“Aokati 17–23. Ereman 1–6: “Te Bwa are Ara Tia Kaboomwi,’” Nakomai, Iriirai—Ibukin te Moanrinan: Ana Boki Moomon 2020 (2020)
“Aokati 17–23. Ereman 1–6,” Nakomai, Iriirai—Ibukin te Moanrinan: 2020
Aokati 17–23
Ereman 1–6
“Te Bwa are Ara Tia Kaboomwi”
Mwakuri ni kauring ae inanon te kabwarabwara aei a koreaki bwa a aonga n angani ngkami iango ma namakin i nanomi ma ami iango. Iango aika tamaroa a bon roko n te tai are ko iangoi koroboki aika tabu ma te tataro ao kainnanoia ataei ake ko reireiniia.
Korei Am Namakin
Kaoa te Tibwatibwa
Ni boutokaia ataei n aia kamatebwai n te mweenga n te euangkerio, kaoiia tabeman mai buakoia bwa a na tibwaua te bwai teuana ae a reiakinna n te wiiki aei. Kabwarabwara bwa e kanga arom ni kamatebwaia te euangkerio ni mweengam, ao maroroakini kawai aika a kona iai ataei ni buokiia aia utu n reirei man ana Boki Moomon.
Reirei te Reirei: Ataei aika a Uarereke
I kona ni katea aau iaon Iesu Kristo.
Ereman e reireinia natina mwaane aika Nibwaai ao Riaai bwa a na katea maiuia iaon te bwa are ara Tia Kaboomwi. Iangoia bwa ko na kanga ni karaoa naba aekakin aei ibukia ataei ake ko reireiniia.
Waaki ni Kakukurei aika a Kona ni Karaoaki
-
Kaota tamnein te tembora ke te kateitei teuana, ao kamatata bwa kateitei a kainnanoi aaia aika matoatoa bwa aonga n aki bwaka n te ang ma te angi buaka. Ni katamneia aei, kaoiia ataei bwa a na kataia ni kamwainga te atibu n ukia. Wareka moan rainin Ereman 5:12, ao tuangia ataei bwa a na katei baia ngkana a ongo bwa antai te “bwa” are e riai bwa aara.
-
Kaoiia ataei bwa a na karaoi mwakuri n am tai ni wareka Ereman 5:12. Te katoto, a kona ni katiotioi baia ngkana ko wareka taekan te “ang ae korakora” mairoun te riaboro ao n tei n te tabo ae ti teuana ngkana ko wareka taekan te “bwa are Ara Tia Kaboomwi.”
-
Kaoiia ataei bwa a na buokiko ni karaoa aron tein te bwai man mwakoro ni kai ke tabeua riki bwai. Waaki man karaon te “kateitei ni koaua,” ao maroroakinna nakoia bwa e aera e riai n riki Iesu Kristo bwa aan maiuia. Tuangia ataei bwa a na tibwauai bwai aika a kona ni karaoi n ira Iesu Kristo, ao anganiia bwa a na karina te mwakoro ni kai nakon aan te kateitei ni katoaa te bwai are a tibwauaia.
-
Kaoiia ataei bwa a na karana te iteraniba ibukin te waaki ni kakukurei, ao buokia bwa a koreia. Tera ae ti kona ni karaoia ni katea maiura iaon aan Iesu Kristo? Tibwauai tabeua kawai ake ko a tia ni katea iai maium iaon te Tia Kamaiu ao e kanga karaoan anne ni kakabwaia maium.
Te Tamnei ae Raoiroi e wirikiriki ma te bwanaa ae maraara, man ni bebete.
Te kabwarabwara are i nanon Ereman 5:29–30, 45–47 n te bwanaa are a ongo Reimwanaite bon titebo ma te kawai are ti kabwarabwara iai n angin te tai bwa e kanga n taetae te Tamnei ae Raoiroi. Ko kona ni kabonganai kibu aikai ni buokiia ataei ni kinaa bwanaan te Tamnei.
Waaki ni Kakukurei aika a Kona ni Karaoaki
-
Tibwaua rongorongon Nibwaai ao Riaai n te nne ni kaikain. Ko kona ni kabongana “Mwakoro 37: Nibwaai ao Riaai n te Nne ni Kaikain” (Karaki man Ana Boki Moomon, 99–102, ke te witeo ae irekereke ma aei iaon ChurchofJesusChrist.org). Ngkana ko taetae iaon te bwanaa are a ongo Reimwanaite, taetae n te bwanaa ae amarau. Kaokioka te karaki tabeua te tai, ao kaoiia ataei bwa a na wirikiriki ma ngkoe. Tuangia ataei rongorongon taai ike E wirikiriki iai te Tamnei ae Raoiroi nakoim ao ni kakorakora am koaua.
-
Wareka Ereman 5:30, ao aneneia ma ataei te kuna ae taekan te Tamnei ae Raoiroi, n aron “The Still Small Voice” (Aia Boki n Anene Ataei, 106–7). Kaoti taeka ake inanon kiibu ao te anene aika a kabwarabwara bwa e kanga te Tamnei ae Raoiroi n taetae nakoira (taraa naba Ereman 5:45–47). Kabongana Ereman 5:29 ao oin am taneiai n tibwauai tabeua katotoon baika a raoiroi ae e kona ni kairira te Tamnei ae raoiroi bwa ti na karaoi.
