“Disiembre 7–13. Moroni 7–9: ‘Bitbitennaka Koma ni Cristo,’” Umaykayo, Sumurot Kaniak—Para iti Primary: Libro ni Mormon 2020 (2020)
“Disiembre 7–13. Moroni 7–9,” Umaykayo, Sumurot Kaniak—Para iti Primary: 2020
Minerva Teichert (1888–1976), Ni Moroni: Ti Naudi a Nephite, 1949–1951, oil on masonite, 35⅞ x 47 inches. Brigham Young University Museum of Art, 1969
Disiembre 7–13
Moroni 7–9
“Bitbitennaka Koma ni Cristo”
Ti sikakararag a panagadal iti Moroni 7–9 ket mangyawisto iti impluensia ti Espiritu Santo. Tulongannakanto a makaawat kadagiti kasapulan dagiti ubbing iti klasem.
Isuratmo Dagiti Impresionmo
Yawis ti Panagbibinninglay
Ipalagipmo kadagiti ubbing ti maipapan iti maysa a banag nga inyawismo nga aramidenda kabayatan ti adalen iti napalabas a lawas a wenno maysa a banag a mabalin a nasursuroda a kadua dagiti pamiliada itoy a lawas. Kiddawem kadakuada a mangibinglay no ania ti nasursuroda.
Isuro ti Doktrina: In-inaudi nga Ubbing
No adda pammatik, maaramidko ti ania man a nasken a paaramid kaniak ti Dios.
Dagiti ubbing nga addaan iti pammati ken ni Jesucristo ken panagtalek iti bilegna ket makaipatungpalda kadagiti naindaklan a banag no agserserbida Kenkuana.
Dagiti Mabalin nga Aktibidad
-
Basaem ti Moroni 7:33, ken awisem dagiti ubbing a tumakder no mangngegda ti balikas a “pammati.” Ilawlawag a maipakitatayo ti pammatitayo ken ni Jesucristo no agtungpaltayo kadagiti bilinna. Tulongam dagiti ubbing a mangilista iti pisarra iti sumagmamano a banag a kayat ni Jesus nga aramidenda, kas iti panangtungpal kadagiti nagannakda wenno panangibaga iti kinapudno. Paneknekam a makatulong kadatayo ti pammatitayo ken ni Jesucristo nga agtungpal kadagiti bilin.
-
I-display ti sumagmamano a ladawan a mangipakita iti maysa a tao manipud iti Libro ni Mormon (wenno dagiti sabali a libro ti nasantuan a kasuratan) a mangipatpatungpal iti maysa a napateg a banag gapa ta adda pammatina ken ni Jesucristo (kitaen, kas pagarigan, iti Libro ti Arte ti Ebanghelio num. 19, 70, 78, 81). Tulongam dagiti ubbing a mangisarita iti estoria a nayakem iti ladawan. Isaritam kadakuada a gapu ta addaan iti pammati dagiti tao ken ni Jesucristo, naikkanda iti bileg nga agaramid iti kasapulan nga ipaaramidna kadakuada.
Makaited kaniak iti namnama ti pammatik ken ni Jesucristo.
Adu dagiti tao iti lubong ti makarikna nga awan ti namnamada. Kasano a matulongam dagiti ubbing a sursuruam a makasarak iti namnama ken ni Jesucristo?
Dagiti Mabalin nga Aktibidad
-
Ibasa ken ilawlawag ti Moroni 7:41 kadagiti ubbing, ken kiddawen kadakuada a mangingato kadagiti imada no mangngeganda ti maysa a banag a kinuna ni Mormon a nasken a namnamaentayo. Ibagam kadagiti ubbing maipapan iti namnama a mariknam gapu ken ni Jesucristo.
-
Awisem dagiti ubbing a mangpanunot iti maysa a tao nga am-ammoda a marigrigatan iti maysa a banag. Awisem dagiti ubbing a mangidrowing iti ladawan para iti maysa a tao a mangipalagip kenkuana a masapul nga maaddaan iti namnama ken ni Jesucristo.
