Ni Cristo nga agparparang kadagiti Nephite

Linawagan Ida ti Silnag ti Rupana, ni Gary L. Kapp

Septiembre 28–Oktubre 11

3 Nephi 17–19

“Adtoy, Naan-anay ti Ragsakko”

Bayat ti panangbasam iti 3 Nephi 17–19, ibilangmo no ania kadagiti nasantuan a kasuratan, padas, aktibidad, ken estoria a makatulong kadagiti ubbing a makaawat kadagiti kinapudno kadagitoy a kapitulo.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Ipakita ti maysa a ladawan iti Mangisalakan, ket awisem dagiti ubbing a mangibinglay no kasano ti mariknada no nasken a sarungkaranna ida a kas iti inaramidna kadagiti Nephite.

icon iti panangisuro

Isuro ti Doktrina: In-inaudi nga Ubbing

3 Nephi 17:7, 20–25

Ay-ayaten ti Mangisalakan ti tunggal maysa kadagiti annak ti Nailangitan nga Ama.

Impakita ni Jesus ti ayatna kadagiti ubbing idi binendisionan ken inkararaganna ida. Kasano a matulongam dagiti ubbing a sursuruam a makarikna iti ayatna kadakuada?

Dagiti Mabalin nga Aktibidad

• Gupgopem ti pakaammuan iti 3 Nephi 17 bayat ti panangi-displaymo iti maysa a ladawan a kas iti maysa nga adda iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Wenno mabalinmo nga usaren ti “Kapitulo 44: Bendisionan ni Jesucristo dagiti Ubbing,” (Dagiti Estoria iti Libro ni Mormon, 124–25, wenno ti maitutop a video iti ChurchofJesusChrist.org). Basaem dagiti ragup dagiti balikas wenno bersikulo manipud iti 3 Nephi 17 a mangyunay-unay ti ayat ti Mangisalakan kadagiti tao (kas kadagiti bersikulo 7 ken 20–25). Pagsisinnublatem dagiti ubbing a mangiggem kadagiti ladawan ken isaritam ti inaramid ni Jesus gapu ta ay-ayatena dagiti tao.

• Usarem daytoy a panid iti aktibidad iti daytoy a lawas a mangtulong kadagiti ubbing a mangidrowing iti maysa a ladawan ti bagida a kadua ni Jesus. Bayat ti panangaramidda, tulongam ida nga agpanunot kadagiti wagas a nangpakitaan ni Jesus iti ayatna kadakuada.

  Ni Jesus a mangbembendison kadagiti ubbing a Nephite

  Adtoy dagiti Babassit nga Annakyo, ni Gary L. Kapp

3 Nephi 18:1–12

Mapanunotko ti maipapan ken ni Jesus no makiranudak iti sakramento.

Adu dagiti banag a mabalin a pakasingaan iti maysa nga ubing bayat ti sakramento. Kasano a matulongam dagiti ubbing iti klasem a maawatanda ti kinapateg iti panangpanunot maipapan iti Mangisalakan ken iti ayatna kadakuada kabayatan daytoy sagrado nga ordinansa?

Dagiti Mabalin nga Aktibidad

• Awisem dagiti ubbing a mangibaga kenka no ania ti mapaspasamak kabayatan ti sakramento. Basaem dagiti bersikulo manipud iti pakaammuan iti panangannong ni Jesus iti sakramento kadagiti Nephite (kitaen ti 3 Nephi 18:1–12), ken kiddawem kadagiti ubbing a tumakderda no mangngegda ti maysa a banag a kapada ti ar-aramidentayo kabayatan ti sakramento. Ania ti kayat ni Jesus a “lagipen” wenno panunotentayo kabayatan ti sakramento? (kitaen iti 3 Nephi 18:7, 11).