Reirei te Reirei: Ataei aika a Ikawai
Ngkana I nanorinano, Tamara are i Karawa E na kakabwaiaai.
Iai inanon Ana Boki Moomon katoto aika mwaiti ibukin buakakan te kainikatonga ao te kakabwaia man te nanorinano, ao tabeuai katoto aikai a oti inanon Ereman 1–6. N am tai ni kamatebwai mwakoro aikai, iangoia bwa ko na kanga ni kabonganai katoto aikai n reireinia ataei ake n am kiraati.
Waaki ni Kakukurei aika a Kona ni Karaoaki
-
Angania ataei bwa a na Korea tamnein ana “baeten te kainikatonga” iaon te burakibooti.” Bootaki ni wareka Ereman 3:24, 33–34 ao 4:11–15, ao kaoiia ataei bwa a na kotei mwakoron te baaten ake a kabwarabwaraki ni kibu aikai.
-
Korea te taeka ae Nanorinano ao Kainikatonga iaon te burakibooti. Korei tabeua katotoon mwakuri aika a nanorinano ao aika a kainikatonga iaon mwakoro ni beeba, ao kaoiia ataei bwa a na anai aia beeba ao ni korei aia taeka iaon te burakibooti ake a kabwarabwara te mwakuri. Tera tabeua kawai are ti kona iai n rineia bwa ti nanorinano?
Ana “baaten te kainikatonga.”
N na katea aau iaon Iesu Kristo.
Ereman 5:12 iai inanona tamnei aika korakora ibukin katean aara iaon Iesu Kristo. Ko na kanga ni kabonganai tamnei aikai ni katamneia te reirei aei nakoia ataei? Karaoan aei e na buokiia ataei nakon kariri ma kakatai ake a na kaitarai.
Waaki ni Kakukurei aika a Kona ni Karaoaki
-
Uoti nakon te kiraati tabeua bwaai ake a kona n tei ibukin aan te kateitei ae maraurau ao ae matoatoa (n aron te bwaubwau ke te atibu ae boraoi ke te taera). Kaoiia ataei bwa a na katea te taua man mwakoro ni kai ke bwai riki tabeua iaon aan te kateitei aika kakaokoro. Tera ae e kamatoatoai tabeua aan te kateitei nakon ake tabeua? Bootaki ni wareka Ereman 5:12, ao titirakiniia ataei bwa bukin tera a taku bwa Iesu Kristo bon “aan te kateitei ni koaua” ibukin maiura. Ti na kanga ni katea maiura i aona? Kaoiia bwa a na ukera Ereman 3:27–29, 35 ao Taekan te Onimaki 1:4 ni karekei iango.
-
Kaoiia ataei bwa a na wareka Ereman 5:5–14 ni kabaiti ao n warekia bwa iraua te tai ae mwaneweaki iai te taeka ae “Uringnga”. Tera ae e reireinia natina mwaane Ereman bwa a riai n uringnga? E na kanga ururingan bwai aikai ni buokira ni karaoa Iesu Kristo bwa aan maiura?
Te rairannano e onea mwin te roo n tamnei nakon te oota.
Reimwanaite ake a nako n te nne ni kaikain bwa a na tiringa Nibwaai ao Riaai a katobibiaki n te roo. Ngkana ti bure, ti mena n te roo n tamnei. Ereman 5:20–52 e reireinira bwa e na kanga ni kamwawaki ara “nang are e rootongitong” n te tamnei (kibu 41).
Waaki ni Kakukurei aika a Kona ni Karaoaki
-
Karooa te umwanreirei; ao imwina wareka ke kakimototoa te rongorongo are n Ereman 5:20–40 ni kabongana te tooti. Tera ae a namakinna Reimwanaite ngke a mena n te rootongitong? Kaoiia ataei bwa a na nooria bwa tera are e reirei Aminatabu nakoia aomata bwa a na karaoia bwa e aonga n kamwawaki te rootongitong, ao imwina wareka te kibu 41. Imwina ao kaurai taura, ao bootaki ni wareka kiibu 42–48 . Tera ae a reireinira kiibu aikai ibukin kakabwaia ake a roko nakon maiura man te rairannano?
-
Kaoiia ataei bwa a na katamneia bwa a reireina te ataei ae uarereke nakoia taekan te Tamnei ae Raoiroi. A na kanga ni kabongana Ereman 5:29–33, 44–47 n reireinia e kanga aron namakinan bwanaan te Tamnei ao tabeua bwai ake e tuangira te Tamnei? E kanga te Tamnei ae Raoiroi n tia ni kaungako nakon te rairannano? Kaoiia ataei bwa a na tibwauai taneiai ike a namakina iai te rau ao te kabebeteaki mairoun te Tamnei ae Raoiroi.
Kaungaa te Kamatebwai n te Mweenga
Kaoiia ataei bwa a na titirakinia kaain aia utu bwa a kanga ni katea maiuia iaon Iesu Kristo. Ke a kona n tibwauaia ma aia utu bwa a baireia n katea oin maiuia irouna.
Kanakoraoan Ara Anga reirei
Kaota am koaua iroun Iesu Kristo. Iai am tai ae tabu ni buokia ni kakorakora aia koaua ataei aika a tabe n rikirake ake n am kiraati. Buokiia bwa a na namakina ana tangira Iesu ibukia, ao kaota am koaua i Rouna n taainako.