“Ti asi ti nadalus nga ayat ni Cristo.”
Ania dagiti padas manipud iti biagmo a makatulong kadagiti ubbing a makasursuro nga agbalin a nasayaat kadagiti dadduma ken mangtrato kadakuada nga addaan iti ayat?
Dagiti Mabalin nga Aktibidad
-
Kiddawem kadagiti ubbing a mangulit kenka daytoy a ragup ti balikas: “Ti asi ti nadalus nga ayat ni Cristo” (Moroni 7:47). Tulongam dagiti ubbing nga agpanunot kadagiti wagas a nangipakitaan ni Jesucristo iti ayat iti dadduma (makatulong dagiti ladawan, kas iti Libro ti Arte ti Ebanghelio, num. 55, 83, 84). Kasano nga impakitana ti ayatna kadatayo? Kasano a maipakitatayo ti ayattayo a kas iti inaramid ni Jesus? Kas maysa a pagarigan, ipabuyam ti video a “My Brother Hyrum” (ChurchofJesusChrist.org).
-
Awisem dagiti ubbing nga agdrowing iti ladawan ti bagbagida a mangipakita iti ayat iti maysa a tao. Isingasing nga ikabilda ti ladawanda iti maysa a lugar nga mangipalagip kadakuada iti panagayat kadagiti dadduma a kas iti ar-aramiden ni Jesus.
Isuro ti Doktrina: In-inauna nga Ubbing
Mabendiosionannak no adda pammatik ken ni Jesucristo.
Kayat ni Mormon a maammuan dagiti tao a saan a nagsardeng dagiti milagro idi nalpas ti panagserbi ti Mangisalakan ditoy daga. Agingga nga addaantayo iti pammati ken ni Jesucristo, mabalintayo, babaen iti tulongna, a aramiden ti ania man a banaga kasapulan nga ipaaramidna kadatayo—agraman kadagiti namilagruan a banag.
Dagiti Mabalin nga Aktibidad
-
Tulongam dagiti ubbing a mangilista iti pisarra iti sumagmamano a “nasayaat a banag” a maawattayo babaen iti ebanghelio ni Jesucristo, kas iti kaadda ti agnanayon a pamilia, panagsubli iti Nailangitan nga Ama, ken pannapakapakawan dagiti basbasoltayo. Kalpasanna awisem dagiti ubbing a mangbasa iti Moroni 7:21–22 ken 25, a mangsapsapul iti no kasano a maawattayo dagiti amin a nasayaat a banag. Kasano a maipakitatayo ti pammatitayo ken ni Jesucristo ken dagiti karina?
-
Ibasam ti Moroni 7:33 kadagiti ubbing, ket kiddawem kadakuada a dumngeg iti no ania ti maaramidtayo no addaantayo iti pammati ken ni Jesucristo. No maitutop, ibinglaymo dagiti padasmo idi nakatulong ti pammatim kenka a nagaramid iti kayat ti Dios nga aramidem. Tulongam dagiti ubbing a mangpanunot ken mangibinglay kadagiti pagarigan manipud iti biagda. Kasano a nakaaramid iti pagdumaan ti pammati ken ni Cristo kadagitoy a pagwadan?
Maaddaanak iti namnama ken ni Jesucristo, uray pay kabayatan dagiti naririgat a pannubok.
Naipasango da Mormon ken Moroni iti makapaupay a kasasaad, ngem nakasarakda iti namnama iti Mangisalakan a ni Jesucristo. Kasano a matulongam dagiti ubbing a makasarak iti namnama ken ni Cristo no maup-upayda?
Dagiti Mabalin nga Aktibidad
-
Tulongam dagiti ubbing a mangilista kadagiti sumagmamano a problema a mabalin a makapaupay wenno mangpaawan iti namnama kadagiti tao. Awisem dagiti ubbing a mangbasa iti Moroni 7:40–41 ken 9:25–26, a mangsapsapul iti maysa a banag a makatulong iti maysa a tao a maup-upay. Isaritam kadakuada no kasano a nakatulong kenka ni Jesucristo ken ti ebangheliona kabayatan dagiti naririgat a panawen.