• Agdayyeng, agkanta, wenno agtokar iti a maysa himno wenno kanta ti Primary kabayataniti panagkolor dagiti ubbing kadagiti ladawan a makatulong kadakuada a manglagip iti Mangisalakan kabayatan ti sakramento (kitaen iti panid ti aktibidad itoy a lawas). Allukoyem dagiti ubbing a mangkita kadagitoy a ladawan tapno makatulong kadakuada a manglagip ken ni Jesus no makiranudda iti sakramento.

3 Nephi 18:15, 20–21, 24; 19:16–17, 30

Isuronak ni Jesus no kasano ti agkararag.

Ania ti masursurom maipapan iti kararag bayat ti panagadalmo maipapan iti kararag 3 Nephi 17–19? Kasano a mausarmo ti nasursurom tapno maisurom kadagiti ubbing no kasano ti agkararag?

Dagiti Mabalin nga Aktibidad

• Ipakitam dagiti ladawan ti tattao nga agkarkararag (kas kadagiti adda iti “Kapitulo 46: Mangisuro ken Makipagkararag ni Jesucristo kadagiti Nephite” iti Dagiti Estoria iti Libro ni Mormon, 128–30). Awisem dagiti ubbing a mangilawlawag kadagiti detalye kadagiti ladawan a mangipakita nga agkarkararag dagitoy a tao. Basaen ti 3 Nephi 19:16–17 tapno mailawlawag nga insuro kadatayo ni Jesus no kasano ti agkararag. Paisaritam kadagiti ubbing kenka no kasano ti riknada no agkararagda.

• Basaen ti 3 Nephi 18:21, ket awisen dagiti ubbing nga agdrowing ti ladawan ti bagbagida wenno dagiti pamiliada nga agkarkararag. Allukoyem dagiti ubbing a mangawis kadagiti pamiliada a makipagkararagda a kadakuada.

• Aggigiddan nga agkansion iti kanta maipapan iti kararag, kas iti “A Child’s Prayer” (Children’s Songbook, 12–13). Awisem dagiti ubbing a mangibinglay no ania ti nasursuroda maipapan iti kararag manipud iti kanta. Ibinglaymo ti pamaneknekmo maipapan iti kararag.

icon iti panangisuro

Isuro ti Doktrina: In-inauna nga Ubbing

3 Nephi 17

Ay-ayaten ti Mangisalakan dagiti annak ti Nailangitan nga Ama.

Insuro ni Presidente Ezra Taft Benson: “Ikarik kadakayo, dungdungnguek nga ubbing, nga agserbinto kadakayo dagiti anghel. mabalin a diyo makita ida, ngem addadanto idiay a mangtulong kadakayo, ken mariknayonto ti kaddada” (“To the Children of the Church,” Ensign, May 1989, 83).

Dagiti Mabalin nga Aktibidad

• Aggigiddan a basaen dagiti sumagmamano a bersikulo manipud iti 3 Nephi 17 a mariknam a napategto kadagiti ubbing a sursuruam. Bayat ti panangbasam iti tunggal bersikulo, kiddawem kadagiti ubbing a mangpili iti maysa a balikas wenno ragup dagiti balikas nga iti panagkunada a napateg ket kalpasanna ibinglay no kasano a napateg dagita a balikas kadakuada. Paneknekam nga ay-ayaten unay ni Jesus dagiti ubbing, ket daytoy ti gapu no pay a binendisionanna ida ken inkararaganna ida.

• Awisem dagiti ubbing a mangibinglay iti no kasano ti nariknada koma no naibilangdada kadagiti ubbing a binendisionan ti Mangisalakan. No mabalin, ipabuya ti video a “My Joy Is Full” (ChurchofJesusChrist.org) tapno makatulong kadakuada a mangpanunot iti daytoy a pasamak. Ania ti inaramid ti Mangisalakan a mangipakita iti ayatna? Ania iti maaramidtayo tapno maisaganatayo dagiti bagitayo a makipagnaed Kenkuana no umay manen Isuna?

3 Nephi 18:1–12

Bayat ti pannakiranudko iti sakramento, mabalinak a mapunno iti Espiritu Santo.

