, wenno agkolor iti maysa a banag a mainaig iti estoria wenno pagbatayan a nasursuroda. Allukoyem ida a mangyawid iti partuatda iti pagtaengan ket ibinglayda daytoy kadagiti miembro ti pamiliada tapno makatulong kadagiti ubbing a manglagip iti no ania ti nasursuruda.

• Makiraman kadagiti banag nga adalen [object lesson]. Makatulong kadagiti ubbing ti simple a banag nga adalen [object lesson] tapno maawatanda ti maysa a pagbatayan ti ebanghelio a narigat a maawatan. No usarem dagiti banag nga adalen [object lesson], mangsapul kadagiti wagas a pakairamanan dagiti ubbing. Ad-adunto ti masursuroda manipud iti padas iti pannakilangen ngem iti panangbuya laeng iti demonstrasion.

• Yakem No yakem dagiti ubbing ti maysa situasion a nalabit a pakaipasanguandanto iti pudno a biag, nasaysayaat a maawatanda no kasano a mayaplikar dagiti pagbatayan ti ebanghelio iti biagda.

• Uliten dagiti aktibidad. Mabalin a kasapulan dagiti ubbing ti dumngeg kadagiti konsepto ti mamin-adu a gundaway tapno maawatanda dagitoy. Dika agbuteng a mangulit kadagiti estoria wenno aktibidad a masansan, uray pay kabayatan ti isu met laeng nga adalen. Kas pagarigan, mabalinmo nga ibinglay ti estoria iti nasantuan a kasuratan iti mamin-adu iti sabasabali a wagas kabayatan ti adalen—babaen iti panangbasa manipud kadagiti nasantuan a kasuratan, pananggupgop iti bukodmo a balikas, panangipabuya iti video, panagpatulong kadagiti ubbing iti panangisalaysaymo iti estoria, panangawismo kadakuada a mangyakem iti estoria, ken dadduma pay. No ti maysa nga aktibidad a nausar iti klase ket maulit iti pagtaengan, ti panangulit-ulit ket makatulongto kadagiti ubbing a makasursuro ken makalagip.

• Makilangen kadagiti dadduma. Padpadur-asen dagiti ubbing dagiti paglainganda iti panakilangen ken masansan a magustuanda ti panagsursuro ken pannakiay-ayam kadagiti kapatadada. Mangparnuay kadagiti gundaway nga agbibinninglay, agsisinnublat, ken agtitinnulongda bayat ti panagsursuroda.

• Makiraman kadagiti nadumaduma nga aktibidad. Gagangay nga ababa ti kapaut ti atension dagiti babassit nga ubbing, ken addaanda iti nadumaduma nga estilo ti panagsursuro. Usarem dagiti nadumaduma a kita ti aktibidad, ken ikasom dagiti pagilasinan a kasapulan dagiti ubbing ti napartak a panagbalbaliw. Kas pagarigan, mabalin a kasapulam a masansan a pagsisinnublaten dagiti naulimek wenno naragsak nga aktibidad.

Paset ti akemmo a kas maysa a mannursuro dagiti babassit nga ubbing—kas nayon iti panangisuro kadagiti pagbatayan ti ebanghelio—ket mangtulong kadagiti ubbing a maammuanda no kasano ti siuumno a makiraman iti klase ti Simbaan. Kas pagarigan, mabalin a kasapulanda ti agsursuro maipapan iti panagsisinnublat, panagibinglay, panagdayaw kadagiti dadduma, ken dadduma pay. Agaramid dagiti sumagmamano a mannursuro kadagiti tsart nga addaan iti naidutok nga aramiden para iti tunggal ubing a makiraman iti klase iti nalawag a wagas (kas iti panagkararag, panagiggem iti ladawan, wenno panangipasa kadagiti papel). Mabalin nga agbaliw dagiti naidutok nga aramiden iti tunggal lawas. Makatulong daytoy kadagiti ubbing nga agsisinnublat ken mangipokus iti umno a galad iti siled ti klase.

Dagiti ubbing—nangnangruna kadagiti in-naudi nga ubbing—ket masansan a mairanud manipud iti gagangay , nalaka a madlaw nga aramid. Gapu ta ababa ti kapaut ti pasnek dagiti babassit nga ubbing ken no dadduma ket agkarigatanda a mangipamaysa iti pasnekda iti sibubukel a klase, gagangay a kasayaatan no daytoy a nakairuamam nga aramiden ket masansan a mangiraman iti masansan a panagbalbaliw manipud iti maysa a kita ti aktibidad iti sabali. Kas pagarigan, mabalin nga iraman iti klasem ti sagpaminsan a panaginana babaen iti panagay-ayam, panagkolor iti ladawan, panagkanta, ken dadduma pay.

dagiti ubbing a makiay-ayam kadagiti manniursuro