-
Awisem dagiti ubbing nga agsurat ti maysa a mensahe para iti maysa a tao a maup-upay tapno makatulong kenkuana a makasarak iti namnama ken ni Cristo, kas iti inaramid ni Mormon para iti anakna a lalaki iti Moroni 9:25–26. Allukoyem dagiti ubbing a mangusar kadagiti balikas ken ragup ti balikas manipud kadagitoy a bersikulo kadagiti mensaheda.
-
Punuem iti danum ti maysa a nalitnaw a pagkargaan, ket itinnagmo daytoy ti dua a banag—maysa a tumpaw ken maysa a lumned. Idiligmo ti tumpaw a banag iti maysa a tao nga addaan iti namnama ken ni Cristo. Aggigiddan a basaen ti Moroni 9:25. Kasano a “bitibitenna[tayo]” ni Cristo no maipasangotayo kadagiti naririgat a pannubok? Tulongam dagiti ubbing a mangpanunot kadagiti wagas a mabalinda a laglagipen ti Mangisalakan ken dagito makaparegta a sursurona iti “kapanunotan[da] iti agnanayon.”
“Ti asi ti nadalus nga ayat ni Cristo.”
Maysa a napaut a panggep a tun-oyen ti panangpadur-as iti sagut ti asi. Kasano a maparegtam dagiti ubbing nga agkalikagum a manggun-od iti nadalus nga ayat ni Cristo?
Dagiti Mabalin nga Aktibidad
-
Awisem dagiti ubbing a mangibinglay no ania ti kaipapanan ti balikas nga “asi.” Kalpasanna awisem ti maysa kadagiti ubbing a mangbasa iti Moroni 7:45 (No narigat a maawatan dagiti sumagmamano a balikas iti daytoy a bersikulo, tulongam dagiti ubbing a mangkita kadagitoy iti maysa a diksionario.) Kiddawem kadagiti ubbing a mangisarita maipapan kadagiti tao nga am-ammoda a nasayaat a pagwadan ti asi. Apay a naawagan ti asi a “ti nadalus nga ayat ni Cristo.”? (Moroni 7:47). Ania ti isuro kadatayo ti bersikulo 48 maipapan iti no kasano a mapunnotayo iti asi? Allukoyem ti tunggal maysa kadagiti ubbing nga agkararag para iti asi itoy a lawas ken mangkita kadagiti wagas a pangipakitaan iti asi kadagiti dadduma.
-
Tulongam dagiti ubbing nga agpanunot kadagiti wagas a nagipakitaan ni Jesus iti asi (kitaen, kas pagarigan, iti, Lucas 23:34; Juan 8:1–11; Ether 12:33–34). Kasano a masurottayo ti pagwadanna?
-
Kiddawem kadakuada a mangisurat kadagiti nagan ti tao nga am-ammoda kadagiti papel ken ikabil dagitoy iti maysa a bassit a bag wenno pagkargaan. Awisem ida a mangyawid iti pagkargaanda, ket agaramidda iti maysa a banag a mangipakita iti ayat para iti dayta a tao. Iti masakbayan nga adalen, awisem ida a mangibinglay kadagiti padasda iti panagserbi kadagitoy a tao.
Yallukoy ti Panagsursuro iti Pagtaengan
Allukoyem dagiti ubbing nga agpanunot ti maysa a tao a mabalin nga agkalkalikagum iti dakdakkel a pammati wenno namnama ken ni Jesucristo. Awisem dagiti ubbing a mangibinglay iti dayta a tao iti maysa a banag a nasursuroda iti klase ita nga aldaw.
Panangpadur-as iti Panangisurotayo
Yallukoy ti panagraem. Ti maysa a napateg a paset ti panagraem ket ti panagpanunot maipapan iti Nailangitan nga Ama ken ni Jesucristo. Mabalinmo a palagipan dagiti ubbing nga agbalin a managraem babaen ti siuulimek a panagkanta wenno panagdayyeng iti kanta wenno panangi-display iti maysa a ladawan ni Jesus.