Makasursurotayo manipud iti 3 Nephi 18 no kasano ti kinapateg ti sakramento iti Mangisalakan. Kasano a matulongam dagiti ubbing a makarikna a napateg daytoy kadakuada?

Dagiti Mabalin nga Aktibidad

• Tulongam dagiti ubbing a mangbasa iti 3 Nephi 18:1–12. Ania ti masursurotayo maipapan iti sakramento manipud kadagitoy a bersikulo? Tulongam ida a mangbasa dagiti kararag ti sakramneto iti Doktrina ken Katulagan 20:77 ken 79 ket sapulenda dagiti balikas ken ragup dagiti balikas dagiti kararag a masarakan met iti 3 Nephi 18:1–12. Ania ti kaipapanan dagitoy a balikas ken ragup dagiti balikas? Kasano a makapagsaganatayo a makiranud iti sakramento? Ania ti ikaritayo, wenno itulagtayo, nga aramiden no makiranudtayo iti sakramento?

• Aggigiddan nga agkansion iti maysa a kanta maipapan iti panagraem, kas iti “Reverently, Quietly” (Children’s Songbook, 26). Kasano a makatulong kadatayo a marikna ti Espiritu babaen iti sidadayaw a pannakiranudtayo iti sakramento? Kasano a makatulong kadatayo daytoy nga agaramid kadagiti nalinteg a pili?

3 Nephi 18:15–24; 19:6–9, 15–36

Makatulongto kaniak ti panagkararagko nga umas-asideg iti Nailangitan nga Ama.

Mariknatayo nga asideg kadatayo ti Nailangitan nga Ama babaen ti kararag. Ania dagiti mensahe maipapan iti kararag iti 3 Nephi 18–19 a makatulongto kadagiti ubbing a sursuruam a mangpasayaat kadagiti kararagda?

Dagiti Mabalin nga Aktibidad

• Isurat dagiti sumaganad a nasantuan a kasuratan kadagiti papel, ket itedmo dagitoy iti tunggal ubing wennoiti babassit a grupo dagiti ubbing: 3 Nephi 18:15; 3 Nephi 18:20; 3 Nephi 18:21; 3 Nephi 19:19; ken 3 Nephi 19:24. Awisem dagiti ubbing a mangbasa kadagiti nasantuan a kasuratan, nga agsapsapul kadagiti banag a insuro ni Jesucristo wenno dagiti disipulona maipapan iti kararag. Kiddawem ida nga agreport no ania ti nasursuroda iti klase.

• Iti pisarra, isurat ti Agyamannak Kenka para iti . Ikkam dagiti ubbing iti maysa a minuto nga agpanunot iti adu a banag agingga a kabaelanda a mangpunno iti blangko. Apay a nasayaat nga ipeksatayo ti panagyamantayo iti Nailangitan nga Ama? Kalpasana isurat ti Dawatek Kenka ti iti pisarra, ken aggigiddan a basaen ti 3 Nephi 18:18–21 ken 19:9, 23, a mangsapsapul kadagiti kapanunotan maipapan iti no ania ti nasken nga ikararagantayo.

• Ibinglaymo ti pammaneknekmo wenno maysa a padas maipapan iti bileg ti kararag, ket allukoyem dagiti ubbing a mangibinglay kadagiti pammneknek wenno padasda.

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing a makisarita kadagiti nagannakda wenno kadagiti dadduma pay a miembro ti pamiliada maipapan iti no kasano a naaddaanda iti napateg a padas iti sakramento iti sumaruno a Domingo.

Panangpadur-as iti Panangisurotayo

Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a makasursuro manipud kadagiti nasantuan a kasuratan, agpokuska iti maysa a bersikulo iti nasantuan a kasuratan wenno uray maysa laeng a kangrunaan a ragup ti balikas. Mabalinmo nga awisen dagiti ubbing nga agtakder no mangngeganda ti maitudo a balikas wenno ragup dagiti balikas.

panid ti aktibidad: Malagipkoti Mangisalakan